Pag-interbenir nin Dios—Ano an Maaasahan Niato?

KAN ikawalong siglo B.C.E., naaraman kan 39 anyos na si Hadeng Ezequias nin Juda na sia igwa nin ikagagadan na helang. Nalunosan kan bareta, si Ezequias nakimaherak sa Dios sa pamibi na paomayan sia. Nagsimbag an Dios paagi sa saiyang propeta: “Nadangog ko an saimong pamibi. Naheling ko an saimong mga luha. Uya, dudugangan ko an saimong mga aldaw nin kinseng taon.”​—Isaias 38:1-5.

Taano ta nag-interbenir an Dios sa partikular na pangyayaring iyan? Dakol na siglo bago kaidto, an Dios nanuga sa matanos na si Hadeng David: “An saimong kamag-anakan asin an saimong kahadean sierto nanggad na magigin marigon sagkod sa panahon na daing talaan sa atubangan mo; an saimo mismong trono magigin saro na masarig sagkod sa panahon na daing talaan.” Ihinayag man nin Dios na an Mesiyas mamumundag sa linahe ni  David. (2 Samuel 7:16; Salmo 89:​20, 26-29; Isaias 11:1) Kan magkahelang si Ezequias, mayo pa siang aki. Huli kaini, an sa hadeng linahe ni David nasa peligrong maputol. Naotob kan pag-interbenir nin Dios sa kaso ni Ezequias an espesipikong katuyohan na maingatan an linahe na masagkod sa Mesiyas.

Tanganing maotob an saiyang mga panuga, napahiro si Jehova na mag-interbenir para sa saiyang banwaan sa dakol na okasyon sa bilog na peryodo bago kan mga Kristiano. Ipinahayag ni Moises may koneksion sa pagkaligtas kan Israel hale sa pagkaoripon sa Egipto: “Huli sa pagkamoot sa saindo ni Jehova, asin huli sa saiyang pag-otob sa sumpa na saiyang isinumpa sa saindong mga apoon, na kamo ilinuwas ni Jehova paagi sa makosog na kamot.”​—Deuteronomio 7:8.

Siring man, kan enot na siglo, an pag-interbenir nin Dios nagpangyaring mapaoswag an mga katuyohan nin Dios. Halimbawa, sa dalan pasiring sa Damasco, an sarong Judio na an ngaran Saulo nagkaigwa nin milagrosong bisyon tanganing papondohon sia sa paglamag sa mga disipulo ni Cristo. An pagkakombertir kan tawong ini, na nagin si apostol Pablo, nagkaigwa nin mahalagang marhay na kabtang sa pagpalakop kan maogmang bareta sa tahaw kan mga nasyon.​—Gibo 9:1-16; Roma 11:13.

Pag-interbenir daw an Pirmeng Nangyayari?

An pag-interbenir daw nin Dios iyo an normal na nangyayari o pambihira sana? Malinaw na ipinaheheling kan Kasuratan na iyan bako nanggad na an pirmeng nangyayari. Minsan ngani ilinigtas nin Dios an tolong hoben na Hebreo na dai magadan sa sarong nagkakalayong horno asin si propeta Daniel hale sa lungib nin mga leon, dai sia naghiro tanganing iligtas sa kagadanan an iba pang propeta. (2 Cronica 24:​20, 21; Daniel 3:21-27; 6:16-22; Hebreo 11:37) Milagrosong  ilinigtas si Pedro sa bilanggoan na duman sia linaom ni Herodes Agripa I. Pero, an hade man sanang ini an nagpagadan ki apostol Santiago, asin dai nag-interbenir an Dios tanganing maolang an krimen na ini. (Gibo 12:1-11) Minsan ngani tinawan nin Dios an mga apostol nin kapangyarihan na magpaomay nin may helang asin magbuhay pa ngani nin gadan, dai sia nagtogot na haleon an “tonok sa laman” na nagpasakit ki apostol Pablo, na tibaad sarong pisikal na kamatean.​—2 Corinto 12:7-9; Gibo 9:32-41; 1 Corinto 12:28.

Dai nag-interbenir an Dios tanganing olangon an biglang paggrabe nin paglamag na ginibo tumang sa mga disipulo ni Cristo kan Romanong si Emperador Nero. An mga Kristiano pinadusahan, sinolong buhay, asin iinapon sa mabangis na mga hayop. Minsan siring, an pagtumang na ini dai nakabigla sa enot na mga Kristiano, asin dai nanggad iyan nakapaluya sa saindang pagtubod sa pag-eksister nin Dios. Total, pinatanidan na ni Jesus an saiyang mga disipulo na sinda dadarahon sa atubangan nin mga korte asin na maninigo na andam sindang magdusa saka magadan pa ngani para sa saindang pagtubod.​—Mateo 10:17-22.

Arog kan ginibo nia kan nakaagi, tunay nanggad na kaya nin Dios na iligtas ngonyan an saiyang mga lingkod sa peligrosong mga kamugtakan, asin dai dapat kritikaron an mga naniniwala na sinda nakinabang sa saiyang proteksion. Minsan siring, depisil sabihon nin patapos kun baga an Dios nag-interbenir o dai sa arog kaiyan na mga pangyayari. Nagkapirang fiel na lingkod ni Jehova an naerido sa sarong pagputok sa Toulouse, asin rinibong fiel na Kristiano an nagadan sa mga kampong Nazi asin Komunista o sa irarom nin iba pang makaturotristeng sirkonstansia na dai nag-interbenir an Dios tanganing maolang iyan. Taano ta dai sistematikong nag-iinterbenir an Dios para sa gabos na inooyonan nia?​—Daniel 3:​17, 18.

