Saindo daw na ‘Sinisipa an Sogkod na Panudok’?

KAN mga panahon kan Biblia, an sogkod na panudok sa baka​—sarong halabang sogkod, na sa parate an poro may mapanas na metal na pantusok​—ginagamit sa pag-alaw asin paggiya sa paraguyod na mga hayop. Kun an hayop may kasutilan na linalabanan an mga tusok kan sogkod na panudok paagi sa pagtulod kaiyan, ano an resulta? Imbes na maginhawahan, kinokologan sana kaiyan an sadiri.

An binuhay liwat na si Jesu-Cristo nagtaram manongod sa mga sogkod na panudok kan sia magpaheling sa sarong tawo na an ngaran Saulo, na paduman sa pag-arestar sa mga disipulo ni Jesus. Hale sa tahaw nin nakabubutang liwanag, nadangog ni Saulo si Jesus na nagsabi: “Saulo, Saulo, taano ta pinaglalamag mo ako? An pagparasipa sa sogkod na panudok an nagpapagin masakit para sa saimo.” Sa pagmaltrato sa mga Kristiano, si Saulo talagang nakikipaglaban tumang sa Dios, na nagsusunod sa dalan na makadadanyar sana sa sadiri nia.​—Gibo 26:14.

Puede man daw niatong dai tuyong ‘pagparasipaon an sogkod na panudok’? Iinagid kan Biblia “an mga tataramon kan mga madonong” sa mga sogkod na panudok sa baka na nagmomotibar sa sato na umabante sa tamang direksion. (Eclesiastes 12:11) An ipinasabong na hatol sa Tataramon nin Dios puedeng magmotibar asin maggiya sa sato nin tama​—kun totogotan ta iyan. (2 Timoteo 3:16) An pagkontra sa pagmotibar kaiyan makadadanyar sana sa sato.

Isinapuso ni Saulo an mga tataramon ni Jesus, binago nia an saiyang dalan, asin sia nagin an namomotan na marhay na Kristianong apostol na si Pablo. An paghimate niato sa hatol nin Dios matao man sa sato nin daing sagkod na mga bendisyon.​—Talinhaga 3:1-6.

[Picture Credit Line sa pahina 32]

L. Chapons/Illustrirte Familien-Bibel nach der deutschen Uebersetzung Dr. Martin Luthers