“Duwang Tawo an Nagtoktok sa Samong Pinto”

“DUWANG taon na an nakaagi poon kan maeksperyensiahan niamo an grabeng kapungawan sa pagkawara kan samong aking babae.” Sa siring minapoon an sarong surat para sa publiko sa peryodikong Le Progrès, na ipinublikar sa Saint-Étienne, Pransia.

“Tolong bulan an edad ni Mélissa kan magkaigwa sia nin grabeng kamatean na trisomy 18. Nungka kamong maoomayan nin biyo sa siring kaiyan na trahedya na garo baga bakong makatanosan. Minsan ngani pinadakula kaming Katoliko, pirmeng nasa isip niamo an ideya na ‘Dios ko, kun ika nag-eeksister, taano ta tinotogotan mong mangyari an siring na mga bagay?’” Malinaw nanggad, an ina na nagsurat kaiyan nakamate nin kapurisawan asin daing maginibo. An saiyang surat nagpapadagos:

“Dai nahaloy pakalihis kan mga pangyayaring ini, duwang tawo an nagtoktok sa samong pinto. Namidbid ko tolos sinda bilang mga Saksi ni Jehova. Andam ko na sindang pahaleon sa magalang na paagi, alagad ta nariparo ko an brosyur na iinaalok ninda. Manongod iyan sa kun taano ta itinotogot nin Dios an pagdusa. Kaya nagdesisyon ako na padagoson sinda sa intension na itumba an saindang mga argumento. Inisip ko na kun mapadapit sa pagdusa, an sakong pamilya talagang dakol nang inagihan asin na nadangog mi na an dakol na sarabihon arog kan ‘An Dios an nagtao saiya sa samo, kaya an Dios an nagkua sa saiya.’ An mga Saksi nagdanay nin labi-labing sarong oras. Naghinanyog sinda sa sako na may dakulang pagkaludok, asin kan sinda pahale na, nagrahay na gayo an sakong pagmate kaya nag-oyon ako sa saro pang pagdalaw. Iyan duwang taon nang nakaagi. Dai ako nagin saro sa Mga Saksi ni Jehova, alagad nagpoon akong makipag-adal nin Biblia kaiba ninda, asin parate akong nag-aatender sa saindang mga pagtiripon sagkod na kaya ko.”