“An Panahon Asin Pagkanorongod”

Kun minatira an grabeng kapahamakan, maski siisay puedeng maapektaran, asin an pagigin fiel sa Dios dai man talaga nin labot dian. Durante kan pagputok sa Toulouse, kun saen si Alain asin Liliane nakaligtas, 30 katawo an nagadan asin ginatos an naerido, dawa ngani bako man ninda iyan na sala. Sa mas dakulang sokol, manampulong ribo katawo an nabibiktima nin krimen, bakong maingat na pagmamaneho, o mga guerra, asin an Dios dai puedeng basolon sa mga remalasong nangyari sainda. Ipinagigirumdom sa sato kan Biblia na “an panahon asin pagkanorongod nangyayari” sa gabos.​—Eclesiastes 9:11.

Dugang pa, an mga tawo nagkakahelang, naggugurang, asin nagagadan. Dawa an nagkapira na nagsasaboot na milagroso sindang ilinigtas nin Dios o itinatao sa saiya an kredito para sa dai linalaoman na pagkaomay sa saindang helang nagadan man giraray pag-abot nin panahon. An paghale sa helang asin kagadanan patin an ‘pagpahid sa gabos na luha’ sa mata nin mga tawo sa ngapit pa.​—Kapahayagan 21:1-4.

Tanganing mangyari iyan, kaipuhan an sarong bagay na mas mahiwas an sakop asin ekstraordinaryo kisa paminsanminsan na pag-interbenir sana. Sinasabi kan Biblia an sarong pangyayari na inaapod na “an dakulang aldaw ni Jehova.” (Sofonias 1:14) Durante kan dakulaon na pag-interbenir na ini, hahaleon nin Dios an gabos na karatan. Itatao sa katawohan an oportunidad na mabuhay sagkod lamang sa sangkap na mga kamugtakan, kun saen “an dating mga bagay dai na magigirumdoman, ni masabong pa iyan sa puso.” (Isaias 65:17) Dawa an mga gadan bubuhayon liwat, sa paaging iyan binabawi an epekto kan tunay nanggad na kadarudakulai sa gabos na trahedya nin tawo. (Juan 5:​28, 29) Sa panahon na iyan sararoan sanang mareresolberan na nin Dios sa saiyang daing katapusan na pagkamoot asin karahayan an mga problema nin katawohan.

Kun Paano Nag-iinterbenir an Dios Ngonyan

Minsan siring, dai man ini nangangahulogan na mientras tanto an Dios indiperenteng nagheheling na sana mantang an mga linalang nagsasakit nin labi-labi. Ngonyan, itinatao nin Dios sa gabos na tawo, ano man an saindang rasa o sosyal  na pinaghalean, an oportunidad na mamidbid sia asin magpatalubo nin personal na relasyon sa saiya. (1 Timoteo 2:​3, 4) Isinaysay ni Jesus an prosesong ini sa mga tataramon na ini: “Dai nin makadodolok sa sako kun dai sia dagkahon kan Ama na nagsugo sa sako.” (Juan 6:44) Dinadagka nin Dios sa saiya an sadiosan an pusong mga tawo paagi sa mensahe kan Kahadean na ibinabalangibog kan saiyang mga lingkod sa bilog na kinaban.

Dugang pa, direktang iniimpluwensiahan nin Dios an buhay kan mga gustong magpagiya sa saiya. Paagi sa saiyang banal na espiritu, ‘binubukasan nin Dios an saindang mga puso’ tanganing masabotan an saiyang kabotan asin isagibo an kahagadan nia. (Gibo 16:14) Iyo, paagi sa pagtao nin oportunidad na mamidbid sia, an saiyang Tataramon, asin an saiyang mga katuyohan, itinatao nin Dios an prueba kan saiyang mamomoton na interes sa lambang saro sa sato.​—Juan 17:3.

Ultimo, tinatabangan nin Dios an saiyang mga lingkod ngonyan, bakong paagi sa milagrosong pagliligtas sa sainda, kundi paagi sa pagtao sa sainda kan saiyang banal na espiritu asin kan “puersa na labi sa ordinaryo” tanganing makaya an ano man na situwasyon na tibaad mapaatubang sa sainda. (2 Corinto 4:7) Si apostol Pablo nagsurat: “Igwa ako kan kosog para sa gabos na bagay huli sa saiya [ki Jehova Dios] na nagtatao nin puersa sa sako.”​—Filipos 4:13.

Sa siring igwa kita nin gabos na dahelan na magpasalamat sa Dios kada aldaw para sa buhay asin para sa paglaom na itinatao nia sa sato na mabuhay sagkod lamang sa sarong kinaban na mayo na nin gabos na pagdusa. “Ano an ibabayad ko ki Jehova para sa gabos na pakinabang na itinao nia sa sako?” an hapot kan salmista. “Kakapotan ko an kopa nin dakulang kaligtasan, asin mag-aarang ako sa ngaran ni Jehova.” (Salmo 116:​12, 13) Makatatabang sa saindo an regular na pagbasa kan magasin na ini tanganing masabotan kun ano an nagibo, ginigibo, asin gigibohon pa nin Dios na matao sa saindo nin kaogmahan ngonyan asin nin masarig na paglaom sa ngapit.​—1 Timoteo 4:8.

[Blurb sa pahina 6]

“An dating mga bagay dai na magigirumdoman, ni masabong pa iyan sa puso.”​—Isaias 65:17.

[Mga Ritrato sa pahina 5]

Kan panahon kan Biblia, dai inolang ni Jehova an paggapo ki Zacarias . . .

ni an lagdoan na pangadan ni Herodes sa mga inosente

[Ritrato sa pahina 7]

Harani na an panahon na mawawara na an pagdusa; dawa an mga gadan mabubuhay liwat