“Uya! Ini an Satong Dios”

An impormasyon na tinokar sa duwang artikulong pag-aadalan na ini basado sa librong Rumani ki Jehova, na ilinuwas sa pandistritong mga kombension na ginibo sa bilog na kinaban durante kan 2002/03.​—Helingon an artikulong “Pinanigoan Kaiyan an Pangangaipo kan Sakong Puso,” sa pahina 20.

“Uya! Ini an satong Dios. Kita naglalaom sa saiya, asin ililigtas nia kita. Ini si Jehova.”​—ISAIAS 25:9.

1, 2. (a) Ano an apod ni Jehova sa patriarkang si Abraham, asin huli kaini ano an tibaad isip-isipon niato? (b) Paano sinisierto sa sato kan Biblia na posible an pagkaigwa nin haraning relasyon sa Dios?

“SAKUYANG katood.” Iyan an apod ni Jehova, an Kaglalang kan langit asin daga, sa patriarkang si Abraham. (Isaias 41:8) Imahinara na sana​—sarong ordinaryong tawo na nakakapakikatood sa Soberanong Kagurangnan kan uniberso! Tibaad isip-isipon nindo, ‘Posible daw para sa sako na magin siring kaiyan kaharani sa Dios?’

² Sinisierto sa sato kan Biblia na posibleng mapasato an haraning relasyon sa Dios. Si Abraham tinawan kan siring na haraning relasyon huli ta sia “nagtubod ki Jehova.” (Santiago 2:23) Ngonyan man si Jehova “dayupot sa mga matanos.” (Talinhaga 3:32) Sa Santiago 4:​8, sinasadol kita kan Biblia: “Rumani kamo sa Dios, asin sia marani sa saindo.” Malinaw nanggad, kun kita naggigibo nin mga lakdang na rumani ki Jehova, sia mahiro man. Iyo nanggad, sia marani sa sato. Alagad an ipinasabong daw na mga tataramon na ini nangangahulogan na kita​—na makasalan, bakong sangkap na mga tawo​—an magibo kan enot na lakdang? Dai man. An pakikidayupot ki Jehova posible sana huli ta an satong mamomoton na Dios naggibo nin duwang mahalagang lakdang.​—Salmo 25:14.

3. Anong duwang lakdang an ginibo ni Jehova tanganing magin posible na kita makapakikatood sa saiya?

³ Enot, iinareglo ni Jehova na “itao [ni Jesus] an saiyang kalag bilang pantubos na karibay nin dakol.” (Mateo 20:28) An atang na pantubos na iyan nagpapagin posible na kita maparani sa Dios. An Biblia nagsasabi: “Kun para sa sato, kita namomoot, huli ta sia an enot na namoot sa sato.” (1 Juan 4:19) Iyo, huling an Dios “an enot na namoot sa sato,” ibinugtak nia an pundasyon tanganing kita makapakikatood sa saiya. Ikaduwa, ihinahayag sa sato ni Jehova an saiyang sadiri. Sa ano man na pakikikatood niato, an relasyon basado sa totoong pakamidbid sa magigin katood niato, na hinahangaan asin pinahahalagahan an saiyang daing kaagid na mga karakteristiko.  Estudyare an kahulogan kaini. Kun si Jehova sarong Dios na natatago, dai puedeng mamidbid, nungka kitang magigin harani sa saiya. Alagad, imbes na magtago, boot ni Jehova na mamidbid niato sia. (Isaias 45:19) Sa saiyang Tataramon, an Biblia, ihinahayag nia an saiyang sadiri sa mga termino na masasabotan niato​—prueba na bako sanang namomotan nia kita kundi na boot niang mamidbid asin kamotan niato sia bilang satong langitnon na Ama.

