An Pagtitiwala Mahalagang Marhay sa Maogmang Buhay

AN PAGKAHILO sa kakanon dai nanggad nakaoogma. An saro na paorootrong nakaeeksperyensia kaiyan kaipuhan na magin mas maingat sa saiyang mga ugale sa pagkakan. Alagad bako man na realistikong opsion an biyo nang pag-ontok sa pagkakan tanganing makalikay sa peligro nin pagkahilo sa kakanon. An paggibo kaiyan magigin dahelan nin mas dakol na problema kisa mareresolberan kaiyan. Kun mayo nin kakanon mayo nin siisay man na mabubuhay nin haloy.

Sa kaagid na paagi, makolog na traydoron nin saro na pinagtiwalaan niato. An paorootrong pagtraydor sa satong pagtitiwala tibaad makapagpaisip-isip sa sato nin maingat manongod sa satong pagpili nin mga makakaasosyar. Pero, bakong solusyon an biyong pagrayo sa mga tawo tanganing malikayan an pagkasudya kan linalaoman. Taano ta bako? Huli ta an pagigin daing tiwala sa iba naghahale kan sato mismong kaogmahan. Tanganing magkaigwa nin kontentong buhay, kaipuhan niato an mga relasyon na nakabasar sa tiwala kan saro sa saro.

“An pagtitiwala saro sa pundamental na kaipuhan sa simpleng pangaroaldaw na interaksion sa iba,” an komento kan librong Jugend 2002. “Hinihimuyawot kan gabos an pagtitiwala,” an bareta kan peryodikong Neue Zürcher Zeitung. “Pinaooswag kan pagtitiwala an kualidad nin buhay” sagkod sa punto na iyan magin “mahalagang marhay sa pagdadanay na buhay.” Sa katunayan, an peryodiko nagsabi pa, kun mayo nin pagtitiwala, “dai makakaya nin sarong tawo na mabuhay.”

Huling igwa kita nin pundamental na pangangaipo na may pagtiwalaan, kiisay daw kita puedeng magtiwala na dai kita natatakot na masudya an linalaoman?

Magtiwala Ka ki Jehova sa Bilog Mong Puso

“Magtiwala ka ki Jehova sa bilog mong puso,” an sabi sato kan Biblia. (Talinhaga 3:5) Tunay nanggad, paorootro kitang ineenkaminar kan Tataramon nin Dios na magtiwala sa satong Kaglalang, si Jehova Dios.

Taano ta makapagtitiwala kita sa Dios? Enot, huli ta si Jehova Dios banal. Si propeta Isaias nagsurat: “Banal, banal, banal si Jehova.” (Isaias 6:3) An ideya daw nin kabanalan dai nakaaakit saindo? An totoo, iyan maninigong makaakit sa saindo huli ta an kabanalan ni Jehova nangangahulogan na sia dalisay, harayo sa gabos na salang gibo, asin biyong masasarigan. Sia nungkang magigin maraot o mapan-abuso, asin imposible para sa saiya na raoton an satong pagtitiwala.

 Dugang pa, makapagtitiwala kita sa Dios huli sa abilidad asin kamawotan nia na suportaran an mga naglilingkod sa saiya. Halimbawa, an saiyang supremong kapangyarihan nagpapangyari sa saiya na humiro. An saiyang sangkap na hustisya asin kadonongan naggigiya sa saiyang paghiro. Asin an saiyang dai mapapantayan na pagkamoot nagmomotibar sa saiya na humiro. “An Dios pagkamoot,” an isinurat ni apostol Juan. (1 Juan 4:8) An pagkamoot nin Dios nakaiimpluwensia sa gabos na ginigibo nia. An kabanalan ni Jehova asin an iba pa niang marahayon na mga kualidad an nagpangyari na sia magin an pinakamarahay na Ama, saro na puede niatong pagtiwalaan nin lubos. Mayo nin ano man asin mayo nin siisay man na mas mapagtitiwalaan kisa ki Jehova.

Magtiwala ki Jehova Asin Magin Maogma

An saro pang balidong dahelan na magtiwala ki Jehova iyo na mas nasasabotan nia kita kisa siisay pa man. Aram nia na an lambang tawo igwa nin pundamental na pangangaipo sa tiwasay, nagdadanay, asin may pagtitiwalang relasyon sa Kaglalang. An mga igwa kan siring na relasyon mas tiwasay. “Maogma an pusog na lalaki na ibinugtak si Jehova bilang saiyang pinagtitiwalaan,” an ikinonklusyon ni Hadeng David. (Salmo 40:4) Minilyon ngonyan an bilog na pusong may kaisipan na arog kan ki David.

