Pakasabot sa Katuyohan nin Disiplina

ANO an minasabong sa saindong isip kun nadadangog nindo an terminong “disiplina”? An sarong diksionaryo tinatawan nin kahulogan an disiplina bilang “an gibo na pasunodon an mga tawo sa mga susundon o pamantayan nin paggawe, asin pagpadusa sa sainda kun dai ninda sinusunod iyan.” Minsan ngani bako nanggad ini an solamenteng inaakong pakahulogan, iinaatribwir nin dakol na tawo ngonyan an kaagid na negatibong konotasyon sa ano man na klase nin disiplina.

Minsan siring, laen an pagkapresentar kan Biblia sa disiplina. “An disiplina ni Jehova, O aki ko, dai mo ipagsikwal,” an isinurat kan madonong na si Hadeng Salomon. (Talinhaga 3:11) An mga tataramon na ini minapanongod, bakong sa disiplina sa pankagabsan, kundi sa “disiplina ni Jehova,” an boot sabihon, disiplina na basado sa halangkawon na mga prinsipyo nin Dios. Solamenteng an arog kaiyan na disiplina an epektibo asin kapakipakinabang sa espirituwal​—kawiliwili pa ngani. Sa kabaliktaran, an disiplina na basado sa kaisipan nin tawo na sarongat sa halangkawon na mga prinsipyo ni Jehova sa parate mapan-abuso asin nakadadanyar. Iyan an dahelan kun taano ta dakol an igwa nin negatibong aktitud sa disiplina.

Taano ta sinasadol kita na akoon an disiplina ni Jehova? Sa Kasuratan, an disiplina nin Dios ilinaladawan bilang kapahayagan kan pagkamoot nin Dios sa saiyang mga linalang na tawo. Sa siring, si Salomon nagpadagos sa pagsabi: “An namomotan ni Jehova saiyang sinasagwe, kun paanong an sarong ama nagsasagwe sa aki na saiyang ikinaoogma.”​—Talinhaga 3:12.

Disiplina o Padusa—Arin?

An disiplina na sinasabi sa Biblia igwa nin dakol na aspekto​—paggiya, pagtotokdo, pagpatood, pagsagwe, pagtatanos, asin pagpadusa pa ngani. Minsan siring, sa lambang kaso, an disiplina ni Jehova motibado nin pagkamoot, asin an pasohan kaiyan iyo na makinabang an nag-ako kaiyan. An nagtatanos na disiplina ni Jehova nungkang para sana sa katuyohan nin pagpadusa.

Sa kabaliktaran, an mga gibo nin pagpadusa nin Dios bako pirmeng an obheto iyo na ikorehir o tokdoan an tinatawan kaiyan. Halimbawa, magpoon mismo sa aldaw na nagkasala si Adan asin Eva, nagpoon na saparon ninda an mga epekto kan saindang pakisuway. Pinahale sinda ni Jehova sa paraisong hardin nin Eden, asin napasairarom sinda sa mga epekto nin pagkabakong sangkap, helang, asin paggurang. Pakalihis nin ginatos na taon nin makolog na pag-eksister, sinda nagadan sagkod lamang. Tunay nanggad na an gabos na ini padusa nin Dios, alagad iyan bakong nagtatanos na disiplina. Huling tinuyo an ginibo asin habong magsolsol, si Adan asin Eva dai na puedeng itanos.

Kabale sa iba pang pagkasaysay sa mga gibo nin pagpadusa ni Jehova an Baha kan kaaldawan ni Noe, an paglaglag sa Sodoma asin Gomorra, asin an paglaglag sa hukbo nin Egipto sa Dagat na Pula. An intension kan ginibong ini ni Jehova bakong magtao nin paggiya, pagtotokdo, o pagpatood para sa mga tinawan kaiyan. Mapadapit sa siring na mga gibo nin pagpadusa nin Dios, si apostol Pedro nagsurat: “Dai sia nag-alangan sa pagkastigo sa suanoy na kinaban, alagad ilinigtas si Noe, sarong parahulit nin katanosan, kaibanan nin pito pa kan papangyarihon nia an delubyo sa sarong kinaban nin maraot na mga tawo; asin sa paggibo sa siudad nin Sodoma asin Gomorra na magin abo sinilotan nia sinda, na nagtatao nin panalmingan para sa mga maraot dapit sa mga bagay na maabot.”​—2 Pedro 2:​5, 6.

