Kaipuhan Nanggad an Pagkamoot

ANO man an edad, kultura, lenguahe, o rasa, an gabos na tawo nangangaipong marhay nin pagkamoot. Kun dai mapanigoan an pangangaipong iyan, dai sinda nagigin maogma. An sarong parasiyasat sa medisina nagsurat: “An pagkamoot asin kadayupotan iyo an nagdedeterminar kun ano an nakakapahelang sa sato asin kun ano an nakakaparahay sa sato, kun ano an nagigin dahelan nin kamondoan asin kun ano an nagtatao nin kaogmahan, kun ano an nagigin dahelan nin pagdusa niato asin kun ano an nagbubunga nin pagkaomay. Kun may bagong bolong na arog kaiyan an epekto, haros gabos na doktor sa nasyon magrereseta kaiyan sa saindang mga pasyente. Magigin kapabayaan na dai ireseta iyan.”

Pero, an sosyedad sa presenteng panahon, nangorogna an media asin an popular na mga modelo kaiyan, parateng mas tinatawan nin importansia an kayamanan, kapangyarihan, kabantogan, asin sekso kisa pangangaipo nin tawo sa may init, mamomoton na relasyon. Idinodoon kan dakol na edukador an sekular na mga pasohan asin karera, na sinasabing an mga iyan an pangenot na nagdedeterminar kun baga an saro mapanggana. Totoo, importante an edukasyon asin an pagkultibar sa talento nin saro, alagad maninigo daw na iyan determinadong marhay na pag-aaboton kaya an saro mayo nang panahon para sa pamilya asin mga katood? An sarong edukadong parasurat kan suanoy na madonongon na paramasid sa naturalesa nin tawo iinagid an indibiduwal na may abilidad alagad mayo nin pagkamoot sa “sarong metal na nagtatanog o simbalo na nagdadaging.” (1 Corinto 13:1) An siring na mga tawo tibaad magin mayaman, magin bantog pa ngani, alagad nungkang magigin totoong maogma.

Si Jesu-Cristo, na biyong nakasasabot asin may espesyal na kapadangatan sa mga tawo, ibinilang an pagkamoot sa Dios asin sa kapwa na pinakasentro kan saiyang katokdoan. Sia nagsabi: “Kamotan mo si Jehova na saimong Dios sa bilog mong puso asin sa bilog mong kalag patin sa bilog mong isip. . . . Kamotan mo an saimong kapwa nin siring sa saimo man sana.” (Mateo 22:37-39) An mga nagsusunod sana sa mga tataramon na ini an magigin totoong mga parasunod ni Jesus. Huli kaini, sia nagsabi: “Paagi kaini an gabos makaaaram na kamo an sakong mga disipulo, kun kamo nagkakaminorootmootan.”​—Juan 13:35.

Pero, paano daw kukultibaron nin saro an pagkamoot sa kinaban ngonyan? Asin paano daw matotokdoan nin pagkamoot kan mga magurang an saindang mga aki? Totokaron kan masunod na artikulo an mga hapot na ini.

[Mga Ritrato sa pahina 3]

Depisil na magkultibar nin pagkamoot sa kinaban na pinangingibabawan nin kahanaban