Sarong Video na Dinisenyong Makapahiro sa Puso nin mga Hoben

NAPARIGON an boot kan dakol na hoben na seryosong konsideraron an saindang paggawe kan madalan ninda an video na Young People Ask​—How Can I Make Real Friends? * An video igwa nin marahay na hatol na sono sa Kasuratan, personal na mga kapahayagan nin hoben na mga Kristiano, asin nakapahihiro na modernong drama na basado sa pagkasaysay sa Biblia manongod ki Dina. (Genesis, kapitulo 34) An minasunod na mga kapahayagan manongod sa video hale sa Mejico.

Isinasaysay ni Martha: “An video nakapahirong marhay sa sakong puso. Iyan garo baga ginibo espesyalmente para sa sako. An paghona ko kaidto igo nang maaraman kan sakong mga maestro asin kaeskuela na ako saro sa mga Saksi ni Jehova. Dai ko iyan napatunayan paagi sa pagpapatotoo sa sainda. Nagpapasalamat ako sa gabos na impormasyon na itinatao ni Jehova, nangorogna kun iyan nakapahihiro nanggad sa sato arog kan videong ini.”

Si Juan Carlos nagsasabi: “Talagang papag-iisipon ka kan videong ini. Bilang hoben na lalaki, nakagibo ako nin mga sala asin nakakapareho ko an nagkapira sa mga karakter sa drama. Mga pirang taon na an nakaagi, nagkaigwa ako nin duwang klaseng buhay, alagad napag-atid-atid ko na an siring na klase nin pamumuhay puedeng magbunga nin maraot na mga resulta. Pakatapos kong madalan an video, determinado na akong magin fiel ki Jehova.”

Nagtuga si Sulem: “Kan dinadalan ko an video, biyong napahiro an sakong boot. Bago kaidto, nagpondo na ako sa pagbasa kan Biblia, asin bihira na akong mamibi ki Jehova. Kan hinihinanyog ko an mga komento kan mga hoben sa video, napahiro akong ponan giraray an pag-adal sa Biblia asin mamibi ki Jehova.”

An mga hoben ngonyan napapaatubang sa dakol na kadepisilan, asin an saindang pagpili nin mga katood sa parate puedeng biyong makaimpluwensia sa saindang pamumuhay. (Salmo 26:4; Talinhaga 13:20) An videong Young People Ask​—How Can I Make Real Friends? nagtatabang sa dakol na gumibo nin marahay na mga desisyon sa bagay na ini.

[Nota sa Ibaba]