Mga Hapot Hale sa mga Parabasa

Ano an bautismo para sa mga gadan?

Kan magsurat manongod sa langitnon na pagkabuhay liwat, isinurat ni apostol Pablo an sarong interesanteng gayong teksto. Mababasa niato sa King James Version: “Ta kun dai ano an gigibohon ninda na binabautismohan para sa mga gadan, kun an mga gadan dai nabubuhay liwat? taano kun siring ta sinda binabautismohan para sa mga gadan?” Asin itrinadusir kan The New Jerusalem Bible an tekstong ini: “Ano an gigibohon nin mga tawo na nagpapabautismo para sa mga gadan? Kun an mga gadan dai nanggad bubuhayon liwat, ano pa an katuyohan kan pagpabautismo para sa sainda?”​—1 Corinto 15:29.

Isinusuherir daw ni Pablo digdi na an buhay na mga tawo babautismohan para sa mga nagadan na dai nabautismohan? Garo baga ini an ikokonklusyon sa mga tekstong ini asin sa nagkapira pang traduksion nin Biblia. Minsan siring, an pagsiyasat na marhay sa Kasuratan sagkod sa orihinal na Griego na ginamit ni Pablo nagsusuherir nin saro pang konklusyon. Boot sabihon ni Pablo na an linahidan na mga Kristiano babautismohan, o ilaladop, sa sarong pamumuhay na masagkod sa kagadanan na may integridad arog kan kagadanan ni Cristo. Dai mahahaloy, sinda bubuhayon pasiring sa espiritung buhay arog nia.

Sinusuportaran kan Kasuratan an paliwanag na ini. Sa saiyang surat sa mga taga Roma, isinurat ni Pablo: “Dai daw nindo naaaraman na kita gabos na nabautismohan dian ki Cristo Jesus nabautismohan dian sa saiyang kagadanan?” (Roma 6:3) Sa saiyang surat sa mga taga Filipos, nagtaram si Pablo manongod sa sadiri nia na nagsasabi: ‘Nakikidamay sa mga tinios ni Cristo, na nagnanamit nin kagadanan na kabaing kan saiya, tanganing probaran kun sa ano man na paagi makamtan ko an mas amay na pagkabuhay liwat hale sa mga gadan.’ (Filipos 3:​10, 11) Sinasabi ni Pablo na kalabot sa buhay nin sarong linahidan na parasunod ni Cristo an pagdadanay na may integridad sa irarom nin pagbalo, aroaldaw na pakaatubang sa kagadanan, asin sa katapustapusi kagadanan na may integridad, kasunod an langitnon na pagkabuhay liwat.

Mahalagang mangnohon na ini asin an iba pang teksto na direktang sinasambit an kagadanan may koneksion sa mga binautismohan nagtataram manongod sa buhay na mga indibiduwal na bautisado na asin bakong sa mga gadan na. Sinabihan man ni Pablo an kapwa linahidan na mga Kristiano: “Ilinobong kamo kaiba nia sa saiyang bautismo, asin huli sa relasyon nindo sa saiya kamo binuhay man liwat na magkairiba paagi sa pagtubod nindo sa paghiro nin Dios, na iyong buminuhay liwat sa saiya sa mga gadan.”​—Colosas 2:12.

An Griegong preposisyon na hy·perʹ, na trinadusir na “para” o “para sa” sa manlaenlaen na bersion nin Biblia sa 1 Corinto 15:​29, puede man na mangahulogan nin “sa katuyohan na.” Kaoyon kan iba pang teksto sa Biblia, an New World Translation of the Holy Scriptures kun siring tamang trinadusir an bersikulong ini: “Ano an gigibohon ninda na binabautismohan sa katuyohan na magin mga gadan? Kun an mga gadan dai nanggad bubuhayon liwat, taano man sinda ta binabautismohan sa katuyohan na magin siring?”