Malakaw Kita sa Ngaran ni Jehova Sagkod Lamang!

“Kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.”​—MIQUEAS 4:5.

1. Anong mga mensahe an sinasabi sa Miqueas kapitulo 3 sagkod 5?

MAY sasabihon si Jehova sa saiyang banwaan, asin ginagamit nia si Miqueas bilang saiyang propeta. Katuyohan nin Dios na gumibo nin aksion tumang sa mga paragibo nin sala. Papadusahan nia an Israel huli sa apostasiya kaini. Pero marahay sana ta bebendisyonan ni Jehova an mga naglalakaw sa saiyang ngaran. An mga mensaheng ini malinaw na ipinahahayag sa kapitulo 3 sagkod 5 kan hula ni Miqueas.

2, 3. (a) An mga namomoon sa Israel maninigong magpaheling nin anong kualidad, alagad ano talaga an saindang ginigibo? (b) Paano nindo ipaliliwanag an pananaram na may piguratibong kahulogan na ginamit sa Miqueas 3:​2, 3?

² An propeta nin Dios nagsasabi: “Pagdangog tabi, kamong mga namomoon sa Jacob asin kamong mga komandante sa harong ni Israel. Bako daw na sa saindo an pakaisi kan hustisya?” Iyo, iyan an dapat na ginigibo ninda, alagad ano talaga an ginigibo ninda? Sabi ni Miqueas: “Kamong mga naoongis sa marahay asin namomoot sa karatan, na inaanitan an mga tawo asin hinahaklas an laman hale sa saindang mga tolang; kamo na nagkakan man sa laman kan sakong banwaan, asin nag-anit sa sainda, asin nagpiropidaso sa sainda mismong mga tolang, patin rinonot iyan siring sa yaon sa mahiwas an bungangang koron asin siring sa laman sa tahaw nin lutoan na koron.”​—Miqueas 3:1-3.

³ Tara, inaapi kan mga namomoon an mga tawong dukha asin daing kalabanlaban! Pasil na masabotan kan mga nagdadangog ki Miqueas an ginamit digding mga pananaram na may piguratibong kahulogan. Kun an binunong karnero linipoan na, iyan inaanitan nguna dangan pinipiridaso. Kun beses an mga tolang binabaak tanganing paluwason an hotok. An laman sagkod an mga tolang ginagaga sa dakulang lalagan, arog kan sinasambit ni Miqueas. (Ezequiel 24:3-5, 10) Angay nanggad na ilustrasyon kan mapan-abusong tratamiento na naeeksperyensiahan kan mga tawo kan kaaldawan ni Miqueas sa kamot kan saindang maraot na mga namomoon!

Inaasahan ni Jehova na Kita Magin Makatanosan

4. Ano an kalaenan ni Jehova asin kan mga namomoon sa Israel?

⁴ Igwa nin grabeng kalaenan an mamomoton na Pastor, si Jehova, asin an mga namomoon sa Israel. Huli sa dai ninda paggibo nin hustisya, dai ninda naootob an sugo sa sainda na protehiran an aripompon. Imbes, may kaimotan nindang inaaprobetsaran an piguratibong mga karnero, na dai itinatao sa sainda an hustisya asin pinapaagi sinda sa “pagpabolos nin dugo,” arog kan sabi sa Miqueas 3:10. Ano an manonodan niato sa situwasyon na ini?

5. Ano an inaasahan ni Jehova sa mga nangengenot sa tahaw kan saiyang banwaan?

⁵ Inaasahan nin Dios na magibo nin hustisya an mga nangengenot sa tahaw kan saiyang banwaan. Ini an maheheling niato na totoo sa mga lingkod ni Jehova ngonyan. Dugang pa, kaoyon ini kan Isaias 32:​1, kun saen mababasa niato: “Uya! An sarong hade magrereynar para sa katanosan mismo; asin kun manongod sa mga prinsipe, mamamahala sinda bilang mga prinsipe para sa hustisya mismo.” Minsan siring, kan kaaldawan ni Miqueas, ano an maheheling niato? An “mga naoongis sa marahay asin namomoot sa karatan” nagpapadagos sa pagbiribid kan hustisya.

