Hula ni Isaias—Liwanag Para sa Bilog na Katawohan II

Kapitulo Beinte-Tres: “Sarong Bagong Ngaran”

Isaias 62:1-12

1. Anong pagpasarig sa boot an nakarekord sa Isaias kapitulo 62?

PAG-ASEGURAR giraray, pagranga, paglaom sa pagbabalik​—iyan an kaipuhan kan desesperadong mga Judio sa Babilonya. Nagkapirang dekada na an nakalihis poon kan laglagon an Jerusalem asin an templo kaiyan. Mga 800 kilometros hale sa Babilonya, an Juda gaba, asin an mga Judio garo baga nalingawan na ni Jehova. Ano an puedeng magparahay sa saindang situwasyon? Mga panuga hale ki Jehova na papupulion nia sinda asin totogotan sinda na ibalik an dalisay na pagsamba. Sa siring an mga paglaladawan na arog nin “biyong binayaan” asin “gaba” masasalidahan nin mga ngaran na nagpaparisa kan pag-oyon nin Dios. (Isaias 62:4; Zacarias 2:12) An kapitulo 62 kan Isaias pano kan mga panugang ini. Minsan siring, arog kan ibang mga hula sa pagbabalik sa dati, an kapitulong ini nagtotokar sa mga isyu na labi pa sa pakabutas sana kan mga Judio sa pagkabihag sa Babilonya. Sa mayor na kaotoban kaini, sinisierto sa sato kan Isaias kapitulo 62 na segurado an kaligtasan kan espiri­tuwal na nasyon ni Jehova, an “Israel nin Dios.”​—Galacia 6:16.

Si Jehova Dai Maalo

2. Sa anong paagi pinahehelingan giraray ni Jehova nin pabor an Sion?

² Ibinagsak an Babilonya kan 539 B.C.E. Pakatapos kaiyan, si Hadeng Ciro nin Persia nagpaluwas nin dekreto na nagpangyari sa mga Judio na matatakton sa Dios na makapuli sa Jerusalem asin ibalik an tunay na pagsamba ki Jehova. (Esdras 1:2-4) Kan 537 B.C.E., an enot na nagbaralik na mga Judio nakapuli sa saindang dagang tinuboan. Sa giraray nagpaheling si Jehova nin pabor sa Jerusalem, siring kan mababanaag sa init kan saiyang makahulang kapahayagan: “Para sa kapakanan kan Sion dai ako maontok, asin para sa kapakanan kan Jerusalem dai ako maalo sagkod na an saiyang katanosan lumuwas na siring sa kaliwanagan, asin an saiyang kaligtasan na siring sa karaba na naglalaad.”​—Isaias 62:1.

3. (a) Taano ta sa katapustapusi hinaboan ni Jehova an daganon na Sion, asin siisay an suminalida sa saiya? (b) Anong pagsuway an nangyari, asin kasuarin, asin sa anong peryodo kita nabubuhay ngonyan?

³ Kan 537 B.C.E., inotob ni Jehova an saiyang panuga na ibalik an Sion, o Jerusalem. Naeksperyensiahan kan mga nag-eerok dian an pagliligtas nia, asin suminirang nin maliwanag an saindang katanosan. Pero, kan huri naparayo giraray sinda sa dalisay na pagsamba. Sa kahurihurihi, hinaboan ninda si Jesus bilang an Mesiyas, asin sa katapustapusi pinabayaan sinda ni Jehova bilang saiyang piniling nasyon. (Mateo 21:43; 23:38; Juan 1:9-13) Pinangyari ni Jehova na mamundag an sarong bagong nasyon, an “Israel nin Dios.” An bagong nasyon na ini nagin saiyang espesyal na banwaan, asin kan enot na siglo, ihinulit kan mga miembro kaiyan an maogmang bareta sa bilog na kinaban na aram na kan panahon na iyan. (Galacia 6:16; Colosas 1:23) Makamomondo, pagkagadan kan mga apostol, may mga suminuway sa tunay na relihion. Bilang resulta, nabilog an sarong apostatang klase nin Kristianismo, siring kan manonompongan ngonyan sa Kakristianohan. (Mateo 13:24-30, 36-43; Gibo 20:​29, 30) Sa laog nin dakol na siglo, an Kakristianohan pinabayaan na magtao nin dakulang katuyawan sa ngaran ni Jehova. Minsan siring, sa katapustapusi kan 1914, nagpoon an “taon nin marahay na boot” ni Jehova, kadungan kan mayor na kaotoban kan kabtang na ini kan hula ni Isaias.​—Isaias 61:2.

