Magtiwala nin Lubos ki Jehova sa mga Panahon nin Kasakitan

“An Dios pailihan asin kosog para sa sato, sarong tabang na tolos na makukua sa panahon nin mga kasakitan.”​—SALMO 46:1.

1, 2. (a) Anong halimbawa an nagpapaheling na bakong igo an pagsabi na kita nagtitiwala sa Dios? (b) Taano ta labi pa sa basta pagsabi na kita nagtitiwala ki Jehova an dapat niatong gibohon?

MADALI sana an pagsabing nagtitiwala kita sa Dios. Pero iba nang orolay an pagpaheling kaiyan paagi sa satong mga aksion. Halimbawa, an fraseng “In God We Trust” (“Sa Dios Kami Nagtitiwala”) haloy nang maheheling sa kuartang papel asin sinsilyo sa E.U. * Kan 1956, an Kongreso kan E.U. nagpasar nin ley na idinedeklarar an mga tataramon na iyan bilang nasyonal na kasabihan kan Estados Unidos. Kabaliktaran sa tibaad linalaoman, dakol na tawo​—bako sanang sa nasyon na iyan kundi sa bilog na kinaban​—an mas nagtitiwala sa kuarta asin materyal na kayamanan kisa Dios.​—Lucas 12:16-21.

² Bilang tunay na mga Kristiano, labi pa sa basta pagsabi na kita nagtitiwala ki Jehova an dapat niatong gibohon. Kun paanong “an pagtubod na daing mga gibo gadan,” an ano man na pagsabing kita nagtitiwala sa Dios dai man nin saysay kun dai niato iyan patunayan paagi sa satong mga aksion. (Santiago 2:26) Sa naenot na artikulo, nanodan niato na an satong pagtitiwala ki Jehova nahahayag kun kita minadolok sa saiya sa pamibi, kun hinahanap niato an instruksion sa saiyang Tataramon, asin kun nag-aasa kita sa saiyang organisasyon para sa paggiya. Pag-olayan niato ngonyan kun paano niato magigibo an tolong lakdang na iyan sa mga panahon nin kasakitan.

Kun Nawaran nin Trabaho o Dikit an Ginaganar

3. Anong mga sakit sa pagbuhay an inaatubang kan mga lingkod ni Jehova sa “delikadong mga panahon” na ini, asin paano niato naaaraman na an Dios andam na tumabang sa sato?

³ Sa “delikadong mga panahon” na ini, kita bilang mga Kristiano napapaatubang sa kaparehong sakit sa pagbuhay na inaagihan kan ibang tawo. (2 Timoteo 3:1) Huli kaini, tibaad bigla na sana kitang haleon sa satong trabaho. O tibaad mayo na  kitang ibang maginibo kundi magtrabaho nin halawig na mga oras na dikit an sueldo. Sa siring na mga kamugtakan, tibaad masakitan kitang ‘sustentohan an mga sadiri niato.’ (1 Timoteo 5:8) Andam daw an Kaharohalangkaweng Dios na tabangan kita sa siring na mga panahon? Iyo nanggad! Siempre, dai kita sinasagangan ni Jehova sa gabos na kasakitan nin buhay sa sistemang ini nin mga bagay. Minsan siring, kun kita nagtitiwala sa saiya an mga tataramon sa Salmo 46:1 magkakatotoo sa kamugtakan niato: “An Dios pailihan asin kosog para sa sato, sarong tabang na tolos na makukua sa panahon nin mga kasakitan.” Pero paano niato ikapaheheling na kita nagtitiwala nin lubos ki Jehova sa mga panahon nin kasakitan sa pinansial?

4. Kun napapaatubang sa pinansial na mga problema, ano an puede niatong ipamibi, asin paano sinisimbag ni Jehova an siring na mga pamibi?

