An Tamang Dahelan na Maniwala

IINIINSISTIR kan Koreanong libro na 31 Reasons Why Young People Leave the Church na dakol an puminondo na sa pagsimba huli ta dai sinda nakakukua nin nakakokontentong simbag sa mga hapot ninda. Halimbawa, ihinahapot ninda, ‘Taano ta nagdudusa an mga tawong naniniwala sa Dios?’ asin ‘Taano ta dapat niatong akoon an gabos na itinotokdo kan mga iglesia mantang nakariribaraw asin nagkakasarongatan an dakol na katokdoan?’

Huling desganado sa mga simbag na itinatao kan saindang klero, dakol an nagkokonklusyon na mayong simbag an Biblia. Kun an sarong klerigo magtao nin paliwanag na basado sana sa personal niang opinyon, sa parate minaresulta iyan sa salang pakasabot, paghabo pa ngani, sa Dios asin sa Biblia.

Iyan an eksperyensia ni Abel, na pinadakula na sarong Luterano sa Aprika del Sur. Nagigirumdoman nia: “Itinotokdo kan iglesia na an gabos na nagagadan ‘kinukua’ nin Dios. Alagad dai ko masabotan kun taano ta ‘kukuanon’ nin sarong Dios nin pagkamoot an mga magurang sa saindang mga aki. Sa puerang lugar nin Aprika kun saen ako nagdakula, dai mi binubuno an guna sagkod na magdakula an mga siyo. Kun maaraman mi na bados an sarong baka, dai mi nguna iyan bubunoon sagkod na an ogbon mamundag asin butason. Dai ko masabotan kun taano ta an sarong mamomoton na Dios dai magpaheling nin arog kaiyan na konsiderasyon sa mga tawo.”

Si Aram, sarong taga Canada, may arog man kaiyan na pagduwaduwa. “Kan ako 13 anyos, nagadan an sakong ama,” an pagsaysay nia. “Sa serbisyo sa lobong, ipinaliwanag kan sarong prominenteng klerigo na gusto nin Dios na magadan an sakong ama tanganing mas maparani sia sa Dios sa langit. ‘Kinukua nin Dios an marahay na mga tawo,’ an sabi nia, ‘huli ta namomotan nin Dios an mga matanos.’ Dai  ko masabotan kun paanong an Dios puedeng magin maimot na marhay.”

Pag-abot nin panahon, nakaolay ni Abel asin Aram an mga Saksi ni Jehova, nag-adal kan Biblia kaiba ninda asin, sa huri, nanompongan an simbag sa mga hapot ninda. Nakapatalubo sinda nin pagkamoot sa Dios asin makosog na pagtubod sa saiya. Sa katapustapusi, idinusay ninda an saindang buhay ki Jehova asin nagin maimbod na mga lingkod nia.

Tamang Kaaraman—Importanteng Marhay sa Paniniwala sa Dios

Ano an manonodan niato sa mga eksperyensiang ini? Sinasabi kaiyan sa sato na kun mapadapit sa paniniwala sa Dios, mahalagang marhay an tamang kaaraman sa Biblia. Sinabihan ni apostol Pablo an mga Kristiano sa suanoy na siudad nin Filipos: “Ini an padagos kong ipinamimibi, na an saindong pagkamoot paorog nang paorog na magin abunda na may tamang kaaraman asin lubos na pakamansay.” (Filipos 1:9) An pagkamoot sa Dios asin sa mga kapagtubod ikinokonektar digdi ni Pablo sa tamang kaaraman manongod sa Dios asin pakamansay sa kun ano an kabotan nia.

Rasonable ini, huli ta an enot na kahagadan sa pagkaigwa nin tiwala asin kompiansa sa sarong tawo iyo an mamidbid an tawong iyan​—kun mamidbid nin mas lubos asin tama, mas makosog an pagtitiwala niato sa saiya. Siring man, kaipuhan an tamang kaaraman tanganing mamotibar kamong maniwala sa Dios. “An pagtubod iyo an siertong paghalat sa mga bagay na linalaoman, an hayag na pagpapaheling kan mga katunayan minsan dai naheheling,” an sabi ni Pablo. (Hebreo 11:1) An paniniwala sa Dios na mayo nin tamang kaaraman sa Biblia garo harong na gibo sa mga baraha. An kadikit sanang paghayop igo na tanganing magaba iyan.

