Gibohon si Jehova na Mani Saindong Kompiansa

“Ika an sakong paglaom, O Soberanong Kagurangnan na Jehova, an sakong kompiansa poon sa sakong pagkaniaki.”​—SALMO 71:5.

1. Anong angat an napaatubang sa solteritong pastor na si David?

LABI nanggad sa siyam na piye an langkaw nia. Bakong makangangalas na an gabos na soldados kan Israel na nakaposisyon para sa ralaban natatakot na hampangon sia! Sa sunod-sunod na semana, kada aga asin kada banggi, dinuduhagi kan Filisteong higante na si Goliat an hukbo nin Israel, na inaangat sindang magpadara nin parapakilaban na kayang lumaban sa saiya. Sa katapustapusi, inako an angat, bakong nin sarong soldados, kundi nin saro sanang hoben. An solteritong pastor na si David saditon paghelingon kun ikokomparar sa saiyang kalaban. Tara, tibaad mas magian pa sia sa kalasag asin armas ni Goliat! Sa ibong kaiyan, hinampang kan hoben an higante asin nagin bantog na simbolo nin kosog nin boot.​—1 Samuel 17:1-51.

2, 3. (a) Taano ta kompiadong marhay na nakayang hampangon ni David si Goliat? (b) Pag-oolayan niato an anong duwang lakdang na dapat gibohon tanganing mani satong kompiansa si Jehova?

² Ano an nagtao ki David kan siring na kosog nin boot? Estudyare an nagkapirang tataramon na minalataw na isinurat ni David kan huring mga taon nia: “Ika an sakong paglaom, O Soberanong Kagurangnan na Jehova, an sakong kompiansa poon sa sakong pagkaniaki.” (Salmo 71:5) Iyo, bilang hoben, si David nagtiwala nin lubos ki Jehova. Hinampang nia si Goliat, na sinasabi: “Ika minadolok sa sako na may darang espada asin may budyak patin may garod, alagad ako minadolok sa saimo sa ngaran ni Jehova nin mga hukbo, an Dios kan posisyon para sa ralaban nin Israel, na saimong dinuduhagi.” (1 Samuel 17:45) Mantang an kompiansa ni Goliat nasa saiyang dakulang kosog asin sa saiyang mga armas, an kompiansa ni David nasa ki Jehova. Huling nasa kampi nia an Soberanong Kagurangnan kan uniberso, taano si David ta mapadaog sa takot sa saro sanang tawo, gurano man ini tibaad kadakula asin kakompleto sa armas?

³ Mantang kamo nagbabasa manongod ki David,  minamawot daw nindo na logod mas makosog an saindong kompiansa ki Jehova? Posibleng marhay na an dakol sa sato arog kaiyan an mawot. Kaya siyasaton niato an duwang lakdang na puede niatong gibohon tanganing gibohon si Jehova na mani satong kompiansa. Enot, kaipuhan niatong daogon asin papagdanayon an pakadaog sa sarong komun na olang sa siring na kompiansa. Ikaduwa, kaipuhan niatong manodan kun ano man nanggad an kalabot sa pagtitiwala ki Jehova.

Pagpanggana sa Sarong Komun na Olang sa Pagkompiar ki Jehova

4, 5. Taano ta nadedepisilan an dakol na tawo na magkompiar sa Dios?

⁴ Ano an nakaoolang sa mga tawo na magkompiar sa Dios? Parateng marhay na an nagkapira nariribaraw manongod sa kun taano ta nangyayari an mga karatan. Dakol an natokdoan na an Dios an responsable sa pagdusa. Kun biglang may mangyaring trahedya, an mga klero tibaad magsabi na “kinua” nin Dios an mga biktima tanganing makaibanan nia sa langit. Apuera kaini, an dakol na namomoon sa relihion nagtotokdo na kaidto pa itinalaga na nin Dios antes pa an lambang pangyayari​—kabale an lambang trahedya asin maraot na gibo​—na nangyayari sa kinaban na ini. Depisil magkompiar sa siring kaiyan na Dios na matagas an puso. Si Satanas, na binubuta an isip kan mga daing pagtubod, gustong-gustong palakopon an gabos na siring kaiyan na “katokdoan nin mga demonyo.”​—1 Timoteo 4:1; 2 Corinto 4:4.