Sa anong sentido na an mga gibong ini nin pagpadusa “nagtatao nin panalmingan para sa mga maraot dapit sa mga bagay na maabot”? Sa surat  ni Pablo sa mga taga Tesalonica, sinambit nia na an satong kaaldawan iyo an panahon na an Dios, paagi sa saiyang Aki, si Jesu-Cristo, mapaabot nin ‘pamalos sa mga dai nakamimidbid sa Dios asin sa mga dai nagkukuyog kan maogmang bareta.’ Idinugang pa ni Pablo: “An mga ini mismo magtitios kan hudisyal na padusa na daing katapusan na pagkalaglag.” (2 Tesalonica 1:​8, 9) Malinaw na an siring na padusa mayo nin intension na tokdoan o dalisayon an mga tinatawan kaiyan. Minsan siring, kun inaagda ni Jehova an saiyang mga parasamba na akoon an saiyang disiplina, dai sia nagtataram manongod sa padusa sa habong magsolsol na mga parakasala.

Makahulogan na sa pangenot dai ilinaladawan kan Biblia si Jehova bilang parapadusa. Imbes, mas parate siang ilinaladawan bilang mamomoton na paratokdo asin mapasensiang nagpapatuod. (Job 36:22; Salmo 71:17; Isaias 54:13) Iyo, an diosnon na disiplina na itinatao bilang pagtatanos pirmeng may kaibang pagkamoot asin pagpasensia. Paagi sa pakasabot sa katuyohan nin disiplina, an mga Kristiano yaon sa mas marahay na kamugtakan na mag-ako asin magtao nin disiplina na may tamang aktitud.

An Disiplina kan Mamomoton na mga Magurang

Sa laog kan pamilya asin sa laog kan Kristianong kongregasyon, kaipuhan na masabotan kan gabos an katuyohan nin disiplina. Ini nangorognang totoo sa mga nasa katongdan na may autoridad, arog kan mga magurang. An Talinhaga 13:24 nagsasabi: “An nagpopogol sa paggamit kan saiyang pamakol naoongis sa saiyang aki, alagad an namomoot sa saiya iyo an nagsisiyasat sa saiya na may pagdisiplina.”

Paano matao nin disiplina an mga magurang? An Biblia nagpapaliwanag: “Kamo, mga ama, dai nindo pagpaanggoton an saindong mga aki, kundi padagos na padakulaon sinda sa disiplina asin pagtatanos nin isip ni Jehova.” (Efeso 6:4) An konsehong ini inootro sa mga tataramon na ini: “Kamong mga ama, dai nindo pagpaanggoton an saindong mga aki, tanganing dai sinda panluyahan nin boot.”​—Colosas 3:21.

An Kristianong mga magurang na nakakasabot sa katuyohan nin disiplina dai magawe nin maringis. An prinsipyo na yaon sa 2 Timoteo 2:24 puedeng iaplikar sa paagi nin pagtao nin disiplina kan mga magurang. Si Pablo nagsurat: “An oripon kan Kagurangnan dai kaipuhan na makiiwal, kundi kaipuhan na magin maboot sa gabos, kualipikadong magtokdo.” An emosyonal na pagputok nin kaanggotan, pagsilyak, asin mapan-insulto o mapagmenos na mga tataramon bako nanggad na mamomoton na disiplina asin mayo nin lugar sa buhay nin sarong Kristiano.​—Efeso 4:31; Colosas 3:8.

An kalabot sa pagtatanos nin magurang bako sanang akto nin pagpadusa na itinatao tolos asin sa desididong paagi. An kadaklan na  aki nangangaipo nin paorootrong konseho bago ninda itanos an saindang kaisipan. Huli kaini, an mga magurang kaipuhan na magtao nin panahon, magin mapasensia, asin pag-isipan na marhay kun paano ninda itatao an disiplina. Dapat na pirme nindang isaisip na an mga aki kaipuhan na padakulaon sa “disiplina asin pagtatanos nin isip ni Jehova.” Ini nangangahulogan nin pagpatuod na nagpapadagos sa laog nin dakol na taon.

An Kristianong mga Pastor Nagdidisiplina na May Kahoyoan

Minaaplikar an kaparehong mga prinsipyo sa Kristianong kamagurangan. Bilang mamomoton na mga pastor, naghihingoa sindang pakosogon an aripompon paagi sa pagtao nin instruksion, paggiya, asin pagsagwe kun kaipuhan. Kun ginigibo iyan, isinasaisip ninda an tunay na katuyohan nin disiplina. (Efeso 4:​11, 12) Kun nakapokus sana sinda sa pagtao nin padusa, kinakastigo sana ninda an napapasala asin sagkod na sana iyan dian. Labi pa an kalabot sa disiplina nin Dios. Minomotibar nin pagkamoot, an kamagurangan nagsusubaybay asin nagpapadagos sa pagtabang. Huling tunay sindang interesado, parate sindang nag-iiskedyul nin nagkapirang sesyon nin pagparigon sa boot asin pagsasanay.

