Tanganing Kamtan an Premyo, Magpogol Kamo sa Sadiri!

“An gabos na nakikipagdaogan sa karawat mapagpogol sa gabos na bagay.”​—1 CORINTO 9:25.

1. Kaoyon kan Efeso 4:22-24, paano nag-oyon ki Jehova an minilyon na tawo?

KUN kamo binautismohan kaidto bilang saro sa Mga Saksi ni Jehova, kamo hayag na nagsabi na andam kamong makikabtang sa sarong karawat na an premyo buhay na daing sagkod. Nag-oyon kamo na gibohon an kabotan ni Jehova. Bago nagdusay ki Jehova, dakol sa sato an kinaipuhan na gumibo nin dakulang mga pagbabago tanganing an satong pagdusay magin makahulogan asin akoon nin Dios. Sinunod niato an hatol ni apostol Pablo sa mga Kristiano: “Haleon [nindo] an daan na personalidad na komporme sa dati nindong paggawe asin na nararaot segun sa saiyang mapandayang mga mawot . . . Magsolog [kamo] kan bagong personalidad na linalang segun sa kabotan nin Dios sa tunay na katanosan asin kaimbodan.” (Efeso 4:22-24) Sa ibang pagtaram, bago inako an pagdusay sa Dios, kinaipuhan niatong sayumahan an dai inaakong paagi nin pamumuhay kan dati.

2, 3. Paano ipinaririsa kan 1 Corinto 6:9-12 na duwang klase nin pagbabago an dapat na gibohon tanganing kamtan an pag-oyon nin Dios?

² An nagkapirang kabtang kan daan na personalidad na dapat haleon kan magigin mga Saksi ni Jehova direktang kinokondenar sa Tataramon nin Dios. An nagkapira sinarosaro ni Pablo sa saiyang surat sa mga taga Corinto, na sinasabi: “Bakong mga parapakisaro, ni mga parasamba sa idolo, ni mga parasambay, ni mga binabae, ni mga lalaki na minadorog sa kapwa lalaki, ni mga parahabon, ni mga paslo, ni mga paraburat, ni mga paramuda, ni mga parakikil an magmamana kan kahadean nin Dios.” Dangan ipinaheling nia na an mga Kristiano kan enot na siglo naggibo nin kinakaipuhan na mga pagbabago sa personalidad, na sinasabi: “Alagad ta arog kaiyan kaidto an nagkapira sa saindo.” Mangnohon, arog kaiyan kaidto, bakong ngonyan.​—1 Corinto 6:9-11.

³ Ipinarisa ni Pablo na tibaad kaipuhan man an dugang pang mga pagbabago, ta sinabi pa nia: “An gabos na bagay itinotogot para sa sako; alagad bakong gabos na bagay sa ikararahay.” (1 Corinto 6:12) Sa siring, naheheling kan dakol ngonyan na gustong magin Saksi ni Jehova an pangangaipo na sayumahan maski an mga bagay na minsan ngani itinotogot pero bakong sa ikararahay o mayo nin nagdadanay na halaga. An mga ini tibaad nakauubos  nin panahon asin puedeng isuki sinda parayo sa paghanap sa mga bagay na mas importante.

4. Sa ano minaoyon ki Pablo an nagdusay na mga Kristiano?

⁴ An pagdusay sa Dios ginigibo nin gikan sa boot, bakong maraot an boot, na garo baga dakulaon na pagsasakripisyo an kalabot dian. An dusay na mga Kristiano minaoyon ki Pablo, na nagsabi pakatapos na sia magin parasunod ni Cristo: “Huli [ki Jesus] tinios ko an pagkawara kan gabos na bagay asin ibinibilang ko an mga iyan na tapok, tanganing makamtan ko si Cristo.” (Filipos 3:8) Si Pablo maogmang nagsayuma sa mga bagay na dikit an halaga tanganing padagos siang makaoyon sa Dios.

5. Sa anong klaseng paorumbasan mapangganang nakikabtang si Pablo, asin paano man niato iyan magigibo?

⁵ Si Pablo nagpogol sa sadiri sa pagdalagan sa saiyang espirituwal na pakipag-umbasan asin sa katapustapusi nakapagsabi: “Nakipaglaban ako kan marahay na pakilaban, natapos ko an paorumbasan, naingatan ko an pagtubod. Poon ngonyan igwa na nin nakatagama para sa sako na korona nin katanosan, na itatao sa sako kan Kagurangnan, an matanos na hokom, bilang balos sa aldaw na iyan, alagad bako sanang sa sako, kundi siring man sa gabos na namoot sa saiyang pagkahayag.” (2 Timoteo 4:​7, 8) Masasabi man daw niato iyan sa maabot na panahon? Iyo kun kita may pagtubod na nagpopogol sa sadiri mantang kita nagdadalagan sa satong Kristianong pakipag-umbasan na daing ontok asin sagkod na matapos iyan.