⁵ Gusto ni Satanas na mawaran nin kompiansa ki Jehova an mga tawo. Habo kan kaiwal na iyan nin Dios na maaraman niato an tunay na mga dahelan nin pagdusa nin tawo. Asin kun nanodan na niato an mga dahelan nin pagdusa sono sa Kasuratan, gusto ni Satanas na malingawan niato iyan. Kun siring, marahay na repasohon niato sa panapanahon an tolong pundamental na dahelan kun taano ta igwa nin pagdusa sa kinaban. Sa paggibo kaiyan, puede niatong maasegurar giraray an satong puso na bakong si Jehova an responsable sa mga problema na inaatubang niato sa buhay.​—Filipos 1:​9, 10.

6. Paano itinotokdo kan 1 Pedro 5:8 an sarong dahelan nin pagdusa nin tawo?

⁶ An sarong dahelan nin pagdusa nin tawo iyo na gusto ni Satanas na raoton an integridad kan fiel na banwaan ni Jehova. Prinobaran niang raoton an integridad ni Job. Nasudya kaidto si Satanas, alagad dai sia uminontok. Bilang an namamahala sa kinaban na ini, hinihingoa nia na ‘sibaon’ an fiel na mga lingkod ni Jehova. (1 Pedro 5:8) Kabale dian an lambang saro sa sato! Gusto ni Satanas na papondohon kita sa paglilingkod ki Jehova. Huli kaini, parate siang nagsusutsut nin paglamag. Minsan ngani makolog an siring na pagdusa, igwa kita nin tamang dahelan na magtagal. Sa paggibo kaiyan, nagtatabang kitang patunayan na si Satanas putikon asin sa siring napaoogmang marhay si Jehova. (Job 2:4; Talinhaga 27:11) Mantang pinakokosog kita ni Jehova na tagalan an paglamag, nag-oorog man an satong kompiansa sa saiya.​—Salmo 9:​9, 10.

7. Tinatabangan kita kan Galacia 6:7 na mamidbid an anong dahelan nin pagdusa?

⁷ An ikaduwang dahelan nin pagdusa manonompongan sa prinsipyong ini: “Ano man an itinatanom nin tawo, ini man an saiyang aanihon.” (Galacia 6:7) Kun beses an mga tawo nagtatanom paagi sa paggibo nin salang mga pagpili asin nag-aani nin sarong sokol nin pagdusa bilang resulta. Tibaad gusto nindang magmaneho nin daing ingat, na nagreresulta sa aksidente. An dakol gustong magsigarilyo, na nagbubunga nin helang sa puso o kanser sa pulmon. An mga gustong gumibo nin inmoral na sekso namemeligrong maparaot an relasyon sa pamilya, mawaran nin paggalang sa sadiri, magkaigwa nin helang na ikinaoolakit paagi sa pagdodorog, asin dai ginustong pagbados. Tibaad hingoahon kan mga tawo na ibasol sa Dios an siring na pagdusa, alagad an totoo biktima sinda kan sainda mismong salang mga desisyon.​—Talinhaga 19:3.

8. Segun sa Eclesiastes 9:​11, taano ta nagdudusa an mga tawo?

⁸ An ikatolong dahelan nin pagdusa sinasabi sa Eclesiastes 9:11: “Nagbalik ako tanganing maheling sa sirong nin aldaw na mayo sa mabagsik an paorumbasan, ni sa makokosog an ralaban, ni sa madonong man an kakanon, ni sa mga may pakasabot man an kayamanan, ni duman man sa mga may kaaraman an biyaya; huli ta an panahon asin pagkanorongod nangyayari sa sainda gabos.” Kun beses, an mga tawo talagang yaon sa salang lugar asin salang panahon. Ano man an personal na mga kakosogan o kaluyahan niato, an siisay man sa sato puedeng bigla na sanang abotan nin pagdusa asin kagadanan ano man na oras. Halimbawa, kan kaaldawan ni Jesus, sarong torre sa Jerusalem an buminagsak asin ikinagadan nin18 katawo. Ipinaheling ni Jesus na dai sinda pinadudusahan nin Dios huli sa nakaaging mga kasalan. (Lucas 13:4) Dai, bakong si Jehova an dapat basolon sa siring na pagdusa.

