Taano ta Maninigo Kitang Mamibi nin Daing Ontok?

“Mamibi nin daing ontok. Magpasalamat kamo para sa gabos na bagay.”​—1 TESALONICA 5:​17, 18.

1, 2. Paano ipinaheling ni Daniel na pinahalagahan nia an pribilehio nin pamibi, asin ano an nagin epekto kaiyan sa saiyang relasyon sa Dios?

KINAUGALEAN ni propeta Daniel na mamibi sa Dios nin tolong beses kada aldaw. Nagluluhod sia sa may bintana kan saiyang kuarto sa bubongan, na paatubang sa siudad nin Jerusalem, asin ipinapahayag an saiyang mga pamibi. (1 Hade 8:46-49; Daniel 6:10) Dawa ipinagbawal nin sarong dekreto kan hade an pamimibi sa siisay man apuera ki Dario, an hade sa Media, si Daniel dai lamang nag-urong-sulong. Isinapeligro man kaiyan an saiyang buhay o dai, an tawong ini na ugale na an pamimibi nagngayongayo ki Jehova nin daing ontok.

² Paano minansay ni Jehova si Daniel? Kan dumatong an anghel na si Gabriel tanganing simbagon an saro sa mga pamibi ni Daniel, ilinadawan nia an propeta bilang “saro na kawiliwiling gayo” o “tawong namomotan na marhay.” (Daniel 9:20-23; The New English Bible) Sa hula ni Ezequiel, nasambitan ni Jehova si Daniel bilang sarong matanos na tawo. (Ezequiel 14:​14, 20) Sa nag-aging mga taon, an mga pamibi ni Daniel malinaw na nagpatalubo nin dayupot na relasyon sa saiyang Dios, sarong katunayan na rinekonoser dawa ni Dario.​—Daniel 6:16.

3. Siring sa ipinaheling kan eksperyensia nin sarong misyonero, paano kita matatabangan kan pamibi na mapagdanay an integridad?

³ An dayaday na pamibi puede man na makatabang sa sato na atubangon an grabeng mga pagbalo. Halimbawa, estudyare an nangyari ki Harold King, sarong misyonero sa Tsina na nasentensiahan nin limang taon na pagkainkomunikado. May labot sa saiyang eksperyensia, si Tugang na King nagsabi: “Puedeng ikasuway ako sa sakong mga kapwa tawo, alagad mayo nin siisay man na makakasuway sa sako sa Dios. . . . Kaya, mantang naheheling kan siisay man na tibaad umagi sa sakong selda, nagluluhod ako sa sakong selda nin tolong beses kada  aldaw asin namimibi nin makosog, na ginigirumdom si Daniel, na nasasambitan sa Biblia. . . . Garo baga sa siring na mga okasyon an espiritu nin Dios ginigiyahan an sakong isip sa pinakakapakipakinabang na mga bagay asin iyan nagpapakalma sa sakong pagmate. Kanigoan na espirituwal na kosog asin karangahan an itinao sa sako kan pamibi!”

4. Anong mga hapot may labot sa pamibi an pag-oolayan niato sa artikulong ini?

⁴ An Biblia nagsasabi: “Mamibi nin daing ontok. Magpasalamat kamo para sa gabos na bagay.” (1 Tesalonica 5:​17, 18) Huli sa hatol na ini, pag-olayan niato an minasunod na mga hapot: Taano ta maninigo niatong tawan nin atension an satong mga pamibi? Ano an mga dahelan niato na dumolok ki Jehova nin dayaday? Asin ano an maninigo niatong gibohon kun an pagmate niato dai kita angay na mamibi sa Dios dahelan sa satong mga pagkukulang?

Pataluboon an Pagkakatood Paagi sa Pamibi

5. Tinatabangan kita kan pamibi na mapasato an anong daing kaagid na pagkakatood?

⁵ Gusto daw nindo na ibilang kamo ni Jehova na saiyang katood? Siring kaiyan an pagkaunabi nia sa patriarkang si Abraham. (Isaias 41:8; Santiago 2:23) Boot ni Jehova na pataluboon niato an klaseng iyan nin relasyon sa saiya. An totoo inaagda nia kita na rumani sa saiya. (Santiago 4:8) Bako daw na an siring na pag-agda maninigong magpahiro sa sato na pensaron an daing kaagid na probisyon nin pamibi? Kanigoan kadepisil na makipag-areglo na makaolay an sarong importanteng opisyal sa gobyerno, dai na baga sabihon pa an magin katood nia! Pero, an Kaglalang kan uniberso ineenkaminar kita na daing pag-alangan na rumani sa saiya sa pamibi, noarin man niato gusto o kaipuhan na rumani. (Salmo 37:5) An satong mga pamibi na daing ontok nagtatabang sa sato na magkaigwa nin dayupot na pakikikatood ki Jehova.

