An Fiel na mga Kristiana—Mahal na Marhay na mga Nagsasamba sa Dios

“An pan-akit tibaad falso, asin an kagayonan tibaad basang sana; alagad an babae na natatakot ki Jehova iyo an nag-aako nin kaomawan para sa saiya man sana.”​—TALINHAGA 31:30.

1. Paano napapalaen an pagmansay ni Jehova sa gayon sa pagmansay kan kinaban?

AN TINATAWAN nin dakulang importansia kan kinaban iyo an panluwas na itsura, lalo na kun dapit sa mga babae. Minsan siring, si Jehova sa pangenot interesado sa personang nasa laog, na puedeng orog pa nganing gumayon mantang nagkakaedad. (Talinhaga 16:31) Huli kaini, sinasadol kan Biblia an mga babae: “An saindong samno dai magin an panluwas na pagsalapid kan buhok asin an pagsulot nin mga alahas na bulawan o an pagsolog nin pan-ibabaw na mga gubing, kundi magin an natatagong persona kan puso sa dai nalalapang gubing kan toninong asin mahoyong espiritu, na may dakulang halaga sa mga mata nin Dios.”​—1 Pedro 3:​3, 4.

2, 3. Paano nakakontribwir an mga babae sa paglakop kan maogmang bareta kan enot na siglo, asin paano ini ihinula?

² An siring na kaomaw-omaw na espiritu ipinaheling kan dakol na babae na nasambitan sa Biblia. Kan enot na siglo, an nagkapira sa mga ini nagkapribilehiong paglingkodan si Jesus asin an saiyang mga apostol. (Lucas 8:1-3) Kan huri, an mga Kristiana nagin maigot na mga paraebanghelyo; an iba nagtao nin mahalagang pagsuportar sa nangengenot na mga lalaking Kristiano, kabale si apostol Pablo; asin an nagkapira nagpaheling nin pambihirang pagkamapag-istimar, na ipinagamit pa ngani an saindang harong para sa mga pagtiripon kan kongregasyon.

³ Ihinula sa Kasuratan na gagamiton ni Jehova sa makakamhan na paagi an mga babae sa pag-otob kan saiyang katuyohan. Halimbawa, ihinula kan Joel 2:​28, 29 na an mga lalaki sagkod babae, hoben asin gurang, maako nin banal na espiritu asin makikikabtang sa pagpalakop kan maogmang bareta kan Kahadean. An hulang iyan nagpoon na maotob kan Pentecostes 33 C.E. (Gibo 2:1-4, 16-18) An nagkapirang babae na linahidan nin espiritu tinawan nin milagrosong mga balaog, arog kan balaog na paghula. (Gibo 21:​8, 9) Paagi sa kaigotan ninda sa ministeryo, an dakula asin espirituwal na hukbong ini nin fiel na mga tugang na babae nakakontribwir sa marikas na paglakop nin Kristianismo kan enot na siglo. Sa katunayan, kan mga 60 C.E., nagsurat si apostol Pablo na an maogmang bareta “ikinahulit [na] sa gabos na linalang sa sirong nin langit.”​—Colosas 1:23.

 Tinawan nin Komendasyon Huli sa Saindang Kosog nin Boot, Kaigotan, Asin Pagkamapag-istimar

4. Taano ta may marahay na dahelan si Pablo na tawan nin komendasyon an dakol na babae sa Kristianong kongregasyon kan enot na siglo?

⁴ Bilang halimbawa, inapresyar ni apostol Pablo an ministeryong ginibo partikular na nin nagkapirang babae​—kun paanong pinahahalagahan nin Kristianong mga paraataman ngonyan an ministeryong ginigibo nin maigot na mga babae. Kabilang sa mga babae na nginaranan ni Pablo iyo “si Trifina asin si Trifosa, mga babaeng nagpapagal sa Kagurangnan,” asin “si Persida na satong namomotan, huli ta sia naggibo nin dakol dian sa Kagurangnan.” (Roma 16:12) Sa surat ni Pablo, si Euodias asin Sintique “nagpagal sa kaibanan [nia] sa maogmang bareta.” (Filipos 4:​2, 3) Si Priscila, saka an agom nia, si Aquila, naglingkod man kaiba ni Pablo. “Isinapeligro [pa ngani ninda ni Aquila] an saindang liog” para ki Pablo, na nagpahiro sa saiya na sumurat: “Nagpapasalamat bako sanang ako kundi pati an gabos na kongregasyon kan mga nasyon.”​—Roma 16:​3, 4; Gibo 18:2.