9. Ano an dai nasasabotan kan dakol manongod sa pagdusa?

 ⁹ Mahalaga an pakasabot sa nagkapira sa mga dahelan nin pagdusa. Minsan siring, may sarong aspekto iyan na depisil masabotan kan dakol. Ini: Taano ta tinotogotan ni Jehova Dios an pagdusa?

Taano ta Tinotogotan ni Jehova an Pagdusa?

10, 11. (a) Segun sa Roma 8:19-22, ano an nangyari sa “gabos na linalang”? (b) Paano niato maaaraman kun siisay an nagpasakop kan mga linalang sa kasayangan?

¹⁰ An sarong teksto sa surat ni apostol Pablo sa mga taga Roma nagtatao nin liwanag dapit sa mahalagang temang ini. Si Pablo nagsurat: “An galagang pag-antisipar kan mga linalang naghahalat sa paghahayag kan mga aki nin Dios. Huli ta an mga linalang ipinasakop sa kasayangan, bakong sa sadiring boot kaiyan kundi paagi sa saiya na nagpasakop kaiyan, basado sa paglaom na an mga linalang man mismo patatalingkason sa pagkaoripon sa kalapaan asin magkakaigwa kan mamuraway na katalingkasan kan mga aki nin Dios. Huli ta aram niato na an gabos na linalang padagos na nag-aaragrangay nin iriba asin nagtitios nin kolog nin iriba sagkod ngonyan.”​—Roma 8:19-22.

¹¹ Tanganing masabotan an mga bersikulong ini, kaipuhan nguna niatong masimbag an nagkapirang pangenot na hapot. Halimbawa, Siisay an nagpasakop kan mga linalang sa kasayangan? An iba si Satanas an itinotokdo; an iba si Adan. Alagad pareho sinda dai makakapasakop kaiyan. Taano ta dai? Huli ta an nagpapasakop kan mga linalang sa kasayangan ginigibo iyan “basado sa paglaom.” Iyo, itinatao nia an paglaom na sa kahurihurihi an mga fiel “patatalingkason sa pagkaoripon sa kalapaan.” Si Adan o si Satanas dai makatatao nin siring na paglaom. Si Jehova sana. Kun siring, malinaw nanggad na sia an nagpasakop kan mga linalang sa kasayangan.

12. Anong pagkaribaraw an naglataw dapit sa kun ano an kahulogan kan “gabos na linalang,” asin paano masisimbag an hapot na ini?

¹² Pero ano “an gabos na linalang” na naunabihan sa tekstong ini? May mga nagsasabi na an “gabos na linalang” nanonongod sa enterong naturalesa, kabale an mga hayop asin pananom. Alagad an mga hayop daw asin mga tanom naglalaom na makamtan an “mamuraway na katalingkasan kan mga aki nin Dios”? Dai. (2 Pedro 2:12) Kun siring, “an gabos na linalang” puede sanang ipanongod sa katawohan. Ini an mga linalang na apektado kan kasalan asin kagadanan dahelan kan pagrebelde sa Eden asin na iyan nangangaipong marhay nin paglaom.​—Roma 5:12.

13. Ano an nagin epekto sa katawohan kan pagrebelde sa Eden?

¹³ Ano man nanggad an nagibo sa katawohan kan pagrebeldeng iyan? Ilinaladawan ni Pablo an mga resulta kaiyan paagi sa sarong tataramon: kasayangan. * Segun sa sarong reperensia, an tataramon na  ini naglaladawan sa “kasayangan nin sarong bagay na dai nagpupunsionar sono sa pagkadisenyo kaiyan.” An mga tawo dinisenyo na mabuhay sagkod lamang, na magtatarabangan bilang sarong sangkap asin nagkakasararong pamilya sa pag-ataman sa sarong paraisong daga. Imbes, an saindang pag-eksister nagin halipot, makolog, asin parateng nakadedesganar. Siring sa pagkasabi kaiyan ni Job, “an tawo, na namundag sa babae, halipot an buhay asin pano nin kasakitan.” (Job 14:1) Tunay nanggad na kasayangan!

