Estorya nin Buhay

Tinokdoan ni Jehova Magpoon sa Sakong Pagkaniaki

ISINAYSAY NI RICHARD ABRAHAMSON

“O Dios, tinokdoan mo ako magpoon sa sakong pagkaniaki, asin sagkod ngonyan ipinahahayag ko an saimong makangangalas na mga gibo.” Togoti nindo akong ipaliwanag kun taano an mga tataramon na iyan sa Salmo 71:17 ta may espesyal na kahulogan para sa sako.

AN SAKONG ina, si Fannie Abrahamson, nakaolay kan 1924 kan mga Estudyante sa Biblia, na apod sa mga Saksi ni Jehova kaidto. Sarong taon pa sana ako kaidto. Mantang itinotokdo kaidto ki Nanay an mga katotoohan sa Biblia, dinadalaw tolos nia an mga kataed nia asin sinasabi sa sainda an mga bagay na nanodan nia, asin tinokdoan man nia ako asin an mas matua kong tugang na lalaki asin babae. Bago ako makanood magbasa, tinokdoan na nia akong memoryahon an dakol na teksto manongod sa mga bendisyon kan Kahadean nin Dios.

Kan huring kabtang kan mga taon nin 1920, an samong grupo nin Mga Estudyante sa Biblia sa La Grande, sa estado nin Oregon, E.U.A., na duman ako namundag asin pinadakula, kompuesto nin nagkapira sanang babae asin aki. Minsan ngani napapasuway kami, dinadalaw kami nin saro o duwang beses kada taon kan nagbibiaheng mga ministro, na midbid bilang mga pilgrim. An mga ini nagtatao nin nakakaparigon sa boot na mga pahayag, iniibanan kami sa ministeryong pagharongharong, asin nagpapaheling nin maboot na interes sa mga aki. Kaiba sa mga namomotan na idto si Shield Toutjian, Gene Orrell, asin John Booth.

Kan 1931 mayo ni saro sa samong grupo an nakaatender sa kombension sa Columbus, Ohio, na duman inako kan Mga Estudyante sa Biblia an ngaran na Mga Saksi ni Jehova. Alagad an mga kompanya, na apod kaidto sa mga kongregasyon, asin an napapasuway na mga grupo na mayo nin representante sa kombension nagtiripon sa lokal kan Agosto na  idto tanganing aprobaran an resolusyon sa pag-ako kan ngaran. Ginibo ini kan sadit niamong grupo sa La Grande. Dangan, sa kampanya kan 1933 na idistribwir an pulyetong The Crisis, tinuom ko an sarong pag-atubang sa Biblia, asin sa kaenot-enote, nagpatotoo ako nin solo sa harong-harong.

Durante kan mga taon nin 1930, nagkaigwa nin nagkokosog na pagtumang sa samong gibohon. Tanganing mapangganahan ini, an mga kompanya inorganisar sa inaapod kaidto na mga dibisyon, na naggigibo nin sadit na mga asamblea asin saro o duwang beses kada taon na naggigibo nin mga misyon sa paghuhulit na inapod na mga kampanya nin dibisyon. Sa mga asambleang ini, tinokdoan kami kan mga paagi nin paghuhulit asin ipinaheling sa samo kun paano magalang na aatubangon an nag-iinterbenir na pulis. Huling an mga Saksi parateng dinadara sa atubangan nin hokom na pulis o sa sarong regular na husgado, ineensayo niamo an materyales hale sa sarong listahan nin mga instruksion na inapod na Orden nin Pagbista. Sinangkapan kami kaini na maatubang an pagtumang.

Amay na Pagtalubo sa Katotoohan sa Biblia

Nagtatalubo kaidto an sakong apresasyon sa mga katotoohan sa Biblia asin sa paglaom na basado sa Biblia na mabuhay sagkod lamang digdi sa daga sakop kan langitnon na Kahadean nin Dios. Kan panahon na idto, daing gayo idinodoon an pagpabautismo sa mga mayo kan paglaom na mamahala sa langit kaiba ni Cristo. (Kapahayagan 5:10; 14:​1, 3) Minsan siring, sinabihan ako na kun desidido na ako sa sakong puso na gibohon an kabotan ni Jehova, angay sanang magpabautismo. Ginibo ko ini kan Agosto 1933.