5, 6. Sa anong mga paagi nagpaheling si Priscila nin marahayon na halimbawa para sa mga tugang na babae ngonyan?

⁵ Ano an dahelan kan kaigotan asin kosog nin boot ni Priscila? May indikasyon na maheheling sa Gibo 18:24-26, kun saen mababasa niato na sinuportaran nia an saiyang agom sa pagtabang ki Apolos, sarong matibay magpahayag, na makaaram kan pinakabagong impormasyon manongod sa ihinayag na katotoohan. Kun siring, malinaw na si Priscila sarong maigot na estudyante sa Tataramon nin Dios asin sa katokdoan kan mga apostol. Bilang resulta, nakapatalubo sia nin marahayon na mga kualidad na nagpangyari sa saiya na magin mahal na marhay para sa Dios asin sa saiyang agom saka sarong mahalagang miembro kan enot na kongregasyon. Mahal man na marhay an dakol na mahihigos na tugang na Kristiana ngonyan na maigot na nag-aadal sa Biblia asin ilinalaog man sa isip an espirituwal na kakanon na itinatao ni Jehova paagi sa “fiel na mayordomo.”​—Lucas 12:42.

⁶ Pambihira an pagkamapag-istimar ni Aquila asin Priscila. Sa harong ninda nagdagos si Pablo kan tumabang sia sa sainda sa saindang negosyo na paggibo nin tolda sa Corinto. (Gibo 18:1-3) Kan an mag-agom bumalyo sa Efeso asin kan huri sa Roma, padagos sindang nagpaheling nin Kristianong pag-istimar, na ipinagamit pa ngani an saindang harong para sa mga pagtiripon kan kongregasyon. (Gibo 18:​18, 19; 1 Corinto 16:​8, 19) Si Nimfa asin Maria na ina ni Juan Marcos ipinagamit man an saindang harong para sa mga pagtiripon kan kongregasyon.​—Gibo 12:12; Colosas 4:15.

Mahal na Marhay na Bagay Ngonyan

7, 8. Ano an kaomaw-omaw na rekord nin sagradong paglilingkod kan dakol na Kristiana sa presenteng panahon, asin sa ano sinda makaseseguro?

⁷ Arog kan enot na siglo, an fiel na mga Kristiana ngonyan igwa nin mahalagang papel sa pag-otob kan katuyohan nin Dios, nangorogna sa pag-ebanghelyo. Asin marahayon nanggad an rekord kan mga tugang na babaeng ini! Isip-isipa an halimbawa ni Gwen, na fiel na naglingkod ki Jehova nin labing 50 taon sagkod sa saiyang kagadanan kan 2002. “An kaigotan ni Gwen bilang paraebanghelyo aram na marhay sa samong siudad,” an sabi kan saiyang agom. “Para sa saiya, an lambang tawo sarong potensial na resipiente kan pagkamoot asin mga panuga ni Jehova. An saiyang kaimbodan sa Dios, sa saiyang organisasyon, asin sa samong pamilya​—dai na baga pagsambiton an saiyang mamomoton na pagparigon sa boot kan kami pinanluluyahan nin boot​—nagin sarong dakulang suporta sa sako asin sa samong mga aki durante kan samong kontento asin kapakipakinabang na buhay na magkaibanan. Hinihidaw mi siang marhay.” Si Gwen asin an saiyang agom 61 taon nang kasal.