⁴ An sarong paagi nin pagpaheling kan satong pagtitiwala ki Jehova iyo an pagdolok sa saiya sa pamibi. Alagad ano an puede niatong ipamibi? Bueno, huling napapaatubang sa pinansial na mga problema, tibaad mas kaipuhan niato ngonyan kisa kasuarin man an praktikal na kadonongan. Kun siring, ipamibi nanggad nindo iyan! An Tataramon ni Jehova inaasegurar kita: “Kun an siisay man sa saindo kulang nin kadonongan, padagos siang maghagad sa Dios, huli ta sia abundang nagtatao sa gabos na dai nin pagbasol; asin iyan itatao saiya.” (Santiago 1:5) Iyo, humagad ki Jehova nin kadonongan​—an kakayahan na gamiton nin tama an kaaraman, pakasabot, asin pakamansay​—tanganing makagibo nin madonong na mga desisyon asin tamang pagpili. An satong mamomoton na langitnon na Ama inaasegurar kita na hihinanyogon nia an siring na mga pamibi. Pirme siang andam na itanos an mga dana kan mga nagtitiwala sa saiya sa bilog nindang puso.​—Salmo 65:2; Talinhaga 3:​5, 6.

5, 6. (a) Taano ta puede kitang magsarig sa Tataramon nin Dios para sa tabang na makayang atubangon an mga sakit sa pagbuhay? (b) Ano an puede niatong gibohon tanganing inaan an kahaditan kun kita napapaatubang sa pagkawara nin trabaho?

⁵ An pagsarig sa Tataramon nin Dios para sa paggiya saro pang paagi nin pagpaheling na kita nagtitiwala ki Jehova. An saiyang madonong na mga pagirumdom na yaon sa Biblia napatunayan na “mapagtitiwalaan nanggad.” (Salmo 93:5) Minsan ngani natapos kaidtong labing 1,900 na taon na an nakaagi, an ipinasabong na librong iyan igwa nin masasarigan na sadol asin malinaw na pakarorop na makatatabang sa sato na mas makayang atubangon an mga sakit sa pagbuhay. Estudyare an nagkapirang halimbawa kan kadonongan sa Biblia.

⁶ An madonong na si Hadeng Salomon nagkomento kaidtong haloy nang panahon: “Mahamis an pagtorog kan sarong naglilingkod, minsan pa kadikit o dakol an saiyang kinakakan; alagad an kadakolan kan mayaman dai nagpapatorog sa saiya.” (Eclesiastes 5:12) Kaipuhan an panahon asin kuarta sa paghirahay, paglinig, pagmantenir, asin pagprotehir sa satong materyal na mga rogaring. Kaya mantang inaatubang an pagkawara nin trabaho, puede niatong gamiton an oportunidad na siyasaton liwat an satong estilo nin pamumuhay, na hinihingoang paglaenon an mga kinakaipuhan asin mga gusto. Tanganing inaan an kahaditan, tibaad madonong na gumibo nin nagkapirang pagliliwat. Halimbawa, posible daw na gibohon na simple an satong buhay, na puede gayod na bumalyo sa mas sadit na erokan o haleon an dai kinakaipuhan na materyal na mga rogaring?​—Mateo 6:22.

7, 8. (a) Paano ipinaheling ni Jesus na aram nia na an bakong sangkap na mga tawo igwa nin tendensia na maghadit nin labi-labi manongod sa materyal na mga bagay? (Helingon man an nota sa ibaba.) (b) Anong madonong na sadol an itinao ni Jesus manongod sa kun paano lilikayan an paghadit nin labi-labi?

