Talaga daw na Kaipuhan Niato an Iba?

“KUN sinisiyasat niato an satong buhay asin mga paghihingoa, tolos na maheheling niato na haros gabos niatong ginigibo asin kamawotan konektado sa pag-eksister nin ibang tawo,” an komento kan midbid na marhay na sientistang si Albert Einstein. Idinugang nia pa: “Kita nagkakakan kan kakanon na prinodusir nin iba, nagsusulot kan mga gubing na ginibo nin iba, nag-iistar sa harong na itinogdok nin iba. . . . An indibiduwal nagin siring asin nagkaigwa kan halaga nia bakong gayong huli sa saiyang pagigin indibiduwal, kundi imbes bilang miembro nin sarong dakulaon na komunidad nin mga tawo, na iyo an nagdidirehir sa saiyang materyal asin espirituwal na pag-eksister poon sa pagkamundag sagkod sa pagkagadan.”

Sa mga hayop, ordinaryo na sanang maobserbaran an kanaturalan na pakiibaiba. An mga elepante pugro-pugro kun maghiro, na maingat na binabantayan an saindang mga ogbon. An mga babaeng leon magkairibang naghahanap nin masisiba asin ihinihiras an saindang kakanon sa mga lalaking leon. An mga lumod nagkakarawat na magkairibanan asin pinoprotehiran dawa an ibang hayop o an mga paralangoy na nasa peligro.

Minsan siring, sa tahaw nin mga tawo, naheling kan mga eksperto sa siensia sosyal an sarong tendensia na ginigikanan nin naggagrabeng paghadit. Segun sa sarong peryodiko na ipinublikar sa Mejico, pinaniniwalaan kan nagkapirang eksperto sa siensia sosyal na an “personal na pagsosolosolo asin luway-luway na pagkaraot kan pamumuhay bilang sarong komunidad sa laog nin mga dekada dakulaon an nagin danyos sa sosyedad kan E.U.” Sinabi kan peryodiko na “an ikararahay kan nasyon nakadepende sa kompletong pagbabago kan sosyedad, na imbuelto an pagbabalik sa pamumuhay bilang sarong komunidad.”

An problemang ini nangorognang naglakop sa mga nag-iistar sa nagprogreso nang mga nasyon. Marikas an pagtalubo kan tendensia nin dakol na isuway an saindang sadiri. Gusto kan mga tawo na ‘magkaigwa nin sadiring buhay’ asin marigon na kinokontra an iba na ‘pakiaraman an buhay ninda.’ May nagpahayag kan opinyon na huli sa aktitud na ini an sosyedad nin tawo nagin mas may tendensiang magkaproblema sa emosyon, magkadepresyon, asin maghugot.

Mapadapit digdi, si Dr. Daniel Goleman nagsabi: “Dinodoble kan pagsuway sa sosyedad​—an ideya na an saro mayo nin siisay man na masasabihan nin pribadong mga saboot o danay na makakadayupot​—an posibilidad nin helang o kagadanan.” An sarong report na ipinublikar sa magasin na Science nagkonklusyon na an pagsuway sa sosyedad ‘may epekto sa kabilangan nin nagagadan na kapareho kan bisyo nin pagsisigarilyo, alta-presyon, paglangkaw nin kolesterol, sobrang taba, asin kawaran nin pisikal na ehersisyo.’

Kun siring, huli sa manlaenlaen na dahelan, kaipuhan talaga niato an iba. Dai kita puedeng mabuhay nin solo. Kaya paano daw mareresolberan an problema nin pagsosolosolo? Ano an nagtao nin tunay na kahulogan sa buhay nin dakol? Totokaron kan masunod na artikulo an siring na mga hapot.

[Blurb sa pahina 3]

“Haros gabos niatong ginigibo asin kamawotan konektado sa pag-eksister nin ibang tawo.”​—Albert Einstein