Kan ako 12 anyos, naisip kan sakong maestra na matibay akong magpahayag sa publiko, kaya sinadol nia si Nanay na iareglo na tawan ako nin dagdag pang pagsasanay. Inisip ni Nanay na tibaad makatabang ini sa sako na mapaglingkodan ko si Jehova nin mas marahay. Huli kaiyan binayadan nia an pagtotokdo sa sako paagi sa paglabada para sa paratokdo sa laog nin sarong taon. Nakatabang sa sakong ministeryo an pagsasanay. Kan ako 14 anyos, nagkahelang ako nin rheumatic fever, kaya napondo an sakong pag-eskuela sa laog nin labing sarong taon.

Kan 1939 nag-abot sa lugar niamo an sarong bilog na panahon na ministro na an ngaran Warren Henschel. * Nagin ko siang matuang tugang sa espirituwal, na iiniiba ako sa ministeryo sa langtad sa laog nin dakol na aldaw. Dai nahaloy tinabangan nia ako na makapoon sa paglilingkod bilang bakasyon payunir, sarong temporaryong klase nin bilog na panahon na ministeryo. Kan tig-init na idto, an samong grupo naorganisar na magin sarong kompanya. Si Warren ninombrahan bilang lingkod kan kompanya, asin ako ninombrahan bilang namamayo sa Pag-adal sa Torrengbantayan. Kan maghale si Warren tanganing maglingkod sa Bethel, an internasyonal na opisina prinsipal kan Mga Saksi ni Jehova sa Brooklyn, Nueva York, ako an nagin lingkod kan kompanya.

Pagpoon sa Bilog na Panahon na Ministeryo

An dagdag na responsibilidad nin paglilingkod bilang lingkod kan kompanya orog pang nagpakosog kan sakong pagmawot na lumaog sa regular na bilog na panahon na ministeryo, na ginibo ko sa edad na 17 pakatapos ko sa tersera anyo sa haiskul. Si Tatay bako niamong kapareho an relihiosong mga paniniwala, alagad sia marahay na paratao asin tawong may halangkaw na mga prinsipyo. Gusto nia na magkolehio ako. Pero sinabi nia na basta dai  ako maasa sa saiya sa istaran asin pagkakan ko, puede kong gibohon an gusto ko. Kaya nagpoon akong magpayunir kan Setyembre 1, 1940.

Kan ako pahale sa harong, ipinabasa sako kan sakong ina an Talinhaga 3:​5, 6: “Magtiwala ka ki Jehova sa bilog mong puso asin dai ka manarig sa saimong sadiring pakasabot. Sa gabos mong dalan girumdomon mo sia, asin itatanos nia mismo an saimong mga dana.” Tunay nanggad na nagin dakulang tabang sa sako an pirmeng pag-asa kan sakong buhay sa kamot ni Jehova.

Dai nahaloy, nakiiba ako ki Joe asin Margaret Hart sa ministeryo sa amihanan sentral kan Estado nin Washington. Laen-laen an teritoryo​—mga rantso nin baka, rantso nin karnero, reserbang daga para sa mga Indian, saka dakol na sadit na banwaan asin baryo. Kan tigsoli nin 1941, inasignaran ako bilang lingkod kan kompanya sa kongregasyon sa Wenatchee, Washington.

Sa saro kan samong mga asamblea sa Walla Walla, Washington, naglingkod ako bilang attendant, na maogmang tinataratara an mga palaog sa auditoryum. Nariparo ko an sarong hoben na tugang na lalaki na naghihingoa nanggad alagad dai mapatanog an sistema nin laudispiker. Kaya isinuherir ko na magribayan kami nin asignasyon. Kan bumalik asin maheling kan lingkod sa rehion, si Albert Hoffman, na binayaan ko an sakong asignasyon, ipinaliwanag nia sa sako na may makikatood na huyom an halaga nin pagdadanay sa asignasyon sagkod na mayo pang instruksion na humale. Pirme kong nagigirumdoman an saiyang konseho poon kaidto.