An pag-adal sa Biblia puedeng makatabang sa saindo na maaraman an simbag sa mga hapot na arog kan haloy nang nagin dakulang iisipon para ki Abel asin Aram, Taano ta nagagadan an mga tawo? Ipinaliliwanag kan Biblia na “paagi sa sarong tawo an kasalan naglaog sa kinaban asin an kagadanan huli sa kasalan, asin sa siring an kagadanan nakalakop sa gabos na tawo huli ta sinda gabos nagkasala.” (Roma 5:12) An mga tawo naggugurang asin nagagadan, bakong huli ta kinukua sinda nin Dios tanganing makaibanan nia, kundi huli ta nagkasala si Adan. (Genesis 2:​16, 17; 3:​6, 17-19) Apuera kaini, ihinahayag kan Biblia an tunay na paglaom na iinaalok ni Jehova Dios. Paagi sa saiyang Aki, si Jesu-Cristo, itinatao nia sa makasalan na katawohan an paglaom na pagkabuhay liwat.​—Juan 5:​28, 29; Gibo 24:15.

Tanganing tabangan kitang masabotan an katotoohan manongod sa pagkabuhay liwat, an rekord sa Biblia may nagkapirang halimbawa nin mga indibiduwal na binuhay liwat ni Jesus. (Lucas 7:11-17; 8:40-56; Juan 11:17-45) Mantang binabasa nindo an pagkasaysay na ini sa Biblia, mangnohon an kagayagayahan asin kaogmahan na namatean kan mga katood asin pamilya kan mga binuhay liwat. Mangnohon man na napahiro sindang omawon an Dios asin magtubod ki Jesus.

An tamang kaaraman manongod sa Dios asin sa saiyang mga katuyohan puedeng magkaigwa nin kaparehong epekto sa mga tawo ngonyan. Dakol an dati nariribaraw, nagagabatan, asin nasisingkog pa ngani huli sa importanteng mga hapot na mayo sindang makuang nakakokontentong simbag. Alagad mantang nag-aadal sinda sa Biblia, nanompongan ninda an simbag, asin biyong binago kaiyan an saindang buhay.

Pagkamoot sa Dios—An Pangenot na Dahelan sa Paglilingkod sa Saiya

Minsan ngani an tamang kaaraman mahalagang marhay sa pagtubod sa Dios, labi pa an kaipuhan tanganing pahiroon an saro na kuyogon asin paglingkodan sia. Kan hapoton kun ano an nakalalabi sa gabos na togon hale sa Dios, si Jesus nagsimbag: “Kamotan mo si Jehova na saimong Dios sa bilog mong puso asin sa bilog mong kalag asin sa bilog mong isip patin sa bilog mong kosog.” (Marcos 12:30) Kun namomotan nin saro an Dios arog kan pagkasabi ni Jesus, sia magigin andam na marhay na magkuyog asin maglingkod sa Saiya. Iyan daw totoo saindo?

Si Rachel, na naglingkod bilang misyonera sa Korea sa laog nin nagkapirang dekada, nagtao kan dahelan na ini sa saiyang tinutubod: “Iniisip ko an pagigin buka an palad ni Jehova sa saiyang mga linalang, an saiyang pagpapatawad sa pagtratar sa saiyang banwaan, asin an saiyang pagmawot na makinabang kita paagi sa pagpaaram sa sato kun ano an gusto nia na gibohon niato. Pinangyayari kan  gabos na iyan na tumalubo an sakong pagkamoot sa Dios. Asin an pagkamoot na iyan an nagpapahiro sa sako na mawoton na paglingkodan sia.”

Si Martha, sarong balo na taga Alemania, naglingkod ki Jehova nin 48 taon. Sabi nia: “Taano ta naglilingkod ako ki Jehova? Huli ta namomotan ko sia. Barobanggi nakikipag-olay ako ki Jehova sa pamibi asin sinasabi ko sa saiya na nagpapasalamat akong marhay sa gabos na bendisyon nia, nangorogna sa atang na pantubos.”