⁸ Manampulong ribong Kristiana, daing agom asin may agom, an naglilingkod bilang payunir na mga ministro asin misyonero, na naninigoan na sa mga pangangaipo sa buhay mantang pinalalakop ninda an mensahe kan Kahadean sa magkakalaen na mga teritoryo poon sa matawong mga siudad sagkod sa napapasuway na mga rehion. (Gibo 1:8) Dakol an ipinagilid an saindang pagkaigwa nin sadiring harong o pagkaigwa nin mga aki tanganing mas lubos na mapaglingkodan si Jehova. Yaon an mga maimbod na sinusuportaran an saindang agom na naglilingkod bilang nagbibiaheng mga paraataman, mantang rinibong tugang na babae an naglilingkod sa mga erokan na Bethel sa bilog na kinaban. Daing duwa-duwa, an mapagsakripisyong mga babaeng ini kabilang sa “kawiliwiling mga bagay kan gabos na nasyon” na pinapano nin kamurawayan an harong ni Jehova.​—Haggeo 2:7.

9, 10. Paano ipinahayag nin nagkapirang kapamilya an apresasyon sa marahayon na halimbawang ipinaheling nin Kristianang mga agom asin ina?

 ⁹ Siempre, an dakol na Kristiana igwa nin pampamilyang mga paninimbagan na inaasikaso; alagad ineenot ninda an intereses kan Kahadean. (Mateo 6:33) An sarong daing agom na tugang na babaeng payunir nagsurat: “An sakong ina, huli sa saiyang marigon na pagtubod asin marahayon na halimbawa, nagkaigwa nin mahalagang papel sa sakong pagigin regular payunir. Sa katunayan, saro sia sa sakong pinakamarahay na mga kapadis na payunir.” An sarong agom na lalaki nagsabi dapit sa saiyang agom, na ina nin limang darakula nang aking babae: “An harong mi pirmeng malinig asin maayos. Pinagdadanay iyan ni Bonnie na simple asin areglado tanganing an samong pamilya makakonsentrar sa espirituwal na mga aktibidad. An ikinatatabang nia sa maingat na pagkapot kan samong kuarta nagpagin posible na ako makapagtrabaho nin por ora sana sa laog nin 32 na taon, na nagpangyari sa sako na makadusay nin orog na panahon sa samong pamilya asin sa espirituwal na mga bagay. Itinokdo man kan agom ko sa mga aki an halaga nin kahigosan. Maninigo sia sa sakong pag-omaw.” Ngonyan an mag-agom parehong naglilingkod sa pankinaban na opisina prinsipal kan Mga Saksi ni Jehova.

¹⁰ An sarong agom na lalaki nagsurat manongod sa saiyang agom, na ina nin darakula nang mga aki: “An mga kualidad na pinakahinangaan ko ki Susan iyo an saiyang makosog na pagkamoot sa Dios asin sa mga tawo, saka an saiyang pagigin mapagsabot, empatiya, asin pagkasadiosan. An pirmeng punto de vista nia iyo na si Jehova maninigo sa pinakamarahay na ikatatao niato sa saiya​—sarong prinsipyo na iinaaplikar nia sa saiyang sadiri bilang lingkod nin Dios sagkod bilang ina.” Paagi sa suporta kan saiyang agom, nahimo kan agom na lalaking ini na akoon an dakol na espirituwal na pribilehio, kabale an paglilingkod bilang magurang sa kongregasyon, payunir, kasalihid na paraataman sa sirkito, asin miembro kan Hospital Liaison Committee. Mahal na marhay nanggad an siring na mga babae para sa saindang agom, sa mga kapwa Kristiano, asin orog sa gabos, ki Jehova!​—Talinhaga 31:​28, 30.

Mahal na Marhay na mga Babae na Mayo nin Agom

11. (a) Paano ihinayag ni Jehova an saiyang pagmakolog sa fiel na mga babae, lalo na sa mga babaeng balo? (b) Sa ano makaseseguro an Kristianang mga balo asin iba pang fiel na tugang na babae na mayo nin agom?

¹¹ Parateng nagpahayag si Jehova kan saiyang pagmakolog sa kapakanan nin mga babaeng balo. (Deuteronomio 27:19; Salmo 68:5; Isaias 10:​1, 2) Dai sia nagliwat. Padagos siang odok na interesado bako sanang sa mga babaeng balo kundi pati sa nagsosolong mga ina saka sa mga babae na nagdesisyon na dai mag-agom o dai nakakua nin angay na Kristianong agom na lalaki. (Malaquias 3:6; Santiago 1:27) Kun kabilang kamo sa mga fiel na naglilingkod ki Jehova na mayo kan pagsuportar nin agom na Kristiano, makaseseguro kamo na mahal na marhay kamo sa pagheling nin Dios.