Kiisay na mga Pamibi an Sinimbag?

6, 7. Anong mahalagang punto an idinodoon sa Miqueas 3:4?

⁶ Maaasahan daw kan maraot na mga katemporanyo ni Miqueas an pabor ni Jehova? Siempre dai!  An Miqueas 3:4 nagsasabi: “Sinda mag-aarang nin tabang ki Jehova, alagad ta dai nia sinda sisimbagon. Asin tatagoon nia an saiyang lalauogon sa sainda sa panahon na iyan, huli ta naggiribo sinda nin maraot sa saindang mga gawe.” Idinodoon kaini an sarong mahalagang marhay na punto.

⁷ Dai sisimbagon ni Jehova an satong mga pamibi kun ugale na niato an maggibo nin kasalan. Totoo nanggad iyan kun duwang klase an satong buhay, na itinatago an satong paggibo nin sala mantang sagin naglilingkod nin fiel sa Dios. Segun sa Salmo 26:​4, si David nag-awit: “Dai ako nagtukaw sa kaibanan nin mga tawong putikon; asin dai man ako naglaog sa kaibanan kan mga nagtatago kan saindang tunay na pagkatawo.” Lalo na nanggad na dai sisimbagon ni Jehova an mga pamibi kan mga tuyong linalapas an saiyang Tataramon!

Pinakokosog kan Espiritu nin Dios

8. An falsong mga propeta kan kaaldawan ni Miqueas pinatanidan manongod sa ano?

⁸ Abaa karaot na mga gibo an lakop sa tahaw kan espirituwal na mga namomoon sa Israel! An falsong mga propeta ilinalagalag sa espirituwal an banwaan nin Dios. An mahanab na mga namomoon nagkukurahaw nin “Katoninongan!” alagad an totoo sinasantipikar an guerra tumang sa siisay man na dai naglalaag nin ano man sa saindang ngoso. “Kun siring,” sabi ni Jehova, “kamo magkakaigwa nin banggi, kaya dai magkakaigwa nin bisyon; asin magkakaigwa kamo nin kadikloman, tangani na dai makapagtoodtood. Asin sosolnopan nanggad kan saldang an mga propeta, asin an aldaw madiklom sa sainda. Asin an mga bisyonaryo mapapasupog, asin an mga paratoodtood madedesganar. Asin saindang tatahoban an bigote.”​—Miqueas 3:5-7a.

9, 10. Ano an boot sabihon kan ‘pagtahob sa bigote,’ asin taano ta mayo nin dahelan si Miqueas na gibohon an siring?

⁹ Taano ta “tatahoban an bigote”? Ini an gigibohon kan maraot na mga katemporanyo ni Miqueas huli sa pagkasupog. Asin an maraot na mga tawong ini kaipuhan na masupog. “Mayong simbag hale sa Dios,” segun sa sainda. (Miqueas 3:7b) Dai dinadangog ni Jehova an mga pamibi nin siisay man na maabhaw asin maraot.

¹⁰ Si Miqueas mayong dahelan tanganing ‘magtahob nin bigote.’ Dai sia nasusupog. Sinisimbag ni Jehova an saiyang mga pamibi. Mangnoha an Miqueas 3:​8, kun saen nagsasabi an fiel na propeta: “Sa ibong na lado, ako mismo napano nin puersa, paagi sa espiritu ni Jehova, asin nin hustisya asin kakosogan.” Kanigoan an pagpasalamat ni Miqueas na sa bilog niang halawig asin fiel na ministeryo, sia pirmeng ‘pano nin puersa, paagi sa espiritu ni Jehova’! Ini an nagtao sa saiya kan kosog na “isabi ki Jacob an saiyang kasumbikalan asin ki Israel an saiyang kasalan.”