4. Ano an mamamatean niato manongod ki Jehova mientras na orog niatong naaaraman an saiyang mga kualidad?

⁴ Nakaheling na daw kamo nin sarong sadit na aki na itinotokdo sa saiyang mga katood an saiyang ama dangan may sinserong kagayagayahan asin pag-orgolyo na nagsasabi, “Iyan an papa ko”? Nasa mga nagsasamba sa Dios an gabos na dahelan na arog man kaiyan an mamatean manongod ki Jehova. Ihinuhula kan Biblia an panahon na an fiel na mga tawo makagsing: “Uya! Ini an satong Dios.” (Isaias 25:​8, 9) Mientras na orog niatong narororop an mga kualidad ni Jehova, orog man niatong mamamatean na nasa sato an pinakamarahay na Ama asin pinakadayupot na Katood na maiisip. Iyo, an pakasabot sa mga kualidad ni Jehova nagtatao sa sato nin dakol na dahelan na orog na rumani sa saiya. Kaya siyasaton niato kun paano ihinahayag kan Biblia an pangenot na mga kualidad ni Jehova​—kapangyarihan, hustisya, kadonongan, asin pagkamoot. Sa artikulong ini, pag-oolayan niato an enot na tolo sa mga kualidad na ini.

“Halangkaw sa Kapangyarihan”

5. Taano ta angay na si Jehova an solamenteng inaapod na “an Makakamhan sa Gabos,” asin sa anong mga paagi nia ginagamit an saiyang makangingirhat na kapangyarihan?

⁵ Si Jehova “halangkaw sa kapangyarihan.” (Job 37:23) An Jeremias 10:6 nagsasabi: “Talagang mayo nin siisay man na nakababaing sa saimo, O Jehova. Dakula ka, asin dakula an saimong ngaran sa pagkamakakamhan.” Bakong arog nin arin man na linalang, si Jehova igwa nin daing sagkod na kapangyarihan. Sa dahelan na iyan, sia an solamenteng inaapod na “an Makakamhan sa Gabos.” (Kapahayagan 15:3) Ginagamit ni Jehova an saiyang makangingirhat na kapangyarihan sa paglalang, paglaglag, pagprotehir, asin pagbalik sa dati. Estudyare an duwa sanang halimbawa​—an saiyang kapangyarihan sa paglalang asin an saiyang kapangyarihan na magprotehir.

6, 7. Gurano kakosog an puersa kan saldang, asin anong mahalagang katotoohan an pinatototoohan kaiyan?

⁶ Kun kamo yaon sa luwas sa sarong maaliwalas na aldaw nin tig-init, ano an mamamatean nindo sa saindong kublit? An init kan saldang. Pero an totoo, namamatean nindo an mga resulta kan kapangyarihan ni Jehova sa paglalang. Gurano daw kakosog an puersa kan saldang? Sa pinakasentro kaiyan, an temperatura kaiyan nasa mga 15 milyones na grado Celsio. Kun makakakua kamo nin kapidaso kan pinakasentro kan saldang na arog kasadit kan payo-payo nin alpiler asin ibugtak iyan digdi sa daga, maski sa distansiang 140 kilometros hale sa sadit na gikanan na iyan nin init dai kamo makakatindog na dai kamo naaano! Kada segundo, an saldang nagpapaluwas nin enerhiya na katimbang kan pagputok nin ginatos na milyon na bomba nuklear. Pero, naglilibot an daga sa makangingirhat na termonuklear na  hornong iyan sa distansiang tamang-tama. Kun haranihon, magigin alisngaw an tubig digdi sa daga; kun harayoon, iyan magyeyelo gabos. Arin man digdi gigibohon na daing buhay an satong planeta.

⁷ Dawa ngani depende sa saldang an sainda mismong buhay, binabaliwala iyan nin dakol na tawo. Sa siring, nalilipasan ninda an ikatotokdo sa sato kan saldang. An Salmo 74:16 nagsasabi dapit ki Jehova: “Ika . . . an nag-andam kan ilaw, kan saldang ngani.” Iyo, an saldang nagpapamuraway ki Jehova, “an Kaggibo kan langit asin daga.” (Salmo 146:6) Dawa siring, saro sana iyan sa kadakol na linalang na nagtotokdo sa sato manongod sa grabe kadakulang kapangyarihan ni Jehova. Mientras na mas nakakanood kita manongod sa kapangyarihan ni Jehova sa paglalang, mas nagrararom man an satong may pagkangirhat na paggalang.

8, 9. (a) Anong mamomoton na ilustrasyon an nagpapaheling sa sato kan pagigin andam ni Jehova na protehiran asin asikasohon an mga nagsasamba sa saiya? (b) An pastor kan mga panahon kan Biblia nagtatao nin anong pag-asikaso sa saiyang mga karnero, asin ano an itinotokdo kaini sa sato manongod sa satong Dakulang Pastor?