4, 5. (a) Siisay an isinisimbolisar ngonyan kan Sion asin kan saiyang mga aki? (b) Sa anong paagi ginamit ni Jehova an Sion tanganing gibohon “an saiyang kaligtasan na siring sa karaba na naglalaad”?

⁴ Ngonyan, an panuga ni Jehova na ibalik an Sion naotob na sa saiyang langitnon na organisasyon, an “Jerusalem na nasa itaas,” na irinerepresentar sa daga kan saiyang mga aki, an linahidan nin espiritung mga Kristiano. (Galacia 4:26) An langitnon na organisasyon ni Jehova naglilingkod bilang debotong paratabang​—mapagbantay, mamomoton, asin mahigos. Nakapupukaw nanggad sa boot na pangyayari kan imundag nia an Mesiyanikong Kahadean kan  1914! (Kapahayagan 12:1-5) Partikularmente poon kan 1919, an saiyang daganon na mga aki naghulit sa mga nasyon manongod sa saiyang katanosan asin kaligtasan. Siring kan ihinula ni Isaias, an mga aking ini nagliwanag sa kadikloman na garo karaba, na pinasisirang an saindang liwanag.​—Mateo 5:​15, 16; Filipos 2:15.

⁵ Si Jehova interesadong gayo sa mga nagsasamba sa saiya asin dai mapahingalo, o maalo, sagkod na naotob na nia an gabos niang ipinanuga sa Sion asin sa mga aki kaini. An mga natatada sa linahidan asin an kaiba nindang “ibang karnero” habo man na magsilensio. (Juan 10:16) Maribok nanggad sinda mantang itinotokdo ninda sa mga tawo an solamenteng dalan nin kaligtasan.​—Roma 10:10.

“Sarong Bagong Ngaran” na Itinao ni Jehova

6. Ano an nasa isip ni Jehova para sa Sion?

⁶ Ano an nasa isip ni Jehova para sa Sion, an saiyang langitnon na “babae,” na irinerepresentar kan suanoy na Jerusalem? Sia nagsasabi: “Maheheling nanggad kan mga nasyon an saimong katanosan, O babae, asin kan gabos na hade an saimong kamurawayan. Asin aapodon ka nanggad sa sarong bagong ngaran, na an mismong ngoso ni Jehova an mangaran.” (Isaias 62:2) Mantang minagawe an mga Israelita na may katanosan, an mga nasyon napipiritan na mag-atento. Dawa mga hade napipiritan na rekonoseron na ginagamit ni Jehova an Jerusalem asin na ano man na pamamahala igwa sinda mayong saysay kun ikokomparar sa Kahadean ni Jehova.​—Isaias 49:23.

7. Nangangahulogan nin ano an bagong ngaran kan Sion?

⁷ Kinokompirmar ngonyan ni Jehova an naliwat na kamugtakan nin Sion paagi sa pagtao sa saiya nin sarong bagong ngaran. An bagong ngaran na iyan nangangahulogan nin maogmang kamugtakan asin onradong posisyon na nakakamtan kan daganon na mga aki nin Sion poon kan 537 B.C.E. * Ipinaheheling kaiyan na rinerekonoser ni Jehova na rogaring nia an Sion. Ngonyan, napapalukso an puso kan Israel nin Dios na sinda magin ikinaoogmang marhay ni Jehova sa paaging ini, asin an ibang karnero nakikigayagaya sa sainda.