Kan Agosto 1941, an Mga Saksi ni Jehova nagplano nin sarong dakulang kombension sa St. Louis, Missouri. Tinakloban kan mag-agom na Hart an likod kan saindang pik-ap asin naglaag nin mga bangko. Siyam kaming payunir na nagbiahe nin 2,400 kilometros pasiring sa St. Louis sakay sa pik-ap na iyan. Inabot nin mga sarong semana an biahe paduman siring man an pabalik. Sa kombension, kinalkulo kan pulis na 115,000 an pinakahalangkaw na kabilangan nin nag-atender. Minsan ngani mas dikit gayod dian an kabilangan kan nag-atender, siertong idto labi sa mga 65,000 na Saksi sa Estados Unidos kan panahon na idto. Tunay nanggad na nakararahay sa espirituwal an kombension na idto.

Paglilingkod sa Bethel sa Brooklyn

Pagkabalik ko sa Wenatchee, nakaresibi ako nin surat na nagsasabing magreport ako sa Bethel sa Brooklyn. Pag-abot ko kan Oktubre 27, 1941, dinara ako sa opisina ni Nathan H. Knorr, an paraataman sa imprentahan. Maboot niang ipinaliwanag sa sako kun anong klase an Bethel asin idinoon na an pagdanay na harani ki Jehova kaipuhan tanganing magin mapanggana an buhay duman. Dangan dinara ako sa Departamento sa Pagpaktora asin tinawan nin gibohon na pagbogkos nin mga karton na ipapaktora.

Kan Enero 8, 1942, nagadan si Joseph Rutherford, na iyong nangengenot sa Mga Saksi ni Jehova sa bilog na kinaban. Pakalihis nin limang aldaw inelehir kan mga direktor kan Sosyedad si Tugang na Knorr tanganing sumalida sa saiya. Kan ianunsiar ini sa pamilyang Bethel ni W. E. Van Amburgh, an haloy nang sekretaryo-tesurero kan Sosyedad, sinabi nia: “Nagigirumdoman ko pa kan magadan si C. T. Russell [kan 1916] asin sinalidahan sia ni J. F. Rutherford. Padagos na giniyahan asin pinaoswag kan Kagurangnan an Saiyang gibohon. Ngonyan, lubos kong inaasahan na maabante an gibohon na si Nathan H. Knorr an presidente  huli ta gibohon ini kan Kagurangnan, bako nin tawo.”

Kan Pebrero 1942, iinanunsiar na poponan an “Mas Halangkaw na Kurso sa Teokratikong Pagmiministro.” Dinisenyo iyan tanganing sanayon an mga nasa Bethel na paoswagon an saindang abilidad na magsiyasat sa mga tema sa Biblia, organisaron sa tamang paagi an saindang materyales, asin iatubang iyan sa epektibong paagi. Natabangan kan pagsasanay ko kaidto sa pagpahayag sa publiko, marikas akong nag-oswag sa programang ini.

Dai nahaloy, iinasignar ako sa Departamento sa Paglilingkod, na iyong nangangataman sa ministeryo kan mga Saksi sa Estados Unidos. Paghaloyhaloy kan taon na idto, napagdesisyonan na ponan liwat an sarong programa na pagdalaw nin mga ministro sa mga kompanya nin mga Saksi. Pag-abot nin panahon, an nagbibiaheng mga ministrong ini, na an apod mga lingkod para sa mga tugang, inapod nang mga paraataman sa sirkito. Durante kan tig-init kan 1942, iinareglo an sarong kurso sa Bethel tanganing sanayon an mga tugang na lalaki para sa klaseng ini nin ministeryo, asin nagkapribilehio ako na mapabilang sa mga sinanay. Espesyalmenteng nagigirumdoman ko na idinoon sa samo ni Tugang na Knorr, saro sa mga instruktor, an puntong ini: “Dai nindo hingoahon na paogmahon an mga tawo. Sa katapustapusi mayo kamong mapaoogma. Paogmahon nindo si Jehova, asin mapaoogma nindo an gabos na namomoot ki Jehova.”