⁸ Ginagamit man ni Jehova an saiyang dakulaon na kapangyarihan sa pagprotehir sa saiyang mga lingkod asin sa pag-asikaso sa sainda. An Biblia naggagamit nin nagkapirang garo maiimahinar pero nakapupukaw sa boot na ilustrasyon sa pagladawan kan mga panuga ni Jehova na nagpoprotehir na pag-asikaso. Halimbawa, helinga an Isaias 40:11. Dian iinaagid ni Jehova an saiyang sadiri sa sarong pastor asin an saiyang banwaan sa mga karnero. Mababasa niato: “Siring sa pastor papastoran nia an saiyang sadiring aripompon. Paagi sa saiyang takyag titiponon nia an mga kordero; asin sa saiyang daghan kakargahon nia sinda. An mga nagpapasuso aatamanon nia.” Naiimahinar daw nindo an ilinaladawan sa bersikulong iyan?

⁹ Pipira sanang hayop an arog nin magarong karnero sa pagigin daing maginibo. An pastor kan mga panahon kan Biblia kinaipuhan na magin makosog an boot tangani na maprotehiran an saiyang mga karnero sa mga lobo, oso, asin leon. (1 Samuel 17:34-36; Juan 10:10-13) Alagad may mga panahon na kaipuhan an pagpadangat kun pinoprotehiran asin inaasikaso an mga karnero. Halimbawa, kun nag-ogbon an sarong karnero harayo sa toril, paano iingatan kan pastor na harayo sa peligro an daing maginibo na bagong mundag na kordero? Kinakarga nia iyan, tibaad sa laog nin dakol na aldaw, “sa saiyang daghan”​—an darakulang katiklopan kan pan-itaas niang gubing. Pero, paano napapasa daghan kan pastor an sadit na kordero? Tibaad rumani sa pastor an kordero asin magsarosagid pa ngani sa saiyang tabay. Minsan siring, an pastor an kaipuhan na dumuko, aboton asin alsahon an kordero, asin ibugtak iyan sa proteksion kan saiyang daghan. Kanigoan kamamomoton na paglaladawan sa pagigin andam kan satong Dakulang Pastor na protehiran asin asikasohon an saiyang mga lingkod!

10. Anong proteksion an itinatao ni Jehova ngonyan, asin taano ta nangorognang mahalaga an siring na proteksion?

¹⁰ Si Jehova bako sanang ipinanuga an proteksion. Kaidtong mga panahon kan Biblia, ipinaheling nia sa milagrosong mga paagi na kaya niang “magligtas sa mga tawong may diosnon na debosyon hale sa pagbalo.” (2 Pedro 2:9) Kumusta man ngonyan? Aram niato na dai nia ginagamit an saiyang kapangyarihan sa pagprotehir sa sato sa gabos na kalamidad ngonyan. Minsan siring, talagang nagtatao sia nin sarong bagay na orog na mahalaga​—espirituwal na proteksion. An satong mamomoton na Dios pinoprotehiran kita sa espirituwal na danyos paagi sa pagsangkap sa sato kan kaipuhan niato tanganing makatagal sa mga pagbalo asin tanganing maprotehiran an satong relasyon sa saiya. Halimbawa, an Lucas 11:13 nagsasabi: “Kun kamo, minsan maraot, tataong magtao nin marahay na mga regalo sa saindong mga aki, gurano pa daw an Ama sa langit na dai magtao nin banal na espiritu sa mga naghahagad sa saiya!” An makosog na puersang iyan makatatabang sa sato na makaya an ano man na pagbalo o problema na tibaad atubangon niato. (2 Corinto 4:7) Sa siring, si Jehova minagibo nin aksion tanganing maingatan an satong buhay, bako sanang sa laog nin pirang halipot na taon, kundi sa panahon na daing sagkod. Nasa isip an esperansang iyan, ikabibilang nanggad niato an ano man na pagdusa sa sistemang ini na “naagi sana asin magian.” (2 Corinto 4:17) Bako daw na nadadagka kitang rumani sa Dios na mamomoton na marhay na ginagamit an saiyang kapangyarihan para sa sato?