Pagpopogol sa Sadiri Tanganing Magibo an Marahay

6. Ano an pagpopogol sa sadiri, asin sa anong duwang paagi kaipuhan niatong gibohon iyan?

⁶ An mga tataramon sa Hebreo asin Griego na trinadusir na “pagpopogol sa sadiri” sa Biblia literal na nangangahulogan na an saro igwa nin kapangyarihan o kontrol sa saiyang sadiri. Parate iyan na nagtatao kan ideya nin pagpopogol sa sadiri na gumibo nin maraot. Alagad malinaw na kaipuhan man an pagpopogol sa sadiri tanganing magamit niato an satong hawak sa paggibo nin marahay na mga bagay. An natural na tendensia nin bakong sangkap na mga tawo gumibo nin maraot, kaya duwa an pinagmamaigotan niatong gibohon. (Eclesiastes 7:29; 8:11) Mantang nagpopogol kita sa paggibo nin maraot, dapat man niatong piriton an satong sadiri na gumibo nin marahay. Sa katunayan, an pagpogol sa satong hawak tanganing gumibo nin marahay saro sa pinakamarahay na mga paagi tanganing malikayan an paggibo nin maraot.

7. (a) Ano an maninigo niatong ipamibi, siring kan ginibo ni David? (b) An paghorophorop sa ano an matabang sa sato na orog na makapagpogol sa sadiri?

⁷ Malinaw nanggad, mahalagang marhay an pagpopogol sa sadiri tanganing maotob niato an satong pagdusay sa Dios. Kaipuhan niatong mamibi nin arog kan ginibo ni David: “Lalangon mo sa sakuya an dalisay na puso, O Dios, asin bugtakan mo ako nin bagong espiritu, sarong marigon.” (Salmo 51:10) Puede niatong horophoropon an mga pakinabang nin paglikay sa mga bagay na sala sa moral o nagpapaluya sa hawak. Isip-isipa an posibleng mga danyos nin dai paglikay sa siring na mga  bagay: grabeng problema sa salud, naraot na relasyon, kagadanan pa ngani na mayo sa panahon. Sa ibong na kampi, isip-isipa an dakol na pakinabang nin pagdadanay sa pamumuhay na sinasabi ni Jehova. Minsan siring, huling realistiko, dai niato dapat paglingawan na madaya an satong puso. (Jeremias 17:9) Dapat kitang magin desidido na labanan an mga paghihingoa kaiyan na pasaditon an pagigin seryoso kan pagsuportar sa mga pamantayan ni Jehova.

8. Anong katunayan an itinotokdo sa sato nin eksperyensia? Iilustrar.

⁸ Aram kan kadaklan sa sato base sa eksperyensia na an magabat an boot na laman parateng naghihingoa na sigbohon an laad kan espiritu nin pagigin gikan sa boot. Halimbawa sa paghuhulit kan Kahadean. Ikinaoogmang marhay ni Jehova an pagigin gikan sa boot kan mga tawo na makikabtang sa nagtatao nin buhay na gibohon na ini. (Salmo 110:3; Mateo 24:14) Para sa kadaklan sa sato, dai nagin madali an pakanood na maghulit sa publiko. Iyan nangaipo​—asin tibaad nangangaipo pa sagkod ngonyan​—na kontrolon an satong hawak, ‘lanogon’ iyan asin ‘oriponon iyan,’ imbes na pabayaan iyan na diktahan kitang gibohon an pinakapasil.​—1 Corinto 9:​16, 27; 1 Tesalonica 2:2.

“Sa Gabos na Bagay”?

9, 10. Ano an kabale sa ‘pagpogol sa sadiri sa gabos na bagay’?

