Pag-arog sa Dios nin Katotoohan

“Magin kamong mga paraarog sa Dios, bilang mga aki na namomotan na marhay.”​—EFESO 5:1.

1. Ano an paniniwala nin nagkapira manongod sa katotoohan, asin taano ta sala an saindang pangangatanosan?

“ANO an katotoohan?” (Juan 18:38) An hapot na iyan, na mapagtuyang ihinapot ni Poncio Pilato kaidtong haros 2,000 na taon na an nakaagi, nagpaparisa na an katotoohan depisilon hanapon. Dakol ngonyan an maoyon. An mismong katotoohan inaatake. Tibaad nadangog na nindong sinasabi na an gabos naggigibo kan kanya-kanyang sadiring katotoohan, o na an katotoohan bakong absoluto, o na an katotoohan pirmeng pabarobago. Sala an pangangatanosan na iyan. An mismong pasohan nin pagsiyasat asin edukasyon iyo na manodan an mga katunayan, an katotoohan, manongod sa kinaban na nabubuhayan niato. An katotoohan bakong depende sa personal na opinyon. Halimbawa, magsalang an kalag nin tawo inmortal o bako. Magsalang si Satanas nag-eeksister o dai. Magsalang igwa nin katuyohan an buhay o mayo. Arin man digdi, saro sana an tamang simbag. An saro tama, asin an saro sala; dai puedeng magin tama pareho.

2. Sa anong mga paagi na si Jehova Dios nin katotoohan, asin anong mga hapot an totokaron ngonyan?

² Sa naenot na artikulo, pinag-olayan niato na si Jehova iyo an Dios nin katotoohan. Aram nia an totoo dapit sa gabos na bagay. Biyong kabaliktaran sa saiyang madayang kaiwal na si Satanas na Diablo, si Jehova pirmeng makatotoohan. Orog pa dian, buka an palad ni Jehova sa paghayag kan katotoohan sa iba. Sinadol ni apostol Pablo an mga kapwa Kristiano: “Magin kamong mga paraarog sa Dios, bilang mga aki na namomotan na marhay.” (Efeso 5:1) Bilang mga Saksi ni Jehova, paano daw niato sia maaarog sa pagtaram asin pag-aplikar kan katotoohan? Taano ta mahalaga na gibohon iyan? Asin ano an garantiya niato na inooyonan ni Jehova an mga nagpapadagos sa dalan nin pagigin makatotoohan? Helingon niato.

3, 4. Paano ilinadawan ni apostol Pablo asin Pedro an mangyayari durante kan “huring mga aldaw”?

³ Nabubuhay kita sa panahon na kadakol kan relihiosong kaputikan. Siring kan ihinula ni apostol Pablo paagi sa pasabong nin Dios, an dakol na tawo sa “huring mga aldaw” na ini igwa nin porma nin  diosnon na debosyon alagad nagpapainda sa kapangyarihan kaiyan. An iba kinokontra an katotoohan, na “biyong marigsok an isip.” Apuera kaini, ‘an mga maraot asin nandadaya orog na nagraraot, na nanlalagalag asin ikinalalagalag.’ Minsan ngani an siring na mga tawo pirmeng nag-aadal, sinda nungkang nakakaabot sa “tamang kaaraman kan katotoohan.”​—2 Timoteo 3:​1, 5, 7, 8, 13.

⁴ Si apostol Pedro pinasabngan man na magsurat manongod sa huring mga aldaw. Siring kan ihinula nia, bako sanang sinasayumahan kan mga tawo an katotoohan kundi pinag-oolog-olog man an Tataramon nin Dios asin an mga nagbabalangibog kan katotoohan kaiyan. “Oyon sa saindang kabotan,” iniignoro kan siring na mga paraolog-olog an katunayan na an kinaban kan kaaldawan ni Noe linantopan nin tubig, na nagtatao nin arogan para sa sarong aldaw nin paghokom sa ngapit. An mapagmawot na boot ninda mangangahulogan nin kapahamakan para sa sainda kun dumatong na an panahon nin Dios sa paglaglag sa mga maraot.​—2 Pedro 3:3-7.

