Mga Hapot Hale sa mga Parabasa

Itinogot ni Jehova an poligamiya sa saiyang suanoy na mga lingkod, an mga Israelita, alagad dai na nia itinotogot iyan ngonyan. Nagliliwatliwat daw an saiyang pamantayan?

Dai binago ni Jehova an saiyang pagmansay sa poligamiya. (Salmo 19:7; Malaquias 3:6) Bako iyan na kabtang kan saiyang areglo para sa mga tawo magpoon sa kapinonan, asin bako man ngonyan. Kan lalangon nia si Eva bilang agom para ki Adan, sinabi ni Jehova na an banal na pamantayan iyo na sarong agom na babae para sa sarong agom na lalaki. “Kaya ngani babayaan nin lalaki an saiyang ama asin an saiyang ina asin sia dapat na magdanay sa saiyang agom na babae asin sinda dapat na magin sarong laman.”​—Genesis 2:24.

Kan si Jesu-Cristo yaon sa daga, sinabi nia giraray an pamantayan na ini bilang simbag sa mga naghapot manongod sa diborsio asin pag-agom liwat. Sinabi nia: “Dai daw nindo nabasa na sia na naglalang sa sainda sa kapinonan ginibo sindang lalaki asin babae asin nagsabi, ‘Huli kaini babayaan nin lalaki an saiyang ama asin an saiyang ina asin magdadanay sa saiyang agom na babae, asin an duwa magigin sarong laman’? Kaya bako na sindang duwa, kundi sarong laman.” Idinugang ni Jesus: “An siisay man na idiborsio an saiyang agom na babae, apuera sana sa dahelan na pakikisaro, asin mag-agom nin iba nakagiginibo nin pagsambay.” (Mateo 19:​4-6, 9) Basado digdi maliwanag na an pagkua nin saro pa o dugang pang agom na babae pagsambay man.

Kun siring taano ta itinogot an poligamiya kan suanoy na mga panahon? Tandaan na dai pinonan ni Jehova an kaugalean na iyan. An enot na nasambitan sa Biblia na nagkaigwa nin sobra sa sarong agom na babae iyo si Lamec, sarong gikan ni Cain. (Genesis 4:​19-​24) Kan pangyarihon ni Jehova an Baha kan kaaldawan ni Noe, si Noe asin an tolo niang aking lalaki may tigsararong agom. An gabos na poligamo nagadan sa Baha.

Pakalihis nin dakol na siglo kan pilion ni Jehova an mga Israelita bilang saiyang banwaan, an poligamiya nag-eeksister na sa tahaw ninda, maski ngani minalataw na mas lakop na marhay kaidto an pagkaigwa nin saro sanang agom na babae. Dai hinagad nin Dios sa mga pamilya na magsuway kun igwa nin sobra sa sarong agom na babae. Imbes, estrikto niang kinontrol an kaugalean na iyan.​—Exodo 21:​10, 11; Deuteronomio 21:15-​17.

Masasabotan na temporaryo sana an pagtogot na ini sa poligamiya bako sanang sa sinabi ni Jesus mapadapit sa orihinal na pamantayan ni Jehova sa pag-agom kundi patin sa isinurat ni apostol Pablo paagi sa pasabong kan banal na espiritu nin Dios. Sinabi nia: “An lambang lalaki magkaigwa nin sadiring agom na babae asin an lambang babae magkaigwa nin sadiring agom na lalaki.” (1 Corinto 7:2) Pinasabngan man si Pablo na isurat na an siisay man na lalaki na ninombrahan bilang sarong paraataman o ministeryal na lingkod sa Kristianong kongregasyon kaipuhan na “agom na lalaki nin sarong agom na babae.”​—1 Timoteo 3:​2, 12; Tito 1:6.

Sa siring, an pagtogot ni Jehova sa poligamiya natapos kan naorganisar an Kristianong kongregasyon mga 2,000 na taon na an nakaagi. Kan panahon na idto, ikinabalik an pamantayan sa pag-agom na siring kan sa kapinonan kan paglalang nin Dios sa lalaki asin babae: sarong agom na lalaki, sarong agom na babae. Iyan an pamantayan ngonyan sa tahaw kan banwaan nin Dios sa bilog na kinaban.​—Marcos 10:​11, 12; 1 Corinto 6:​9, 10.