Kultibaron an Espiritu nin Pagtatao

MAYO nin siisay man na namundag na may espiritu nin pagtatao. An natural na inklinasyon nin sarong omboy iyo na panigoan an sadiring mga gusto asin pangangaipo kaiyan, na daing pagrisa sa intereses dawa kan nag-aataman kaiyan. Pero, pag-abot nin panahon naaaraman kan aki na bako sana sia an may mga pangangaipo. Kaipuhan na konsideraron man an iba, asin kaipuhan na manodan nia bako sanang an mag-ako kundi patin an magtao asin manhiras. Kaipuhan na kultibaron an espiritu nin pagtatao.

Bakong gabos na indibiduwal na nagtatao​—dawa dakol an itinatao​—an igwa nin espiritu nin pagtatao. May mga tibaad nagdodonar sa sarong institusyon tangani na suportaran an sadiri nindang intereses. An iba tibaad nag-aambag tanganing makua an pag-oyon nin mga tawo. Minsan siring, laen an pagtatao na ginigibo kan tunay na mga Kristiano. Ano, kun siring, an mga karakteristiko kan pagtatao na ineenkaminar sa Tataramon nin Dios? Sisimbagon an hapot na iyan kan sarong halipot na pag-estudyar sa pagtatao na ginibo kan mga Kristiano kan enot na siglo.

Mga Halimbawa nin Kristianong Pagtatao

An Kristianong pagtatao, na ilinaladawan sa Biblia, sa pankagabsan iyo an “paghiras nin  mga bagay sa iba” na tunay na nangangaipo. (Hebreo 13:16; Roma 15:26) Iyan dai ginigibo na napipiritan. Si apostol Pablo nagsurat: “Gumibo an lambang saro nin oyon sa napagdesisyonan nia sa saiyang puso, bakong sa maraot na boot o sa kapiritan, huli ta an Dios namomoot sa maogmang paratao.” (2 Corinto 9:7) An pagtatao dai man ginigibo tanganing magpasikat. Ginibo ni Ananias asin Safira an arog kaiyan na pagsaginsagin asin nag-ani nin mapait na marhay na mga resulta.​—Gibo 5:1-10.

Naglataw an pangangaipo para sa pagtatao kan an dakol na Judio asin proselito hale sa hararayong lugar nagtiripon sa Jerusalem para sa kapiestahan nin Pentecostes kan 33 C.E. Duman kaidto “nagkaparano nin banal na espiritu asin nagpoon na magtaram nin manlaenlaen na tataramon” an mga parasunod ni Jesus. Sarong dakulang kadaklan an nagtiripon sa palibot ninda asin nadangog an nakapupukaw sa boot na pahayag ni Pedro manongod ki Jesu-Cristo. Sa huri, naheling kan mga tawo kun paano pinaomayan ni Pedro asin Juan an sarong lupog na lalaki sa may pinto kan templo, asin nadangog ninda si Pedro na nagtaram liwat manongod ki Jesus asin sa pangangaipong magsolsol. Rinibo an nagsolsol asin nabautismohan bilang mga parasunod ni Cristo.​—Gibo, kapitulo 2 asin 3.

Gusto kan bagong mga nakombertir na magdanay sa Jerusalem asin mag-ako nin dugang pang pagtotokdo hale sa mga apostol ni Jesus. Alagad paano maaasikaso kan mga apostol an mga pangangaipo kan gabos na bisitang idto? An pagkasaysay sa Biblia nagsasabi sato: “An gabos na kagsadiri nin mga oma o mga harong ipinapabakal an mga iyan asin dinadara an kantidad kan mga ipinabakal asin ibinubugtak ninda iyan sa pamitisan kan mga apostol. Dangan idinidistribwir iyan sa kada saro, sono sa saiyang pangangaipo.” (Gibo 4:33-35) Totoo nanggad, an bago pa sanang organisaron na kongregasyon sa Jerusalem may espiritu nin pagtatao!