Aram kan mga Lingkod ni Jehova an Katotoohan

5. Segun ki propeta Daniel, ano an mangyayari sa “panahon kan katapusan,” asin paano naotob an hula na ini?

⁵ Sa sarong paglaladawan kan “panahon kan katapusan,” si propeta Daniel naghula nin sarong biyong laen na pangyayari sa tahaw kan banwaan nin Dios​—an pakabalik kan relihiosong katotoohan. Sia nagsurat: “Dakol an magririlibot, asin an tunay na kaaraman magigin abunda.” (Daniel 12:4) An banwaan ni Jehova dai nariribaraw o nabubuta kan dakulang Paradaya. Sa pagsiyasat sa mga pahina kan Biblia, nakua ninda an tamang kaaraman. Kan enot na siglo, tinawan ni Jesus nin kaliwanagan an saiyang mga disipulo. “Binukas nia nin lubos an saindang isip tanganing masabotan an kahulogan kan Kasuratan.” (Lucas 24:45) Sa satong kaaldawan, arog man kaiyan an ginibo ni Jehova. Paagi sa saiyang Tataramon, saiyang espiritu, asin saiyang organisasyon, minilyon sa bilog na daga an pinangyari niang makasabot kan aram na nia​—an katotoohan.

6. Anong mga katotoohan sa Biblia an nasasabotan kan banwaan nin Dios ngonyan?

⁶ Bilang banwaan nin Dios, dakol na bagay kitang nasasabotan na dai kutana niato naaraman. Aram niato an simbag sa mga hapot na kadakol nang taon na masakit na inaatubang kan mga tawong madonong sa kinaban. Halimbawa, aram niato kun taano ta igwa nin pagdusa, kun taano ta nagagadan an mga tawo, asin kun taano ta dai kaya nin mga tawo na makamtan an lakop sa globong katoninongan asin pagkasararo. Binendisyonan man kita nin bisyon kun ano an natatagama sa ngapit​—an Kahadean nin Dios, sarong paraisong daga, asin buhay na daing katapusan sa pagkasangkap. Namidbid niato si Jehova, an Supremo. Nanodan niato an manongod sa saiyang nakaaakit na personalidad pati na kun ano an dapat niatong gibohon tanganing kamtan an saiyang bendisyon. An pakaaram kan katotoohan nagpapangyari sa sato na mamidbid an bakong totoo. An pag-aplikar kan katotoohan nagpoprotehir sa sato sa daing saysay na mga pinag-aaabot, nagpapangyari sa sato na makamtan an pinakamarahay sa buhay, asin nagtatao sa sato nin makangangalas na paglaom sa ngapit.

7. Siisay an makasasabot sa mga katotoohan sa Biblia, asin siisay an dai?

⁷ Nasasabotan daw nindo an katotoohan sa Biblia? Kun iyo, dakulang bendisyon iyan sa saindo. Kun an sarong autor magsurat nin libro, sa parate ibinabagay nia iyan tanganing makaakit sa sarong espesipikong grupo nin mga tawo. May mga libro na isinurat para sa mga halangkaw an inadalan, an iba para sa mga aki, an iba pa para sa espesyalisadong mga langtad. Minsan ngani an Biblia pasil na makukua kan gabos, iyan sinadyang masabotan asin maapresyar nin sarong partikular na grupo nin mga tawo. Dinisenyo iyan ni Jehova para sa mga mapakumbaba, mga mahoyo sa daga. Masasabotan kan siring na mga tawo an kahulogan kan Biblia, ano man an saindang inadalan, kultura, kamugtakan sa buhay, o grupong etniko. (1 Timoteo 2:​3, 4) Sa ibong na lado, dai tinatawan nin pakasabot sa katotoohan sa Biblia an mga bakong tama an inklinasyon, gurano man sinda tibaad kaintelihente o kaedukado. Dai masasabotan kan mga mapaabaw-abaw, mga mapalangkaw, an mahal na marhay na mga katotoohan sa Tataramon nin Dios. (Mateo 13:11-15; Lucas 10:21; Gibo 13:48) An Dios sana an makagigibo nin siring na libro.