6. Ano an itinotokdo sa sato kan halimbawa ni Jesus manongod sa pangangaipo na “padagos na mamibi”?

⁶ Pero pasilon nanggad na mapalimanlimanan niato an pamibi! An pag-atubang sana sa mga sakit sa pangaroaldaw na buhay puedeng makabangkag na marhay sa sato kaya dai na kita naghihingoang makipag-olay sa Dios. Inenkaminar ni Jesus an saiyang mga disipulo na “padagos na mamibi,” asin ginibo nia mismo iyan. (Mateo 26:41) Minsan ngani pirme siang sibot poon aga sagkod banggi, nagtagama sia nin panahon na makipag-olay sa saiyang langitnon na Ama. May beses na si Jesus nagbangon nin “amay pagkaaga, mantang madiklom pa,” tanganing mamibi. (Marcos 1:35) Sa ibang mga pangyayari, nagduman sia sa sarong lugar na harayo sa mga tawo pagkatapos nin maghapon tanganing makipag-olay ki Jehova. (Mateo 14:23) Si Jesus pirmeng nagtatagama nin panahon na mamibi, asin maninigo na iyo man kita.​—1 Pedro 2:21.

7. Anong mga kamugtakan an maninigong magpahiro sa sato na makipag-olay sa satong langitnon na Ama aroaldaw?

 ⁷ Kadakol nin angay na oras para sa pribadong pamibi kada aldaw mantang kita napapaatubang sa mga problema, sa mga sugot, asin kun naggigibo nin mga desisyon. (Efeso 6:18) Kun hinahagad niato an paggiya nin Dios sa gabos na aspekto nin buhay, an satong pakikikatood sa saiya siertong matalubo. Kun an mga problema magkaibanan na inaatubang nin duwang magkatood, bako daw na orog na minakosog an bogkos nin pagkakatood ninda? (Talinhaga 17:17) Totoo man iyan kun kita nananarig ki Jehova asin kun naeeksperyensiahan niato an saiyang tabang.​—2 Cronica 14:11.

8. Sa halimbawa ni Nehemias, Jesus, asin Ana, ano an manonodan niato manongod sa lawig kan satong personal na mga pamibi?

⁸ Maoogma nanggad kita na an Dios dai nagbubugtak nin limite sa kun gurano kalawig o kun gurano kaparate kita puedeng makipag-olay sa saiya sa pamibi! Si Nehemias marikas na namibi nin silensio bago ipinahayag an kahagadan sa hade nin Persia. (Nehemias 2:​4, 5) Si Jesus namibi man nin halipot kan hagadon nia ki Jehova na tawan sia nin kapangyarihan na buhayon liwat si Lazaro. (Juan 11:​41, 42) Sa ibong na lado, si Ana ‘namibi nin halawig sa atubangan ni Jehova’ kan ipahayag nia sa saiya an nasa puso nia. (1 Samuel 1:​12, 15, 16) An satong personal na mga pamibi puedeng halipot o halawig segun sa pangangaipo asin sa mga kamugtakan.

9. Taano ta maninigo na kaiba sa satong mga pamibi an pag-omaw asin pagpasalamat sa gabos na ginigibo ni Jehova para sa sato?

⁹ An dakol na pamibi sa Biblia nagpapahayag nin odok sa pusong apresasyon sa supremong posisyon ni Jehova asin sa saiyang makangangalas na mga gibo. (Exodo 15:1-19; 1 Cronica 16:7-36; Salmo 145) Sa sarong bisyon, naheling ni apostol Juan an 24 kamagurangan​—an kompletong kabilangan nin linahidan na mga Kristiano sa saindang langitnon na kamugtakan​—na nag-oomaw ki Jehova, na sinasabi: “Maninigo ka, Jehova, na samong Dios, na mag-ako kan kamurawayan asin kan onra patin kan kapangyarihan, huli ta linalang mo an gabos na bagay, asin huli sa saimong kabotan an mga iyan naglataw asin nalalang.” (Kapahayagan 4:​10, 11) Kita igwa man nin dahelan na omawon nin dayaday an Kaglalang. Abaang ogma kan mga magurang kun pinasasalamatan sinda kan aki ninda nin gikan sa puso huli sa sarong bagay na ginibo ninda para sa saiya! An may pag-apresyar na paghorophorop sa mga kabootan ni Jehova asin pagpahayag kan satong odok sa pusong pagpasalamat para sa mga iyan sarong marahayon na paagi tanganing mapaoswag an kualidad kan satong mga pamibi.

