Sarong Kinaban sa Ngapit na Mayo Na nin Krimen

IMAHINARA, kun kaya nindo, an sarong kinaban na mayo na nin mga kriminal! Mayo na nin pangangaipo para sa mga pulis, presohan, o mamahalon asin komplikadong mga sistema hudisyal para sa mga kasong kriminal. Iyan magigin sarong kinaban na duman an lambang indibiduwal igagalang an buhay asin rogaring nin iba. Garo daw iyan imposible? Puedeng iyan an isipon nindo, alagad an makangangalas na pagbagong ini an mismong ipinanuga kan Biblia. Taano ta dai estudyaran kun ano an ihinula kan Kasuratan mapadapit sa krimen asin iba pang karatan sa dagang ini?

Sa libro nin Mga Salmo, satuyang mababasa: “Dai ka mag-init dahel sa mga paragibo nin maraot. Dai ka mauri sa mga naggigibo nin karatan. Huli ta siring sa doot sinda tolos-tolos na maluluyos, asin siring sa berdeng doot sinda mapapara. Alagad an mga mahoyo mismo makasasadiri kan daga, asin tunay na manonompongan ninda an saindang labi-labi nanggad na kaogmahan sa nagsosopay na katoninongan.” (Salmo 37:​1, 2, 11) Totoo nanggad, mayo nin siisay man na makapopogol sa Dios sa pag-otob kan panugang ini asin kan gabos na iba pa niang nakapagpapakosog sa boot na mga panuga.

An paagi nin Dios tanganing pangyarihon an mga bendisyon na ini iyo an saiyang Kahadean. Sa Pamibi kan Kagurangnan, itinokdo ni Jesu-Cristo sa saiyang mga parasunod na ipamibi na dumatong logod an Kahadean na ini asin na maotob logod an kabotan nin Dios “kun paano sa langit, siring man sa daga.” (Mateo 6:​9, 10) Dai na mahahaloy, sa irarom kan Kahadean na iyan, mayo na nin siisay man sa daga na mamomotibar pa na gumibo nin krimen dahel sa pagtios, pagkaapi, o kaimotan. Imbes, an tataramon nin Dios nagsasabi: “Magkakaigwa nin abundang tipasi sa ibabaw kan daga; maglilipwas sa alitoktok kan kabukidan.” (Salmo 72:16) Tunay nanggad, an gabos digdi sa daga tatawan ni Jehova Dios nin dai nauubos na marahay na mga bagay. Orog pang mahalaga, momotibaron kan pagkamoot sa Dios asin pagtaraed an sosyedad nin tawo, asin nungka pang riribarawon nin krimen an kinaban.