An mga Lingkod ni Jehova Makatotoohan

8. Taano ta si Jesus an mismong personipikasyon kan katotoohan?

⁸ Arog ki Jehova, an saiyang fiel na mga Saksi makatotoohan. Si Jesu-Cristo, an nangongorog sa  gabos na Saksi ni Jehova, nagpatotoo sa katotoohan paagi sa mga bagay na saiyang itinokdo saka sa saiyang pamumuhay asin sa paagi nin pagkagadan. Sinuportaran nia an katotoohan kan tataramon asin mga panuga ni Jehova. Bilang resulta, si Jesus an mismong personipikasyon kan katotoohan, siring kan sabi nia mismo.​—Juan 14:6; Kapahayagan 3:14; 19:10.

9. Ano an sinasabi kan Kasuratan manongod sa pagsabi kan totoo?

⁹ Si Jesus “pano nin dai na kutana maninigong kabootan asin katotoohan” asin “dai nagkaigwa nin daya sa saiyang ngoso.” (Juan 1:14; Isaias 53:9) Sinusunod kan tunay na mga Kristiano an arogan na itinao ni Jesus sa pagigin makatotoohan sa iba. Sinadol ni Pablo an mga kapagtubod: “An balang saro sa saindo magtaram nin katotoohan sa saiyang kapwa, huli ta kita mga miembro na kabtang kan lambang saro.” (Efeso 4:25) Bago kaiyan, si propeta Zacarias nagsurat: “Magtaram kamo nin katotoohan sa lambang saro.” (Zacarias 8:16) An mga Kristiano makatotoohan huli ta boot nindang paogmahon an Dios. Si Jehova makatotoohan asin aram nia an danyos na ibinubunga nin kaputikan. Kun siring, tama sanang asahan nia na an saiyang mga lingkod magsasabi kan totoo.

10. Taano ta nagpuputik an mga tawo, asin ano an negatibong mga resulta?

¹⁰ Para sa dakol, an pagputik tibaad garo sarong pasil na paagi tanganing makua an nagkapirang bentaha. An mga tawo nagpuputik tanganing makadulag sa padusa, tanganing makaganansia minsan paano, o tanganing omawon nin iba. Pero, sarong bisyo an ugale na pagparaputik. Dugang pa dian, an putikon dai magkakamit kan pag-oyon nin Dios. (Kapahayagan 21:​8, 27; 22:15) Kun kita midbid na makatotoohan, an iba naniniwala sa sinasabi niato; nagtitiwala sinda sa sato. Minsan siring, kun kita madakop na nagpuputik dawa sarong beses, an iba puedeng magduda sa pagigin totoo kan ano man na sasabihon niato sa ngapit. An sarong talinhaga sa Aprika nagsasabi: “An sarong kaputikan nakararaot sa sangribong katotoohan.” An saro pang talinhaga nagsasabi: “An putikon dai paniniwalaan, dawa kun sia nagtataram na kan totoo.”