⁹ An hatol kan Biblia na ‘magpogol sa gabos na bagay’ nagpaparisa na an kalabot bako sanang pagkontrol sa satong ugale asin paglikay sa inmoral na paggawe. Tibaad iniisip niato na nakakapagpogol kita sa mga bagay na ini, asin kun iyo, makapagpapasalamat nanggad kita. Pero, kumusta man an iba pang kabtang nin buhay na kun saen an pangangaipo nin pagpopogol sa sadiri tibaad daing gayo naririsa? Bilang ilustrasyon, halimbawa baga na nag-iistar kita sa sarong medyo mayaman na nasyon na halangkaw an klase nin pamumuhay. Bako daw na madonong na sayumahan an dai man kaipuhan na paggasto? Marahay na tokdoan kan mga magurang an saindang mga aki na dai magbakal nin ano man na maheling ninda huli sana ta igwa kaiyan, magayon iyan, o kaya nindang bakalon iyan. Siempre, tanganing magin epektibo an itinotokdong iyan, an mga magurang dapat na magtao nin tamang halimbawa.​—Lucas 10:38-42.

¹⁰ An pakanood na mahimong mabuhay dawa mayo an sarong bagay puedeng magpakosog kan satong determinasyon. Mapapaoswag man kaiyan an pag-apresyar sa materyal na mga bagay na igwa kita asin mapangyari sa sato na magkaigwa nin orog na simpatiya sa mga kaipuhan na mabuhay na mayo an pirang bagay, bakong huli ta ginusto iyan, kundi huli sa pangangaipo. Totoo, an pagigin simple sana sarongat sa popular na mga aktitud na arog kan “magin maboot ka sa saimong sadiri” o “maninigo ka sa pinakamarahay.” Ineenkaminar kan kinaban nin mga anunsio an pagmawot sa insigidang pagpakontento, alagad ginigibo iyan kaiyan para sa sadiri kaiyan na komersial na pakinabang. An situwasyon na ini tibaad makaolang sa satong mga paghihingoa na magpaheling nin pagpopogol sa sadiri. An sarong magasin hale sa asensadong nasyon sa Europa nagsabi kasuarin pa sana: “Kun an pagkontrol sa bakong kawiliwiling mga tendensia nagkakaipo nin panlaog na pakikipaglaban kan mga namumuhay sa masakiton na mga kamugtakan na grabe an kadukhaan, lalo man na totoo iyan sa mga nag-iistar sa asensadong nasyon sa presenteng mayaman na sosyedad!”

11. Taano ta kapakipakinabang an makanood na mahimong mamuhay dawa mayo an sarong bagay, alagad ano an nagpapagin depisil kaini?

¹¹ Kun nadedepisilan kitang mamidbid an kalaenan kan gusto niato asin kan talagang kaipuhan niato, puedeng makatabang na gumibo nin mga paagi tanganing seguradohon na dai kita naghihiro nin iresponsable. Halimbawa, kun mawot niato na labanan an tendensiang gumasto nin daing kontrol, puedeng booton niato na magdesisyon na dai magbakal paagi sa utang, o kun namamakal, puede kitang magdara sana nin itinalaan na kantidad. Girumdomon na sinabi ni Pablo na ‘may dakulang pakinabang an diosnon na debosyon kaiba an pagigin naninigoan sa sadiri.’ Nangatanosan sia: “Dai kita nagdara nin ano man sa kinaban, asin dai man kita makadadara nin ano man hale dian. Kaya, mantang igwa na nin kakanon asin gubing, maninigoan na kita sa mga bagay na ini.” (1 Timoteo 6:6-8) Kita daw kontento? An pakanood na mamuhay nin simple, na mayo kan dai kaipuhan na mga kaolangan na resulta nin pagpagusto sa sadiri​—ano man na klase​—nagkakaipo nin determinasyon asin pagpopogol sa sadiri. Pero iyan sarong leksion na kapakipakinabang na manodan.

12, 13. (a) Sa anong mga paagi kalabot sa Kristianong mga pagtiripon an pagpopogol sa sadiri? (b) Ano an nagkapirang iba pang kabtang kun saen kaipuhan niatong kultibaron an pagpopogol sa sadiri?

 ¹² An pag-atender sa Kristianong mga pagtiripon, asamblea, asin kombension may kalabot man na sarong partikular na pagpaheling nin pagpopogol sa sadiri. Halimbawa, kaipuhan an kualidad na iyan tanganing dai mapabayaan na maglagawlagaw an satong isip durante kan programa. (Talinhaga 1:5) Tibaad kaipuhan an pagpopogol sa sadiri na dai istorbohon an iba paagi sa paghinghing sa satong mga kataed imbes na itao sa ispiker an satong lubos na atension. An pagliwat kan satong iskedyul tanganing makaabot kita na nasa oras tibaad mangaipo nin pagpopogol sa sadiri. Dugang pa, tibaad kaipuhan an pagpopogol sa sadiri tanganing magtagama nin panahon sa pag-andam para sa mga pagtiripon dangan pakikikabtang dian.