Segun sa konseho na manonompongan sa 2 Timoteo 2:​25, 26, dawa kun nakikipag-olay sa mga dai tolos nag-aako nin disiplina, an kamagurangan maninigong magtokdo na “may kahoyoan.” Dangan sinasabi kan teksto an katuyohan nin disiplina: “Tibaad sinda tawan nin Dios nin pagsolsol na magiya sa tamang kaaraman kan katotoohan, asin sinda maulian giraray hale sa siod kan Diablo.”

Kun beses, kaipuhan na itiwalag sa kongregasyon an habong magsolsol na paragibo nin sala. (1 Timoteo 1:18-20) Dawa an siring kagabat na aksion maninigong ibilang na disiplina, bako sanang padusa. Sa panapanahon, naghihingoa an kamagurangan na songkoon an natiwalag na mga indibiduwal na bako man aktibo sa paggibo nin sala. Durante kan siring na mga pagsongko, an kamagurangan minagawe kaoyon kan tunay na katuyohan nin disiplina paagi sa pagsabi kan mga lakdang na kaipuhan tanganing an saro makabalik sa Kristianong kongregasyon.

Si Jehova an Sangkap na Hokom

An siring na responsibilidad maninigong seryosohon kan mga magurang, Kristianong mga pastor, asin iba pa na may autoridad na sono sa Kasuratan na magtao nin disiplina. Dai sinda dapat mangahas na husgaran an iba bilang dai na mababakle noarin pa man. Huli kaini, an saindang disiplina maninigo na nungkang magin benggatibo o antipatikong paagi nin pagpadusa.

Totoo, inaapod si Jehova sa Biblia na an saro na matao nin magabat asin pangultimong padusa. Sa katunayan, sinasabi kan Kasuratan na  “makangingirhat na bagay an maholog sa mga kamot kan nabubuhay na Dios.” (Hebreo 10:31) Alagad mayong tawo na maninigo noarin man na ikomparar an saiyang sadiri ki Jehova sa bagay na ini o sa ano pa man. Asin mayo nin siisay man an maninigong makamate na makangingirhat na bagay an maholog sa mga kamot nin sarong magurang o sarong magurang sa kongregasyon.

May abilidad si Jehova na magibo an sangkap na pagkatimbang kun nagtatao nin disiplina. An mga tawo mayo kaiyan. Nababasa nin Dios an puso asin nadedeterminaran nia kun an sarong tawo dai na ikakatanos asin sa siring maninigo nang umako nin desidido asin pangultimong padusa. Sa ibong na lado, an mga tawo dai kayang magtao nin arog kaiyan na paghokom. Sa rason na iyan, kun kaipuhan na magtao nin disiplina, an mga nasa katongdan na may autoridad maninigo na pirmeng gibohon iyan sa katuyohan na magtanos.

Pag-ako sa Disiplina ni Jehova

Kaipuhan ta gabos an disiplina ni Jehova. (Talinhaga 8:33) Sa katunayan, maninigo na mawoton niatong gayo an disiplina na basado sa Tataramon nin Dios. Mantang pinag-aadalan niato an Tataramon nin Dios, puede niatong maako an disiplina na direktang hale ki Jehova paagi sa Kasuratan. (2 Timoteo 3:​16, 17) Minsan siring, kun beses maako kita nin disiplina hale sa mga kapwa Kristiano. An pakaaram sa tunay na intension sa pagtao kan siring na disiplina matabang sa sato na gikan sa boot na akoon iyan.

Rinekonoser ni apostol Pablo: “Totoo, mayong disiplina na sa presente garo nakagagayagaya, kundi nakamomondo.” Dangan idinugang nia: “Pero pagkatapos duman sa mga napatood kaiyan iyan nagbubunga nin toninong na bunga, arin na baga, an katanosan.” (Hebreo 12:11) An disiplina ni Jehova kapahayagan kan saiyang hararom na pagkamoot sa sato. Baga man kita minaako o minatao nin disiplina, danay niatong isaisip an katuyohan kan disiplina nin Dios asin himateon an madonong na hatol kan Biblia: “Mangapot ka sa disiplina; dai mo iyan pagbutasan. Ingatan mo iyan, huli ta iyan mismo an saimong buhay.”​—Talinhaga 4:13.

[Mga Ritrato sa pahina 21]

An habong magsolsol na mga parakasala maako nin hudisyal na padusa nin Dios, bakong kan saiyang nagtatanos na disiplina

[Mga Ritrato sa pahina 22]

Minomotibar nin pagkamoot, an kamagurangan nagtatao nin panahon sa pagsiyasat asin pagtabang sa mga napapasala

[Mga Ritrato sa pahina 23]

Mapasensia asin mamomoton na itinatao kan mga magurang an “disiplina asin pagtatanos nin isip ni Jehova”