“Mamibi nin Daing Ontok”​—Taano?

10. May anong kabtang an pamibi sa pagpakosog sa satong pagtubod?

¹⁰ An dayaday na pamibi kaipuhan sa satong pagtubod. Pakatapos na iilustrar an pangangaipo na “danay na mamibi asin dai manluya,” si Jesus  naghapot: “Kun dumatong na an Aki nin tawo, talaga daw na makukua nia an pagtubod sa daga?” (Lucas 18:1-8) An makahulogan, odok sa pusong pamibi nagpapatalubo nin pagtubod. Kan an patriarkang si Abraham naggugurang na asin dai pang aki, ipinakipag-olay nia iyan sa Dios. Bilang simbag, pinatingag nguna sia ni Jehova sa kalangitan asin pinabilang an mga bitoon, kun mabibilang nia iyan. Dangan inasegurar giraray nin Dios si Abraham: “Magigin siring an saimong banhi.” An resulta? Si Abraham “tuminubod ki Jehova; asin ibinilang nia iyan sa saiya na katanosan.” (Genesis 15:​5, 6) Kun satuyang ipapahayag ki Jehova sa pamibi an nasa puso niato, aakoon an saiyang mga pag-asegurar gikan sa Biblia, asin kukuyogon sia, pakokosogon nia an satong pagtubod.

11. Paano kita matatabangan kan pamibi sa pagresolber sa mga problema?

¹¹ An pamibi makatatabang man sa sato sa pagresolber sa mga problema. Kita daw nagagabatan sa kamugtakan niato sa buhay asin nasasakitan sa mga situwasyon na inaatubang niato? Sinasabihan kita kan Biblia: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.” (Salmo 55:22) Kun napapaatubang sa depisil na mga desisyon, puede niatong arogon an halimbawa ni Jesus. Magdamlag siang namibi nin pribado bago ninombrahan an 12 apostol nia. (Lucas 6:12-16) Asin kan banggi bago sia nagadan, grabe an pamibi ni Jesus kaya “an saiyang ganot nagin siring sa mga toro nin dugo na nagdadalahay sagkod sa daga.” (Lucas 22:44) An resulta? “Sia dinangog na may pabor huli sa saiyang diosnon na takot.” (Hebreo 5:7) An satong odok asin daing ontok na mga pamibi matabang sa sato na makaya an nakakatension na mga situwasyon asin masakit na mga pagbalo.

12. Paano ipinaheheling kan pamibi an personal na interes ni Jehova sa sato?

¹² An saro pang dahelan na kita orog na rumani ki Jehova paagi sa pamibi iyo na sia man orog na minarani sa sato. (Santiago 4:8) Kun ipinahahayag niato ki Jehova sa pamibi an nasa puso niato, bako daw na namamatean niato na sia interesado sa satong mga pangangaipo asin mamomoton na nagmamakolog sa sato? Naeeksperyensiahan niato an pagkamoot nin Dios sa personal na marhay na paagi. Dai idinelegar ni Jehova sa siisay pa man an paninimbagan na hinanyogon an lambang pamibi na ipinahahayag kan saiyang mga lingkod sa saiya bilang saindang langitnon na Ama. (Salmo 66:​19, 20; Lucas 11:2) Asin inaagda nia kita na ‘ibugtak an gabos niatong kahaditan sa saiya huli ta sia may pagmakolog sa sato.’​—1 Pedro 5:​6, 7.

13, 14. Ano an satong mga dahelan na mamibi nin daing ontok?

¹³ An pamibi puedeng magtao sa sato nin orog na kaigotan sa pampublikong ministeryo asin  magpakosog sa sato kun tibaad garo gusto na niatong pumondo dahel sa pagkaindiperente o pagtumang kan mga tawo. (Gibo 4:23-31) Puede man kitang protehiran kan pamibi tumang sa “mga pakana kan Diablo.” (Efeso 6:​11, 17, 18) Kun nasasakitan sa pag-atubang sa aroaldaw na mga pagbalo, puede kitang daing ontok na mag-arang sa Dios na logod pasarigon kita. Kabale sa modelong pamibi ni Jesus an kahagadan na “iligtas [kita ni Jehova] sa maraot,” si Satanas na Diablo.​—Mateo 6:13.

