“Andam Para sa Gabos  na Marahay na Gibo”

“PADAGOS na ipagirumdom sa sainda na magpasakop asin magkuyog sa mga gobyerno asin autoridad bilang mga namamahala, na magin andam para sa gabos na marahay na gibo.” (Tito 3:1) Anong marahay na gibo an nasa isip ni apostol Pablo kan isurat nia an mga tataramon na idto sa mga kapagtubod nia? An nag-espesyalisar sa Biblia na si E. F.  Scott nagsambit nin sarong klase nin marahay na gibo, na nagsasabi: “An mga Kristiano bako sana na dapat na magkuyog sa autoridad, kundi sinda dapat na magin andam para sa ano man na marahay na gibo. . . . Kun hinahagad kan okasyon, an mga Kristiano maninigong magin kabilang kan mga nangengenot sa pagpaheling nin pagmalasakit sa komunidad. Pirmeng magkakaigwa nin biglang mga pag-abot nin pagkasolo, peste, manlaenlaen na klase nin kalamidad, na sa panahon na iyan an gabos na marahay na siudadano magmamawot na tumabang sa saindang kataraed.”

An mga Kristiano nakikikabtang sa nagkapirang gibo na para sa kapakinabangan kan komunidad sagkod na an mga gibong ini dai minakontra sa mga ley nin Dios. (Gibo 5:29) Halimbawa, sa pagsunod sa direksion kan lokal na mga bombero, an sangang opisina kan Mga Saksi ni Jehova sa Hapon, na yaon sa Ebina, nagpapraktis laban sa pagkasolo taon-taon. Sa arog kaiyan na mga okasyon, an gabos na miembro kan pamilyang Bethel nagtitiripon tanganing magdangog sa mga instruksion na itinatao kan sarong representante kan lokal na mga bombero.

Dugang pa, sa laog nin labi nang sarong dekada, an sangang opisina nakikikooperar sa lokal na mga autoridad sa sarong eksibisyon na iniisponsor tangani na palakopon an pagigin marigmat manongod sa prebension kan pagkasolo. Duman sa eksibisyon, idinedemonstrar kan mga kompaniya kan siudad an saindang pagigin andam sa paglaban sa pagkasolo asin sa pagkontrol sa pagkasolo. An sangang opisina parateng natatawan nin pagrekonoser sa pagkamaykabatidan asin kooperasyon kan mga tawohan kaini. Kan 2001, sinda an natawan kan primer premyo sa eksibisyon. Andam sindang gumibo nin marahay na gibo na puedeng magligtas nin buhay kun igwa nin pagkasolo.

Sarong Mahalagang Paglilingkod

Minsan siring, an Mga Saksi ni Jehova interesado sa mas mahalagang klase nin marahay na gibo, na saro man na nagliligtas-buhay. Regular sindang nagdadalaw sa saindang kataraed tanganing ipaabot an maogmang bareta kan Kahadean nin Dios. (Mateo 24:14) Dinadagka kan mga Saksi an mga tawo na mag-adal asin mag-aplikar kan mga prinsipyo kan Biblia sa saindang buhay tangani na magrahay an kualidad kan saindang buhay ngonyan asin magkaigwa sinda nin paglaom sa buhay na daing katapusan sa sarong kinaban kun saen mangingibabaw an tunay na katoninongan asin katiwasayan.

Tibaad dai nasasabotan kan iba an halaga kan paglilingkod na itinatao kan Mga Saksi ni Jehova, na ibinibilang pa ngani sindang istorbo. Minsan siring, si Hukom Jean Crepeau kan Korte Superyor nin Quebec sa Canada laen man an opinyon. An Mga Saksi ni Jehova duman kinuestion an reglamento kan siudad nin Blainville, Quebec, na minahagad nin permiso para sa saindang pagharongharong. Sa desisyon kan korte, si Hukom Crepeau nagsabi: “An mga pagbisita kan Mga Saksi ni Jehova sarong Kristianong paglilingkod sa komunidad asin . . . an mga publikasyon na iinaalok kan mga Saksi sa mga interesadong siudadano mahahalagang literatura, na nagtotokar nin mga tema na arog baga kan relihion, Biblia, droga, alkoholismo, edukasyon para sa mga hoben, mga problema nin mag-agom asin diborsio.” An desisyon padagos na nagsasabi: “An korte daing ibang puedeng magin konklusyon kundi na an pagkomparar kan Mga Saksi ni Jehova sa mga paratinda nakaiinsulto, makasusupog, nakakokolog, asin mapagpakaraot.”

An Mga Saksi ni Jehova nakakokontribwir sa ikararahay kan komunidad na saindang iniistaran paagi sa pagtabang sa mga tawo na mapangganahan an mga problema sa saindang pan-aroaldaw na buhay asin sa pagtao sa sainda nin paglaom para sa ngapit. Sinasangkapan sinda kan Biblia na hamanon an gibohon na iyan. “An gabos na Kasuratan ipinasabong nin Dios asin kapakipakinabang para sa pagtokdo, sa pagsagwe, sa paghusay kan mga bagay, sa pagdisiplina sa katanosan, tanganing an tawo nin Dios magin lubos na may kakayahan, biyong nasangkapan para sa gabos na marahay na gibo.”​— 2  Timoteo 3:​16, 17.

Boot daw nindong maaraman kun paano an Mga Saksi ni Jehova nagigin “andam para sa gabos na marahay na gibo”? Inaagda mi kamo na akoon an saindang tabang na makanood nin orog pa manongod sa Biblia asin sa siring maaaprobetsaran nindo ining mahalagang marhay na paglilingkod sa komunidad na saindang ginigibo sa saindong lugar asin sa bilog na kinaban.

[Mga Ritrato sa pahina 30, 31]

An Mga Saksi ni Jehova naghihingoang makikooperar sa sekular na mga autoridad

[Ritrato sa pahina 31]

An mga Saksi bantog sa pagtabang sa saindang kataraed