14, 15. (a) Anong ebidensia nin hustisya an maheheling niato sa sentensia ni Jehova sa katawohan? (b) Taano ta sinabi ni Pablo na an mga linalang ipinasakop sa kasayangan na “bakong sa sadiring boot kaiyan”?

¹⁴ Magduman kita ngonyan sa pangenot na hapot: Taano ta ipinasakop kan “Hokom sa bilog na daga” an katawohan sa makolog asin nakadedesganar na pag-eksister na ini? (Genesis 18:25) May katanosan daw sia sa paggibo kaiyan? Bueno, girumdoma an ginibo kan enot niatong mga magurang. Sa pagrebelde sa Dios, kuminampi sinda ki Satanas, na nagbangon nin mahiwas an sakop na angat sa soberaniya ni Jehova. Paagi sa saindang ginibo, sinuportaran ninda an deklarasyon na an tawo mas mapapakarhay na mayo si Jehova, na pinamamahalaan an saiyang sadiri sa paggiya nin sarong rebeldeng espiritung linalang. Sa pagsentensia sa mga rebelde, garo man sana itinao ni Jehova an hinahagad ninda. Tinotogotan nia an tawo na pamahalaan an saiyang sadiri sa impluwensia ni Satanas. Sa mga kamugtakan na iyan, anong desisyon daw an magigin mas makatanosan nanggad kisa ipasakop an katawohan sa kasayangan alagad basado sa paglaom?

¹⁵ Siempre, ini bakong sa “sadiring boot” kan mga linalang. Kita namundag bilang mga oripon sa kasalan asin kalapaan na bako man niatong kagustohan. Alagad sa pagkaherak ni Jehova tinogotan nia si Adan asin Eva na mabuhay pa asin mangaki. Minsan ngani kita, na saindang mga gikan, ipinasakop sa kasayangan nin kasalan asin kagadanan, may oportunidad kita na gibohon an dai nagibo ni Adan asin Eva. Puede kitang maghimate ki Jehova asin makanood na an saiyang soberaniya matanos asin sangkap, mantang an pamamahala nin tawo na siblag ki Jehova nagbubunga sana nin kakologan, pagkadesganar, asin kasayangan. (Jeremias 10:23; Kapahayagan 4:11) Asin an impluwensia ni Satanas orog sanang nagpapagrabe sa situwasyon. Pinatutunayan kan kasaysayan nin tawo an mga katotoohan na ini.​—Eclesiastes 8:9.

16. (a) Taano ta makasesegurado kita na bakong si Jehova an responsable sa pagdusa na naheheling niato sa kinaban ngonyan? (b) Anong paglaom an mamomoton na itinao ni Jehova para sa fiel na mga tawo?

¹⁶ Malinaw nanggad, may makatanosan na mga dahelan si Jehova na ipasakop an katawohan sa kasayangan. Pero nangangahulogan daw iyan na si Jehova an dahelan kan kasayangan asin pagdusa na nagpapasakit nin makuri sa lambang saro sa sato ngonyan? Bueno, imahinara an sarong hokom na nagpapahayag nin makatanosan na sentensia sa sarong kriminal. An napatunayan na nagkasala tibaad magdusa nin darudakula mantang tinatapos nia an sentensia sa saiya, alagad tama daw na basolon nia an hokom na iyong dahelan kan saiyang pagdusa? Dai nanggad! Apuera kaini, nungkang gikan ki Jehova an karatan. An Santiago 1:13 nagsasabi: “Paagi sa maraot na mga bagay an Dios dai puedeng baloon ni binabalo man nia an siisay man.” Girumdomon ta man na ipinahayag ni Jehova an sentensiang ini “basado sa paglaom.” Mamomoton na naggibo sia nin mga areglo na maheling kan fiel na mga gikan ni Adan asin Eva an katapusan nin kasayangan asin mag-ogmang marhay sa “mamuraway na katalingkasan kan mga aki nin Dios.” Sa bilog na panahon na daing sagkod, an fiel na katawohan nungka nang maghahadit pa na an gabos na linalang tibaad maholog liwat sa makolog na kamugtakan nin kasayangan. An matanos na pag-asikaso ni Jehova sa situwasyon magpapatunay sa pagigin makatanosan kan saiyang soberaniya sa gabos na panahon.​—Isaias 25:8.

