Puede daw Kamong Magtubod sa Sarong Paraisong Daga?

PIRA sana an nagtutubod na an daga magigin sarong paraiso. Dakol an nagsasaboot na dai na ngani iyan magpapadagos na mag-eksister. Oyon sa librong The Sacred Earth, ni Brian Leigh Molyneaux, an globong ini nag-eksister huli sa ‘sarong dakulaon na kosmikong pagputok’ minilyon na taon na an nakaagi. Asin kun bakong tawo mismo an makaraot sa daga, dakol an naniniwala na iyan asin an bilog na uniberso tibaad sa kahurihurihi “magigin garo bolang nagkakalayo asin nagpuputok nin pakupos.”

An poetang Ingles kan ika-17 siglo na si John Milton mayo kan siring na pesimistang mga saboot. Sa saiyang plosa na Paradise Lost, isinurat nia na linalang nin Dios an daga tanganing magin paraisong istaran kan pamilya nin tawo. An orihinal na Paraisong iyan nawara. Minsan siring, nagtutubod si Milton na ibabalik iyan sa dati​—na maabot an aldaw na an sarong parabalukat na iyo si Jesu-Cristo “matao nin balos sa saiyang fiel na mga parasunod, asin maako sa sainda sa lubos na kaogmahan . . . sa Langit o sa Daga.” Kompiadong nagpahayag si Milton: “Huli ta sa panahon na iyan an bilog na Daga magigin Paraiso.”

An Paraiso—Sa Langit o sa Daga?

Dakol na relihiosong tawo an kapareho ni Milton an opinyon na sa kahurihurihi maako sinda nin sarong klase nin kabayadan sa makuring sakit asin kolog na kinaipuhan nindang tagalan digdi sa daga. Alagad saen ninda kakamtan an balos na iyan? Iyan daw “sa Langit o sa Daga”? Para sa nagkapira, an daga haros dai nagsabong sa isip ninda. Sinasabi ninda na an mga tawo magkakamit sana nin “lubos na kaogmahan” pagkatapos na maghale sinda sa daga asin mag-istar sa rona nin mga espiritu sa langit.

Sa librong Heaven​—A History, an mga autor na si C. McDannell asin B. Lang nagsasabi na an teologo kan ikaduwang siglo na si Ireneo nagtutubod na an buhay sa paraisong ibinalik sa dati “dai mangyayari sa sarong harayong rona sa langit, kundi sa daga.” Oyon sa librong iyan, maski ngani an mga namomoon sa relihion na si John Calvin asin Martin Luther naglaom na sinda mapalangit, nagtubod man sinda na “ibabalik nin Dios sa dati an daga.” Arog man kaiyan an pagtubod kan mga miembro kan ibang mga relihion. Si McDannell asin Lang nagsasabi man na may mga Judiong nagtubod na sa itinalaan na panahon nin Dios, an gabos na kasakitan nin tawo “hahaleon asin magkakaigwa nin sarong makahulogan na buhay sa daga.” Oyon sa suanoy na paniniwala kan mga Persiano, “an malinigon na kamugtakan kan daga ibabalik sa dati asin an mga tawo mamumuhay giraray na may katoninongan,” an sabi kan The Encyclopaedia of Middle Eastern Mythology and Religion.

Ano an nangyari sa paglaom sa sarong paraisong daga? An sato daw na pag-eksister sa daga tinuyo na magin temporaryo sana? Arog kan paniniwala kan Judiong pilosopo kan enot na siglo na si Filo, iyan daw magigin sanang “halipot asin sa parate makamomondong pangyayari” sa sarong pagbiahe pasiring sa rona nin mga espiritu? O an Dios daw may iba pang katuyohan kan lalangon nia an daga asin lagan iyan nin mga tawo sa paraisong kamugtakan kaiyan? An katawohan daw puedeng makanompong nin tunay na espirituwal na satispaksion asin lubos na kaogmahan digdi mismo sa daga? Taano ta dai siyasaton an sinasabi kan Biblia manongod sa temang ini? Tibaad magin konklusyon nindo, arog kan nagin konklusyon na nin minilyon, na an maglaom sa ibinalik liwat na paraiso sa daga rasonable nanggad.

[Ritrato sa pahina 3]

An poetang si John Milton nagtubod na an Paraiso ibabalik liwat

 [Picture Credit Line sa pahina 2]

COVER: Earth: U.S. Fish & Wildlife Service, Washington, D.C./NASA

[Picture Credit Line sa pahina 3]

An daga: U.S. Fish & Wildlife Service, Washington, D.C./NASA; si John Milton: Leslie’s