11. Sa anong paagi na an pagigin makatotoohan bako sanang pagsabi kan totoo?

¹¹ An pagigin makatotoohan nangangahulogan nin labi pa sa pagsabi sana kan totoo. Iyan sarong paagi nin pamumuhay. Iyan an nagsasabi kun siisay kita. Ipinaaaram niato sa iba an katotoohan bako sanang paagi sa satong sinasabi kundi paagi man sa satong ginigibo. “Ika daw na nagtotokdo sa iba, dai nagtotokdo sa saimong sadiri?” an hapot ni apostol Pablo. “Ika, na naghuhulit na ‘Dai maghabon,’ naghahabon ka? Ika, na nagsasabing ‘Dai magsambay,’ nananambay ka?” (Roma 2:​21, 22) Tanganing ikahiras niato sa iba an katotoohan, dapat kitang magin makatotoohan sa gabos niatong ginigibo. An satong reputasyon sa pagigin makatotoohan asin onesto magkakaigwa nin mapuersang epekto sa magigin reaksion kan mga tawo sa satong itinotokdo.

12, 13. Ano an isinurat nin sarong hoben manongod sa pagigin makatotoohan, asin ano an dahelan kan saiyang halangkaw na pamantayan sa moral?

¹² Nasasabotan man kan mga hoben na kabilang sa mga lingkod ni Jehova an halaga nin pagigin makatotoohan. Sa pagsurat nin komposisyon sa eskuelahan, si Jenny, na kaidto 13 anyos, nagsurat: “An pagkaonesto sarong bagay na pinahahalagahan ko talaga. Iyo sana iyan ta dikit na tawo an lubos na onesto ngonyan. Nanunuga ako sa sadiri ko na pirme kong papagdadanayon an pagkaonesto sa sakong buhay. Magigin onesto man ako dawa kun an pagsabi kan totoo dai ensegidang magtatao nin pakinabang sa sako o sa sakong mga katood. Sinesegurado ko na an mga katood ko iyo an mga nagsasabi kan totoo asin onestong mga tawo.”

¹³ Sa pagkomento dapit sa komposisyon na ini, an maestra ni Jenny nagsabi: “Akion ka pa tanganing makapatalubo kan siring kakosog na pamantayan sa moral asin etika. Aram ko na pangangaptan mo an saimong pamantayan huli ta igwa kang makosog na moral.” Ano an dahelan kan siring kakosog na moral kan estudyanteng ini? Sa introduksion kan saiyang komposisyon, sinabi ni Jenny na an saiyang relihion an “nagtatao kan mga pamantayan para sa [saiyang] buhay.” Pitong taon na an nag-agi poon kan isurat ni Jenny an komposisyon na iyan. Siring kan suposisyon kan maestra nia, si Jenny padagos na nagpapaheling nin halangkaw na pamantayan sa moral sa saiyang buhay bilang saro sa Mga Saksi ni Jehova.

Ihinahayag kan mga Lingkod ni Jehova an Katotoohan

14. Taano an mga lingkod nin Dios ta igwa nin partikularmenteng dakulang paninimbagan na suportaran kun ano an totoo?

¹⁴ Siempre, an iba apuera sa Mga Saksi ni Jehova puedeng nagsasabi kan totoo asin naghihingoang  magin onesto. Minsan siring, bilang mga lingkod nin Dios, igwa kita nin partikularmenteng dakulang paninimbagan na suportaran kun ano an totoo. Pinaniwalaan kita kan mga katotoohan sa Biblia​—mga katotoohan na puedeng gumiya sa saro pasiring sa buhay na daing katapusan. Huli kaini, igwa kita nin obligasyon na ihiras sa iba an kaaraman na iyan. “An lambang saro na tinawan nin dakol,” sabi ni Jesus, “dakol an hahagadon sa saiya.” (Lucas 12:48) Tunay nanggad na ‘dakol an hinahagad’ sa mga binendisyonan nin mahal na marhay na kaaraman nin Dios.