Kan huri, an ibang kongregasyon nagpaheling nin kaparehong espiritu nin pagtatao. Halimbawa, an mga Kristianong Macedonio, maski mga dukha man, nagtao nin labi pa sa talagang kaya nindang iambag sa daing sukat nindang mga tugang sa Judea. (Roma 15:26; 2 Corinto 8:1-7) An kongregasyon nin Filipos nagin pambihira sa pagsuportar sa ministeryo ni Pablo. (Filipos 4:​15, 16) An kongregasyon sa Jerusalem mismo aroaldaw na nagdistribwir nin kakanon sa daing sukat na mga balong babae, asin an mga apostol nagnombra nin pitong kualipikadong lalaki tanganing seguradohon na mayong mapabayaan na mga balong babae na angay na mag-ako.​—Gibo 6:1-6.

An enot na Kristianong mga kongregasyon nagin marikas sa paghiro dawa bilang pag-antisipar sa masakit na mga panahon. Halimbawa, kan ihula ni propeta Agabo an pagdatong nin grabeng gutom, an mga disipulo sa kongregasyon nin Antioquia sa Siria “naggarayak, an lambang saro siring sa saiyang makakayanan, na magpadara nin ayuda sa mga tugang na nag-eerok sa Judea.” (Gibo 11:​28, 29) Marahayon nanggad na espiritu an ipinaheling ninda bilang pag-antisipar sa mga pangangaipo kan iba!

Ano an nagtulod sa enot na mga Kristiano na magin bukang marhay an palad asin mamomoton? Sa katunayan, paano nagkakaigwa an saro nin espiritu nin pagtatao? Dakol kitang manonodan sa halipot na pag-estudyar sa halimbawa ni Hadeng David.

An Buka an Palad na Pagsuportar ni David sa Tunay na Pagsamba

Sa laog nin haros 500 na taon, an kaban kan tipan​—sarong sagradong lalagan na nagrerepresentar sa presensia ni Jehova​—mayo nin permanenteng lugar. Iyan nakasaray sa sarong tolda, o tabernakulo, na ibinabarobalyo nin lugar durante kan paglagawlagaw kan Israel sa kaawagan dangan sa pagpasiring sa Dagang Panuga. Grabe an pagmawot ni Hadeng David na kuanon an kaban sa tolda na sinasarayan kaiyan asin magtogdok nin sarong angay na harong para ki Jehova na bubugtakan kan sagradong kaban. Sa pakipag-olay ki propeta Natan, si David nagsabi: “Uya nag-eerok ako sa harong na gibo sa mga sedro, alagad an kaban kan tipan ni Jehova yaon sa sirong kan mga tahob nin tolda.”​—1 Cronica 17:1.

Pero, si David nagin sarong lalaking parapakilaban. Kaya ipinagboot ni Jehova na an saiyang aking si Salomon, durante nin matoninong na pagreynar, an matogdok kan templo na bubugtakan kan kaban kan tipan. (1 Cronica 22:7-10) Minsan siring, dai ini nakapogol sa espiritu nin pagtatao ni David. Inorganisar an sarong  dakulang grupo, pinonan niang itao an materyales na gagamiton sa pagtogdok kan templo. Kan huri sinabihan nia si Salomon: “Nag-andam ako para sa harong ni Jehova nin sanggatos na ribong talentong bulawan asin sarong milyon na talentong pirak, asin daing paagi na matimbang an tanso saka batbat huli sa kadakolan kaiyan; asin inandam ko an mga tablon saka mga gapo.” (1 Cronica 22:14) Dai pa nakontento kaiyan, hale sa saiyang personal na kayamanan, nagkontribwir si David nin bulawan asin pirak na sa presenteng panahon may halagang labing $1,200,000,000. Apuera dian, an mga prinsipe buka an palad na nagkontribwir man. (1 Cronica 29:3-9) Tunay nanggad, si David nagpaheling nin espiritu nin pagkabuka an palad asin nin pagtatao!