¹⁴ Kun padagos kitang mamimibi na logod tabangan kitang kontrolon an satong makasalan na mga inklinasyon, maeeksperyensiahan niato an pagtabang ni Jehova. Nasa sato an asegurasyon na ini: “Fiel an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.” (1 Corinto 10:13) Naeksperyensiahan mismo ni apostol Pablo an nagpapakosog na pagmakolog ni Jehova sa laen-laen na kamugtakan. “Igwa ako kan kosog para sa gabos na bagay huli sa saiya na nagtatao nin puersa sa sako,” an sabi nia.​—Filipos 4:13; 2 Corinto 11:23-29.

Magmaigot sa Pamimibi sa Ibong nin mga Pagkukulang

15. Ano an puedeng mangyari kun an satong gawe-gawe dai makaabot sa mga pamantayan nin Dios?

¹⁵ Tanganing dangogon na may pabor an satong mga pamibi, dai niato dapat pagsayumahan an konseho sa Tataramon nin Dios. “Ano man an satong hagadon inaako niato gikan sa saiya,” an isinurat ni apostol Juan, “huli ta kinukuyog niato an saiyang mga pagboot asin ginigibo niato an mga bagay na nakapaoogma sa saiyang mga mata.” (1 Juan 3:22) Pero ano an puedeng mangyari kun an satong gawe-gawe dai makaabot sa mga pamantayan nin Dios? Si Adan asin Eva nagtago pagkatapos nindang magkasala sa tatamnan nin Eden. Tibaad gusto man niatong magtago “sa lalauogon ni Jehova” asin dai na mamibi. (Genesis 3:8) “Narisa ko na an pirmeng enot na salang ginigibo kan mga napaparayo ki Jehova asin sa saiyang organisasyon iyo na sinda minapondo sa pamimibi,” an obserbasyon ni Klaus, sarong eksperyensiadong nagbibiaheng paraataman. (Hebreo 2:1) Ini an nangyari ki Jose Angel. Sabi nia: “Sa laog nin haros walong taon, bihira akong namibi ki Jehova. An pagmate ko dai ako angay na makipag-olay sa saiya, minsan ngani ibinibilang ko pa man giraray sia na sakong langitnon na Ama.”

16, 17. Tumao nin mga halimbawa kun paano an dayaday na pamibi puedeng makatabang sa sato na madaog an espirituwal na kaluyahan.

¹⁶ An nagkapira sa sato tibaad makamate na dai angay na mamibi huli sa espirituwal na kaluyahan o tibaad naholog kita sa salang gibo. Alagad ini an mismong panahon na kaipuhan niatong lubos na aprobetsaran an probisyon nin pamibi. Si Jonas duminulag sa saiyang asignasyon. Alagad ‘sa saiyang mga kasakitan, si Jonas nag-arang ki Jehova, asin sinimbag Nia sia. Sa tulak nin Sheol, si Jonas naghagad nin tabang, asin dinangog ni Jehova an saiyang tingog.’ (Jonas 2:2) Namibi si Jonas, sinimbag ni Jehova an saiyang pamibi, asin si Jonas naulian sa espirituwal.

¹⁷ Si Jose Angel odok man na namibi para sa tabang. Nagigirumdoman nia: “Ipinahayag ko an nasa puso ko asin nakimaherak sa Dios na logod patawadon nia. Asin talagang tinabangan nia ako. Sa pagmate ko dai na kutana ako nakabalik sa katotoohan kun bakong sa tabang kan pamibi. Dayaday na akong namimibi ngonyan kada aldaw, asin inaantisipar ko an mga oras na ini.” Maninigo na dai kita noarin man mag-alangan na makipag-olay nin prangka sa Dios manongod sa satong mga sala asin mapakumbabang hagadon na logod patawadon nia. Kan ituga ni Hadeng David an saiyang mga paglapas, pinatawad ni Jehova an saiyang mga kasalan. (Salmo 32:3-5) Gusto ni Jehova na tabangan kita, bakong kondenaron kita. (1 Juan 3:​19, 20) Asin an mga pamibi kan kamagurangan na lalaki sa kongregasyon puedeng makatabang sa  sato sa espirituwal, huli ta an siring na mga pamibi may “dakulang puersa.”​—Santiago 5:13-16.

