Kun Taano ta Sinda Nagsisimba

“MAS dakol nin haros apat na doble an mga Presbiteriano sa Republika nin Korea ngonyan kisa sa Amerika.” Tibaad nagngalas an dakol na parabasa sa deklarasyon na iyan sa magasin na Newsweek, mantang naghohona an kadaklan na tawo na an Korea nasyon nin mga Confuciano o Budista. Makakakua an sarong bisita ngonyan nin dakol-dakol na simbahan na “Kristiano” duman, na sa parate mamimidbid paagi sa mga krus na may pulang ilaw. Kun Domingo, ordinaryo nang maheheling an mga tawo na manduwaduwa asin mantulotulo, may kapot na Biblia, na pasiring sa simbahan. Segun sa sarong surbey kan 1998, haros 30 porsiento kan mga Koreano an nagsisimba magsalang sa simbahan na Katoliko o Protestante, labi pa sa mga naghihingakong Budista.

Ngonyan na mga aldaw, pambihira nang makaheling saen man nin siring kadakulang porsentahe nin mga tawong nagsisimba nin regular. Pero, nangyayari iyan bako sanang sa Korea kundi patin sa iba pang nasyon sa Asia, siring man sa Aprika asin Latin Amerika. Taano ta dakolon pa man giraray an naghihingakong naniniwala sa Dios mantang garo baga naglalakop sa daga an pagkadaing labot asin pagkaindiperente sa relihion? Taano daw ta nagsisimba sinda?

Ihinayag nin sarong surbey na Gallup na an labi sa kabanga kan mga parasimba sa Korea naghahanap nin katoninongan nin isip; mga un-tersio an naglalaom nin buhay na daing sagkod pagkagadan; asin 1 sa 10 an naglalaom nin marahay na salud, kayamanan, asin pag-asenso sa buhay.

Dakol na tawo sa Tsina an nagduduruman sa mga simbahan na naglalaom na mapanigoan an saindang kakulangan sa espirituwal na iyo an resulta kan an Komunistang ideolohiya luway-luway na nasasalidahan nin kapitalismong mga ambisyon. Kada taon, minilyon na kopya nin Biblia an iniimprenta asin idinidistribwir sa Tsina, asin garo baga an kaigotan kan mga tawo sa pagbasa kaiyan kapareho kan kaigotan ninda sa pagbasa kan sadit na pulang libro ni Mao.

May mga Katoliko sa Brazil, nangorogna an mas hoben na henerasyon, na dai kontento sa panugang kaogmahan sa buhay sa ngapit​—gusto na  nindang maotob iyan ngonyan. An magasin nin mga bareta na Tudo nagkokomento: “Kun an teolohiya liberasyon an nagin motibasyon kan dekada nin 1970, an teolohiya sa prosperidad naman ngonyan.” An sarong surbey sa Britania naghagad sa mga nagsisimba duman na magsambit nin sarong bagay na nagugustohan ninda manongod sa simbahan ninda. Pakikiasosyar an pirmeng enot na nasasambitan.

Gabos ini nagpapaheling na minsan ngani dakol-dakol na tawo an naniniwala pa man giraray sa Dios, an kadaklan mas interesado sa kun ano an puede nindang makua ngonyan kisa kun ano an makukua ninda sa ngapit​—o kisa sa Dios ngani mismo. Ano daw sa paghona nindo an tamang dahelan na maniwala sa Dios? Ano daw an sinasabi kan Biblia sa bagay na ini? Makukua nindo an simbag sa masunod na artikulo.