11. Paano pinakokosog an mga tawo tanganing ipahayag an mga mensahe nin Dios?

¹¹ Kaipuhan ni Miqueas an kosog na labi pa sa tawo tanganing ibalangibog an mensahe nin Dios nin paghokom na bakong paborable. Mahalagang marhay an espiritu, o makapangyarihan na puersa aktiba, ni Jehova. Kumusta man kita? An sugo sa sato na maghulit magigibo sana kun pakokosogon kita ni Jehova paagi sa saiyang banal na espiritu. An mga paghihingoang maghulit seguradong biyong magigin basang sana kun kita tuyong naggigibo nin kasalan. Kun siring kaiyan dai sisimbagon nin Dios an satong mga pamibi para sa kosog na gibohon ini. Dai nanggad niato ikapapahayag an mga mensahe nin paghokom kan satong langitnon na Ama kun an “espiritu ni Jehova” mayo sa sato. Paagi sa mga pamibi na dinadangog asin sa tabang kan banal na espiritu, nakakaya niatong isabi an tataramon nin Dios na may kosog nin boot arog ni Miqueas.

12. Taano an enot na mga disipulo ni Jesus ta ‘padagos na makatataram kan tataramon nin Dios sa bilog na pagkapusoan’?

 ¹² Tibaad nagigirumdoman nindo an pagkasaysay sa Gibo 4:23-31. Imahinara na saro kamo sa mga disipulo ni Jesus kan enot na siglo. Naghihingoa an panatikong mga paralamag na patonongon an mga parasunod ni Cristo. Alagad an mga maimbod na ini namibi sa saindang Soberanong Kagurangnan, na nakikimaherak: “Jehova, risaha an saindang mga patakot, asin itogot mo sa saimong mga oripon na padagos na magtaram kan saimong tataramon sa bilog na pagkapusoan.” An resulta? Kan sinda magngayongayo, an lugar na saindang pinagkakatiriponan natanyog, asin sinda gabos napano kan banal na espiritu asin nagtaram kan tataramon nin Dios na may pagkapusoan. Kun siring, logod na kita mapagngayongayong mag-arang ki Jehova asin manarig sa saiyang tabang paagi sa banal na espiritu mantang inootob niato an satong ministeryo.

13. Ano an mangyayari sa Jerusalem asin Samaria, asin taano?

¹³ Isipon giraray nindo an kaaldawan ni Miqueas. Segun sa Miqueas 3:9-12, an mga namamahalang may kasalan sa dugo naghohokom huli sa suhol, an mga saserdote nagtotokdo huli sa bayad, asin an falsong mga propeta naggigibo nin pagtoodtood huli sa kuarta. Bakong makangangalas na idinekreto nin Dios na an kabisera nin Juda, an Jerusalem, “magigin mga tinambak na sana nin kagabaan”! Huling lakop man sa Israel an falsong pagsamba asin karatan sa moral, pinasabngan si Miqueas na magpatanid na gigibohon nin Dios na “sarong tambak nin kagabaan” an Samaria. (Miqueas 1:6) Sa katunayan, nabuhay an propeta tanganing maheling an ihinulang paglaglag sa Samaria na ginibo kan mga hukbo nin Asiria kan 740 B.C.E. (2 Hade 17:​5, 6; 25:1-21) Risang-risa na an  mapuersang mga mensahe na ini tumang sa Jerusalem asin Samaria ikakapaabot sana paagi sa kosog ni Jehova.