Inimplementar an gibohon na nagbibiahe kan Oktubre 1942. An nagkapira samo sa Bethel nakikabtang dian sa nagkapirang katapusan kan semana, na dinadalaw an mga kongregasyon na nasa laog kan distansiang 400 kilometros hale sa Siudad nin Nueva York. Rinerepaso niamo an aktibidad sa paghuhulit kan kongregasyon asin an kabilangan nin mga nag-atender sa pagtiripon, nakikipagmiting sa mga igwa nin mga paninimbagan sa kongregasyon, nagtatao nin saro o duwang pahayag, asin nakikikabtang sa ministeryo kaiba an lokal na mga Saksi.

Kan 1944, kaiba ako sa mga nasa Departamento sa Paglilingkod na sinugo sa gibohon na nagbibiahe sa laog nin anom na bulan, na maglilingkod sa Delaware, Maryland, Pennsylvania, asin Virginia. Kan huri, sa laog nin nagkapirang bulan, dinalaw ko an mga kongregasyon sa Connecticut, Massachusetts, asin Rhode Island. Pagkabalik ko sa Bethel, nagtatrabaho ako nin por ora sana sa opisina ni Tugang na Knorr asin kan saiyang sekretaryong si Milton Henschel, na duman nagin pamilyar ako sa samong gibohon sa bilog na kinaban. Nagtrabaho man ako nin por ora sana sa Treasurer’s Office na pinangangatamanan ni W. E. Van Amburgh asin kan saiyang katabang, si Grant Suiter. Dangan, kan 1946, ginibo akong paraataman sa dakol na opisina sa Bethel.

Dakulang mga Pagbabago sa Sakong Buhay

Mantang naglilingkod sa mga kongregasyon kan 1945, nakamidbid ko si Julia Charnauskas sa Providence, Rhode Island. Kan mga kabangaan kan 1947 nagpaplano na kaming magpakasal. Namotan kong marhay an paglilingkod sa Bethel, pero kan panahon na idto, mayo nin probisyon na ikalaog an agom tanganing maglingkod duman. Kaya kan Enero 1948, nagluwas ako sa Bethel, asin nagpakasal kami ni Julia (Julie). Nakakua ako nin por ora sanang trabaho sa sarong supermarket sa Providence, asin pinonan niamo an samong ministeryong pagpapayunir na magkaibahan.

Kan Setyembre 1949, inimbitaran ako sa gibohon sa sirkito sa amihanan-solnopan nin Wisconsin. Dakulang pagbabago para sa samo ni Julie na maghulit sa kadaklan saradit na banwaan asin puerang mga lugar nin pagibohan nin mga produktong gatas. Halawig asin malipot an mga tiglipot, na sa laog nin dakol na semana hababa pa sa sero an temperatura asin kadakol nin niebe. Mayo kami nin kotse. Minsan siring, pirmeng may nagpapasakay sa samo pasiring sa sunod na kongregasyon.

Dai nahaloy pakatapos kong ponan an gibohon sa sirkito, nagkaigwa kami nin pansirkitong asamblea. Nagigirumdoman ko na nagsisiyasat akong marhay tanganing masierto na naaasikaso an gabos na trabaho, na medyo ikinanerbios nin nagkapira. Kaya maboot na ipinaliwanag sako kan paraataman sa distrito, si Nicholas Kovalak, na an lokal na mga tugang na lalaki tuod nang asikasohon an mga bagay-bagay sa sadiri nindang paagi asin dai ko kaipuhan na hingoahon na maneharon an mga bagay-bagay sa gabos na detalye kaiyan. An sadol na iyan nakatabang sa sako sa pag-asikaso sa dakol na asignasyon poon kaidto.

