Karangahan Para sa mga Naghahagad nin Tabang

AN Biblia bakong manwal para sa kamugtakan kan isip. Minsan siring, nagtatao iyan sa sato nin karangahan asin nagtatabang sa sato na pahalagahan an buhay sa ibong kan mga problema na napapaatubang sa sato. Sa katotoohan, an Kasuratan talagang nagsasabi: “An tawo, na namundag sa babae, halipot an buhay asin pano nin kasakitan.” (Job 14:1) An sato mismong pagkabakong sangkap an dahelan kan nagkapira sa satong mga kasakitan. Alagad siisay sa pangenot an responsable sa pagdusa nin tawo?

Sinasabi kan Biblia na iyan iyo an sarong maraot na espiritu na inaapod na Diablo asin Satanas. “Ilinalagalag [nia] an bilog na ineerokan na daga” asin sia an dahelan kan dakol na problema na nagpapasakit sa katawohan. Pero, sinasabi man sato kan Biblia na an saiyang oras nauubos na. (Kapahayagan 12:​9, 12) Sa dai na mahahaloy an gabos na kasakitan na pinangyari ni Satanas sa mga nag-eerok sa daga matatapos paagi sa pag-interbenir nin Dios. Oyon sa Biblia, an ipinanuga nin Dios na bagong kinaban nin katanosan an matapos sa kadaihan nin paglaom asin pagkadesesperar.​—2 Pedro 3:13.

Nakararanga nanggad na maaraman na an pagdusa nin tawo temporaryo sana! Sa irarom kan pamamahala kan langitnon na Kahadean nin Dios sa kamot ni Jesu-Cristo, matatapos an inhustisya asin pagdusa. Mapadapit sa ninombrahan nin Dios na Hade, an Kasuratan nagsasabi: “Ililigtas nia an dukha na naghahagad nin tabang, siring man an nagsasakit nin makuri asin an siisay man na mayo nin paratabang. Maheherak sia sa hababa asin sa dukha, asin an kalag kan mga dukha saiyang ililigtas. Gikan sa pan-aapi asin sa kadahasan saiyang tutuboson an saindang kalag, asin an saindang dugo magigin mahalagang marhay sa saiyang mga mata.”​—Salmo 72:12-14.

Haranihon na an panahon kan kaotoban kan makahulang mga tataramon na ini. Puede niatong kamtan an buhay na daing katapusan sa sarong paraisong daga sa irarom nin marahayon na mga kamugtakan. (Lucas 23:43; Juan 17:3) An kaaraman manongod sa nakararangang panuga na ini sa Kasuratan nagtatao nin paglaom asin karangahan sa mga naghahagad nin tabang.

[Picture Credit Line sa pahina 32]

Mamondong daragita: Rinetrato kan ILO/J. Maillard