12. (a) Paano ipinaheheling nin nagkapirang tugang na Kristiana an saindang kaimbodan ki Jehova? (b) An nagkapira sa satong mga tugang na babae naghihingoang daogon an anong mga pagmate?

¹² Bilang halimbawa, isip-isipa an satong mga tugang na Kristiana na dai nag-agom huli ta maimbod nindang kinukuyog an hatol ni Jehova na ‘mag-agom sana sa Kagurangnan.’ (1 Corinto 7:39; Talinhaga 3:1) Inaasegurar sinda kan Tataramon nin Dios: “Sa sarong maimbod [si Jehova] mahiro sa kaimbodan.” (2 Samuel 22:26) Pero, para sa dakol sa sainda, an pagdadanay na daing agom sarong angat. Nagsabi an sarong tugang na babae: “Nagdesisyon ako na mag-agom sana sa Kagurangnan, alagad dakol na beses na akong naghibi kun pinagmamasdan ko an sakong mga katood na nakaagom nin marahayon na mga lalaking Kristiano, mantang ako padagos na nagsosolo.” Nagsabi an saro pang tugang na babae: “Beinte singkong taon na akong  naglilingkod ki Jehova. Desidido akong magdanay na maimbod sa saiya, alagad parate akong namomondo huli sa kapungawan.” Idinagdag nia: “An mga tugang na babae na arog sa sako naghahanap nin pagparigon sa boot.” Paano daw niato matatabangan an mga maimbod na iyan?

13. (a) Ano an manonodan niato sa halimbawang ipinaheling kan mga nagdalaw sa aking babae ni Jefte? (b) Sa ano pang mga paagi ikapaheheling niato an pagmakolog sa daing agom na mga tugang na babae sa satong kongregasyon?

¹³ An sarong paagi maheheling sa sarong halimbawa kan suanoy? Kan bayaan kan aking babae ni Jefte an saiyang oportunidad na magkaagom, narealisar kan banwaan na sia naggigibo nin pagsasakripisyo. Ano an ginibo tanganing parigonon an boot nia? “Taon-taon an mga aking babae nin Israel minaduman sa pagtao nin komendasyon sa aking babae ni Jefte na Galaadita, apat na aldaw sa laog kan taon.” (Hokom 11:30-40) Kaagid kaiyan, maninigo kitang magtao nin odok sa pusong komendasyon sa daing agom na mga tugang na babae na maimbod na kinukuyog an ley nin Dios. * Ano an saro pang paagi na ikapaheheling niato an satong pagmakolog? Sa satong mga pamibi maninigo niatong hagadon ki Jehova na suportaran an mahal asin fiel na mga tugang na babaeng iyan na magpadagos na may kaimbodan sa saindang paglilingkod. Maninigo sindang aseguraron giraray na sinda namomotan na marhay asin odok na inaapresyar ni Jehova asin kan bilog na Kristianong kongregasyon.​—Salmo 37:28.

Kun Paano Nagigin Mapanggana an Nagsosolong mga Magurang

14, 15. (a) Taano ta maninigong arangon nin mga Kristianang nagsosolong ina an tabang ni Jehova? (b) Paano puedeng humiro an nagsosolong mga magurang kaoyon kan saindang mga pamibi?