Ano an nagmotibar ki David na magtao na bukang marhay an palad? Nasasabotan nia na an gabos na nakua asin nagibo nia resulta kan bendisyon ni Jehova. Rinekonoser nia sa pamibi: “O Jehova na samuyang Dios, an gabos na kadakolan na ini na samong inandam tanganing magtogdok para sa saimo nin harong para sa saimong banal na ngaran, iyan hale sa saimong kamot, asin iyan gabos sadiri mo. Asin naaaraman kong gayo, O Dios ko, na ika parasiyasat kan puso, asin na sa pagkamakatanosan na ika naoogma. Ako, sa sakong  kabtang, sa katanosan kan sakong puso gikan sa boot na nagdolot kan gabos na bagay na ini, asin ngonyan an saimong banwaan na uya digdi naoogma akong maheling na nagdodolot sa saimo nin gikan sa boot.” (1 Cronica 29:​16, 17) Pinahalagahan na marhay ni David an saiyang relasyon ki Jehova. Rinekonoser nia an pangangaipong maglingkod sa Dios “na may kompletong puso asin may nakaoogmang marhay na kalag,” asin nakanompong sia nin kagayagayahan sa paggibo kaiyan. (1 Cronica 28:9) An iyo man sanang mga kualidad na ini an nagpahiro sa enot na mga Kristiano na ipaheling an espiritu nin pagtatao.

Si Jehova—An Kadarudakulaing Paratao

Si Jehova an pinakamarahay na halimbawa sa pagtatao. Sia mamomoton asin nagmamakolog na marhay kaya “pinasisirang nia an saiyang saldang sa maraot asin sa marahay asin pinapaoranan nia an matanos asin bakong matanos.” (Mateo 5:45) Itinatao nia sa gabos na tawo an “buhay asin hinangos patin gabos na bagay.” (Gibo 17:25) Tunay nanggad, arog kan pagkasabi ni disipulo Santiago, “an lambang marahay na balaog asin lambang sangkap na regalo hale sa itaas, huling iyan naghahale sa Ama kan langitnon na mga liwanag.”​—Santiago 1:17.

 An kadarudakulaing regalo ni Jehova sa sato iyo an pagsugo nia sa saiyang “Aking bugtong, tanganing an lambang nagtutubod sa saiya dai mapahamak kundi magkaigwa nin buhay na daing katapusan.” (Juan 3:16) Mayo nin siisay man na puedeng maghingako na sia maninigo sa siring na regalo, “huli ta an gabos nagkasala asin nagkulang sa kamurawayan nin Dios.” (Roma 3:​23, 24; 1 Juan 4:​9, 10) An pantubos ni Cristo an basehan asin pinakapaagihan para sa “dai ikaladawan na daing bayad na balaog” nin Dios, an boot sabihon, an “nakalalabing marhay na dai na kutana maninigong kabootan nin Dios.” (2 Corinto 9:​14, 15) Huling inapresyar an balaog nin Dios, ginibo ni Pablo na pangenot na gibohon sa buhay nia an “lubos na magpatotoo sa maogmang bareta manongod sa dai na kutana maninigong kabootan nin Dios.” (Gibo 20:24) Rinekonoser nia na kabotan nin Dios na “gabos na klase nin tawo makaligtas asin makaabot sa tamang kaaraman sa katotoohan.”​—1 Timoteo 2:4.

Ngonyan, ginigibo na ini paagi sa mahiwas na paghuhulit asin pagtotokdo na nakaabot na ngonyan sa 234 kadagaan sa bilog na daga. Ihinula ni Jesus an paghiwas na ini kan sia magsabi: “An maogmang baretang ini kan kahadean ihuhulit sa bilog na ineerokan na daga para sa pagpatotoo sa gabos na nasyon; dangan madatong an katapusan.” (Mateo 24:14) Iyo, “sa gabos na nasyon an maogmang bareta kaipuhan na ikahulit nguna.” (Marcos 13:10) Kan nakaaging taon labing anom na milyon na parabalangibog kan maogmang bareta an naggamit nin 1,202,381,302 na oras sa gibohon na ini asin namayo sa labing 5,300,000 na pag-adal sa Biblia. Huling mga buhay an nakataya, mahalagang marhay nanggad an pagtotokdong ini.​—Roma 10:13-15; 1 Corinto 1:21.

Minilyon na publikasyon​—kaiba an mga Biblia, libro, asin brosyur​—an iniimprenta kada taon tanganing tabangan an mga nagugutom sa katotoohan sa Biblia. Saro pa, labi nanggad sa sarong bilyon na kopya kan magasin na Torrengbantayan asin Awake! an iniimprenta. Mantang naghihimate an mga tawo sa maogmang bareta, nagdadakol an itinotogdok na Kingdom Hall asin Assembly Hall kan Mga Saksi ni Jehova, na nagseserbing mga sentro nin pagtotokdo sa Biblia. Inaareglo kada taon an pansirkitong mga asamblea asin espesyal na mga aldaw nin asamblea, saka pandistritong mga kombension. Nagpapadagos man an pagsasanay sa mga misyonero, nagbibiaheng mga paraataman, kamagurangan, asin ministeryal na mga lingkod. Nagpapasalamat kita ki Jehova sa pagpangyaring makua an gabos na probisyon na ini paagi sa “fiel asin may diskresion na oripon.” (Mateo 24:45-47) Tunay nanggad na gusto niatong ipaheling an satong pagpasalamat sa Saiya!