Iyo, an pagkamoot sa Dios an nagpapangyaring mawoton niatong paglingkodan sia gikan sa puso. Alagad paano nagkakaigwa an saro nin siring na pagkamoot? An pinakamakosog na pan-engganyar tanganing makultibar an pagkamoot sa Dios iyo an hararom na pag-apresyar sa pagkamoot na ipinaheling nia sa sato. Mangnohon an nakaoogmang pagirumdom na ini hale sa Biblia: “An dai namomoot dai nakakamidbid sa Dios, huli ta an Dios pagkamoot. Huli kaini nahayag sa sato an pagkamoot nin Dios, huli ta sinugo nin Dios an saiyang Aking bugtong sa kinaban tanganing kita magkamit nin buhay paagi sa saiya. An pagkamoot sa bagay na ini, bakong huli ta kita namoot sa Dios, kundi na sia namoot sa sato asin isinugo an saiyang Aki bilang pampagian nin boot na atang para sa satong mga kasalan.”​—1 Juan 4:8-10.

Nasasabotan daw nindo kun gurano kadakula an pagkamoot na ini? Imahinara na kamo nalalamos sa sarong masulog na sapa asin isinapeligro nin sarong tawo an saiyang buhay tanganing isalbar kamo. Lilingawan na sana daw nindo sia, o bako daw na mapasalamat kamo nin labi-labi sa saiya? Bako daw na magigin andam kamong gibohon an gabos na makakaya nindo para sa saiya? An pagkamoot na ipinaheling nin Dios sa pagtao kan saiyang Aki, si Jesu-Cristo, bilang atang na pantubos orog pang marhay dian. (Juan 3:16; Roma 8:​38, 39) Kun an saindong puso pinahihiro kan pagkamoot nin Dios, mamomotibar kamong kamotan asin paglingkodan sia nin bilog na puso.

Mga Bendisyon Ngonyan Asin sa Ngapit

Minsan ngani an pagkamoot niato sa Dios an maninigo na magin pangenot na dahelan sa paggibo niato kan saiyang kabotan, nakaoogmang maaraman na binabalosan nin Dios an mga naglilingkod sa saiya. Idinoon ni apostol Pablo: “Kun dai nin pagtubod imposible na mapanigoan sia nin marhay, huli ta an minadolok sa Dios kaipuhan na  magtubod na sia iyo nanggad asin na sia nagigin an parabalos sa mga maigot na naghahanap sa saiya.”​—Hebreo 11:6.

An mga namomoot asin nagkukuyog sa Dios totoo nanggad na binebendisyonan nia. Dakol an nagkakamit nin mas marahay na salud bilang resulta kan pagsunod sa mga prinsipyo sa Biblia. (Talinhaga 23:​20, 21; 2 Corinto 7:1) An mga nag-aaplikar kan mga prinsipyo sa Biblia mapadapit sa pagkaonesto asin kahigosan sa pankagabsan pinagtitiwalaan kan saindang mga among asin huli kaini nagkakamit nin orog na seguridad sa pagbuhay. (Colosas 3:23) Paagi sa pagsarig ninda ki Jehova, an mga lingkod nin Dios binebendisyonan nin katoninongan nin isip dawa nasa masakit na mga kamugtakan. (Talinhaga 28:25; Filipos 4:​6, 7) Orog sa gabos, kompiado nindang inaantisipar an bendisyon na buhay na daing katapusan sa nagdadangadang na Paraiso digdi sa daga.​—Salmo 37:​11, 29.

Ano an saboot ki Jehova kan mga nagkakamit kan siring na mga bendisyon hale sa saiya? Ipinahayag ni Jacqueline, sarong Kristiana sa Canada, an saiyang pagpasalamat sa Dios: “Pirme siang nagtatao samo nin marahayon nanggad na mga regalo, asin itinatao nia an seguradong paglaom na buhay na daing katapusan.” Sinabi ni Abel, na nasambitan sa enotan, an saiyang saboot sa paaging ini: “An esperansang mabuhay sagkod lamang sa sarong paraisong daga sarong bagay na bago sa sako, asin inaantisipar ko iyan. Minsan siring, dawa mayo nin Paraiso, magigin kawiliwili pa man giraray para sa sako na ipaheling an sakong pagkamoot sa Dios paagi sa paglilingkod sa saiya.”