Kan 1950, nakaresibi ako nin temporaryong asignasyon​—na pangatamanan an pag-areglo nin dadagosan kan mga delegado sa enot kan dakol na  darakulang kombension niato sa Yankee Stadium sa Siudad nin Nueva York. An kombension nakaoogmang marhay poon sa kapinonan sagkod sa katapusan, na may mga delegado hale sa 67 nasyon asin may pinakahalangkaw na kabilangan nin nag-atender na 123,707! Pakatapos kan kombension, ipinadagos niamo ni Julie an samong ministeryong nagbibiahe. Maogma nanggad kami sa gibohon sa sirkito. Minsan siring, sa boot niamo maninigo na padagos kaming magin pirmeng andam na gamiton para sa paglilingkod. Kaya kada taon, nagsusumitir kami nin mga aplikasyon para sa Bethel sagkod para sa paglilingkod bilang misyonero. Kan 1952 naogma kaming marhay na makaresibi nin imbitasyon na umatender sa ika-20 klase kan Paadalan sa Biblia kan Watchtower sa Gilead, na duman sinanay kami para sa pagmimisyonero.

Paglilingkod sa Ibang Nasyon

Pakagradwar niamo kan 1953, idinestino kami sa Britania, na duman naglingkod ako sa gibohon sa distrito sa timog kan Inglaterra. Pakalihis nin mayo pang sangtaon sa aktibidad na ini, na ikinaogma ming marhay ni Julie, nasorpresa kami kan naresibi niamo an asignasyon na bumalyo sa Denmark. Nangangaipo kaidto an Denmark nin bagong pangangataman sa sangang opisina. Huling harani sana ako asin nasanay na sa siring na gibohon sa Brooklyn, isinugo ako tanganing tumabang. Nagbarko kami pasiring sa Netherlands, asin hale duman nagtren kami pasiring sa Copenhagen, Denmark. Nag-abot kami kan Agosto 9, 1954.

An saro sa mga problema na dapat asikasohon iyo na may nagkapirang nasa responsableng katongdan an habong mag-ako nin paggiya hale sa opisina prinsipal sa Brooklyn. Siring man, an tolo sa apat na nagtatradusir kan samong mga publikasyon sa Danes naghale sa Bethel asin pag-abot nin panahon nag-ontok na sa pakikiasosyar sa Mga Saksi ni Jehova. Alagad sinimbag ni Jehova an samong mga pamibi. An duwang payunir, si Jørgen asin  Anna Larsen, na nakapagtradusir na nin por ora sana, nagpresentar kan saindang sadiri na maglingkod nin bilog na panahon. Sa siring an pagtradusir kan samong mga magasin sa Danes nagpadagos na daing nalipasan ni sarong isyu. An mag-agom na Larsen nasa Bethel pa ngonyan sa Denmark, asin si Jørgen an nagkokoordinar kan Komite kan Sanga.

Sarong tunay na gikanan nin pamparigon sa boot sa enot na mga taon na idto an regular na pagdalaw ni Tugang na Knorr. Nagtatao sia nin panahon na makipag-olay, na nagsasaysay nin mga eksperyensia na nagtao nin pakarorop sa kun paano aatubangon an mga problema. Durante nin dalaw kan 1955, napagdesisyonan na maninigo kaming magtogdok nin bagong sangang opisina na may mga pasilidad sa pag-imprenta tangani na makaprodusir kami nin mga magasin para sa Denmark. Nakakua nin daga sa amihanan na gilid-gilid kan Copenhagen, asin kan tig-init kan 1957, nagbalyo kami sa bagong itogdok na edipisyo. Si Harry Johnson, kaiba an saiyang agom, si Karin, na kaaabot pa sana sa Denmark pakagradwar sa ika-26 na klase sa Gilead, nagtabang tanganing ipuesto asin padalaganon an samong imprentahan.

