Mga Hapot Hale sa mga Parabasa

Sa dakol na parte kan kinaban, pinagkatodan na an pagtao nin mga regalo sa kasal. Anong mga prinsipyo sa Kasuratan an maninigo niatong konsideraron kun nagtatao o nag-aako kan siring na mga regalo?

Inooyonan kan Biblia an pagregalo kun iyan ginigibo na may tamang motibo asin nasa tamang okasyon. Kun dapit sa pagtao, ineenkaminar kan Biblia an tunay na mga Kristiano na arogon an saindang buka an palad na Paratao, si Jehova. (Santiago 1:17) Sinadol ni apostol Pablo an mga kapwa Kristiano: “Dai nindo paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.” Sa siring, ineenkaminar an mga Kristiano na magin matinao.​—Hebreo 13:16; Lucas 6:38.

Kumusta man an paggamit nin gift registry, na sarong usong kaugalean sa Estados Unidos? Sa Inglaterra, inaapod iyan na listahan sa kasal. Sa tipikong mga kamugtakan, an magkailusyon na kakasalon nagpaparehistro sa sarong basar paagi sa pagheling kan mga paninda sa basar asin paggibo nin listahan kan mga bagay na gusto nindang iregalo sa sainda. An mga paryente asin katood kan magkailusyon iniimpormaran na magduman sa tamang basar tanganing magbakal nin sarong bagay na nakalista sa registry kan magkailusyon. Sa praktikal na punto de vista, an lista sa gift registry pinalilibre an maregalo sa paggamit nin dakol na oras sa pagparahanap nin ireregalo, mantang an rinegalohan pinalilibre sa pagkaabala sa pagbalik sa basar kan dai nagustohan na mga regalo.

Personal na desisyon kun baga an sarong magkailusyon na ikakasal gustong gumamit nin gift registry. Minsan siring, bobooton nin sarong Kristiano na mag-ingat na likayan an ano man na kaugalean na tibaad makalapas sa mga prinsipyo sa Biblia. Halimbawa, kumusta kun an magkatratong pakasal gumibo nin listahan nin mga bagay na sobrang mahal? Sa siring na kamugtakan, an mga limitado sana an badyet tibaad dai kayang makapagregalo, o tibaad isipon ninda na mas marahay pang sayumahan an imbitasyon na mag-atender sa kasal tanganing dai sinda mapasupog sa pagdara nin bakong mamahalon na regalo. An sarong Kristiana nagsurat: “Iyan nagigin pagabat na marhay. Pinagmaigotan ko na magin matinao, alagad nawara kasuarin pa sana an gabos na kaogmahan na dati naeeksperyensiahan ko sa pagtao.” Kanigoan kamakamomondo kun an kasal magigin gikanan nin pagkadesganar!

Tunay nanggad, dai maninigong ipamate sa mga nagreregalo na tanganing magin kawiliwili an saindang regalo, kaipuhan na bakalon iyan sa itinalagang basar o makaabot sa isinuherir na presyo. Total, ipinarisa ni Jesu-Cristo na an mahalagang marhay sa pagheling nin Dios iyo an kamugtakan nin puso kan nagtao, bakong an materyal na halaga kan regalo. (Lucas 21:​1-4) Kaagid kaiyan, mapadapit sa mga balaog nin pagkaherak sa mga nangangaipo, si apostol Pablo nagsurat: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.”​—2 Corinto 9:7.

Kun Biblia an pag-oolayan, mayo nin maraot na ipamidbid nin saro na sia an nagtao nin regalo, tibaad paagi sa pagbugtak nin sarong surat kaiba kan regalo. Minsan siring, sa nagkapirang lugar, kaugalean na ipamidbid an nagregalo sa gabos na presente. An kaugalean na ini puedeng magresulta sa mga problema. An mga nagtatao nin regalo tibaad habong magpamidbid tanganing malikayan na makaakit nin dai maninigong atension sa saindang sadiri. An siring na mga indibiduwal minagawe kaoyon kan prinsipyo na manonompongan sa Mateo 6:​3, na sinasabi ni Jesus: “Alagad ika, kun nagtatao nin mga balaog nin pagkaherak, dai na makaisi an saimong wala kan ginigibo kan saimong too.” Tibaad namamatean nin iba na an pagregalo sarong personal na bagay na an maninigong makaaram sana iyo an nagtao asin an nag-ako. Dugang pa, an pagpamidbid sa mga nagregalo puedeng magresulta sa pagkokomparar nin mga regalo, na “nagpupukaw nin pagdaraogan.” (Galacia 5:26) Daing duwa-duwa na mamawoton nin mga Kristiano na likayan na mapasupog an siisay man paagi sa pag-anunsiar sa publiko kan mga ngaran kan nagregalo.​—1 Pedro 3:8.

Iyo, paagi sa paggawe kaoyon kan mga prinsipyo sa Tataramon nin Dios, an pagregalo magdadanay na sarong gikanan nin kaogmahan.​—Gibo 20:35.