¹⁴ An mga Kristiana na nagsosolong magurang napapaatubang man sa dakol na angat. Minsan siring, puede sindang dumolok ki Jehova para sa tabang sa pagpadakula sa saindang mga aki kaoyon kan mga prinsipyo sa Biblia. Totoo, kun kamo nagsosolong magurang, dai nindo kayang magin ina sagkod ama sa gabos na bagay. Minsan siring, tatabangan kamo ni Jehova na asikasohon an dakol na paninimbagan nindo kun kamo maarang sa saiya na may pagtubod. Bilang ilustrasyon: Imahinara na igwa kamo nin magabat na bag nin mga groseriya na isasakat sa apartment nindo na nasa itaas nin sarong kadakol na eskalon na edipisyo. Magpapakasakit daw kamong maghagyan kun igwa man sana nin haraning elebeytor? Siempre dai! Kaagid kaiyan, dai paghingoahon na pasanon nin solo an magabat na pagabat sa emosyon mantang puede kamong umarang ki Jehova na tabangan kamo. Sa katunayan, inaagda nia kamo na mag-arang sa saiya. An Salmo 68:19 nagsasabi: “Pag-omawon si Jehova, na sa aroaldaw dinadara an pasan para sa sato.” Siring man, an 1 Pedro 5:7 inaagda kamo na itao an gabos nindong kahaditan ki Jehova “huli ta sia may pagmakolog sa saindo.” Kaya kun nagagabatan na kamo sa mga problema asin kahaditan, ipahayag sa saindong langitnon na Ama an ikinagagabat kan boot nindo, na ginigibo iyan nin “daing ontok.”​—1 Tesalonica 5:17; Salmo 18:6; 55:22.

¹⁵ Halimbawa, kun kamo ina, daing duda na nahahadit kamo manongod sa tibaad magin impluwensia  nin kairiba sa mga aki nindo sa eskuelahan o sa mga pagbalo sa integridad na tibaad inaatubang ninda. (1 Corinto 15:33) Balidong mga kahaditan ini. Alagad dapat man na ipamibi an mga iyan. Sa katunayan, taano ta dai mamibi manongod sa mga bagay na iyan kairiba an saindong mga aki bago sinda maghale pasiring sa eskuelahan, tibaad pagkatapos na iribang pag-orolayan an pan-aroaldaw na teksto? An odok sa puso asin espesipikong mga pamibi puedeng makatudok na marhay sa isip kan mga aki. Orog sa gabos, nakalinya kamong mag-ako kan bendisyon ni Jehova kun mapasensia nindong pinagmamaigotan na itadom an saiyang Tataramon sa puso kan saindong mga aki. (Deuteronomio 6:​6, 7; Talinhaga 22:6) Girumdomon, “an mga mata ni Jehova nasa mga matanos, asin an saiyang mga talinga nasa saindang pagngayongayo.”​—1 Pedro 3:12; Filipos 4:​6, 7.

16, 17. (a) Ano an sinabi nin sarong aking lalaki manongod sa pagkamoot na ipinaheling kan saiyang ina? (b) Ano an nagin epekto sa mga aki kan espirituwal na pananaw kan saindang ina?

¹⁶ Isip-isipa an halimbawa ni Olivia, na ina nin anom na aki. An pamilya binayaan kan saiyang daing pagtubod na agom pagkamundag tolos kan huring aki, alagad listong ginibo ni Olivia an paninimbagan na patuodon an saiyang mga aki sa mga dalan nin Dios. An aking lalaki ni Olivia, si Darren, na ngonyan 31 anyos na asin naglilingkod bilang Kristianong magurang sa kongregasyon asin payunir, mga 5 anyos kan panahon na idto. Dagdag pa sa mga kahaditan ni Olivia, si Darren nagkaigwa kaidto nin sarong seryosong problema sa salud na sagkod ngonyan minamate pa nia. Sa paghorophorop sa panahon kan sia aki pa, si Darren nagsurat: “Natatandaan ko pa na nakatukaw ako sa kama kan ospital na galagang hinahalat si Nanay. Minatukaw sia sa kataed ko asin binabasahan ako nin Biblia aroaldaw. Dangan kinakanta nia an awit na pan-Kahadean na ‘Nagpapasalamat Kami Saimo, Jehova.’ * Sagkod ngonyan, iyan an paborito kong awit na pan-Kahadean.”

