An Biblia Puedeng Makatabang sa Saimong Pag-agom

PAG-AGOM​—para sa nagkapira, an terminong iyan nagpapagirumdom nin nakaoogmang mga kaisipan. Para sa iba, nagpupukaw iyan nin kamondoan. “An pagmate ko garo man sana ako suway sa sakong agom,” an agrangay nin sarong agom na babae. “An pagmate ko pinabayaan ako asin napupungaw sa gabos na panahon.”

Ano an dahelan nin pagigin indiperenteng marhay kan duwang tawo na kaidto nanumpa na mamomotan asin pakamamahalon an lambang saro? An sarong dahelan iyo an kakulangan nin edukasyon sa kun ano an kalabot sa pag-agom. “Minalaog kita sa pag-agom na mayo lamang nin ano man na pagsasanay,” an sabi nin sarong peryodista sa medisina.

An bagay na pira sana ngonyan an igwa kan siring na kaaraman pinatunayan nin sarong pag-adal na ginibo kan Nasyonal na Proyekto sa Pag-agom, sarong maingat na pagsiyasat na ginibo kan Unibersidad nin Rutgers sa New Jersey, E.U.A. “An dakol sa pag-adal na ini duminakula sa bakong maogmang pag-agoman o nagdiborsiong mga magurang,” an isinurat kan mga namamahala sa proyektong ini. “Aram ninda nin eksakto kun ano an bakong mapangganang pag-agoman, alagad dai sinda segurado kun ano an mapangganang pag-agoman. An nagkapira nagsabi sana na an mapangganang pag-agoman ‘kabaliktaran kan pag-agoman kan sakong mga magurang.’”

An mga Kristiano daw libre sa mga problemang konektado sa pag-agom? Dai. Sa katunayan, an nagkapira sa mga Kristiano kan enot na siglo nangaipo nin direktang hatol na ‘dai maghingoa na makahubad’ sa saindang pag-agoman. (1 Corinto 7:27) Malinaw nanggad, an arin man na pag-agoman nin duwang bakong sangkap na tawo magkakaigwa nin mga problema, alagad igwa kita nin tabang. Puedeng mapakarhay nin mga mag-agom an saindang relasyon paagi sa pag-aplikar kan mga prinsipyo sa Biblia.

Totoo, an Biblia bakong manwal sa pag-agom. Minsan siring, mantang ipinasabong iyan kan Saro na ginikanan kan areglo nin pag-agom, makalalaom kita na an mga prinsipyo kaiyan makatatabang. Paagi ki propeta Isaias, si Jehova Dios nagsabi: “Ako, si Jehova, an saimong Dios, an Saro na nagtotokdo sa saimo na pakinabangon an saimong sadiri, an Saro na nagpapangyari sa saimo na maglakaw sa dalan na maninigo mong lakawan. O kun ika sana kutana totoong matao nin atension sa sakong mga togon! Dangan an saimong katoninongan magigin siring sa salog, asin an saimong katanosan siring sa mga alon kan dagat.”​—Isaias 48:​17, 18.

An pagkamoot daw na kaidto yaon sa tahaw nindong mag-agom nagpoon nang mawara? An pagmate mo daw nalalaom ka sa pag-agoman na mayo nin pagkamoot? An sarong babae na 26 na taon nang may agom nagsabi: “An kolog na naeeksperyensiahan sa arog kaining relasyon dai nanggad ikaladawan. Iyan nagdadanay asin dai nahahale.” Imbes na akoon na sana an dai nakakokontentong pag-agoman, taano ta dai magdesisyon na gumibo nin lakdang na remedyohan iyan? Ipaheheling kan masunod na artikulo sa mga agom na lalaki asin agom na babae kun paano an mga prinsipyo sa Biblia puedeng makatabang sa saindang pag-agoman sa sarong espesipikong kabtang​—sa saindang kapanugaan.