Estudyare an nagkapirang halimbawa. Si Doris nag-istar sa Republika Dominica, Alemania, Grecia, asin Estados Unidos. Sabi nia: “Naoogma akong marhay na magtiwala ki Jehova. Aram nia kun paano ako aatamanon sa pisikal, espirituwal, asin emosyonal. Sia an puedeng magin pinakadayupot na katood nin saro kasuarin man.” Si Wolfgang, sarong kinokonsulta dapit sa ley, nagpapaliwanag: “Marahayon nanggad na may saro na masasarigan na interesado sa pinakaikararahay mo, saro na kayang gibohon​—asin talagang gigibohon—​kun ano an pinakamarahay para sa saimo!” Si Ham, na namundag sa Asia alagad nag-iistar na ngonyan sa Europa, nagkokomento: “Kompiado ako na kontrolado ni Jehova an gabos na bagay, asin dai sia nasasala, kaya naoogma akong magsarig sa saiya.”

Siempre, an lambang saro sa sato kaipuhan na magtiwala bako sanang sa satong Kaglalang kundi pati sa mga tawo. Huli kaini, tinatawan kita ni Jehova, bilang madonong asin may kabatidan na katood, nin sadol sa kun anong klaseng mga indibiduwal an maninigo niatong pagtiwalaan. Paagi sa maingat na pagbasa nin Biblia, matatawan niato nin atension an hatol nia sa bagay na ini.

Mga Tawo na Puede Niatong Pagtiwalaan

“Dai ka magtiwala sa mga mahal na tawo, ni sa aki nin daganon na tawo, na sa sainda mayo nin kaligtasan,” an isinurat kan salmista. (Salmo 146:3) An ipinasabong na mga tataramon na ini nagtatabang sa sato na rekonoseron na dakol na tawo an dai niato maninigong pagtiwalaan. Dawa an mga iginagalang na marhay bilang “mga mahal na tawo” sa kinaban na ini, siring kan mga eksperto sa espesyalisadong mga linya nin kaaraman o aktibidad, bakong automatiko na maninigong pagtiwalaan niato. Sa parate an saindang paggiya puedeng masala, asin an pagtitiwala niato sa siring na “mga mahal na tawo” puedeng biglang magin pagkasudya kan linalaoman.

Siempre, maninigo na dai ini magin dahelan na kita magdeskompiar sa gabos. Minsan siring, malinaw na kaipuhan niatong magin mapamili sa pagtitiwalaan niato. Anong mga pinagbabasaran sa paghusgar an maninigo niatong gamiton? Tibaad makatabang sa sato an sarong halimbawa sa suanoy  na nasyon nin Israel. Kan mangaipo na magnombra nin mga indibiduwal na mapasan nin magabat na paninimbagan sa Israel, sinadol si Moises na “pumili hale sa bilog na banwaan nin mga lalaking may kakayahan, natatakot sa Dios, mga lalaking mapagtitiwalaan, na naoongis sa madayang pakinabang.” (Exodo 18:21) Ano an manonodan niato digdi?

Ini mga lalaking nagpaheling nin diosnon na mga kualidad bago nombrahan sa katongdan na tinitiwalaan. Pinatunayan na ninda na may pagkatakot sinda sa Dios; igwa sinda nin makosog na pagreberensiar sa Kaglalang asin natatakot na paanggoton sia. Naheheling kan gabos na ginigibo kan mga lalaking ini an saindang pinakamakakaya tanganing suportaran an mga pamantayan nin Dios. Ikinaoongis ninda an madayang pakinabang, na nagpaparisa nin kosog sa moral na maolang na raoton sinda kan kapangyarihan. Dai ninda aabusohon an pagtitiwala sa sainda tangani sanang paoswagon an personal nindang intereses o an sa mga paryente o katood ninda.

Bako daw na magigin madonong para sa sato ngonyan na gamiton an kaparehong mga pinagbabasaran sa paghusgar kun nagpipili kan mga pagtitiwalaan niato? May midbid daw kitang mga indibiduwal na an gawe-gawe nagpapaheling na may takot sinda sa Dios? Determinado daw sindang otobon an saiyang mga pamantayan sa paggawe? Igwa daw sinda kan integridad na lumikay sa paggibo nin mga bagay na bakong tama? May pagkaonesto daw sinda tanganing dai ninda kontrolon an mga situwasyon para sa sadiri nindang bentaha o tanganing makua an gusto ninda? Daing duwa-duwa na an mga lalaki asin babaeng nagpapaheling kan siring na mga kualidad maninigong pagtiwalaan niato.

Dai Panluyahan nin Boot sa Paminsanminsan na Pagkasudya kan Linalaoman

Sa pagdesisyon kun siisay an pagtitiwalaan niato, kaipuhan na kita magin mapasensia, huling nakukua an pagtitiwala sa pag-agi nin panahon. An madonong na gibohon iyo na itao an satong pagtitiwala sa sarong tawo nin luway-luway asin tangga-tangga. Paano? Bueno, puedeng obserbaran niato an gawe-gawe nin saro sa pag-agi nin panahon, na inoobserbaran an saiyang reaksion sa pirang situwasyon. An tawong iyan daw mapagtitiwalaan sa saradit na bagay? Halimbawa, ibinabalik daw nia an mga bagay na sinubli nia arog kan panuga nia asin nasa oras daw sia kun may katagbuan sia? Kun iyo, kun siring tibaad magsaboot kita na puede na niatong itao sa saiya an satong pagtitiwala sa mas seryosong mga bagay. Kaoyon ini kan prinsipyo na: “An fiel sa kadikit fiel man sa dakol.” (Lucas 16:10) An pagigin mapamili asin mapasensia puedeng makatabang sa sato na makalikay sa grabeng mga pagkasudya kan linalaoman.