Pagpaheling nin Pagpasalamat ki Jehova

Arog kan pagtogdok kan templo asin pagtao kan mga pangangaipo kan enot na Kristianong mga kongregasyon, an isinusustento sa gabos na ini hale entero sa gikan sa boot na mga kontribusyon. Minsan siring, dapat na girumdomon na mayo nin puedeng magpayaman ki Jehova, an Kagsadiri kan gabos na bagay. (1 Cronica 29:14; Haggeo 2:8) Kun siring, an mga kontribusyon sarong ebidensia kan satong pagkamoot ki Jehova asin kan satong pagmawot na paoswagon an tunay na pagsamba. An mga kapahayagan na ini nin pagigin buka an palad, sabi ni Pablo, nagbubunga nin “kapahayagan nin pagpasalamat sa Dios.” (2 Corinto 9:8-13) Ineenkaminar ni Jehova an siring na pagtatao huli ta ipinaheheling kaiyan na igwa kita nin tamang espiritu asin marahay na puso para sa saiya. An mga buka an palad asin nagsasarig ki Jehova bebendisyonan nia asin mapapakarhay sa espirituwal. (Deuteronomio 11:13-15; Talinhaga 3:​9, 10; 11:25) Inaasegurar kita ni Jesus na maresulta iyan sa kaogmahan, na nagsasabi: “Igwang orog na kaogmahan sa pagtao kisa pag-ako.”​—Gibo 20:35.

An mga Kristiano na may espiritu nin pagtatao dai naghahalat na sana sagkod na umabot an mga panahon nin pangangaipo. Imbes, naghahanap sinda nin mga oportunidad na ‘gumibo kan marahay sa gabos, alagad orog na sa mga may relasyon sa sainda sa pagtubod.’ (Galacia 6:10) Ineenkaminar an diosnon na pagigin buka an palad, si Pablo nagsurat: “Dai nindo paglingawan an paggibo nin marahay asin an paghiras nin mga bagay sa iba, huli ta sa siring na mga atang naoogmang gayo an Dios.” (Hebreo 13:16) Nasosonoan na marhay ni Jehova Dios an paggamit niato kan satong mga kayamanan​—panahon, kosog, kuarta​—tanganing tabangan an iba asin palakopon an dalisay na pagsamba. Totoo nanggad, nasosonoan nia an espiritu nin pagtatao.

[Kahon/Ritrato sa pahina 28, 29]

Mga Paaging Pinipili nin Iba sa Pagtao

MGA KONTRIBUSYON SA PAMBILOG NA KINABAN NA GIBOHON

An dakol nagtatagama, o nagbabadyet, nin kantidad na ibinubugtak ninda sa mga kahon nin kontribusyon na may nakasurat na “Contributions for the Worldwide Work​—Matthew 24:14.”

Kada bulan, ipinadadara kan mga kongregasyon an kantidad na ini sa opisina kan Mga Saksi ni Jehova na naglilingkod sa saindang nasyon. An boluntad na mga donasyon na kuarta puede man na direktang ipadara sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang opisina na naglilingkod sa saindong nasyon. An mga tseke maninigong bayadan sa “Watch Tower.” An mga alahas o iba pang mahalagang bagay puede man na idonar. An sarong halipot na surat na nagsasabing iyan sarong direktang regalo maninigong iiba sa mga kontribusyon na ini.

AREGLO SA KONDISYONAL NA DONASYON

Puedeng magdonar nin kuarta paagi sa sarong espesyal na areglo na dian, enkaso hagadon iyan kan nagdonar, an donasyon puedeng ibalik sa saiya. Para sa dugang na impormasyon, makikomunikar tabi sa Treasurer’s Office sa adres na sinabi sa enotan.