Pinarahay niamo an samong pag-organisar sa paggibo nin darakulang kombension sa Denmark, asin nakatabang an eksperyensia na nakua ko mantang nagtatrabaho sa mga kombension sa Estados Unidos. Kan 1961 an samong dakulang internasyonal na kombension sa Copenhagen inatenderan nin mga delegado hale sa labing 30 nasyon. An pinakahalangkaw na kabilangan nin nag-atender 33,513. Kan 1969, sa samo ginibo an nagin pinakadakula sa gabos na kombension sa Scandinavia, na may pinakahalangkaw na kabilangan nin nag-atender na 42,073!

Kan 1963, inimbitaran akong umatender sa ika-38 klase kan Gilead. Ini sarong kurso na ginibong sampulong bulan na dinisenyo partikularmente tanganing sanayon an tawohan sa sangang opisina. Sarong kaogmahan na makaiba liwat an pamilyang Bethel sa Brooklyn asin makinabang sa eksperyensia kan mga nagtatrabaho nin dakol nang taon sa pag-asikaso kan mga trabaho sa opisina prinsipal.

Pakatapos kan kursong ini sa pagsasanay, nagbalik ako sa Denmark tanganing ipadagos an pag-asikaso kan mga paninimbagan duman. Dugang pa, nagkapribilehio ako na maglingkod bilang paraataman sa sona, na nagdadalaw sa mga sangang opisina sa solnopan asin amihanan na Europa tanganing magtao nin pamparigon sa boot sa mga tawohan duman asin tabangan sinda na otobon an saindang mga paninimbagan. Mas bago pa sana ginibo ko ini sa Solnopan na Aprika asin sa Caribe.

Kan huring kabtang kan mga taon nin 1970, an mga tugang sa Denmark nagpoon na maghanap nin sarong lugar na puedeng togdokan nin mas dakulang pasilidad para sa pagpahiwas kan aktibidad sa pagtradusir asin pag-imprenta. Nakakua nin sarong marahayrahay na lote mga 60 kilometros sa solnopan kan Copenhagen. Kaiba an iba pang tugang, nagtrabaho ako sa pagplano asin pagdisenyo kan bagong pasilidad na ini, asin kami ni Julie nag-antisipar na mag-istar kaiba kan pamilyang Bethel sa magayon na bagong erokan kaini. Minsan siring, dai iyan nangyari.

Balik sa Brooklyn

Kan Nobyembre 1980, kami ni Julie inimbitaran na maglingkod sa Bethel sa Brooklyn, na duman nag-abot kami kan Enero 1981. Magsisisenta na kami kan panahon idto, asin pakatapos na maglingkod nin haros kabanga kan samong buhay kaiba an mahal niamong mga tugang sa Denmark, bakong madali para sa samo na bumalik sa Estados Unidos. Pero, dai niamo pinagparaisip kun saen niamo gusto kundi hiningoa ming magkonsentrar sa presente niamong asignasyon asin sa ano man na mga kadepisilan na itao kaiyan.

Nagdatong kami sa Brooklyn asin nag-erok duman. Si Julie iinasignar sa opisina nin akaunting, na an trabaho kapareho kan ginibo nia sa Denmark. Iinasignar ako sa Departamento nin Pagsurat tanganing tumabang sa pag-iskedyul kan pagproseso kan satong mga publikasyon. An kapinonan kan mga taon nin 1980 panahon nin pagbabago sa samong  mga trabaho sa Brooklyn, ta an paggamit nin mga makinilya asin nin typesetting sa mainit na timga sinalidahan nin pagproseso sa komputer asin pag-imprenta na offset. Mayo akong aram sa komputer alagad tatao ako kan mga prosedimiento sa pag-organisar asin pagtrabaho kaiba nin mga tawo.

Dai nahaloy pakatapos kaiyan, kinaipuhan na pakosogon an pagkaorganisar kan Departamento sa Arte ta naggamit na kami nin kompleto sa kolor na pag-imprenta na offset asin nin de kolor na mga ilustrasyon asin retrato. Minsan ngani mayo ako nin eksperyensia bilang eksperto sa arte, puede akong tumabang sa pag-organisar. Kaya nagkapribilehio ako na pangatamanan an departamentong iyan sa laog nin siyam na taon.