14. Paano naotob an hula na nakasurat sa Miqueas 3:​12, asin ano an maninigong magin epekto kaiyan sa sato?

¹⁴ An Juda dai nanggad makakadulag sa bakong paborableng paghokom ni Jehova. Bilang kaotoban kan hula na nakasurat sa Miqueas 3:​12, an Sion “bababolon na siring sa oma sana.” Sa punto de vista niato ngonyan na ika-21 siglo, aram niato na nangyari an mga bagay na ini kan biyong laglagon kan mga Babilonyo an Juda asin Jerusalem kan 607 B.C.E. Nangyari ini pakalihis nin dakol na taon pakapaghula ni Miqueas, alagad segurado sia na maabot iyan. Daing duwa-duwa na kita maninigo man na magin kompiado na an presenteng maraot na sistema nin mga bagay matatapos sa ihinulang “aldaw ni Jehova.”​—2 Pedro 3:​11, 12.

Hinuhusay ni Jehova an mga Bagay-bagay

15. Sa sadiri nindong pananaram, paano nindo ilaladawan an hula na nakasurat sa Miqueas 4:1-4?

¹⁵ Kun babalikan niato, maheheling niato na sunod na itinatao ni Miqueas an sarong nakapupukaw sa boot na mensahe nin paglaom. Nakapakokosog nanggad sa boot an mga tataramon na manonompongan niato sa Miqueas 4:1-4! Sinasabi ni Miqueas, sa sarong kabtang: “Mangyayari sa huring kabtang kan mga aldaw na an bukid kan harong ni Jehova marigon na mapatitindog na halangkaw pa sa alitoktok kan mga bukid, asin iyan ilalangkaw nanggad nin mas halangkaw pa sa mga bulod; asin dian maburunyog an mga banwaan. . . . Asin sia maghohokom nanggad sa tahaw nin dakol na banwaan, asin maghuhusay mapadapit sa makokosog na nasyon sa harayo. Asin pupulpogon ninda an saindang mga espada na magin tarom nin arado asin an saindang mga budyak na magin mga gunting na pan-awan. Dai sinda mabingat nin espada, an nasyon tumang sa nasyon, ni mag-aadal pa man sinda sa pakilaban. Asin sinda totoong magtutukaw, an lambang saro sa sirong kan saiyang ubas asin sa sirong kan saiyang higuerra, asin mayo nin siisay man na magpapatakig sa sainda; huli ta an mismong ngoso ni Jehova nin mga hukbo iyo an nagtaram kaiyan.”

16, 17. Paano naootob ngonyan an Miqueas 4:1-4?

¹⁶ Sairisay an “dakol na banwaan” asin an “makokosog na nasyon” na nasambitan digdi? Bako sinda an mga nasyon asin gobyerno sa kinaban na ini. Imbes, an hula minaaplikar sa mga indibiduwal hale sa gabos na nasyon na nagkasararo sa sagradong paglilingkod sa bukid ni Jehova para sa tunay na pagsamba.

¹⁷ Kaoyon kan hula ni Miqueas, dai na mahahaloy an malinig na pagsamba ki Jehova gigibohon na sa pinakalubos na sentido sa bilog na daga. Ngonyan, an mga tawo na “may tamang tendensia sa buhay na daing katapusan” tinotokdoan na sa mga dalan ni Jehova. (Gibo 13:48) Si Jehova naghohokom asin hinuhusay sa espirituwal an mga may pagtubod na naninindogan para sa Kahadean. Makaliligtas sinda sa “dakulang kahorasaan” bilang kabtang kan “dakulang kadaklan.” (Kapahayagan 7:​9, 14) Huling pinulpog na ninda an mga espada ninda na magin tarom nin arado, dawa ngonyan namumuhay sinda nin toninong kaiba kan mga kapwa Saksi ni Jehova asin kan iba pa. Nakaoogmang marhay na makabilang sa sainda!