¹⁷ An pagtitiwala asin pagkamoot ni Olivia ki Jehova an dahelan kan saiyang kapangganahan bilang nagsosolong ina. (Talinhaga 3:​5, 6) An saiyang marahayon na aktitud nabanaag sa mga pasohan na ibinugtak nia para sa saiyang mga aki. “Pirme kaming ineenkaminar ni Nanay na aboton an pasohan nin bilog na panahon na ministeryo,” an sabi ni Darren. “Bilang resulta, an apat sa limang tugang kong babae asin ako naglaog sa bilog na panahon na ministeryo. Pero, nungka ining ipinaghambog ni Nanay sa iba. Pinagmamaigotan kong marhay na arogon an saiyang marahayon na mga kualidad.” Totoo, bakong gabos na aki nagdadakula na lingkod nin Dios arog kan nangyari sa mga aki ni Olivia. Alagad kun ginigibo nin sarong ina an saiyang pinakamakakaya na otobon an mga prinsipyo sa Biblia, makaseseguro sia sa paggiya asin mamomoton na pagsuportar ni Jehova.​—Salmo 32:8.

18. Paano niato ikapaheheling na pinahahalagahan niato an probisyon ni Jehova na Kristianong kongregasyon?

¹⁸ Kadaklan kan pagsuportar nin Dios itinatao  paagi sa Kristianong kongregasyon, kabale an regular na programa kaiyan nin pagpakakan sa espirituwal, an Kristianong kasararoan nin magturugang, asin an maygurang sa espirituwal na “balaog na mga lalaki.” (Efeso 4:8) An fiel na mga magurang sa kongregasyon nagmamaigot na pakosogon an gabos sa kongregasyon, na nangorognang inaasikaso an mga pangangaipo nin “mga ilo asin babaeng balo sa saindang kasakitan.” (Santiago 1:27) Kaya magdanay na dayupot sa banwaan nin Dios, na nungkang isinusuway an saindong sadiri.​—Talinhaga 18:1; Roma 14:7.

An Gayon nin Pagpasakop

19. Taano an pagpasakop nin agom na babae ta dai nangangahulogan nin pagigin hababa an halaga, asin anong halimbawa sa Biblia an nagsusuportar kaini?

¹⁹ Linalang ni Jehova an babae bilang kakomplemento kan lalaki. (Genesis 2:18) Huli kaini, an pagpasakop nin agom na babae sa saiyang agom na lalaki dai nanggad nangangahulogan nin pagigin hababa an halaga. Imbes, tinatawan kaiyan nin dignidad an babae, na tinotogotan sia na gamiton an dakol niang balaog asin talento kaoyon kan kabotan nin Dios. Ilinaladawan kan Talinhaga kapitulo 31 an manlaenlaen na aktibidad nin sarong may kakayahan na agom na babae sa suanoy na Israel. Nagtatabang sia sa mga nangangaipo, nagtatanom nin mga ubasan, asin nagbabakal nin daga. Iyo, ‘sa saiya an puso kan saiyang kagsadiri nagtitiwala, asin dai magkukulang nin pakinabang.’​—Bersikulo 11, 16, 20.

20. (a) Paano maninigong mansayon nin sarong Kristiana an saiyang tao nin Dios na mga abilidad, o balaog? (b) Anong marahayon na mga kualidad an ipinaheling ni Ester, asin paano sia nagamit ni Jehova bilang resulta?

²⁰ An sarong hababa an boot asin matatakton sa Dios na babae dai nag-aambisyon na ilangkaw an saiyang sadiri o makipagdaogan sa saiyang agom na lalaki. (Talinhaga 16:18) Dai sia naghahanap nin pagkakontento sa sadiri sa pangenot paagi sa sekular na mga okupasyon kundi ginagamit nia an saiyang tao nin Dios na mga balaog sa pangenot tanganing paglingkodan an iba​—an saiyang pamilya, mga kapwa Kristiano, kapwa tawo, asin orog sa gabos, si Jehova. (Galacia 6:10; Tito 2:3-5) Isip-isipa an halimbawa sa Biblia ni Reyna Ester. Minsan ngani magayon sa pisikal, hababa an saiyang boot asin mapagpasakop. (Ester 2:​13, 15) Kan may agom na, nagpaheling sia nin hararom na paggalang sa saiyang agom, si Hadeng Assuero, bakong arog kan dating agom kan hade, si Vasti. (Ester 1:10-12; 2:​16, 17) Si Ester magalang man na nagkuyog ki Mardoqueo, an saiyang matuang pinsan, sa angay na mga bagay​—dawa kan sia magin nang reyna. Alagad bakong maluya an saiyang boot! Daing takot na ibinuyagyag nia si Haman, sarong mapuersa asin maringis na lalaki na nagpakanang pohoon an mga Judio. Ginamit ni Jehova si Ester sa makakamhan na paagi tanganing iligtas an saiyang banwaan.​—Ester 3:8–​4:17; 7:1-10; 9:13.

