Igwa daw nin Saro Sanang ‘Tunay na Iglesia’?

“KUN paanong igwa nin sarong Cristo, igwa man nin sasarong hawak ni Cristo, sasarong Nobya ni Cristo: ‘sasarong Iglesia Katolika asin apostolika.’”​—Dominus Iesus.

Arog kaiyan an pagkasabi kan Katoliko Romanong kardinal, si Joseph Ratzinger, manongod sa katokdoan kan saiyang iglesia na puedeng magkaigwa nin saro sanang tunay na iglesia. An iglesiang iyan, sabi nia, “sasarong Iglesia ni Cristo, na iyo an Iglesia Katolika.”

“Bakong Tunay na mga Iglesia”

Minsan ngani si Papa Juan Paulo II nag-insistir na an dokumentong Dominus Iesus “mayo nin pagpaabaw-abaw, o dai paggalang, sa ibang relihion,” makosog an nagin reaksion dian kan mga namomoon sa iglesiang Protestante. Halimbawa, sa Presbiterianong Junta Heneral sa Belfast, Amihanan na Irlandia, kan Hunyo 2001, nagsabi an sarong ministro na an dokumento gibo nin “sarong makapangyarihan na paksion sa Iglesia Katolika Romana . . . na namungnan sa takot huli sa pagkabukas nin isip na inintrodusir kan Batikano II.”

Si Robin Eames, an Primado kan Iglesia nin Irlandia, nagsabi na sia “madedesganar na marhay” kun an dokumento “sarong pagbalik liwat sa dati bago an Batikano II.” Sa pagkomento manongod sa sinasabi kan Batikano na an mga iglesia na minahabo sa nagkapirang doktrinang Katoliko “bakong tunay na Iglesia,” sabi ni Eames: “Para sako iyan mapan-insulto.”

Ano an dahelan sa pagluwas kan Dominus Iesus? Minalataw na an Curia Katolika Romana nahandal sa inaapod na relihiosong relatibismo. Segun sa The Irish Times, “an paglataw kan pluralistang teolohiya​—na sa pundamental nagsasabing an mga relihion pareparehong marahay . . . paorog nang paorog na ikinabangkag ni Kardinal Ratzinger.” Garo baga an punto de vistang ini an dahelan sa saiyang mga komento manongod sa sarong tunay na iglesia.

Mahalaga daw Kun sa Arin Man na Iglesia Kamo Kabilang?

Siempre, para sa nagkapira, an “relihiosong relatibismo” o “pluralistang teolohiya” orog nanggad na rasonable asin nakaaatraer kisa sa ano man na suhestion na igwa nin saro sanang tunay na iglesia. Para sainda, an relihion maninigo na depende na sana sa personal na gusto. ‘Sa katapustapusi,’ sabi ninda, ‘bako na talagang mahalaga kun sa arin man na iglesia kamo kabilang.’

Garo baga iyan an mas liberal na punto de vista​—dawa ngani an saro sa epekto kaiyan iyo an pagkabarangabanga nin relihion sa manampulong ribong laen-laen na denominasyon. ‘An siring na pagkalaenlaen sa relihion,’ sabi nin dakol, ‘tama sanang kapahayagan kan indibiduwal na katalingkasan.’ Minsan siring, segun sa parasurat na si  Steve Bruce, an arog kaiyan na “pagpabaya sa ibang relihion” sa katunayan saro sanang “relihiosong pagkaindiperente.”​—A House Divided: Protestantism, Schism, and Secularization.

Kun siring, ano an tamang punto de vista? Igwa daw nin saro sanang tunay na iglesia? Iyan daw sana an Iglesia Katolika Romana? An iba daw na mga iglesia inaako man nin Dios? Mantang kalabot sa mga hapot na ini an relasyon niato sa satong Kaglalang, daing duwa-duwa na mahalagang maaraman niato an saiyang punto de vista sa bagay na iyan. Paano niato magigibo iyan? Paagi sa pagsiyasat sa ipinasabong na Tataramon nin Dios, an Biblia. (Gibo 17:11; 2 Timoteo 3:​16, 17) Estudyaran niato an sinasabi kaiyan sa temang ini manongod sa sarong tunay na iglesia.