Determinadong Maglakaw sa Ngaran ni Jehova

18. Ano an isinisimbolisar kan ‘pagtukaw sa sirong kan sadiring ubas asin higuerra’?

¹⁸ Sa satong kaaldawan, na an daga natatahoban nin takot na garo sarong panganoron na may darang maraot na pangyayari, naoogma kitang marhay na dakol an nakakanood kan mga dalan ni Jehova. Hinihidaw niato an panahon na harani na ngonyan na an gabos na iyan na namomoot sa Dios dai na mag-aadal nin pakilaban kundi matukaw sa sirong kan saindang ubas asin higuerra. An mga higuerra parateng nakatanom sa mga ubasan. (Lucas 13:6) An pagtukaw sa sirong kan sadiring ubas asin higuerra nagsisimbolisar sa matoninong, maginhawa, asin tiwasay na mga kamugtakan. Dawa ngonyan, an relasyon niato ki Jehova nagtatao sa sato nin katoninongan nin isip asin espirituwal na katiwasayan. Kun iyan na an magin mga kamugtakan sa irarom kan pamamahala kan Kahadean, kita dai na matatakot asin biyo nang tiwasay.

19. Ano an boot sabihon kan maglakaw sa ngaran ni Jehova?

¹⁹ Tanganing kamtan an pag-oyon asin bendisyon nin Dios, dapat na maglakaw kita sa ngaran ni Jehova. Ini mapuersang ipinahayag sa Miqueas 4:​5, kun saen an propeta nagsasabi: “An gabos na banwaan, kun para sa sainda, maglalakaw an balang saro sa ngaran kan saiyang dios; alagad, kun para sa  sato, kita maglalakaw sa ngaran ni Jehova na satong Dios sagkod sa panahon na daing talaan, sagkod lamang pa ngani.” An paglakaw sa ngaran ni Jehova dai nangangahulogan nin pagsabi sana na sia an satong Dios. Iyan naghahagad nin bako sanang pakikikabtang niato sa Kristianong mga pagtiripon asin paghuhulit kan Kahadean, minsan ngani mahalagang marhay man an siring na mga aktibidad. Kun kita naglalakaw sa ngaran ni Jehova, kita dusay sa saiya asin naghihingoa na maglingkod sa saiya nin fiel huli sa bilog na pusong pagkamoot. (Mateo 22:37) Asin bilang mga nagsasamba sa saiya, sierto nanggad na kita determinadong lumakaw sa ngaran ni Jehova na satong Dios sagkod sa bilog na panahon na daing sagkod.

20. Ano an ihinula sa Miqueas 4:6-13?

²⁰ Estudyare tabi ngonyan an makahulang mga tataramon sa Miqueas 4:6-13. “An aking babae nin Sion” kaipuhan na madistiero “sagkod sa Babilonya.” Iyan an eksaktong nangyari sa mga nag-eerok sa Jerusalem kan ikapitong siglo B.C.E. Minsan siring, ipinaririsa kan hula ni Miqueas na may mabalik na natatada sa Juda, asin sa pagbabalik sa dati kan Sion seseguradohon ni Jehova na mapopoho an mga kalaban kaini.

21, 22. Paano naotob an Miqueas 5:2?

²¹ May iba pang pambihirang mga pangyayari na ihinula sa Miqueas kapitulo 5. Halimbawa, mangnoha an sinasabi sa Miqueas 5:2-4. Ihinuhula ni Miqueas na an sarong ninombrahan nin Dios na Namamahala​—saro “na an ginikanan sa enot na mga panahon”​—maluwas sa Betlehem. Sia mamamahala bilang sarong pastor “sa kosog ni Jehova.” Dugang pa, an Namamahalang ini magigin dakula, bako sanang sa Israel, kundi “sagkod sa mga kaporoporohi kan daga.” An kinaban sa pankagabsan tibaad maribaraw kun siisay sia, alagad bako iyan na misteryo para sa sato.

²² Siisay an pinakamahalagang tawo na namundag kasuarin man sa Betlehem? Asin siisay an “magigin dakula sagkod sa mga kaporoporohi kan daga”? Mayong iba kundi an Mesiyas, si Jesu-Cristo! Kan hapoton ni Herodes na Dakula an poon na mga saserdote asin an mga eskriba kun saen mamumundag an Mesiyas, sinda nagsimbag: “Sa Betlehem nin Judea.” Kinotar pa ngani ninda an mga tataramon sa Miqueas 5:2. (Mateo 2:3-6) Aram man ini kan nagkapira sa ordinaryong mga tawo, huli ta kinokotar sinda sa Juan 7:42 na nagsasabi: “Bakong an Kasuratan nagsabi na an Cristo magikan sa banhi ni David, asin sa Betlehem na baryo na inerokan ni David?”