17. Ano an maninigo na magin epekto sa sato kan pagrepaso sa mga dahelan nin pagdusa sa kinaban ngonyan?

¹⁷ Mantang rinerepaso niato an mga dahelan na ini nin pagdusa nin tawo, may naheheling daw kitang ano man na basehan na ibasol ki Jehova an karatan o na mawaran kita nin kompiansa sa saiya? Sa kabaliktaran, an siring na pag-adal nagtatao sa sato nin dahelan na otrohon an mga tataramon na ini ni Moises: “An Gapo, sangkap an saiyang gibo, huli ta an gabos niang dalan hustisya. Dios nin pagigin fiel, na dian sa saiya mayo nin inhustisya; matanos asin tanos sia.” (Deuteronomio 32:4) Paagi sa paghorophorop sa mga bagay na ini, sa panapanahon repasohon niato an satong  pakasabot sa mga iyan. Paagi kaiyan, kun mapaatubang kita sa mga pagbalo, malalabanan niato an mga paghihingoa ni Satanas na magtanom nin mga pagduda sa satong isip. Pero kumusta man an ikaduwang lakdang na nasambitan sa enotan? Ano an kalabot sa pagtitiwala ki Jehova?

Kun Ano an Boot Sabihon kan Magtiwala ki Jehova

18, 19. Paagi sa anong mga tataramon pinaririgon kan Biblia an boot niato na magtiwala ki Jehova, alagad sa bagay na iyan, ano an salang ideya nin nagkapira?

¹⁸ Sinasadol kita kan Tataramon nin Dios: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” (Talinhaga 3:​5, 6) Magayon asin nakapakokosog liwat sa boot an mga tataramon na iyan. Daing duwa-duwa na mayo nang ibang mas mapagtitiwalaan sa bilog na uniberso kisa satong namomotan na langitnon na Ama. Minsan siring, mas pasil na basahon an mga tataramon na iyan sa Talinhaga kisa iaplikar iyan.

¹⁹ Dakol an igwa nin salang ideya manongod sa kun ano an boot sabihon kan magtiwala ki Jehova. An nagkapira naghohona na an siring na pagtitiwala saro sanang pagmate, sarong klase nin maogmang emosyon na maninigong basta na sana lumuwas sa puso. An iba garo baga naniniwala na an pagtitiwala sa Dios nangangahulogan na puede niato siang asahan na poprotehiran kita sa lambang kadepisilan, sosolusyonan an lambang problema niato, asin reresolberan an lambang pangaroaldaw na kasakitan sono sa linalaoman niato​—asin gibohon nia iyan tolos-tolos! Alagad an mga paghonahona na iyan daing basehan. An pagtitiwala bako sanang sarong pagmate, asin bako iyan na harayo sa katunayan. Sa mga nasa edad na, kalabot sa pagtitiwala an paggibo nin tuyo asin pinag-isipan na mga desisyon.

20, 21. Ano an kalabot sa pagtitiwala ki Jehova? Iilustrar.

²⁰ Mangnoha giraray an sinasabi kan Talinhaga 3:5. Ipinaheheling kaiyan an kalaenan kan pagtitiwala ki Jehova asin kan pagsarig sa satong sadiring pakasabot, na nagsusuherir na dai niato iyan puedeng gibohon pareho. Nangangahulogan daw iyan na dai kita tinotogotan na gamiton an satong mga kakayahan nin pakasabot? Dai, huli ta inaasahan ni Jehova, an nagtao sa sato kan mga kakayahan na iyan, na gamiton niato iyan sa paglilingkod sa saiya. (Roma 12:1) Alagad sa ano kita nananarig, o nagdedepende? Kun an satong kaisipan dai magin kaoyon kan kaisipan ni Jehova, inaako daw niato an saiyang kadonongan kun ano man nanggad iyan​—na dai masokol an kalabihan sa satong kadonongan? (Isaias 55:​8, 9) An pagtitiwala ki Jehova nangangahulogan nin pagtogot sa saiyang kaisipan na iyong gumiya sa satong kaisipan.