Puede Man Kamong Magkaigwa nin Tunay na Pagtubod

“Si Jehova nin mga hukbo naghohokom sa katanosan; saiyang sinisiyasat an mga bato asin an puso,” an sabi kan Biblia. (Jeremias 11:20) Iyo, sinisiyasat ni Jehova an nakatago sa kairairaroming parte kan satong pagkatawo. Maninigong siyasaton kan kada saro an sadiri niang motibo sa paniniwala sa Dios. Tibaad nakakontribwir sa salang gawe-gawe kan nakaagi an salang mga paniniwala asin ideya manongod sa Dios. Alagad an tamang kaaraman sa Biblia puedeng gumiya sa pagkaigwa nin tamang relasyon sa Kaglalang, si Jehova Dios.​—1 Timoteo 2:​3, 4.

Paagi sa areglo ninda na daing bayad na pag-adal sa Biblia, tinatabangan kan Mga Saksi ni Jehova an mga tawo na magkaigwa nin tamang kaaraman manongod sa Dios. (Mateo 28:20) Dakol sa mga nag-ako kan siring na tabang an nakanood na kamotan an Dios asin nakapatalubo nin tunay na pagtubod sa saiya. Paagi sa pag-adal kan Biblia, nagkaigwa sinda nin “praktikal na kadonongan asin kakayahan sa pag-iisip,” na nakatatabang sa sainda na ‘maglakaw sa katiwasayan’ sa peligrosong mga aldaw na ini. (Talinhaga 3:21-23) Orog sa gabos, sinda ngonyan may “sierto sagkod marigon” na paglaom sa ngapit. (Hebreo 6:19) Puede man kamong magkaigwa nin tunay na pagtubod asin magkamit kan mga bendisyon na ini.

[Kahon sa pahina 6]

Nakapupurisaw na mga Hapot na Nangangaipo nin Simbag

“Mantang sinasanay ako sa ospital bilang sarong estudyante sa medisina, nakakaheling ako nin marahay na mga tawo na nag-aagrangay sa kolog huli sa mga helang asin kalamidad. Kun igwa nin Dios, taano daw ta nangyayari an mga bagay na ini? An relihion daw saro sanang paagi tanganing magkaigwa nin katoninongan nin isip?”​—Sarong dating Presbiteriano sa Korea.

“Iniisip-isip ko parate kun baga an sakong ama, na sarong alkoholiko, nagpasiring na sa impierno o sa langit. Grabe an takot ko sa mga gadan asin sa ideya nin kalayo sa impierno. Dai ko masabotan kun paano ikasusubol nin sarong mamomoton na Dios an saro tanganing magsakit nin daing sagkod sa impierno.”​—Sarong dating Katoliko sa Brazil.

“Ano an nakatagama sa ngapit para sa daga asin para sa katawohan? Paano mangyayari na an katawohan mabubuhay sagkod lamang? Paano daw makakamtan nin katawohan an tunay na katoninongan?”​—Sarong dating Katoliko sa Alemania.

“Para sa sako garo bakong tama an katokdoan na reenkarnasyon. An mga hayop dai nagsasamba, kaya kun huli sa sarong dahelan mareenkarnar kamo bilang hayop tanganing bayadan an saindong mga kasalan, paano daw nindo itatanos an mga bagay-bagay asin umoswag hale sa kamugtakan na iyan?”​—Sarong dating Hindu sa Aprika del Sur.

“Nagdakula ako sa sarong Confucianong pamilya, asin dati akong nakikikabtang sa seremonya para sa katrangkilohan kan samong mga apoon. Mantang nakikikabtang ako sa pagpuesto kan lamesa sa pag-atang asin pagduko, iniisip-isip ko kun an gadan nang mga apoon minaabot tanganing kakanon an mga pagkakan asin helingon an samong pagduko sa sainda.”​—Sarong dating Confuciano sa Korea.

Nanompongan kan gabos na indibiduwal na ini an simbag sa saindang mga hapot kan mag-adal sinda sa Biblia kaiba kan mga Saksi ni Jehova.