Tunay na Kaginhawahan Para sa Banwaan

23. Ano ngonyan an nangyayari bilang kaotoban kan Miqueas 5:7?

²³ An Miqueas 5:5-15 nagtataram manongod sa sarong pagsakyada kan Asiria na magkakaigwa sana nin halipot na kapangganahan asin nagsasabi na an Dios magibo nin pamamalos sa suwayan na mga nasyon. An Miqueas 5:7 nanunuga na ibabalik an nagsosolsol na natatadang mga Judio sa saindang dagang tinuboan, alagad an mga tataramon na ini minaaplikar man sa satong kaaldawan. Si Miqueas nagsasabi: “An mga nagkawaralat ni Jacob kaipuhan na magin siring sa ambon hale ki Jehova sa tahaw nin dakol na banwaan, siring sa ragiri sa ibabaw nin mga pananom.” An magayon na simbolismong ini ginamit tanganing ihula na an natatada sa espirituwal na Jacob, o Israel, magigin sarong bendisyon hale sa Dios para sa banwaan. An “ibang karnero” ni Jesus, na may daganon na paglaom, naoogmang marhay na maglingkod na magkaabaga kaiba kan natatada sa “Israel nin Dios” sa presenteng aldaw, na nagtatabang na paginhawahon sa espirituwal an iba pa. (Juan 10:16; Galacia 6:16; Sofonias 3:9) Mapadapit digdi, may mahalagang punto na dapat horophoropon. Bilang mga parabalangibog kan Kahadean, maninigo na pakamahalon niato gabos an satong pribilehio na pagdara nin tunay na kaginhawahan sa iba.

24. Anong mga punto hale sa Miqueas kapitulo 3 sagkod 5 an nakatudok sa boot nindo?

²⁴ Ano an nanodan nindo poon sa kapitulo 3 sagkod 5 kan hula ni Miqueas? Tibaad an mga punto  na arog kaini: (1) Inaasahan nin Dios na magibo nin hustisya an mga nangengenot sa tahaw kan saiyang banwaan. (2) Dai sisimbagon ni Jehova an satong mga pamibi kun kita tuyong naggigibo nin kasalan. (3) An sugo sa sato na maghulit magigibo sana kun pakokosogon kita nin Dios paagi sa saiyang banal na espiritu. (4) Tanganing kamtan an pag-oyon nin Dios, kita dapat na maglakaw sa ngaran ni Jehova. (5) Bilang mga parabalangibog kan Kahadean, maninigo na pakamahalon niato an satong pribilehio na pagdara nin tunay na kaginhawahan sa mga tawo. May iba pang punto na tibaad nakatudok sa boot nindo. Ano pa an puede niatong manodan sa makahulang librong ini sa Biblia? An sunod na artikulo matabang sa sato na kumua nin praktikal na mga leksion sa huring duwang kapitulo kan nakapakokosog sa pagtubod na hula ni Miqueas.

Ano an Isisimbag Nindo?

• Ano an inaasahan nin Dios sa mga nangengenot sa tahaw kan saiyang banwaan?

• Taano an pamibi asin banal na espiritu ta mahalaga may koneksion sa satong paglilingkod ki Jehova?

• Paano an mga tawo ‘naglalakaw sa ngaran ni Jehova’?

[Mga Hapot Para sa Pag-adal]

[Ritrato sa pahina 15]

Ikapaliliwanag daw nindo an ilustrasyon ni Miqueas may koneksion sa sarong koron?

[Mga Ritrato sa pahina 16]

Arog ki Miqueas, may kosog nin boot na ginigibo niato an satong ministeryo