18. Sa ano makakokompiar an mga lingkod nin Dios gurano man karayo an tibaad pagkalagalag ninda?

¹⁸ Siisay na ama an sasayumahan an sarong aki na mapakumbabang minarani sa saiya tanganing humagad nin tabang asin sadol pakatapos na masala? An parabola kan gastador na aki nagpapaheling na gurano man karayo an tibaad pagkalagalag niato, an satong langitnon na Ama naggagayagaya kun kita bumalik sa saiya. (Lucas 15:​21, 22, 32) An gabos na napapasala sinasadol ni Jehova na mag-apod sa saiya, “huli ta sia bulaos na magpapatawad.” (Isaias 55:​6, 7) Minsan ngani nakagibo si David nin nagkapirang magabat na kasalan, nag-apod sia ki Jehova, na nagsasabi: “Dangoga, O Dios, an sakong pamibi; asin dai mo pagtagoan an sakong paghagad nin pabor.” Sinabi man nia: “Sa banggi asin sa aga patin sa odto dai akong maginibo kundi maghadit asin ako nag-aagrotong, asin dinadangog [ni Jehova] an sakong tingog.” (Salmo 55:​1, 17) Nakapasasarig nanggad sa boot!

19. Taano ta dai kita maninigong magkonklusyon na an garo baga dai sinisimbag na mga pamibi ebidensia kan dai pag-oyon nin Dios?

¹⁹ Paano kun an satong mga hinahagad dai tolos sinisimbag? Kun siring, dapat niatong seguradohon na an satong hinahagad kaoyon kan kabotan ni Jehova asin ipinamimibi sa ngaran ni Jesus. (Juan 16:23; 1 Juan 5:14) Nasambitan ni disipulo Santiago an nagkapirang Kristiano na an mga pamibi dai sinisimbag huli ta sinda ‘naghahagad para sa salang katuyohan.’ (Santiago 4:3) Sa ibong na lado, dai kita maninigong magkonklusyon tolos na an garo baga dai sinisimbag na mga pamibi pirmeng ebidensia kan dai pag-oyon nin Dios. Kun beses puedeng pabayaan ni Jehova an fiel na mga parasamba na magpadagos sa pamimibi manongod sa sarong bagay sa kadikit na panahon bago maheling an saiyang simbag. “Padagos na maghagad, asin ta iyan itatao sa saindo,” sabi ni Jesus. (Mateo 7:7) Huli kaini, kaipuhan kitang ‘magmaigot sa pamimibi.’​—Roma 12:12.

Mamibi nin Dayaday

20, 21. (a) Taano ta kaipuhan kitang mamibi nin daing ontok sa “huring mga aldaw” na ini? (b) Ano an aakoon niato kun kita aroaldaw na minadolok sa trono nin dai na kutana maninigong kabootan ni Jehova?

²⁰ An mga sakit asin problema nag-oorog sa “huring mga aldaw” na ini, na tinandaan kan “delikadong mga panahon na masakit pakibagayan.” (2 Timoteo 3:1) Asin an satong isip madaling magin okupado huli sa mga pagbalo. Minsan siring, an satong daing ontok na mga pamibi matabang sa sato na papagdanayon na nakaturuhok sa espirituwal na mga bagay an satong buhay sa ibong nin daing ontok na mga problema, sugot, asin panluluya kan boot. An aroaldaw na mga pamibi niato ki Jehova puedeng magtao kan mahalagang marhay na suportang kinakaipuhan niato.

²¹ Si Jehova, an “Paradangog nin pamibi,” nungkang sibot na marhay tanganing dangogon kita. (Salmo 65:2) Nungka kitang magin sibot na marhay tanganing makipag-olay sa saiya. An satong pakikikatood sa Dios iyo an pinakamahal na marhay na rogaring niato. Logod na dai niato iyan noarin man ipasipara na sana. “Kun siring, kita dumolok na may katalingkasan sa pagtaram sa trono nin dai na kutana maninigong kabootan, tanganing kita magkamit nin pagkaherak asin makakua nin dai na kutana maninigong kabootan na makatatabang sa igong panahon.”​—Hebreo 4:16.

Ano an Isisimbag Nindo?

• Ano an manonodan niato ki propeta Daniel manongod sa kahalagahan nin pamibi?

• Paano niato mapakokosog an satong pakikikatood ki Jehova?

• Taano ta maninigo kitang mamibi nin daing ontok?

• Taano an mga pakamate nin pagigin dai angay ta dai maninigong makaolang sa sato na mamibi ki Jehova?

[Mga Hapot Para sa Pag-adal]

[Ritrato sa pahina 16]

Si Nehemias namibi nin halipot asin silensio bago nakipag-olay sa hade

[Ritrato sa pahina 17]

Si Ana ‘namibi nin halawig sa atubangan ni Jehova’

[Mga Ritrato sa pahina 18]

Si Jesus magdamlag na namibi bago ninombrahan an 12 apostol nia

[Mga Ritrato sa pahina 20]

May mga oportunidad na mamibi sa bilog na aldaw