⁷ Sa Sermon sa Bukid, si Jesus naghatol: “Dai na kamo magparahadit dapit sa saindong kalag kun ano an saindong kakakanon o kun ano an saindong iinomon, o dapit sa saindong hawak kun ano an saindong gugubingon.” * (Mateo 6:25) Aram ni Jesus na an bakong sangkap na mga tawo natural sanang mahadit kun paano makukua an pundamental na mga pangangaipo. Pero paano niato mahihimo na ‘dai na magparahadit’ manongod sa siring na mga bagay? “Padagos na hanapon nguna an kahadean,” an sabi ni Jesus. Ano man na problema an mapaatubang sa sato, dapat na padagos niatong tawan nin prioridad sa buhay an pagsamba ki Jehova. Kun gigibohon niato iyan, sa siring an gabos niatong pangaroaldaw  na mga pangangaipo “idadagdag na sana” sa sato kan satuyang langitnon na Ama. Minsan paano, pangyayarihon niang makaagwanta kita.​—Mateo 6:33.

⁸ Itinao ni Jesus an dugang pang sadol na ini: “Dai kamo noarin man maghadit dapit sa masunod na aldaw, huli ta an masunod na aldaw magkakaigwa kan sadiring mga kahaditan kaiyan.” (Mateo 6:34) Bakong madonong na maghadit nin labi-labi manongod sa kun ano an tibaad mangyayari nuodma. An sarong intelektuwal nagsabi: “An satong mga pagkatakot mapadapit sa ngapit bihira na totoong nangyayari.” An mapakumbabang paghimate sa sadol kan Biblia na papagdanayon na malinaw kun ano an satong mga prioridad asin mabuhay sa kada aldaw makatatabang sa sato na likayan an labi-labing paghadit.​—1 Pedro 5:​6, 7.

9. Kun napapaatubang sa kasakitan sa pinansial, anong tabang an tibaad makua niato sa mga publikasyon kan “fiel asin may diskresion na oripon”?

⁹ Kun napapaatubang sa kasakitan sa pinansial, ikapaheheling man niato an satong pagtitiwala ki Jehova paagi sa pagsarig sa mga publikasyon kan “fiel asin may diskresion na oripon” para sa tabang. (Mateo 24:45) Sa panapanahon, an magasin na Awake! nagtampok nin mga artikulo na may nakatatabang na mga sadol asin suhestion sa pag-atubang sa mga angat sa pagbuhay. An artikulong “Out of a Job​—What Are the Solutions?” (“Daing Trabaho​—Ano an mga Solusyon?”) sa luwas na Agosto 8, 1991, nagtao nin walong praktikal na giya na nakatabang sa dakol na magdanay na marigon sa pinansial asin emosyon kan mag-agi nin panahon nin kawaran nin trabaho. * Siempre, an mga giyang iyan dapat na timbangan nin tamang pagmansay sa tunay na importansia nin kuarta. Tinokar ini sa artikulong “Something More Vital Than Money” (“Sarong Bagay na Mas Mahalaga Kisa Kuarta”), na mababasa sa luwas man sanang iyan.​—Eclesiastes 7:12.

Kun Pinupurisaw nin mga Problema sa Salud

10. Paano ipinaheheling kan halimbawa ni Hadeng David na realistikong magtiwala ki Jehova kun napapaatubang sa grabeng helang?

¹⁰ Realistiko daw na magtiwala ki Jehova kun napapaatubang sa grabeng helang? Iyo nanggad! May empatiya si Jehova sa mga may helang sa saiyang banwaan. Orog pa dian, andam sia na tumabang. Halimbawa, estudyare si Hadeng David. Sia mismo tibaad naghehelang nin grabe kan isurat nia an dapit sa pagtratar nin Dios sa sarong tanos na tawo na may helang. Sia nagsabi: “Si Jehova mismo magpapakosog sa saiya sa ibabaw nin sopa nin kahelangan; an gabos niang higdaan sasalidahan mo sa panahon kan saiyang paghelang.” (Salmo 41:​1, 3, 7, 8) An pagtitiwala ni David sa Dios nagdanay na makosog, asin sa katapustapusi naulian an hade. Pero paano niato ikapaheheling an pagtitiwala sa Dios kun kita pinupurisaw nin mga problema sa salud?