21. Paano magigin lalo pang mahal na marhay para ki Jehova an sarong Kristiana?

²¹ Malinaw nanggad, kaidto asin ngonyan, ipinaheling nin diosnon na mga babae an saindang dai nababangang debosyon ki Jehova asin sa pagsamba sa saiya. Kun siring, an mga babaeng matatakton sa Dios mahal na marhay sa pagheling ni Jehova. Mga tugang na Kristiana, togotan nindo si Jehova paagi sa saiyang espiritu na moldehon kamo nin progresibo na magin lalo pang kawiliwiling “lalagan,” na “andam para sa lambang marahay na gibo.” (2 Timoteo 2:21; Roma 12:2) Mapadapit sa siring na mahal na marhay na mga nagsasamba, an Tataramon nin Dios nagsasabi: “Tawan nindo sa saiya an bunga kan saiyang mga kamot, asin ipaomaw sia nindo sa saiyang mga gibo minsan sa mga tata.” (Talinhaga 31:31) Logod na magin totoo iyan sa lambang saro sa saindo.

[Mga Nota sa Ibaba]

Nagigirumdoman daw Nindo?

• Paano nagin mahal na marhay sa pagheling ni Jehova an nagkapirang Kristiana kan enot na siglo?

• Paano ginibo kan dakol na tugang na babae sa panahon niato na sinda magin mahal na marhay para sa Dios?

• Sa anong mga paagi sinusuportaran ni Jehova an nagsosolong mga ina asin iba pang tugang na babae na mayo nin agom?

• Paano ikapaheheling nin sarong babae an odok sa pusong paggalang sa areglo nin pagkapayo?

[Mga Hapot Para sa Pag-adal]

[Kahon sa pahina 17]

MGA HALIMBAWA NA DAPAT HOROPHOROPON

Gusto daw nindong estudyaran an nagkapira pang halimbawa nin fiel na mga babae na nasambitan sa Biblia? Kun iyo, basahon tabi an mga teksto na sinitar sa ibaba. Mantang hinohorophorop nindo an laen-laen na indibiduwal na nakalista, hingoahon na mansayon an mga prinsipyo na puede nindong ikaaplikar nin orog pa sa saindong buhay.​—Roma 15:4.

◆ Si Sara: Genesis 12:​1, 5; 13:18a; 21:​9-​12; 1 Pedro 3:​5, 6.

◆ An buka an palad na mga babaeng Israelita: Exodo 35:​5, 22, 25, 26; 36:3-7; Lucas 21:1-4.

◆ Si Debora: Hokom 4:1–​5:31.

◆ Si Rut: Rut 1:​4, 5, 16, 17; 2:​2, 3, 11-13; 4:15.

◆ An babae sa Sunem: 2 Hade 4:8-37.

◆ An babaeng taga Fenicia: Mateo 15:22-28.

◆ Si Marta asin Maria: Marcos 14:3-9; Lucas 10:38-42; Juan 11:17-29; 12:1-8.

◆ Si Tabita: Gibo 9:36-41.

◆ An apat na aking babae ni Felipe: Gibo 21:9.

◆ Si Febe: Roma 16:​1, 2.

[Ritrato sa pahina 15]

Tinatawan daw nindo nin komendasyon an daing agom na mga tugang na babae na maimbod na kinukuyog an ley nin Dios?

[Ritrato sa pahina 16]

Anong espesipikong mga kahagadan an puedeng sambiton sa pamibi bago maghale an mga aki pasiring sa eskuelahan?