Mga Hapot Hale sa mga Parabasa

Taano ta naghagad si Eliseo nin “duwang kabtang” kan espiritu ni Elias?

Bago matapos ni Elias an asignasyon nia bilang propeta sa Israel, nakiolay sa saiya an mas nguhod na si propeta Eliseo: “Tabi na mapasakuya logod an duwang kabtang kan saimong espiritu.” (2 Hade 2:9) Sa espirituwal na pananaram, minalataw na si Eliseo naghahagad nin duwang kabtang siring kan itinatao sa panganay na aking lalaki. (Deuteronomio 21:17) An sarong halipot na pag-estudyar kan pagkasaysay an malinaw kaini asin matabang sa sato na makakua nin mga leksion sa nangyari.

Kaoyon sa instruksion ni Jehova, linahidan ni propeta Elias si Eliseo na magin saiyang kasalihid. (1 Hade 19:19-​21) Sa laog nin mga anom na taon, naglingkod si Eliseo bilang fiel na katabang ni Elias asin determinado siang gibohon ini sagkod sa katapusan. Dawa kan huring aldaw ni Elias bilang propeta sa Israel, si Eliseo nagdanay na kaiba kan paratokdo nia. Minsan ngani sinadol ni Elias si Eliseo na pumondo na sa pagsunod sa saiya, tolong beses na sinabi kan mas nguhod na propeta: “Dai taka babayaan.” (2 Hade 2:​2, 4, 6; 3:11) Tunay nanggad, minansay ni Eliseo an mas may edad na propeta bilang espirituwal na ama nia.​—2 Hade 2:12.

Minsan siring, bako sanang si Eliseo an espirituwal na aki ni Elias. Nakaibaiba ni Elias asin Eliseo an sarong grupo nin mga lalaki na inaapod na “mga aki kan mga propeta.” (2 Hade 2:3) An pagkasaysay sa Ikaduwang Hade nagsasabi na an “mga aki” na ini nakamate man nin pagkadayupot sa saindang espirituwal na ama, si Elias. (2 Hade 2:​3, 5, 7, 15-​17) Pero, bilang linahidan na kasalihid, si Eliseo an pangenot sa espirituwal na mga aki ni Elias​—sia siring sa panganay. Sa suanoy na Israel, an literal na panganay na aking lalaki nag-aako nin duwang kabtang kan pamana kan saiyang ama, mantang an iba pang mga aki nag-aako nin tigsararong kabtang. Huli kaini, naghagad si Eliseo nin duwang kabtang kan espirituwal na pamana ni Elias.

Taano ta ini an hinagad ni Eliseo kan partikular na panahon na idto? Huli ta may gigibohon siang sarong magabat na trabaho​—an pagsalihid ki Elias bilang propeta sa Israel. Narealisar ni Eliseo na tanganing maotob an mga paninimbagan na konektado sa magabat na asignasyon na ini, kaipuhan nia nin espirituwal na kosog na lihis pa sa saiya mismong mga kakayahan, kosog na si Jehova sana an makatatao. Sia kaipuhan na magin daing takot siring ki Elias. (2 Hade 1:​3, 4, 15, 16) Huli kaini, naghagad sia nin duwang kabtang kan espiritu ni Elias, espiritu nin kosog nin boot asin nin pagigin “lubos na maimon para ki Jehova”​—kawiliwiling mga kualidad na pinaluluwas kan espiritu nin Dios. (1 Hade 19:​10, 14) Paano nagsimbag si Elias?

Aram ni Elias na si Eliseo naghagad nin sarong bagay na bako man saiya kundi an Dios sana an makatatao. Kaya may kababaan nin boot na nagsimbag si Elias: “Mapawot na bagay an hinahagad mo. Kun maheling mo ako kun kinukua sa saimo, siring kaiyan an mangyayari sa saimo.” (2 Hade 2:10) Asin, tunay nanggad, tinogotan ni Jehova si Eliseo na maheling si Elias na nagsasakat sa bagyo nin doros. (2 Hade 2:​11, 12) Itinao an kahagadan ni Eliseo. Tinawan sia ni Jehova kan espiritu na kaipuhan nia sa pagpoon kan saiyang bagong gibohon asin sa pag-atubang sa maabot na mga pagbalo.

Ngonyan, an linahidan na mga Kristiano (kun beses inaapod na grupong Eliseo) asin an mga lingkod nin Dios sa pankagabsan makakukua nanggad nin pagparigon sa boot sa pagkasaysay na ini sa Biblia. Kun beses, tibaad nakakamate kita na nagagabatan asin kulang nin kakayahan kun natatawan nin bagong asignasyon, o tibaad nawawaran na kita nin kosog nin boot na ipagpadagos an satong paghuhulit kan Kahadean mantang napapaatubang kita sa nag-oorog na pagkaindiperente o pagtumang sa satong teritoryo. Pero, kun makikimaherak kita ki Jehova para sa saiyang suporta, tatawan nia kita nin banal na espiritu kun kaipuhan niato iyan tangani na makaya an mga kadepisilan asin nagbabagong mga kamugtakan. (Lucas 11:13; 2 Corinto 4:7; Filipos 4:13) Iyo, kun paanong pinakosog ni Jehova si Eliseo para sa saiyang mas magabat na mga paninimbagan, tatabangan man nia kita gabos, hoben asin gurang, na otobon an satong ministeryo.​—2 Timoteo 4:5.