“Si Jehova Mamomoton sa Hustisya”

11, 12. (a) Taano ta nadadagka kita kan hustisya ni Jehova na rumani sa saiya? (b) Ano an nagin konklusyon ni David mapadapit sa hustisya ni Jehova, asin paano kita mararanga kan ipinasabong na mga tataramon na ini?

¹¹ Ginigibo ni Jehova an tama saka imparsial, asin  ginigibo nia iyan pirme, na daing pagpaorog. An hustisya nin Dios, bakong indiperente, daing herak na kualidad na nakakaalaw sa sato, kundi kawiliwiling kualidad na nakadadagka sa sato na rumani ki Jehova. Malinaw na ilinaladawan kan Biblia an pagigin nakaoogma kan kualidad na ini. Kun siring, estudyaran niato an tolong paagi nin paggamit ni Jehova kan saiyang hustisya.

¹² Enot, an hustisya ni Jehova nagpapahiro sa saiya na magpaheling nin pagigin fiel asin kaimbodan sa saiyang mga lingkod. Naeksperyensiahan mismo kan salmistang si David an aspektong ini kan hustisya ni Jehova. Sa sadiri niang eksperyensia asin sa pag-adal nia kan mga paagi nin paghiro nin Dios, ano an nagin konklusyon ni David? Sinabi nia: “Si Jehova mamomoton sa hustisya, asin dai nia pababayaan an saiyang mga maimbod. Sagkod sa panahon na daing talaan sinda babantayan nanggad.” (Salmo 37:28) Abaa kanakararangang pagpasarig sa boot! Nungka na aabandonaron kan satong Dios an mga maimbod sa saiya. Kun siring, masasarigan niato an saiyang pagigin harani asin an saiyang mamomoton na pangataman. Iginagarantiya ini kan saiyang hustisya!​—Talinhaga 2:​7, 8

13. Paano risang-risa sa Ley na itinao nia sa Israel an pagmakolog ni Jehova sa mga daing sukat?

¹³ Ikaduwa, an hustisya nin Dios sensitibo sa mga pangangaipo kan mga nagsasakit nin makuri. An pagmakolog ni Jehova sa mga daing sukat risang-risa sa Ley na itinao nia sa Israel. Halimbawa, an Ley may mga probisyon tanganing masierto na naaasikaso an mga ilo asin babaeng balo. (Deuteronomio 24:17-21) Sa pagmidbid kun gurano kadepisil kan puedeng magin buhay nin siring na mga pamilya, si Jehova mismo an nagin garo amang Hokom asin Protektor ninda. (Deuteronomio 10:​17, 18) Pinatanidan nia an mga Israelita na kun bibiktimahon ninda an daing kalabanlaban na mga babae asin aki, dadangogon nia an kinurahaw kan mga iyan. “Malaad nanggad an sakong kaanggotan,” an sabi nia, na nasusurat sa Exodo 22:22-24. Minsan ngani an kaanggotan bakong saro sa nangingibabaw na kualidad nin Dios, napoprobokar sia sa matanos na gurobgutob nin tuyong mga akto nin inhustisya, nangorogna kun an mga biktima iyo an mga dai kayang lumaban.​—Salmo 103:6.

14. Ano an pambihira nanggad na patunay kan dai pagpaorog ni Jehova?

¹⁴ Ikatolo, sa Deuteronomio 10:​17, sinisierto sa sato kan Biblia na si Jehova “daing ipinaoorog ni nag-aako nin suhol.” Bakong arog nin dakol na tawo na may kapangyarihan o impluwensia, si Jehova dai nadadara nin materyal na kayamanan o panluwas na itsura. Sia mayo nin pagkampi o paboritismo. An pambihira nanggad na patunay kan dai nia pagpaorog iyo ini: An oportunidad na magin tunay na mga parasamba nia, na may tinatanaw na buhay na daing katapusan, dai limitado sa pira sanang pili. Imbes, an Gibo 10:​34, 35 nagsasabi: “An Dios daing ipinaoorog, kundi sa lambang nasyon an tawo na natatakot sa saiya asin naggigibo nin katanosan saiyang inaako.” An esperansang ini bukas sa gabos ano man an saindang kamugtakan sa sosyedad, kolor kan saindang kublit, o nasyon na iniistaran ninda. Bako daw na iyan an pinakatunay na hustisya? Tunay nanggad, an orog na pakasabot sa hustisya ni Jehova nakadadagka sa sato na rumani sa saiya!

