Bareta kan mga Parabalangibog kan Kahadean

“Bago Ini Sako!”

INIBANAN ni Dorota, sarong bilog na panahon na ministro kan Mga Saksi ni Jehova sa Polandia, an saiyang 14 anyos na aking lalaki sa rutinang pagpaheling sa klinika kan eskuelahan. Durante kan pag-eksamin, hinapot si Dorota kan doktor na si Janina * manongod sa mga obligasyon kan saiyang aki sa harong.

“Kun dai ko kayang gibohon iyan, an sakong aki an nag-aandam kan pamanggihan para sa samo gabos na anom sa pamilya,” an simbag ni Dorota. “Naglilinig man sia nin harong asin nagtatabang sa mga paghirohirahay sa harong. Hilig niang magbasa. Maigot siang estudyante.”

“Pambihirang marhay iyan,” an sabi ni Janina. “Doseng taon na akong nagtatrabaho digdi, asin nungka akong nakadangog nin arog kaini.”

Narisa an oportunidad na magpatotoo, si Dorota nagpaliwanag: “Dakol na magurang ngonyan an dai natatawan nin tamang pagpatood an saindang mga aki. Iyan an dahelan na sa parate an mga aki ninda may hababang paggalang sa sadiri.”

“Paano mo naaraman an gabos na ini?” an hapot ni Janina. “Kadaklan na magurang mayo lamang nin aram sa mga bagay na ini.”

“An Biblia mahalagang marhay na gikanan nin siring na mga impormasyon,” an simbag ni Dorota. “Halimbawa, segun sa Deuteronomio 6:6-9, an pag-edukar sa satong mga aki minapoon sa pag-edukar sa satong sadiri. Bako daw na maninigo nguna niatong itadom sa sato mismong puso asin isip an mga prinsipyo sa buhay na gusto niatong itadom sa satong mga aki?”

“Pambihirang marhay ini,” an sabi ni Janina. “Pambihirang marhay ini!” Dangan hinapot nia si Dorota kun paano nakatabang sa saiya an Biblia sa pagpapadakula asin pagtotokdo sa saiyang mga aki.

“Pinag-aadalan mi an Biblia kada semana kaiba an samong mga aki,” an paliwanag ni Dorota. “Ginagamit mi an libro na may titulong Questions Young People Ask​—Answers That Work.” * Dangan ilinadawan nia an libro asin sinambit an nagkapira sa mga topiko na tinotokar kaiyan.

“Bago ini sako!” an kagsing ni Janina. “Puede ko daw na maheling an librong iyan?”

Pakalihis nin sarong oras, nagbuelta si Dorota na dara an libro.

“Ano an relihion nindo?” an hapot ni Janina, mantang sinisiyasat nia an libro.

“Saro ako sa Mga Saksi ni Jehova.”

“Paano tinatratar kan Mga Saksi ni Jehova an mga iba man an pagtubod?”

“Arog kan pagtratar ko saimo​—may paggalang,” an simbag ni Dorota, na idinugang pa: “Siempre, minamawot niamo na makaaram man sinda kan katotoohan sa Biblia.”

“Ngonyan pa sana marahayon na an sakong pagmate,” an pagtuga ni Janina.

Sa pagtatapos kan saiyang pagbisita, sinadol ni Dorota si Janina na basahon an Biblia. “Matao iyan nin kahulogan sa saimong buhay asin matabang sa saimo sa trabaho mo.”

“Talagang nadagka mo akong gibohon iyan,” an pag-admitir ni Janina.

Huli sa pagkamataktika asin pagigin determinado, ginibo ni Dorota an sarong rutinang pagpaheling sa doktor na magin marahay na pagpatotoo.​—1 Pedro 3:15.

[Mga Nota sa Ibaba]