Mga Hapot Hale sa mga Parabasa

Manongod kiisay nagtataram si Jehova sa pagsabing “saro sa sato” sa Genesis 3:22?

Minalataw na nagtataram si Jehova Dios manongod sa saiyang sadiri asin sa saiyang bugtong na Aki kan sabihon nia: “An tawo nagin arog sa saro sa sato sa pakamidbid kan marahay asin maraot.” (Genesis 3:22) Estudyaran niato kun taano.

Sinabi ni Jehova an mga tataramon na ini pakatapos na ipahayag an sentensia sa enot na tawong mag-agom. An pakasabot nin nagkapira sa pananaram na “saro sa sato” plural nin kamahalan, kun paanong puedeng sabihon nin sarong tawong hade na “dai kami naoogma” mantang sia sana an boot niang sabihon. Minsan siring, mapadapit sa Genesis 1:26 asin 3:​22, an nag-espesyalisar sa Biblia na si Donald E. Gowan nagsasabi: “Mayo nin prueba sa D[aan] na T[ipan] para sa kadaklan na iprinoponer na mga paliwanag: an sa hadeng ‘kami,’ an ‘kita’ na ginagamit sa paghorophorop, an plural para sa pagdodoon, o an pagparisa nin labi sa sarong persona sa pagka-Dios. . . . Mayo sa mga paliwanag na ini an garo baga lohiko sa 3:​22, na nagtataram manongod sa ‘saro sa sato.’”

Posible daw na si Jehova nagtataram manongod ki Satanas na Diablo, na nagsadiri nang magdesisyon kun ano an “marahay asin maraot” asin inimpluwensiahan an enot na mga tawo na gibohon an siring man kaiyan? Bako iyan na rasonable. Ginamit digdi ni Jehova an pananaram na “saro sa sato.” Si Satanas bako nang kabilang sa kadakol na fiel na anghel ni Jehova, kaya dai sia puedeng kaiba sa mga nasa kampi ni Jehova.

An Dios daw nagtataram manongod sa fiel na mga anghel? Dai niato puedeng sabihon nin sayod. Minsan siring, an pagkakaagid kan mga pananaram sa Genesis 1:26 asin sa 3:22 nagtatao sato nin ideya. Sa Genesis 1:​26, mababasa niato na si Jehova nagsabi: “Gibohon niato an tawo sa satong ladawan, kasugad niato.” Kiisay nia daw sinabi an mga tataramon na ini? Nagtataram manongod sa espiritung linalang na nagin an sangkap na tawong si Jesus, si apostol Pablo nagsabi: “Sia an ladawan kan Dios na dai naheheling, an panganay sa gabos na linalang; huli ta paagi sa saiya an gabos na iba pang bagay linalang sa kalangitan asin sa daga.” (Colosas 1:​15, 16) Iyo, garo baga lohiko na sa Genesis 1:​26, kaolay ni Jehova an saiyang bugtong na Aki, an “pangenot na trabahador,” na nasa kataed nia kan linalalang an kalangitan asin an daga. (Talinhaga 8:22-31) An pagkakaagid kan pananaram sa Genesis 3:22 nagsusuherir na kaolay giraray ni Jehova an pinakadayupot sa saiya, an saiyang bugtong na Aki.

An bugtong na Aki nin Dios minalataw na nakaaaram kan “marahay asin maraot.” Huli sa saiyang halawig asin dayupot na pakikiiba ki Jehova, siertong nanodan nia nanggad an kaisipan, mga prinsipyo, asin mga pamantayan kan saiyang Ama. Huling kombensido na an saiyang Aki aram iyan asin maimbod dian, tibaad tinawan sia ni Jehova nin katalingkasan na asikasohon an mga bagay na dai Sia kinokonsulta sa lambang situwasyon. Kaya sa bagay na ini an Aki may kakayahan asin autorisasyon na determinaran kun ano an marahay asin maraot. Minsan siring, bakong arog ni Satanas, Adan, asin Eva, dai sia naggibo nin pamantayan na kontra sa pamantayan ni Jehova.