11. Kun naghehelang, ano an puede niatong hagadon sa satong langitnon na Ama?

 ¹¹ Kun naghehelang, an sarong paagi nin pagpaheling kan satong pagtitiwala ki Jehova iyo an pakikimaherak sa saiya sa pamibi na logod tabangan niang makatagal. Puede niatong hagadon sa saiya na tabangan kitang gamiton an “praktikal na kadonongan” tanganing mahanap niato an sokol nin salud na realistikong itinotogot kan satong mga kamugtakan. (Talinhaga 3:21) Puede man niatong hagadon sa saiya na tabangan kitang magpasensia asin makatagal tanganing makayang tioson an helang. Orog sa gabos, boot niatong hagadon na logod susteniran kita ni Jehova, na tawan kita kan kosog tanganing magdanay na fiel sa saiya asin dai mawara an satong pagkatimbang, ano man an mangyari. (Filipos 4:13) An pagpapadanay kan satong integridad sa Dios orog pa nganing mahalaga kisa pagpapadanay kan satong presenteng buhay. Kun papagdanayon niato an satong integridad, an Dakulang Parabalos tatawan kita nin daing sagkod na sangkap na buhay asin salud.​—Hebreo 11:6.

12. Anong mga prinsipyo sa Kasuratan an makatatabang sa sato na gumibo nin madonong na mga desisyon pag-abot sa medikal na pagbolong?

¹² An pagtitiwala niato ki Jehova nagpapahiro man sa sato na magsarig sa saiyang Tataramon, an Biblia, para sa praktikal na giya. An mga prinsipyo sa Kasuratan makatatabang sa sato na gumibo nin madonong na mga desisyon pag-abot sa medikal na pagbolong. Halimbawa, sa pakaaram na kinokondenar kan Biblia an “paggibo nin espiritismo,” lilikayan niato an ano man na paagi nin diagnosis o terapi na may kalabot na espiritismo. (Galacia 5:19-21; Deuteronomio 18:10-12) Uya an saro pang halimbawa kan mapagtitiwalaan na kadonongan sa Biblia: “An siisay man na daing kabatidan nagtutubod sa lambang tataramon, alagad an alisto an isip ineestudyaran an saiyang mga lakad.” (Talinhaga 14:15) Huli kaini, kun nagpaplanong magpabolong, madonong na humanap kita nin masasarigan na impormasyon imbes na ‘magtubod sa lambang tataramon.’ An siring na “toltol na isip” makatatabang sa sato na turotimbangon nin maingat an satong mga opsion asin gumibo nin may kabatidan na desisyon.​—Tito 2:12.

13, 14. (a) Anong impormatibong mga artikulo dapit sa salud an ipinublikar sa magasin na Watchtower asin Awake!? (Helingon an kahon sa pahina 17.) (b) Anong sadol manongod sa pag-atubang sa pabalikbalik na mga kamatean an itinao sa Awake! na Enero 22, 2001?

¹³ Puede man niatong ipaheling an satong pagtitiwala ki Jehova paagi sa pagsiyasat sa mga publikasyon kan fiel na oripon. An magasin na Torrengbantayan asin Awake! sa panapanahon nagpublikar nin impormatibong mga artikulo dapit sa dakol na laen-laen na espesipikong problema sa salud asin helang. * Kun beses, an mga magasin na ini nagtampok nin mga artikulo hale sa mga indibiduwal na nakayang atubangon an laen-laen na diperensia, kamatean, asin kabiadian. Dugang pa, an nagkapirang artikulo nagtao nin mga suhestion sono sa Kasuratan saka nin praktikal na sadol dapit sa kun paano titioson an pabalikbalik na mga problema sa salud.