Pero, paano kun may nakasudya sa linalaoman niato sa saiya? Magigirumdoman kan mga nag-aadal nin Biblia na kan bangging sia arestaron, si Jesu-Cristo biyong nasudya an linalaoman nia sa saiyang mga apostol. Pinasaloiban sia ni Judas Iscariote, asin an iba nagdurulag sa takot. Pinaindahan pa ngani ni Pedro si Jesus nin tolong beses. Alagad namansayan ni Jesus na si Judas sana an guminawe nin tuyo. An pagkasudya kan saiyang linalaoman sa arog kaiyan na panahon na kritikal na marhay dai nakaolang ki Jesus na patunayan liwat an saiyang pagtitiwala sa natadang 11 apostol pakalihis sana nin pirang semana. (Mateo 26:45-47, 56, 69-75; 28:16-20) Siring man, kun nagsasaboot kita na trinaydor kita nin saro na pinagtiwalaan niato, marahay na pensaron niato kun baga an sinasaboot na pagtraydor nagpapatunay nin dai mapagtitiwalaan na aktitud o nin madali sanang kaluyahan nin laman.

Ako daw Mapagtitiwalaan?

An saro na nagdesisyon na magin mapamili kun siisay an pagtitiwalaan nia kaipuhan na magin imparsial asin hapoton an sadiri: ‘Ako daw mapagtitiwalaan? Anong rasonableng mga pamantayan nin pagigin mapagtitiwalaan an maninigong laoman ko sa sakong sadiri asin sa iba?’

Daing duwa-duwa na an tawong mapagtitiwalaan pirmeng nagsasabi kan totoo. (Efeso 4:25) Dai nia ibinabagay an saiyang mga tataramon segun sa kun siisay an kaolay nia para sa personal na bentaha. Asin kun maggibo sia nin kapanugaan, ginigibo kan tawong mapagtitiwalaan an gabos na makakaya nia tanganing otobon an tataramon nia. (Mateo 5:37) Kun may magtuga nin sekreto sa saiya, iniingatan kan tawong mapagtitiwalaan an sekretong iyan asin dai sia nagtitsismis. An masasarigan na tawo fiel sa saiyang agom. Dai sia nagheheling nin pornograpiya, dai sia nagpaparaimahinar nin makalaman na mga bagay, asin dai sia nakikipaggitilan. (Mateo 5:​27, 28) An tawong maninigo sa satong pagtitiwala mahigos na naghahanap-buhay para sa sadiri nia asin sa saiyang pamilya saka dai naghihingoang aprobetsaran an iba tanganing makakua nin kuarta na dai nia pinagpagalan. (1 Timoteo 5:8) Tatabangan kita kan paggirumdom  sa siring na rasonable asin sono sa Kasuratan na mga pamantayan na mamidbid an mga tawo na puede niatong pagtiwalaan. Dugang pa, an pagsunod sa iyo man sanang mga pamantayan nin paggawe matabang sa kada saro sa sato na magin maninigo na pagtiwalaan nin iba.

Magigin nakaoogmang marhay na mabuhay sa sarong kinaban na an gabos na tawo mapagtitiwalaan asin an pagkasudya kan linalaoman huli sa pagkaraot nin pagtitiwala nakalihis na! Iyan daw pangatorogan sana? Bako para sa mga tawo na seryosong tinutubod an mga panuga sa Biblia, huli ta ihinuhula kan Tataramon nin Dios an pag-abot nin sarong magayon na “bagong daga” na mayo na kan gabos na panloloko, pagputik, asin pag-aprobetsar saka mayo na nin pagmondo, helang, asin pati kagadanan! (2 Pedro 3:13; Salmo 37:​11, 29; Kapahayagan 21:3-5) Bako daw na kapakipakinabang na makaaram nin orog pa manongod sa esperansang ini? Maoogma an Mga Saksi ni Jehova na itao sa saindo an dugang pang impormasyon manongod digdi asin iba pang mahalagang marhay na mga topiko.

[Ritrato sa pahina 4]

An pagigin daing tiwala naghahale kan satong kaogmahan

[Ritrato sa pahina 5]

Si Jehova maninigong marhay na pagtiwalaan niato

[Mga Ritrato sa pahina 7]

Gabos kita nangangaipo nin mga relasyon na nakabasar sa tiwala kan saro sa saro