Kan 1992, inasignaran akong tumabang sa Komite sa Pagpublikar kan Namamahalang Grupo asin ibinalyo sa Treasurer’s Office. Digdi nagpadagos ako sa paglilingkod may koneksion sa mga aktibidad sa pinansial kan Mga Saksi ni Jehova.

Paglilingkod Magpoon sa Sakong Pagkaniaki

Poon kan enot na mga taon kan sakong pagkaniaki asin durante kan 70 taon nin dusay na paglilingkod, si Jehova mapasensiang tinokdoan ako paagi sa saiyang Tataramon, an Biblia, asin matinabang na mga tugang na lalaki sa saiyang makangangalas na organisasyon. Nakalabing 63 na taon ako sa bilog na panahon na ministeryo, na labing 55 kan mga taon na iyan kaiba ko an sakong maimbod na agom, si Julie. Tunay nanggad, namatean ko na binendisyonan ako nin igo ni Jehova.

Kaidtong 1940 kan ako maghale sa harong tanganing lumaog sa paglilingkod bilang payunir, tinuya kan ama ko an sakong desisyon asin nagsabi: “Nonoy, pagnaghale ka sa harong tanganing gibohon ini, dai mo pag-isipon na puede kang bumalik sako tanganing humagad nin ano man na tabang.” Sa nag-aging mga taon, dai ko noarin man kinaipuhan na gibohon iyan. Si Jehova buka an palad na itinao an sakong mga pangangaipo, na sa parate paagi sa matinabang na mga kapwa Kristiano. Kan huri, iginalang na kan sakong ama an samong gibohon, asin nag-oswag pa man ngani sia sa pakanood kan katotoohan sa Biblia bago sia nagadan kan 1972. Si Nanay, na may paglaom sa langitnon na buhay, padagos na naglingkod nin fiel ki Jehova sagkod na sia magadan kan 1985, sa edad na 102.

Minsan ngani nagkakaigwa nin mga problema sa bilog na panahon na ministeryo, kami ni Julie dai noarin man nag-isip na bayaan an samong asignasyon. Pirme kaming sinusteniran ni Jehova sa desisyon na ini. Dawa kan naggugurang na an sakong mga magurang asin nangangaipo nin tabang, an sakong tugang na babae, si Victoria Marlin, nag-alok nin tabang asin maboot na nag-ataman sa sainda. Odok kaming nagpapasalamat sa saiyang mamomoton na tabang, na nakatabang sa samo na magdanay sa bilog na panahon na ministeryo.

Si Julie maimbod na nagsuportar sako sa gabos na asignasyon niamo, na minamansay ini na kabtang kan saiyang sadiring pagdusay ki Jehova. Asin minsan ngani 80 anyos na ako ngonyan asin igwa na nin nagkapirang problema sa salud, namamatean ko na binendisyonan kami nin igo ni Jehova. Nakanonompong ako nin dakulang karangahan sa salmista na pakatapos ipahayag na tinokdoan sia nin Dios magpoon sa saiyang pagkaniaki, nakimaherak, ‘Minsan sagkod sa kagurangan, O Dios, dai mo ako pabayaan, sagkod na ikasabi ko an manongod sa saimong kakosogan sa maarabot pa.’​—Salmo 71:​17, 18.

[Nota sa Ibaba]

[Ritrato sa pahina 20]

Kaiba ni Nanay kan 1940, kan ponan ko an pagpapayunir

[Ritrato sa pahina 21]

Kaiba an mga kapwa ko payunir na si Joe asin Margaret Hart

[Ritrato sa pahina 23]

Aldaw kan samong kasal kan Enero 1948

[Ritrato sa pahina 23]

Kan 1953, kaiba kan mga kaklase ko sa Gilead. Poon sa wala pasiring sa too: Si Don asin Virginia Ward, si Geertruida Stegenga, si Julie, asin ako

[Ritrato sa pahina 23]

Kaiba ni Frederick W. Franz asin Nathan H. Knorr sa Copenhagen, Denmark, 1961

[Ritrato sa pahina 25]

Kaiba ni Julie ngonyan