¹⁴ Halimbawa, an luwas kan Awake! na Enero 22, 2001, itinampok an serye sa tutob na “Comfort for the Sick” (“Karangahan Para sa mga May Helang”). Iinatubang kan mga artikulo an nakatatabang na mga prinsipyo sa Biblia saka an mga impormasyon na direktang nakalap hale sa mga interbio sa may kaaraman  na mga indibiduwal na namuhay na may nakapanluluyang mga helang sa laog nin dakol na taon. An artikulong “Living Successfully With Your Ailment​—How?” (“Mapangganang Pamumuhay na Yaon an Saindong Kamatean​—Paano?”) nagtao kan minasunod na sadol: Pag-adalan sagkod sa rasonableng magigibo nindo an manongod sa saindong helang. (Talinhaga 24:5) Magtalaan nin praktikal na mga pasohan, kabale an pasohan na tumabang sa iba, alagad aramon nindo na tibaad dai nindo maaabot an kaparehong mga pasohan na kayang aboton nin iba. (Gibo 20:35; Galacia 6:4) Likayan an pagsolosolo. (Talinhaga 18:1) Gibohon nindo na an pagdalaw saindo magin nakaoogmang eksperyensia para sa iba. (Talinhaga 17:22) Orog sa gabos, papagdanayon an kadayupotan ki Jehova asin sa kongregasyon. (Nahum 1:7; Roma 1:​11, 12) Bako daw na nagpapasalamat kita sa mapagtitiwalaan na paggiyang itinatao ni Jehova paagi sa saiyang organisasyon?

Kun Dai Nahahale an Sarong Kaluyahan nin Laman

15. Paano nanggana si apostol Pablo sa saiyang pakikilaban sa mga kaluyahan kan bakong sangkap na laman, asin anong garantiya an puedeng mapasato?

¹⁵ “Sa sakong laman, mayo nin marahay na nag-eerok,” an isinurat ni apostol Pablo. (Roma 7:18) Aram mismo ni Pablo kun gurano kadepisil na labanan an mga pagmawot asin kaluyahan kan bakong sangkap na laman. Minsan siring, may kompiansa man si Pablo na makapanggagana sia. (1 Corinto 9:​26, 27) Paano? Paagi sa pagtitiwala nin lubos ki Jehova. Iyan an dahelan na masasabi ni Pablo: “Herak man sa sako! Siisay an maligtas sa sako hale sa hawak na napapairarom sa kagadanan na ini? Salamat sa Dios paagi ki Jesu-Cristo na satong Kagurangnan!” (Roma 7:​24, 25) Kumusta man kita? Kita man nakikilaban tumang sa mga kaluyahan nin laman. Mantang kita naghihingoang labanan an siring na mga kaluyahan, pasil na mawaran nin kompiansa, na nakokombensir na nungka kitang makapanggagana. Alagad tatabangan kita ni Jehova kun kita, arog ki Pablo, talagang magsasarig sa Saiya asin bako sanang sa satong sadiring kosog.

16. Kun dai nahahale an sarong kaluyahan nin laman, ano an kaipuhan niatong ipamibi, asin ano an maninigo niatong gibohon kun maotro iyan?

¹⁶ Kun dai nahahale an sarong kaluyahan nin laman, ikapaheheling niato na nagtitiwala kita ki Jehova paagi sa pag-arang sa saiya sa pamibi. Kaipuhan kitang humagad, makimaherak pa ngani, ki Jehova para sa tabang kan saiyang banal na espiritu. (Lucas 11:9-13) Puede niatong espesipikong  hagadon an pagpopogol sa sadiri, na kabtang kan bunga kan espiritu nin Dios. (Galacia 5:​22, 23) Ano an maninigo niatong gibohon kun maotro iyan? Iyo nanggad, dai kita maninigong sumuko. Nungka kitang mapagal sa kapamimibi na may kapakumbabaan sa satong maheherakon na Dios, na logod patawadon asin tabangan nia kita. Nungkang isisikwal, o sasayumahan, ni Jehova an puso na “laglag asin ronot” huli sa gabat nin nagkasalang konsensia. (Salmo 51:17) Kun kita mangayongayo sa saiya na may sinsero asin nagbabasol na puso, tatabangan kita ni Jehova na labanan an mga sugot.​—Filipos 4:​6, 7.