¹³ An pagpopogol sa sadiri sa saradit na bagay nagpapakosog kan satong kakayahan na gibohon iyan sa mas darakulang bagay. (Lucas 16:10) Sa siring, marahay nanggad na disiplinahon an satong sadiri na basahon nin regular an Tataramon nin Dios asin mga publikasyon sa Biblia, na pinag-aadalan iyan asin hinohorophorop an nanonodan niato! Madonong nanggad na disiplinahon an satong sadiri mapadapit sa bakong angay na mga trabaho, pakikikatood, aktitud, asin personal na ugale o na disiplinahon an satong sadiri na magsayuma sa mga aktibidad na puedeng ikawara kan mahalagang marhay na panahon para sa paglilingkod sa Dios! An pagdadanay na sibot sa paglilingkod ki Jehova saro nanggad na marahayon na proteksion tumang sa mga bagay na puedeng irayo kita sa espirituwal na paraiso kan pambilog na kinaban na kongregasyon ni Jehova.

Magin Maygurang Paagi sa Pagpopogol sa Sadiri

14. (a) Paano maninigong makanood na magpogol sa sadiri an mga aki? (b) Ano an mga pakinabang kun manonodan kan mga aki an leksion na iyan sa enot na mga taon nin buhay?

¹⁴ An sarong bagong mamundag na omboy dai masasabing may pagpopogol sa sadiri. An sarong libreto nin mga eksperto sa gawe-gawe nin aki nagpapaliwanag: “An pagpopogol sa sadiri dai nangyayari nin automatiko o bigla na sana. An mga omboy asin saradit pang aki nangangaipo nin paggiya asin suporta nin magurang tanganing ponan an proseso nin pakanood nin pagpopogol sa sadiri. . . . Kun ginigiyahan nin mga magurang an proseso, an pagpopogol sa sadiri nag-ooswag durante kan mga taon nin pag-eskuela.” Ihinayag nin sarong pag-adal sa kuatro anyos na mga aki na an mga nakanood na minsan paano na magpogol sa sadiri “sa pankagabsan nagdadakula bilang mga tinedyer na mas marahay makiiba, mas popular, abenturoso, kompiado asin masasarigan.” An mga dai nagpoon na makanood kan leksion na ini “mas posibleng marhay na magin mapungaw, madaling madesganar asin sutil. Sinda suminuko sa tension asin naglikay  sa mga angat.” Malinaw nanggad, tanganing magin adulto na marahay makiiba, an sarong aki dapat na makanood na magpogol sa sadiri.

15. Ano an ipinaririsa nin kadaihan nin pagpopogol sa sadiri, na kabaliktaran sa anong pasohan na sinasabi sa Biblia?

¹⁵ Kaagid kaiyan, tanganing kita magin maygurang na mga Kristiano, dapat kitang makanood na magpaheling nin pagpopogol sa sadiri. An kadaihan kaiyan nagpaparisa na kita mga omboy pa sa espirituwal. Sinasadol kita kan Biblia na “magin maygurang sa mga kakayahan nin pagsabot.” (1 Corinto 14:20) An pasohan niato “makaabot sa pagkasararo sa pagtubod asin sa tamang kaaraman manongod sa Aki nin Dios, sa lubos na pagkatawo, sa sokol nin pagtalubo na kapareho kan kapanoan kan Cristo.” Taano? “Tanganing dai na kita magin mga omboy, na inaanod nin mga alon asin ipinapadpad nin lambang doros nin katokdoan paagi sa kadayaan nin mga tawo, paagi sa katusohan sa pagpakana nin karatan.” (Efeso 4:​13, 14) Malinaw nanggad, an pakanood na magpogol sa sadiri mahalagang marhay sa satong espirituwalidad.

