“Abaa Nanggad Kamapuersa kan Tataramon nin Dios!”

“AN TATARAMON nin Dios buhay asin mapuersa.” (Hebreo 4:12) Bilang pagpapatunay sa dai malalabanan na puersa kan Tataramon nin Dios, an 2003 Calendar of Jehovah’s Witnesses nagtampok nin anom na aktuwal na estorya nin buhay hale sa iba-ibang parte kan kinaban. Sa irarom kan titulong “Before and After,” ipinaheling kan kalendaryo kun paano nakatatabang sa mga tawo an gibohon na pagtotokdo kan Mga Saksi ni Jehova tanganing mapakarhay an saindang moral, bayaan an nakararaot na mga estilo nin pamumuhay, pakosogon an saindang buhay pampamilya, asin kultibaron an sarong personal na relasyon sa Dios.

May nagkapirang surat nin pag-apresyar na naresibi mapadapit sa 2003 na kalendaryo. Uya an nagkapira sa mga komentong ini:

“An kalendaryong ini sarong patotoo sa tunay na mga Kristiano na igwa nin iba kapareho ninda na nangaipong makipaglaban nin maigot para sa pagtubod. Ngonyan puede na nindang helingon an mga retrato bilang pagirumdom sa mga pagbago na ginibo nin iba.”​—Steven, Estados Unidos.

“Gusto ko talagang isurat ining nagkapirang tataramon tanganing ipaaram saindo kun gurano napahiro kan 2003 na kalendaryo an sakuyang puso. Nungkang nagkaigwa nin arog kaiyan na epekto sakuya an sarong kalendaryo. An mga estoryang ini nin buhay magigin kaiba na sa mga kagamitan na dara ko sa sakuyang bag tanganing ipaheling sa mga tawo an buhay asin makangangalas na patotoo sa kun ano an puedeng magin impluwensia kan Biblia sa mga indibiduwal.”​—Marc, Belgium.

“Napahiro akong marhay kan kalendaryo. Nagpiot an sakong daghan huli sa makosog na emosyon kan mabasa asin maheling ko kun paano binago ni Jehova an mga indibiduwal na ini. Bilang resulta, nainspirar akong padagos na gumibo nin mga pagbago sa sadiri ko mismong buhay. Orog kisa kasuarin man, namamatean ko ngonyan na ako kabtang kan satong pambilog na kinaban na kasararoan nin magturugang.”​—Mary, Estados Unidos.

“Napahirong marhay si Jesus kan espirituwal na kamugtakan kan mga kadaklan. Salamat sa pag-arog kan halimbawa ni Cristo paagi sa pagtampok kan mga estorya nin buhay na nagluwas sa satuyang 2003 na kalendaryo. Dai pa nangyari sa buhay ko kaidto na napahibi ako nin sarong kalendaryo.”​—Cassandra, Estados Unidos.

“Kan ako 11 anyos, nagpoon akong manigarilyo; paghaloyhaloy nagdroga ako. Parate kong naiisip kaidto na taposon na an sakong buhay. Kan mamidbid ko si Jehova, natabangan akong pondohon an mga bisyong idto. Mahalagang marhay an kalendaryong ini sakuya. Napakokosog ako kan mga halimbawa kan sakong mga tugang na lalaki asin babae hale sa iba-ibang parte kan kinaban. Ngonyan aram ko nang dai ako nagsosolo sa laban na ini asin na an pagkamoot ki Jehova asin an bilog na pusong paglilingkod sa saiya an pinakamahalagang bagay.”​—Margaret, Polandia.

“Ay, abaa nanggad kamapuersa kan Tataramon nin Dios! Kan maresibi ko an 2003 na kalendaryo, grabe an pagpogol kong dai mapahibi. An mga eksperyensiang ini, pati an mga retrato, nakapagpapakosog na marhay nin pagtubod.”​—Darlene, Estados Unidos.

“An dating estilo nin pamumuhay kan nagkapira sa mga tawong ini kaparehong marhay kan sakuya man na dating estilo nin pamumuhay. Tinawan ako ni Jehova nin kosog tanganing haleon an garo baga dai mapapangganahan na mga bisyo. Salamat na marhay sa aktuwal na mga estoryang ini nin buhay.”​—William, Estados Unidos.