15. Anong kaogmahan an naeeksperyensiahan nindo sa pagpaabot sa iba kan katotoohan sa Biblia?

¹⁵ May kaogmahan sa pagpaabot sa iba kan katotoohan sa Biblia. Arog kan mga disipulo ni Jesus kan enot na siglo, ibinabalangibog niato an maogmang bareta​—sarong nakaoogmang mensahe nin paglaom​—sa mga “naanitan asin nagkakaralagalag siring sa mga karnero na mayong pastor” asin sa mga nabuta asin nariribaraw sa mga “katokdoan nin mga demonyo.” (Mateo 9:36; 1 Timoteo 4:1) Si apostol Juan nagsurat: “Dai na ako nin orog pa kadakulang dahelan sa pagpasalamat kisa mga bagay na ini, na madangog ko na an sakong mga aki padagos na naglalakaw sa katotoohan.” (3 Juan 4) An pagigin fiel kan “mga aki” ni Juan​—tibaad idtong mga tinokdoan nia kan katotoohan​—nagtao sa saiya nin dakulang kagayagayahan. Naggagayagaya kita kun naheheling niato an mga tawo na may pag-apresyar na naghihimate sa Tataramon nin Dios.

16, 17. (a) Taano ta bakong gabos nag-aako kan katotoohan? (b) Anong kagayagayahan an puede nindong maeksperyensiahan mantang ibinabalangibog nindo an katotoohan sa Biblia?

¹⁶ Totoo, bakong gabos maako kan katotoohan. Si Jesus nagtaram kan katotoohan manongod sa Dios, dawa ikinauuyam kan mga tawo an paggibo kaiyan. Sinabihan nia an nagkokontrang mga Judio: “Taano ta dai kamo nagtutubod sa sako? An gikan sa Dios naghihinanyog sa mga kasabihan nin Dios. Iyan an dahelan kun taano ta dai kamo naghihinanyog, huli ta bako kamong gikan sa Dios.”​—Juan 8:​46, 47.

¹⁷ Kita, arog ni Jesus, dai nagpopogol sa pagsabi kan mahal na marhay na katotoohan manongod ki Jehova. Dai kita nag-aasa na aakoon kan gabos an sinasabi niato sa sainda, ta bakong gabos nag-ako sa sinabi ni Jesus. Minsan siring, igwa kita kan kagayagayahan sa pakaaram na ginigibo niato an tama. Dahel sa mamomoton na kabootan ni Jehova boot  nia na an katotoohan ihayag sa katawohan. Bilang mga igwa kan katotoohan, an mga Kristiano nagigin paradara kan liwanag sa sarong madiklom na kinaban. Paagi sa pagpasirang kan liwanag nin katotoohan paagi sa satong mga tataramon asin gibo, matatabangan niato an iba na pamurawayon man an satong langitnon na Ama. (Mateo 5:​14, 16) Ipinaaaram niato sa publiko na sinasayumahan niato an palsipikadong bersion ni Satanas kan katotoohan asin sinuportaran niato an dalisay asin malinig na Tataramon nin Dios. An katotoohan na aram asin ihinihiras niato puedeng magtao nin tunay na katalingkasan sa mga nag-aako kaiyan.​—Juan 8:32.

Sundon an Dalan nin Pagigin Makatotoohan

18. Taano asin paano pinahelingan ni Jesus nin pabor si Natanael?

¹⁸ Namotan asin itinaram ni Jesus an katotoohan. Durante kan saiyang ministeryo sa daga, nagpaheling sia nin pabor sa mga makatotoohan. May labot ki Natanael, nagsabi si Jesus: “Uya, sarong tunay na Israelita, na sa saiya mayo nin pandadaya.” (Juan 1:47) Pagkatapos, si Natanael, na posibleng inaapod man na Bartolome, pinili na magin saro sa 12 apostol. (Mateo 10:2-4) Kanigoan na onra iyan!

19-21. Paano binendisyonan an sarong dating buta huli sa saiyang may kosog nin boot na pagigin makatotoohan?