8. Sa anong mga paagi tinawan nin onra ni Jehova an Sion?

⁸ Kan matawan an Sion kan bago niang ngaran, si Jehova nanuga ngonyan: “Ika magigin korona nin kagayonan sa kamot ni Jehova, asin sarong sa hadeng turbante sa palad kan saimong Dios.” (Isaias 62:3) Iinitaas ni Jehova an saiyang simbolikong agom na babae, an langitnon na Sion, tangani na hangaan. (Salmo 48:2; 50:2) An korona nin kagayonan asin an “sa hadeng turbante” nag-iindikar na sia nagugubingan nin onra asin autoridad. (Zacarias 9:16) Nagrerepresentar sa langitnon na Sion, o “Jerusalem na nasa itaas,” an Israel nin Dios sarong pambihirang bunga kan paghiro kan kamot nin Dios​—an saiyang ginagamit na kapangyarihan. (Galacia 4:26) Sa tabang ni Jehova, an espirituwal na nasyon na iyan nakaestablisar nin pambihirang rekord nin integridad asin debosyon. Minilyon, kaiba an linahidan sagkod ibang karnero, an napakosog na ipaheling an pambihirang pagtubod asin pagkamoot. Durante kan Milenyal na Paghade ni Cristo, an mga linahidan, mantang nagkamit na kan saindang mamuraway na langitnon na balos, magigin mga instrumento sa kamot ni Jehova tanganing hawason an nag-aagrangay na mga linalang pasiring sa buhay na daing katapusan.​—Roma 8:​21, 22; Kapahayagan 22:2.

‘Si Jehova Nagkaigwa nin Dakulang Kaogmahan sa Saimo’

9. Iladawan an pagkaliwat kan Sion.

⁹ An pagtao nin sarong bagong ngaran kabtang kan nakaoogmang marhay na pagkaliwat kan langitnon na Sion na irinerepresentar kan saiyang daganon na mga aki. Mababasa niato: “Dai ka na sasabihon na sarong babae na biyong pinabayaan; asin an daga mo dai na sasabihon na gaba; kundi aapodon ka mismo na An Sakong Dakulang Kaogmahan Nasa Saiya, asin an saimong daga Sinadiri Bilang Agom na Babae. Huli ta si Jehova magkakaigwa nin dakulang kaogmahan sa saimo, asin an saimong sadiring daga sasadirihon bilang agom na babae.” (Isaias 62:4) An daganon na Sion gaba poon kan sia laglagon kan 607 B.C.E. Minsan siring, inaasegurar sa saiya kan mga tataramon ni Jehova an dapit sa pagbabalik sa dati asin pagkaigwa giraray nin mga tawo sa saiyang daga. An Sion na dating nadestroso nin grabe dai na magigin sarong babae na biyong pinabayaan, asin an saiyang daga dai na magigin gaba. An pagbabalik sa dati kan Jerusalem kan 537 B.C.E. nangangahulogan nin sarong bagong kamugtakan para sa saiya, na biyong kabaliktaran kan saiyang dating gabang kamugtakan. Ipinahayag ni Jehova na an Sion aapodon na “An Sakong Dakulang Kaogmahan Nasa Saiya,” asin an saiyang daga, “Sinadiri Bilang Agom na Babae.”​—Isaias 54:​1, 5, 6; 66:8; Jeremias 23:5-8; 30:17; Galacia 4:27-31.

10. (a) Paano naliwat an Israel nin Dios? (b) Ano an “daga” kan Israel nin Dios?

¹⁰ Poon kan 1919, naeksperyensiahan kan Israel nin Dios an kaagid na pagbabago. Durante kan enot na guerra mundial, an linahidan na mga ­Kristiano  garo baga isinikwal nin Dios. Alagad kan 1919 ibinalik an saindang inooyonan na kamugtakan, asin dinalisay an saindang paagi nin pagsamba. Nakaapektar ini sa saindang katokdoan, sa saindang organisasyon, asin saindang aktibidad. An Israel nin Dios naglaog sa “daga” kaiyan, sa espirituwal na kamugtakan, o rona nin aktibidad kaiyan.​—Isaias 66:​7, 8, 20-22.

11. Paano sinadiri kan mga Judio an saindang ina bilang agom na babae?

¹¹ Bilang dugang pang pagdodoon sa bago asin inooyonan na kamugtakan kan saiyang banwaan, ipinahayag ni Jehova: “Kun paanong sinasadiri nin sarong soltero an sarong daraga bilang saiyang agom na babae, sasadirihon ka kan saimong mga aki bilang agom na babae. Asin arog kan paggayagaya nin labi-labi nin nobyo sa nobya, an saimong Dios maggagayagaya nin labi-labi sa saimo.” (Isaias 62:5) Paano sasadirihon kan mga Judio, na “mga aki” kan Sion, an saindang ina bilang sarong agom na babae? Sa bagay na sinadiri kan nagbaralik na mga aki kan Sion na binutasan sa pagkadistiero sa Babilonya an saindang dating kabiserang siudad asin nag-erok giraray digdi. Kan iyan mangyari, an Sion bako nang gaba kundi napano nin mga aki.​—Jeremias 3:14.