PAGPLANO PARA SA PAG-ABULOY

Apuera sa direktang mga regalong kuarta asin kondisyonal na mga donasyon na kuarta, igwa nin iba pang mga paagi nin pagtao para sa kapakinabangan kan paglilingkod sa Kahadean sa bilog na kinaban. Kabale digdi an:

Seguro: An Watch Tower Society puedeng gibohon na benepisyaryo nin polisa sa seguro sa buhay o nin plano sa pagretiro/pension.

Mga Deposito sa Bangko: An mga deposito sa bangko, sertipiko nin deposito, o indibiduwal na deposito sa pagretiro puedeng ipagkatiwala sa o bayadan sa Watch Tower Society pagkagadan kan nagdeposito, kaoyon sa lokal na mga kahagadan sa bangko.

Aksiones Asin mga Bono: An aksiones asin mga bono puedeng idonar sa Watch Tower Society bilang direktang regalo.

Daga Asin Harong: An ikapapabakal na daga asin harong puedeng idonar magsalang paagi sa direktang pagregalo o sa kaso nin residensial na rogaring, paagi sa pagreserba sa nagdonar nin propiedad sagkod na nabubuhay, na puedeng magpadagos na mag-istar dian sagkod na sia nabubuhay. Paaramon an sangang opisina sa saindong nasyon bago ibalyo an ano man na daga asin harong.

Gift Annuity: An gift annuity sarong areglo kun saen ibinabalyo nin saro an kuarta o garantiya sa Watch Tower Society. Karibay kaiyan, an nagdonar, o saro na dinesignaran kan nagdonar, maresibi nin espesipikong annuity payment kada taon sagkod na nabubuhay. An nagdonar binabawasan sa buhis sa ginaganar sa taon na naestablisar an gift annuity.

Mga Testamento Asin Kabuhayan na Ipinagkatiwala: An propiedad o kuarta puedeng ipamana sa Watch Tower Society paagi sa sarong testamento na ginibo sa legal na paagi, o an Watch Tower Society puedeng gibohon na benepisyaryo nin sarong kontrata sa kabuhayan na ipinagkatiwala. An kabuhayan na ipinagkatiwala na an nakikinabang sarong relihiosong organisasyon puedeng magtao nin nagkapirang bentaha sa pagbuhis.

Siring sa ipinaririsa kan terminong “pagplano para sa pag-abuloy,” an klaseng ini nin mga donasyon natural sanang nagkakaipo nin pagplano kan nagdonar. Tanganing tabangan an mga indibiduwal na gustong pakinabangon an pambilog na kinaban na gibohon kan Mga Saksi ni Jehova paagi sa sarong klase nin pagplano para sa pag-abuloy, sarong brosyur an inandam sa Ingles asin Kastila na may titulong Charitable Planning to Benefit Kingdom Service Worldwide. Isinurat an brosyur bilang simbag sa dakol na hapot na naresibi mapadapit sa mga regalo, testamento, asin kabuhayan na ipinagkatiwala. Igwa man iyan nin dagdag na makakatabang na impormasyon sa pagplano manongod sa daga, pinansial, asin buhis. Iniimpormaran kaiyan an mga indibiduwal dapit sa laen-laen na paagi nin pagtao nin regalo magsalang ngonyan o paagi sa pamana pagnagadan.

Pakatapos na mabasa an brosyur asin maghapot sa sadiri nindang kinokonsulta dapit sa ley o buwis asin sa Charitable Planning Office, dakol an nakatabang sa Mga Saksi ni Jehova sa bilog na kinaban asin, kadungan kaiyan, ginagamit sa pinakalubos na paagi an mga benepisyo ninda sa buhis huli sa paggibo kaiyan. Puedeng makakua kan brosyur na ini paagi sa direktang paghagad nin kopya sa Charitable Planning Office.

Para sa dugang pang impormasyon, puede kamong makikomunikar sa Charitable Planning Office, magsalang paagi sa pagsurat o telepono, sa adres na nakalista sa ibaba o sa opisina kan Mga Saksi ni Jehova na naglilingkod sa saindong nasyon.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue

San Francisco Del Monte

1105 Quezon City

Telepono: (02) 411-6090

[Ritrato sa pahina 26]

Ano an nagtulod sa enot na mga Kristiano na magin buka an palad?