²¹ Sa pag-ilustrar: Imahinara an sarong aki na nakatukaw sa likod na tukawan nin kotse, na nasa enotan an saiyang mga magurang. An tatay nia an nagmamaneho. Kun may bumangon na mga problema durante kan biahe​—dai maseguro kun saen an tamang agihan o tibaad problema dapit sa kamugtakan kan panahon o kan tinampo​—ano an magigin reaksion nin sarong makinuyog asin nagtitiwalang aki? Ikinukurahaw daw nia an direksion mantang sia nakatukaw sa likod, na sinasabihan an saiyang tatay kun paano magmamaneho kan kotse? Kinukuestion daw nia an mga desisyon kan magurang nia o minakontra daw sia kun ipagirumdom ninda sa saiya na magdanay sa saiyang tukawan? Dai, natural nang nagtitiwala sia sa mga magurang nia na iyong maasikaso kaiyan, minsan ngani bako sindang sangkap. Si Jehova sarong sangkap na Ama. Bako daw na maninigo kitang magtiwala sa saiya nin lubos, nangorogna kun kita napapaatubang sa masakit na mga situwasyon?​—Isaias 30:21.

22, 23. (a) Taano ta maninigo kitang magtiwala ki Jehova kun kita napapaatubang sa mga problema, asin paano niato iyan magigibo? (b) Ano an totokaron sa sunod na artikulo?

²² Minsan siring, an Talinhaga 3:6 nagsasabi na maninigo niatong ‘girumdomon si Jehova sa gabos  niatong dalan,’ bako sanang kun kita napapaatubang sa masakit na mga situwasyon. Kaya an pangaroaldaw na mga desisyon na ginigibo niato sa buhay maninigong magpabanaag kan satong pagtitiwala ki Jehova. Kun may bumangon na mga problema, dai kita maninigong madesesperar, mataranta, o labanan an paggiya ni Jehova mapadapit sa pinakamarahay na paagi nin pag-asikaso kaiyan. Maninigo niatong mansayon an mga pagbalo bilang oportunidad na suportaran an soberaniya ni Jehova, na tumabang na patunayan na putikon si Satanas, asin pataluboon an pagkuyog asin iba pang kualidad na nakapaoogma ki Jehova.​—Hebreo 5:​7, 8.

²³ Puede niatong ipaheling an satong pagtitiwala ki Jehova ano man na mga kaolangan an mapaatubang sa sato. Ginigibo niato iyan sa satong mga pamibi asin sa paagi nin pagsarig niato sa Tataramon ni Jehova asin sa saiyang organisasyon para sa paggiya. Pero paano niato espesipikong ikapaheheling an pagtitiwala ki Jehova kun napapaatubang sa mga problema na minalataw sa presenteng kinaban? Totokaron kan sunod na artikulo niato an temang iyan.

[Nota sa Ibaba]

Ano an Isisimbag Nindo?

• Paano ipinaheling ni David na ginibo nia si Jehova na mani saiyang kompiansa?

• Ano an tolong dahelan nin pagdusa nin tawo ngonyan, asin taano ta marahay na repasohon iyan sa panapanahon?

• Anong sentensia sa katawohan an ipinahayag ni Jehova, asin taano ta makatanosan na sentensia idto?

• Ano an kalabot sa pagtitiwala ki Jehova?

[Mga Hapot Para sa Pag-adal]

[Mga Ritrato sa pahina 8]

Ginibo ni David si Jehova na mani saiyang kompiansa

[Ritrato sa pahina 10]

Ipinaheling ni Jesus na kan bumagsak an sarong torre sa Jerusalem, bakong si Jehova an responsable