12. Sa anong paagi lininaw ni Jehova na an linahidan na mga Kristiano kabtang kan organisasyon na ikinasal sa saiya?

¹² Sa kaparehong paagi, poon kan 1919 sinadiri kan mga aki kan langitnon na Sion an saindang daga, an saindang espirituwal na kamugtakan, na may makahulang ngaran na “Sinadiri Bilang Agom na Babae.” Nagin risang-risa huli sa saindang Kristianong aktibidad sa dagang iyan na an linahidan na mga Kristianong ini iyo an ‘banwaan para sa ngaran’ ni Jehova. (Gibo 15:14) Malinaw na ipinaheling kan saindang pagpaluwas nin mga bunga kan Kahadean asin pagpahayag kan ngaran ni Jehova na naoogmang marhay si Jehova sa mga Kristianong ini. Lininaw nia na sinda kabtang kan organisasyon na kaiba nia sa pagkakasaro na dai mararaot. Paagi sa paglahid nin banal na espiritu sa mga Kristianong ini, pagpatalingkas sa sainda sa espirituwal na pagkabihag, asin paggamit sa sainda sa paghuhulit kan paglaom sa Kahadean sa bilog na katawohan, ipinaheling ni Jehova na sia naggagayagaya sa sainda na siring sa kagayagayahan nin nobyo sa saiyang nobya.​—Jeremias 32:41.

“Dai Kamo Magsilensio”

13, 14. (a) Kan suanoy na mga panahon, paano nagin sarong siudad nin kaligtasan an Jerusalem? (b) Sa presenteng mga panahon, paano nagin “sarong kaomawan sa daga” an Sion?

¹³ An piguratibong bagong ngaran na itinao ni Jehova nagpangyaring makamateng tiwasay an saiyang banwaan. Aram ninda na rinerekonoser nia sinda asin na sadiri nia sinda. Naggagamit ngonyan nin ibang ilustrasyon, kinaolay ni Jehova an saiyang banwaan na garo sarong nalalanoban na siudad: “Sa ibabaw kan saimong mga lanob, O Jerusalem, nagnombra ako nin mga bantay. Sa bilog na aldaw asin sa bilog na banggi, dayaday, dai sinda mag-ontok. Kamo na nagsasambit ki Jehova, dai kamo magsilensio, asin dai kamo magsilensio sa saiya sagkod na ikabugtak nia nin marigon, iyo, sagkod sa ikaestablisar na nia an Jerusalem bilang sarong kaomawan sa daga.” (Isaias 62:​6, 7) Sa itinalaan na panahon ni Jehova pagnakabalik na an fiel na natatada hale sa Babilonya, an Jerusalem magigin nanggad “sarong kaomawan sa daga”​—sarong nalalanoban na siudad na nagtatao nin kaligtasan sa mga nag-eerok sa saiya. Aldaw asin banggi, listo an mga bantay sa mga lanob na idto tangani na masegurado an seguridad kan siudad asin tanganing ikapaabot an nagpapatanid na mga mensahe sa mga siudadano kaiyan.​—Nehemias 6:15; 7:3; Isaias 52:8.

¹⁴ Sa presenteng mga panahon ginamit ni Jehova an saiyang linahidan na mga bantay tanganing ipaheling sa mga mahoyo an dalan pasiring sa katalingkasan hale sa pagkaoripon sa falsong relihion. An mga ini inagdang lumaog sa saiyang organisasyon, na dian sinda nakakakua nin proteksion sa espirituwal na kaatian, maraot na mga impluwensia, asin kaanggotan ni Jehova. (Jeremias 33:9; Sofonias 3:19) Mahalagang marhay sa siring na proteksion an kabtang kan grupong bantay, “an fiel asin may diskresion na oripon,” na nagtatao nin espirituwal na “kakanon sa igong panahon.” (Mateo 24:45-47) Sa pakipagtabangan sa grupong bantay, igwa man nin mahalagang kabtang an “dakulang kadaklan” tanganing an Sion magin “sarong kaomawan sa daga.”​—Kapahayagan 7:9.

