“Dai Kamo Makipagsakal na Bakong Timbang”

AROG kan maheheling nindo digdi, an kamelyo asin toro na magkaibanan na nag-aarado bako nanggad na komportable kun hehelingon. An sakal na nagtatakod sa sainda​—na ginibo para sa duwang hayop na magkapareho kadakula asin pareho sa kosog​—nagpapasakit sa duwang hayop. Huling interesado sa ikararahay kan siring na paraguyod na mga hayop, sinabihan nin Dios an mga Israelita: “Dai ka mag-arado paagi sa pinag-ibang baka asin asno.” (Deuteronomio 22:10) An iyo man sanang prinsipyo aplikado sa sarong toro asin sarong kamelyo.

Sa parate, dai pasasakitan nin arog kaiyan kan sarong paraoma an saiyang mga hayop. Alagad kun mayo sia nin duwang toro, tibaad pag-ibanon nia sa sakal an duwang hayop na igwa sia. Minalataw na ini an ginibo kan paraoma kaidtong ika-19 siglo na maheheling ta sa ilustrasyon na ini. Huli ta magkalaen an kadakulaan asin timbang, an mas maluyang hayop kaipuhan na maglapigot tanganing makasabay, asin an mas makosog kaipuhan na mas magabat an pasanon.

Ginamit ni apostol Pablo an ilustrasyon nin bakong timbang na pagsakal tanganing tokdoan kita nin importanteng leksion. “Dai kamo makipagsakal na bakong timbang sa mga dai nagtutubod,” an isinurat nia. “Huli ta anong pakikiiba igwa an katanosan asin katampalasanan? O ano an pakikisumaro kan liwanag sa diklom?” (2 Corinto 6:14) Paano puedeng makipagsakal na bakong timbang an sarong Kristiano?

An sarong paagi iyo na kun an sarong Kristiano pumili nin aagomon na dai nia kapareho an mga paniniwala. An arog kaiyan na pag-inagoman magigin depisil para sa mag-ibong na lado, na magkakontra an mag-agom sa pundamental na mga isyu.

Kan ponan ni Jehova an pag-agoman, itinao nia sa agom na babae an papel nin “sarong kakomplemento,” o “katimbang.” (Genesis 2:18; nota sa ibaba) Siring man, paagi ki propeta Malaquias, inapod nin Dios an agom na babae na sarong “kapadis.” (Malaquias 2:14) Gusto kan satong Kaglalang na an mag-agom magtinabangan pasiring sa parehong espirituwal na direksion, na nagtitinabangan sa mga pagabat asin parehong nag-aani kan mga pakinabang.

Sa pag-agom ‘sana dian sa Kagurangnan,’ ipinaheheling nin sarong Kristiano an paggalang sa hatol kan satong langitnon na Ama. (1 Corinto 7:39) Ini nagbubugtak nin sarong pundasyon para sa nagkakasarong pag-agoman, na matao nin pag-omaw asin onra sa Dios mantang an mag-agom naglilingkod sa saiya bilang ‘tunay na magkatuwang’ sa espesyal na kahulogan kaiyan.​—Filipos 4:3.

[Picture Credit Line sa pahina 32]

Kamelyo asin baka: Hale sa librong La Tierra Santa, Tomo 1, 1830