‘O an Rarom kan Kadonongan nin Dios!’

15. Ano an kadonongan, asin paano iyan ipinaheheling ni Jehova?

¹⁵ Si apostol Pablo napahiro na magkagsing, siring kan nasusurat sa Roma 11:33: ‘O an rarom kan kadonongan patin kaaraman nin Dios!’ Iyo, mantang hinohorophorop niato an manlaenlaen na aspekto kan mahiwason na kadonongan ni Jehova, dai kitang maginibo kundi mapano nin may pagkangirhat na paggalang. Pero paano daw niato matatawan nin kahulogan an kualidad na ini? Pinag-iiriba kan kadonongan an kaaraman, pakamansay, asin pakasabot dangan ginagamit iyan. Ginagamit an saiyang mahiwas na kaaraman asin an saiyang hararom na pakasabot, pirmeng pinakamarahay na desisyon na posible an ginigibo ni Jehova, na inootob iyan paagi sa pinakamarahay na magigibong aksion na maiisip.

16, 17. Paano pinatototoohan kan mga linalang ni Jehova an mahiwason na kadonongan nia? Magtao nin halimbawa.

¹⁶ Ano an nagkapirang espesipikong ebidensia kan mahiwason na kadonongan ni Jehova? Nagsasabi an Salmo 104:24: “Kanigoan kadakol kan saimong mga gibo, O Jehova! Iyan gabos ginibo mo sa kadonongan. An daga pano kan saimong mga ginibo.” Tunay nanggad, mientras na mas dakol kitang nanonodan manongod sa mga bagay na ginibo ni Jehova, orog man kitang nakakamate nin may pagkangirhat na paggalang sa saiyang kadonongan. Tara, dakol an nanodan nin mga sientista sa pag-adal sa mga linalang ni Jehova! Igwa pa ngani nin  sarong linya nin inhenyeriya, na inaapod biomimetika, na naghihingoang arogon an mga disenyo na yaon sa naturalesa.

¹⁷ Halimbawa, tibaad pinagmasdan na nindong may pagngalas an gayon nin sarong harong nin lawa. Iyan tunay nanggad na sarong ngangalasan sa disenyo. An nagkapirang sapot na garo baga tupok na paghelingon proporsional na mas makosog sa asero, mas matibay sa mga awat nin tsalekong dai nalalagbas nin bala. Ano talaga an kahulogan kaiyan? Imahinara an harong nin lawa na pinadakula sagkod na arog na iyan kadakula nin pukot na ginagamit sa lantsang panira. An siring na harong nin lawa magigin makosogon na kaya kaiyan na pogolon an sarong naglulupad na eroplanong pampasahero! Iyo, ginibo ni Jehova an gabos na bagay na iyan “sa kadonongan.”

18. Paano naheheling an kadonongan ni Jehova sa paggamit nia nin mga tawo na iyong sumurat kan saiyang Tataramon, an Biblia?

¹⁸ An pinakadakulang ebidensia kan kadonongan ni Jehova manonompongan sa saiyang Tataramon, an Biblia. An madonong na hatol na yaon sa mga pahina kaiyan ipinaheheling nanggad sa sato an pinakamarahay na paaging mabuhay. (Isaias 48:17) Alagad an daing kaparehong kadonongan ni Jehova naheheling man sa paagi nin pagkasurat kan Biblia. Taano man? Sa saiyang kadonongan, pinili ni Jehova na gumamit nin mga tawo na iyong sumurat kan saiyang Tataramon. Kun mga anghel an ginamit nia na sumurat kan ipinasabong na Tataramon, magkakaigwa daw an Biblia nin kaparehong pan-akit? Totoo, ikinaladawan kutana nin mga anghel si Jehova gikan sa halangkawon nindang punto de vista asin ikinapahayag an sadiri nindang debosyon sa saiya. Alagad talaga daw na makakapakisaro kita sa punto de vista nin sangkap na espiritung mga linalang, na an kaaraman, eksperyensia, asin kosog nakalalabing marhay sa sato?​—Hebreo 2:​6, 7.