15. Paano an grupong bantay asin an saindang kairiba naglilingkod ki Jehova aldaw asin banggi?

 ¹⁵ Nagpapadagos an paglilingkod kan grupong bantay asin kan saindang kairiba! An saindang pagigin bilog na kalag maheheling sa maigot na aktibidad kan minilyon na fiel na indibiduwal na sinusuportaran nin nagbibiaheng mga paraataman asin kan saindang agom; mga boluntaryo sa manlaenlaen na erokan na Bethel asin mga pasilidad sa pag-imprenta kan Mga Saksi ni Jehova; mga misyonero; asin mga espesyal, regular, patin auxiliary payunir. Dugang pa, sinda mahigos na nagtatrabaho sa pagtogdok nin bagong mga Kingdom Hall, pagdalaw sa mga may helang, pagtabang sa mga indibiduwal na napapaatubang sa masakit na mga situwasyon sa pagpapabolong, asin pagtao nin napapanahon na mga ayuda sa mga biktima nin mga kalamidad asin aksidente. An dakol sa mapagsakripisyong mga indibiduwal na ini sa parate literal na naglilingkod “aldaw asin banggi”!​—Kapahayagan 7:​14, 15.

16. Sa anong paagi na an mga lingkod ni Jehova ‘dai nagsisilensio sa saiya’?

¹⁶ An mga lingkod ni Jehova ineenkaminar na mamibi na daing ontok, na arangon sa Dios na “gibohon logod an boot [nia], kun paano sa langit, siring man sa daga.” (Mateo 6:​9, 10; 1 Tesalonica 5:17) Sinasadol sinda: “Dai kamo magsilensio” ki Jehova sagkod na dai pa itinatao an mga minamawot asin inaasahan mapadapit sa pagbabalik nin tunay na pagsamba. Idinoon ni Jesus an pangangaipo na daing ontok na mamibi, na sinasadol an saiyang mga parasunod na ‘mag-agrangay sa Dios aldaw asin banggi.’​—Lucas 18:1-8.

Babalosan an Paglilingkod sa Dios

17, 18. (a) Sa anong paagi makaaasa an mga nag-eerok sa Sion na makakamtan ninda an mga bunga kan saindang pagmamaigot? (b) Paano nakakamtan kan banwaan ni Jehova ngonyan an mga bunga kan saindang pagmamaigot?

¹⁷ An bagong ngaran na itinatao ni Jehova sa saiyang banwaan nakapakokosog liwat sa boot ninda na an saindang mga paghihingoa bakong sayang sana. “Ipinanumpa ni Jehova an saiyang toong kamot asin an saiyang makosog na takyag: ‘Dai ko na itatao an saimong mga tipasi bilang kakanon kan saimong mga kaiwal, ni iinomon man kan mga taga ibang daga an saimong bagong arak, na pinagpagalan mo. Kundi sinda mismo na nagtitipon kaiyan an makakan kaiyan, asin siertong oomawon ninda si Jehova; asin sinda mismong nagguguno kaiyan an mainom kaiyan sa laog kan sakong banal na mga patyo.’ ” (Isaias 62:​8, 9) An toong kamot asin makosog na takyag ni Jehova mga simbolo kan saiyang kapangyarihan asin kosog. (Deuteronomio 32:40; Ezequiel 20:5) An panunumpa nia paagi kaini nagpapaheling na determinado siang bagohon an kamugtakan nin Sion. Kan 607 B.C.E., pinabayaan ni Jehova an mga kaiwal kan Sion na habonan sia asin samsamon an saiyang mga rogaring. (Deuteronomio 28:​33, 51) Alagad ngonyan, an mga rogaring kan Sion makakamtan sana kan mga may deretso dian.​—Deuteronomio 14:22-27.

¹⁸ Sa kaotoban kan panugang ini sa presenteng aldaw, naeeksperyensiahan kan ibinalik na banwaan ni Jehova an dakulang espirituwal na prosperidad. Lubos nindang nakakamtan an mga bunga kan saindang pagmamaigot​—duminakol na kabilangan nin mga disipulong Kristiano asin abundang espirituwal na kakanon. (Isaias 55:​1, 2; 65:14) Huling fiel an saiyang banwaan, dai tinotogotan ni Jehova an saindang mga kaiwal na pakiaraman an saindang espirituwal na prosperidad o kuanon sa sainda an mga bunga kan saindang bilog na kalag na paglilingkod. Mayo nin nasasayang sa gabos na ginigibong paglilingkod ki Jehova.​—Malaquias 3:10-12; Hebreo 6:10.