17. (a) Taano ta nakatatabang na pensaron kun ano an namamatean ni Jehova manongod sa partikular na kaluyahan na tibaad linalabanan niato? (b) Anong mga teksto an puede niatong tuomon kun linalabanan niato na kontrolon an pagigin madaling maanggot? na ingatan an satong dila? na labanan an pagkahilig sa nakararaot na aling-alingan?

¹⁷ Ikapaheheling man niato na nagtitiwala kita ki Jehova paagi sa pagsiyasat sa saiyang Tataramon para sa tabang. Sa paggamit nin konkordansia sa Biblia o kan Watch Tower Publications Index, puede niatong hanapon an simbag sa hapot na, ‘Ano daw an namamatean ni Jehova manongod sa partikular na kaluyahan na linalabanan ko?’ An pagpensar sa kun ano an namamatean ni Jehova manongod sa bagay na iyan puedeng magpakosog sa satong pagmawot na paogmahon sia. Sa siring, magigin kapareho niato an namamatean nia, na ikinaoongis an ikinaoongis nia. (Salmo 97:10) Nanompongan nin nagkapira na nakatatabang an pagtuom nin mga teksto sa Biblia na aplikado sa espesipikong kaluyahan na linalabanan ninda. Nasasakitan daw kitang kontrolon an pagigin madaling maanggot? Kun siring puede niatong tuomon an mga teksto na arog kan Talinhaga 14:17 asin Efeso 4:31. Nadedepisilan daw kitang kontrolon an satong dila? Puede niatong tuomon an mga teksto na arog kan Talinhaga 12:18 asin Efeso 4:29. Mahilig daw kita sa nakararaot na aling-alingan? Puede niatong hingoahon na tandaan an mga teksto na arog kan Efeso 5:3 asin Colosas 3:5.

18. Taano ta dai niato maninigong togotan an pagkasupog na pogolan kita sa paghagad nin tabang sa kamagurangan na mapangganahan an satong kaluyahan?

¹⁸ An paghagad nin tabang sa nombrado nin espiritung kamagurangan sa kongregasyon saro pang paagi nin pagpaheling kan satong pagsarig ki Jehova. (Gibo 20:28) Total, an “balaog na mga lalaki” na ini probisyon hale ki Jehova paagi ki Cristo tanganing protehiran asin asikasohon an saiyang mga karnero. (Efeso 4:​7, 8, 11-14) Totoo, bako gayod pasil an paghagad nin tabang sa pagpanggana sa sarong kaluyahan. Tibaad masupog kita, na natatakot na mababa an pagheling sa sato kan kamagurangan. Alagad daing duwa-duwa na an maygurang sa espirituwal na mga lalaking ini igagalang kita huli sa pagkaigwa kan kosog nin boot na maghagad nin tabang. Apuera kaini, an kamagurangan naghihingoa  na ipabanaag an mismong mga kualidad ni Jehova sa pagtratar sa aripompon. An saindang nakararanga saka praktikal na hatol asin instruksion hale sa Tataramon nin Dios tibaad iyo nanggad an kaipuhan niato tanganing pakosogon an satong determinasyon na igo na tanganing mapangganahan an satong kaluyahan.​—Santiago 5:14-16.

19. (a) Sa anong paagi hinihingoa ni Satanas na gamiton an kasayangan nin buhay sa sistemang ini? (b) Ano an kalabot sa pagtitiwala, asin ano an maninigo na magin marigon na determinasyon niato?