19. Anong halimbawa an nagpapaheling na an paggamit nin mga parasurat na tawo nagtatao nin dakulaon na init asin pan-akit sa Biblia?

¹⁹ An paggamit nin mga parasurat na tawo nagtatao nin dakulaon na init asin pan-akit sa Biblia. An mga kagsurat kaiyan mga tawong may mga saboot na arog kan sa sato. Huling bakong sangkap, napaatubang sinda sa mga pagbalo asin sakit na kaagid kan sato. Sa nagkapirang kaso, nagsurat sinda nin mga tataramon sa primera persona manongod sa sadiri nindang mga saboot asin paglapigot. (2 Corinto 12:7-10) Kaya nagsurat sinda nin mga tataramon na daing anghel na makakapahayag. Halimbawa an mga tataramon ni David na nasusurat sa Salmo 51. Segun sa nota sa itaas, kinomponer ni David an salmong ini pakakomiter nia nin magabat na kasalan. Biyo niang ipinahayag an nasa saiyang  puso, na ipinahahayag an hararom na pagkamondo asin nakikimaherak na patawadon nin Dios. An bersikulo 2 asin 3 nagsasabi: “Hugasan mo ako nin biyo sa sakong sala, asin linigan mo ako sa sakong kasalan. Huli ta aram ko an sakuyang mga paglapas, asin an sakuyang kasalan danay na nasa atubangan ko.” Mangnoha an bersikulo 5: “Uya! Sa sala ako ipinangaki na may kolog nin pangangaki, asin sa kasalan ipinangidam ako kan sakong ina.” Idinagdag kan bersikulo 17: “An mga atang sa Dios laglag na espiritu; an pusong laglag asin ronot, O Dios, dai mo duduhagion.” Dai daw nindo namamatean an labi-labing kamondoan kan kagsurat? Siisay baga kundi bakong sangkap na tawo an makakapahayag nin siring na saboot?

20, 21. (a) Taano ta masasabi na apisar kan paggamit nin mga parasurat na tawo, an yaon sa Biblia kadonongan ni Jehova? (b) Ano an totokaron sa sunod na artikulo?

²⁰ Paagi sa paggamit nia kan siring na bakong sangkap na mga tawo, itinao ni Jehova an talagang kaipuhan niato​—sarong rekord na “ipinasabong nin Dios” pero yaon an elementong sa tawo. (2 Timoteo 3:16) Iyo, an mga kagsurat na idto giniyahan kan banal na espiritu. Sa siring, an isinurat ninda kadonongan ni Jehova, bakong an sainda. An kadonongan na iyan biyong mapagtitiwalaan. Iyan nakalalabing marhay sa sadiri niatong kadonongan kaya kita mamomoton na sinasadol nin Dios: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:​5, 6) Paagi sa paghimate sa madonong na hatol na iyan, kita orog na minarani sa satong madonong sa gabos na Dios.

²¹ An pinakakawiliwili asin pinakamagayon sa gabos na kualidad ni Jehova iyo an pagkamoot. Totokaron sa sunod na artikulo kun paano si Jehova nagpaheling nin pagkamoot.

Nagigirumdoman daw Nindo?

• Anong mga lakdang an ginibo ni Jehova tanganing magin posible na mapatalubo niato an pakikidayupot sa saiya?

• Ano an nagkapirang halimbawa kan kapangyarihan ni Jehova sa paglalang asin kan saiyang kapangyarihan na magprotehir?

• Sa anong mga paagi ginagamit ni Jehova an saiyang hustisya?

• Paano naheheling an kadonongan ni Jehova sa saiyang mga linalang saka sa Biblia?

[Mga Hapot Para sa Pag-adal]

[Ritrato sa pahina 10]

Arog nin sarong pastor na kinakarga an kordero sa saiyang daghan, mamomoton na inaasikaso ni Jehova an Saiyang mga karnero

[Ritrato sa pahina 13]

An kadonongan ni Jehova naheheling sa paagi nin pagkasurat kan Biblia