19, 20. (a) Paano pinatag an dalan tanganing makabalik sa Jerusalem an mga Judio? (b) Paano pinatag an dalan tanganing makalaog sa organisasyon ni Jehova an mga mahoyo?

¹⁹ Pinangyayari man kan bagong ngaran na magin nakaaatraer an organisasyon ni Jehova sa mga tawong sadiosan an puso. Kadakoldakol an nagbuburunyog digdi, asin pinagdadanay na bukas an dalan para sa sainda. An hula ni Isaias nagsasabi: “Lumuwas kamo, lumuwas kamo sa mga tata. Andamon nindo an dalan kan banwaan. Tambakan nindo, tambakan nindo an tinampo. Halean nindo iyan nin mga gapo. Magpatindog kamo nin senyal para sa mga banwaan.” (Isaias 62:10) Sa enot na pangyayari, an pangapodan na ini posibleng marhay na nanonongod sa pagluwas sa mga tata kan mga siudad nin Babilonya tanganing bumalik sa Jerusalem. Kinaipuhan na haleon kan nagbaralik an mga gapo sa dalan tanganing magin mas madali an pagbiahe asin magpatindog nin senyal tanganing ipaheling an dalan.​—Isaias 11:12.

²⁰ Poon kan 1919, an linahidan na mga Kristiano ilinaen para sa banal na paglilingkod asin nagbibiahe sa “Dalan nin Kabanalan.” (Isaias 35:8) Sinda an enot na naglakaw sa espirituwal na tinampo paluwas sa Dakulang Babilonya. (Isaias 40:3; 48:20) Itinao sa sainda nin Dios an pribilehio na mangenot sa pagpahayag kan saiyang makapangyarihan na mga gibo asin sa pagpaheling sa iba kan agihan pasiring sa tinampo. An paghale sa mga gapo na yaon dian​—an pagpatag sa mga singkogan​—nangorognang para sa saindang sadiring ikararahay. (Isaias 57:14) Kaipuhan nindang masabotan nin malinaw an mga katuyohan  asin katokdoan nin Dios. An falsong mga paniniwala mga singkogan na gapo sa dana pasiring sa buhay, alagad an Tataramon ni Jehova “siring sa martilyo sa pandayan na nakaroronot kan kantil.” Paagi kaiyan, pinapasa kan linahidan na mga Kristiano an singkogan na mga gapo na puedeng makasingkog sa mga gustong maglingkod ki Jehova.​—Jeremias 23:29.

21, 22. Anong senyal an ibinugtak ni Jehova para sa mga nagbaya sa falsong relihion, asin paano niato ini naaraman?

²¹ Kan 537 B.C.E., an Jerusalem nagin senyal na nangangapodan sa Judiong natatada na bumalik asin itogdok liwat an templo. (Isaias 49:22) Kan 1919 kan an linahidan na natatada pinatalingkas sa pagkabihag sa falsong relihion, dai sinda naglagawlagaw na daing direksion. Aram ninda kun saen sinda paduman, huli ta si Jehova nagbugtak nin senyal para sa sainda. Anong senyal? An iyo man sanang senyal na ihinula sa Isaias 11:​10, na nagsasabi: “Mangyayari sa aldaw na iyan na malataw an gamot ni Jese na matindog bilang sarong senyal para sa mga banwaan.” Iinaplikar ni apostol Pablo an mga tataramon na ini ki Jesus. (Roma 15:​8, 12) Iyo, si Cristo Jesus an senyal, na namamahala bilang Hade sa langitnon na Bukid nin Sion!​—Hebreo 12:22; Kapahayagan 14:1.

²² Sa palibot ni Jesu-Cristo, an linahidan na mga Kristiano sagkod an ibang karnero nagkatiripon tanganing makikabtang sa nakapasasararong pagsamba sa Kaharohalangkaweng Dios. An saiyang pamamahala nakatatabang na ibindikar an unibersal na soberaniya ni Jehova asin bendisyonan an mga tawong sadiosan an puso hale sa gabos na nasyon sa daga. Bako daw na dahelan ini na kita gabos makiiba sa pagpamuraway sa saiya na may pag-omaw?