¹⁹ An sarong bilog na kapitulo sa libro sa Biblia ni Juan nagsasaysay kan estorya nin saro pang onestong tawo na binendisyonan ni Jesus. Dai niato aram an saiyang ngaran. An aram sana niato iyo na an tawong iyan sarong parapakilimos na buta na poon kan mamundag. Napangalas an mga tawo kan paomayan ni Jesus an saiyang pagheling. An bareta dapit sa milagrosong pagpaomay na ini nakaabot sa pagdangog kan nagkapirang Fariseo, mga naoongis sa katotoohan, na nagkaoroyon na an siisay man na nagtutubod ki Jesus dapat na haleon sa sinagoga. Kan maaraman an saindang plano, an natatakot na mga magurang kan dating buta nagputik sa mga Fariseo, na nagsabing dai ninda aram kun paanong an saindang aki nakakaheling na ngonyan o kun siisay an may kaggibo kaiyan.​—Juan 9:1-23.

²⁰ An pinaomayan na lalaki ipinaapod giraray sa atubangan kan mga Fariseo. Dai iniintindi an ano man na resulta, pusoan niang sinabi an totoo. Ipinaliwanag nia kun paano sia pinaomayan asin na si Jesus an naggibo kaiyan. Nagngangalas nin labi-labi na an prominente asin edukadong mga tawong ini dai nagtutubod na si Jesus gikan sa Dios, an pinaomayan na lalaki daing takot na sinadol sinda na akoon an malinaw nang bagay: “Kun an tawong ini bakong gikan sa Dios, mayo sia nin ano man na magigibo.” Mayong ikataong kontra argumento, an mga Fariseo inakusar an lalaki nin pagkadaing galang asin iinapon sia sa luwas.​—Juan 9:24-34.

²¹ Kan mabaretaan ini ni Jesus, mamomoton siang nagtao nin panahon tanganing hanapon an lalaki. Kan makua nia ini, dinugangan nia an pagtubod na ipinaheling kan dating buta. Hayagan na ipinamidbid ni Jesus na sia an Mesiyas. Kanigoan na bendisyon an inako kan lalaking iyan huli sa pagsabi kan katotoohan! Daing duwa-duwa na an pabor nin Dios nasa mga nagtataram kan katotoohan.​—Juan 9:35-37.

22. Taano ta maninigo niatong sunodon an dalan nin pagigin makatotoohan?

²² An pagsagibo kan katotoohan maninigo na seryoso niatong pagmaigotan na magibo. Kaipuhan iyan sa pagpatalubo asin pagpadanay nin marahay na relasyon sa mga tawo asin sa Dios. An pagigin makatotoohan iyo an pagigin daing itinatago, tunay, madaling dolokon, asin mapagtitiwalaan, asin nakakamit kaiyan an pag-oyon ni Jehova. (Salmo 15:​1, 2) An pagigin bakong makatotoohan iyo an pagigin madaya, dai masasarigan, asin bakong totoo, asin dai iyan inooyonan ni Jehova. (Talinhaga 6:16-19) Kun siring, magin desidido na sunodon an dalan nin pagigin makatotoohan. Tunay nanggad, tanganing maarog an Dios nin katotoohan, dapat niatong aramon an katotoohan, magtaram kita kan katotoohan, asin isabuhay an katotoohan.

Ano an Isisimbag Nindo?

• Taano ta makapagpapasalamat kita na aram niato an katotoohan?

• Paano daw niato maaarog si Jehova sa pagigin makatotoohan?

• Ano an mga pakinabang sa pagpaabot sa iba kan katotoohan sa Biblia?

• Taano ta mahalaga na sundon an dalan nin pagigin makatotoohan?

[Mga Hapot Para sa Pag-adal]

[Mga Ritrato sa pahina 17]

Huling pinagkatiwalaan kan katotoohan sa Biblia, an mga Kristiano maigot na ihinihiras iyan sa iba

 [Mga Ritrato sa pahina 18]

An buta na pinaomayan ni Jesus nag-ako nin dakulang bendisyon huli sa pagsabi kan katotoohan