¹⁹ Nungkang paglingawan na aram ni Satanas na halipot na sana an saiyang panahon. (Kapahayagan 12:12) Gusto niang gamiton an kasayangan nin buhay sa kinaban na ini tanganing desganaron asin pasukoon kita. Logod na lubos kitang magkompiar sa sinabi sa Roma 8:35-39: “Siisay an mapasuhay sa sato sa pagkamoot kan Cristo? An kahorasaan daw o kasakitan o paglamag o gutom o kahubaan o peligro o minasbad? . . . Al kontraryo, sa gabos na bagay na ini kita biyong nanggagana paagi sa saiya na namoot sa sato. Huli ta ako kombensido na ni an kagadanan ni an buhay ni an mga anghel ni an mga gobyerno ni an mga bagay na yaon na digdi ngonyan ni an mga bagay na madatong pa ni an mga kapangyarihan ni an kalangkawan ni an kararoman ni an arin man na ibang linalang dai makakapasuhay sa sato sa pagkamoot nin Dios na yaon dian ki Cristo Jesus na satong Kagurangnan.” Kanigoan na kapahayagan nin pagtitiwala ki Jehova! Minsan siring, an siring na pagtitiwala bakong pagmate sana. Imbes, iyan pagtitiwala na kalabot an pinag-isipan na mga desisyon na ginigibo niato sa satong pangaroaldaw na buhay. Kun siring, magin marigon na determinasyon niato na magtiwala ki Jehova nin lubos sa mga panahon nin kasakitan.

[Mga Nota sa Ibaba]

Nagigirumdoman daw Nindo?

• Kun napapaatubang sa mga problema sa pagbuhay, sa anong mga paagi niato ikapaheheling na kita nagtitiwala ki Jehova?

• Paano niato ikapaheheling an pagtitiwala sa Dios kun kita pinupurisaw nin mga problema sa salud?

• Kun dai nahahale an sarong kaluyahan nin laman, paano niato ikapaheheling na kita talagang nagsasarig ki Jehova?

[Mga Hapot Para sa Pag-adal]

[Kahon sa pahina 17]

Nagigirumdoman daw Nindo an mga Artikulong Ini?

Kun kita pinupurisaw nin mga problema sa satong salud, nakaparirigon sa boot na basahon an manongod sa iba na nakayang atubangon an mga diperensia sa salud, kamatean, o kabiadian. An minasunod nagkapirang artikulo na ipinublikar na sa magasin na Watchtower asin Awake!

An “Coping With My Weaknesses” nakasentro sa pag-atubang sa negatibong kaisipan asin depresyon.​—The Watchtower, Mayo 1, 1990.

“Not Even an Iron Lung Could Stop Her Preaching.”​—Awake!, Enero 22, 1993.

An “A Bullet Changed My Life” nakasentro sa pag-atubang sa paralisis.​—Awake!, Oktubre 22, 1995.

Tinokar sa “You Do Not Know What Your Life Will Be Tomorrow” an pag-atubang sa bipolar disorder.​—The Watchtower, Disyembre 1, 2000.

An “Loida’s Journey out of Silence” nakasentro sa pag-atubang sa paralisis huli sa danyos sa hotok.​—Awake!, Mayo 8, 2000.

“My Struggle With Endometriosis.”​—Awake!, Hulyo 22, 2000.

“My Fight With Scleroderma.”​—Awake!, Agosto 8, 2001.

“I Won My Battle With Postpartum Depression.”​—Awake!, Hulyo 22, 2002.

[Ritrato sa pahina 15]

Mantang inaatubang an pagkawara nin trabaho, tibaad madonong na siyasaton niato liwat an satong estilo nin pamumuhay

[Ritrato sa pahina 16]

An estorya ni Loida nagpapaheling kun paano an pagtitiwala ki Jehova nakatatabang sa saro na makatagal. (Helingon an kahon sa pahina 17)

[Ritrato sa pahina 18]

Dai kita kaipuhan na masupog na humagad nin tabang na mapangganahan an satong mga kaluyahan