“An Saimong Kaligtasan Nagdadangadang”!

23, 24. Paano dinadara an kaligtasan para sa mga nagtutubod sa Dios?

²³ An bagong ngaran na itinao ni Jehova sa saiyang garo agom na organisasyon may labot sa daing sagkod na kaligtasan kan saiyang mga aki. Si Isaias nagsurat: “Uya! Ipinadangog iyan ni Jehova sagkod sa pinakaharayong kabtang kan daga: ‘Sabihon nindo sa aking babae nin Sion, “Uya! An saimong kaligtasan nagdadangadang. Uya! An balos na itinatao nia dara nia, asin an kabayadan na ibinabayad nia nasa atubangan nia.” ’ ” (Isaias 62:11) Nagdatong an kaligtasan sa mga Judio kan bumagsak an Babilonya asin buminalik sinda sa saindang dagang tinuboan. Alagad orog pa dian an itinotokdo kan mga tataramon na ini. Ipinagigirumdom kan ipinahayag ni Jehova an hula ni Zacarias mapadapit sa Jerusalem: “Maggayagaya ka nin labi-labi, O aking babae nin Sion. Kumurahaw ka sa kapangganahan, O aking babae nin Jerusalem. Uya! An saimong hade mismo minadolok sa saimo. Sia matanos, iyo, ligtas; mapakumbaba, asin nangangabayo sa sarong asno, sa dakula nang hayop na ogbon nin sarong babaeng asno.”​—Zacarias 9:9.

²⁴ Tolo may kabangang taon pakatapos bautismohan si Jesus sa tubig asin lahidan nin espiritu nin Dios, naglaog sia sa Jerusalem sakay sa sarong asno asin lininig nia an templo kaini. (Mateo 21:1-5; Juan 12:14-16) Ngonyan, si Jesu-Cristo an nagdadara nin kaligtasan hale ki Jehova para sa gabos na nagtutubod sa Dios. Poon kan sia patukawon sa trono kan 1914, si Jesus man an ninombrahan ni Jehova bilang Hokom asin Parakastigo. Kan 1918, tolo may kabangang taon pakatapos na sia patukawon sa trono, lininig nia an espirituwal na templo ni Jehova, na irinerepresentar sa daga kan kongregasyon nin linahidan na mga Kristiano. (Malaquias 3:1-5) An pagpatindog sa saiya bilang senyal nagin tanda kan kapinonan nin sarong dakulang pagtitipon nin mga tawo hale sa bilog na daga, bilang pagsuportar sa Mesiyanikong Kahadean. Kapareho kan suanoy na arogan, an “kaligtasan” nagdatong sa Israel nin Dios kan sinda patalingkason sa Dakulang Babilonya kan 1919. “An balos” o “an kabayadan” na nakatagama para sa mapagsakripisyong mga paraani magsalang inmortal na buhay sa langit o buhay na daing sagkod sa daga. An gabos na nagdadanay na fiel makakokompiar na an saindang “pagpapagal bakong sayang sana dian sa Kagurangnan.”​—1 Corinto 15:58.

25. Anong pagpasarig sa boot an itinao sa banwaan ni Jehova?

²⁵ Kanigoan karahay na paglaom para sa langitnon na organisasyon ni Jehova, para sa linahidan na mga representante kaiyan digdi sa daga, asin para sa gabos na aktibong kaiba ninda! (Deuteronomio 26:19) Si Isaias naghula: “Aapodon nanggad sinda kan mga tawo na an banal na banwaan, idtong mga binalukat ni Jehova; asin ika mismo aapodon na Hinanap, Sarong Siudad na Dai Pinabayaan nin Biyo.” (Isaias 62:12) May panahon kaidto na an “Jerusalem na nasa itaas,” na irinerepresentar kan Israel nin Dios, nagsaboot na sia pinabayaan. Dai na sia noarin man magsasaboot nin siring kaiyan. An banwaan ni Jehova mag-aako sagkod lamang kan mapagprotehir na pag-asikaso nia, na magkakamit kan saiyang nagpapadagos na huyom nin pag-oyon.

[Nota sa Ibaba]

[Mga Hapot Para sa Pag-adal]