Pagkultibar sa Pagpopogol sa Sadiri

16. Paano nagtatao nin tabang si Jehova?

¹⁶ Tanganing makultibar an pagpopogol sa sadiri, kaipuhan niato an tabang nin Dios, asin makukua niato iyan. Ipinaheheling sa sato kan Tataramon nin Dios, na siring sa salming na daing depekto, kun saen kita kaipuhan na gumibo nin personal na mga pagbabago, asin nagtatao iyan nin konseho kun paano iyan gigibohon. (Santiago 1:22-25) An mamomoton na kasararoan nin magturugang andam man na tumao nin tabang. An Kristianong kamagurangan nagpapaheling nin pag-intindi sa pagtao nin personal na tabang. Si Jehova mismo bulaos na nagtatao kan saiyang banal na espiritu kun hahagadon niato iyan sa pamibi. (Lucas 11:13; Roma 8:26) Kun siring, may kagayagayahan na gamiton niato an mga probisyon na ini. Puedeng makatabang an mga suhestion sa pahina 21.

17. Anong pagparigon sa boot an itinatao sato kan Talinhaga 24:16?

¹⁷ Nakararanga nanggad na maaraman na pinahahalagahan ni Jehova an satong mga paghihingoa kun pinagmamaigotan niatong paogmahon sia! Maninigo ining magmotibar sa sato na padagos na magmaigot na madugangan an pagpopogol sa sadiri. Gurano man kita kaparateng masingkog, dai kita dapat noarin man sumuko sa satong mga paghihingoa. “An matanos puedeng mapukan sagkod sa makapito, asin sia siertong matindog.” (Talinhaga 24:16) Kada makapanggana kita, igwa kita nin dahelan na maogma sa satong sadiri. Makasisierto man kita na si Jehova naoogma sa sato. Sinabi nin sarong Saksi na bago nia idinusay an saiyang buhay ki Jehova, kada mapangganahan nia na dai magsigarilyo sa sarong semana, pinepremyohan nia an saiyang sadiri paagi sa pagbakal nin sarong bagay na kapakipakinabang paagi sa kuarta na nadamot nia huli sa pagpopogol sa sadiri.

18. (a) Ano an kalabot sa satong pakikilaban na magkaigwa nin pagpopogol sa sadiri? (b) Anong garantiya an itinatao ni Jehova?

¹⁸ Orog sa gabos, maninigo niatong girumdomon na kalabot sa pagpopogol sa sadiri an isip asin emosyon. Maheheling niato ini sa mga tataramon ni Jesus: “An lambang saro na magparaheling sa sarong babae tanganing magkaigwa nin horot sa saiya nagsasambay na sa saiya sa saiyang puso.” (Mateo 5:28; Santiago 1:​14, 15) An nakanood na kontrolon an saiyang isip asin pagmate mas mapapasilan man na kontrolon an saiyang bilog na hawak. Kun siring, pakosogon niato an satong determinasyon na likayan bako sana an paggibo nin sala kundi pati an pag-isip kaiyan. Kun sumabong an maraot na mga kaisipan, isikwal tolos iyan. Makakadulag kita sa sugot paagi sa mapagngayongayong pagturuhok kan satong mga mata ki Jesus. (1 Timoteo 6:11; 2 Timoteo 2:22; Hebreo 4:​15, 16) Mantang ginigibo niato an satong pinakamakakaya, masusunod niato an hatol sa Salmo 55:22: “Tawan ki Jehova mismo an pagabat sa saimo, asin sia mismo matabang sa saimo. Noarin man dai nia totogotan na matanyog an matanos.”

Nagigirumdoman daw Nindo?

• Sa anong duwang paagi dapat kitang magpogol sa sadiri?

• Ano an boot sabihon kan ‘pagpopogol sa sadiri sa gabos na bagay’?

• Anong praktikal na mga suhestion para sa pagkultibar sa pagpopogol sa sadiri an tinawan nindo nin partikular na atension durante kan satong pag-adal?

• Saen minapoon an pagpopogol sa sadiri?

[Mga Hapot Para sa Pag-adal]

[Kahon/Mga Ritrato sa pahina 21]

Kun Paano Pakokosogon an Pagpopogol sa Sadiri

• Kultibaron iyan dawa sa saradit na bagay

• Horophoropon an mga pakinabang kaiyan sa presente asin sa ngapit

• Salidahan an mga ibinabawal nin Dios nin mga bagay na ineenkaminar niang gibohon

• Isikwal tolos an salang mga ideya

• Panoon an saindong isip nin mga kaisipan na nakapakokosog sa espirituwal

• Akoon an tabang na ikatatao nin maygurang na mga kapwa Kristiano

• Likayan an nakatetentar na mga situwasyon

• Mamibi para sa tabang nin Dios kun may sugot

[Mga Ritrato sa pahina 18, 19]

An pagpopogol sa sadiri nagpapahiro sa sato na gumibo nin marahay