“Magkaigwa nin Labi-labi Nanggad na Kaogmahan ki Jehova”

“Magkaigwa nin labi-labi nanggad na kaogmahan ki Jehova, asin itatao nia sa saimo an mga kahagadan kan saimong puso.”​—SALMO 37:4.

1, 2. Siisay an Gikanan nin tunay na kaogmahan, asin paano dinara ni Hadeng David an atension sa katunayan na ini?

“MAOGMA idtong mga nakamamate kan saindang espirituwal na pangangaipo, . . . maogma an mga maheherakon, . . . maogma an mga toninong.” Kaiba an anom pang paglaladawan sa mga maogma, an mga tataramon na ini iyo an nakaaapod nin atension na introduksion kan bantog na Sermon sa Bukid ni Jesus, na isinurat kan kagsurat nin Ebanghelyo na si Mateo. (Mateo 5:3-11) An mga tataramon ni Jesus nag-aasegurar na puede niatong kamtan an kaogmahan.

² An sarong sagradong awit na isinurat ni Hadeng David kan suanoy na Israel dinadara an atension sa Gikanan kan tunay na kaogmahan, si Jehova. “Magkaigwa nin labi-labi nanggad na kaogmahan ki Jehova,” an sabi ni David, “asin itatao nia sa saimo an mga kahagadan kan saimong puso.” (Salmo 37:4) Alagad paano puedeng magin “labi-labi nanggad na kaogmahan” an pakamidbid ki Jehova asin pakaaram sa dakol na aspekto kan saiyang personalidad? Paanong an pag-estudyar sa mga ginibo asin gigibohon pa nia sa pag-otob kan saiyang katuyohan nagtatao sa saindo nin paglaom na akoon ‘an mga kahagadan kan saindong puso’? An maingat na pagsiyasat sa Salmo 37, bersikulo 1 sagkod 11, nagtatao kan simbag.

“Dai Ka Mauri”

3, 4. Siring sa nakasurat sa Salmo 37:​1, ano an isinadol ni David, asin taano ta angay na himateon iyan ngonyan?

³ Nabubuhay kita sa “delikadong mga panahon na masakit pakibagayan,” asin lakop an karatan. Naheling niato na nagkatotoo an mga tataramon ni apostol Pablo: “An mga maraot asin nandadaya orog na magraraot, na nanlalagalag asin ikinalalagalag.” (2 Timoteo 3:​1, 13) Madalion nanggad na maapektaran kan garo baga kapangganahan asin pag-asenso kan mga tawong maraot! An gabos na iyan puedeng makadisturbo sa sato, na nagigin dahelan na mawara sa pokus an satong espirituwal na pakaheling. Mangnoha kun paano kita pinatatanidan kan enot na mga tataramon kan Salmo 37 dapit sa potensial na peligrong ini: “Dai ka mag-init dahel sa mga paragibo nin maraot. Dai ka mauri sa mga naggigibo nin karatan.”

⁴ An media sa kinaban aroaldaw kitang pinaooranan nin kadakol na bareta nin inhustisya. An madayang mga negosyante nakakalusot sa pandadaya. Inaaprobetsaran kan mga kriminal an mga dai kayang lumaban. An mga paragadan dai pa man giraray nadadakop o napapadusahan. An gabos na halimbawang iyan kan pagbiribid sa hustisya puedeng ikaanggot asin makadisturbo sa satong katoninongan nin isip. An garo baga kapangganahan kan mga paragibo nin maraot tibaad ikauri pa ngani. Alagad mapapakarhay daw kan pagkaaburido niato an situwasyon? Maliliwat daw kan pagkauri sa garo baga mga bentaha sa buhay kan mga maraot an  kaaabtan ninda? Dai nanggad! Asin talagang dai kaipuhan na kita “mag-init.” Taano ta dai?

5. Taano ta iinaagid sa doot an mga paragibo nin maraot?

⁵ An salmista minasimbag: “Huli ta siring sa doot sinda tolos-tolos na maluluyos, asin siring sa berdeng doot sinda mapapara.” (Salmo 37:2) An berdeng doot tibaad magayon paghelingon, alagad an mga dahon madaling naluluyos asin nagagadan. Arog man kaiyan an mga paragibo nin maraot. An garo baga pag-asenso ninda bakong permanente. Kun sinda magadan, an saindang mga ginanar sa maraot na paagi dai na makakatabang sa sainda. Sa katapustapusi an gabos naaabotan kan hustisya. “An ibinabayad nin kasalan kagadanan,” an isinurat ni Pablo. (Roma 6:23) An mga paragibo nin maraot asin an gabos na bakong matanos sa katapustapusi maako kan ‘kabayadan’ ninda asin mawawara na. Abaa kadaing pakinabang na pamumuhay!​—Salmo 37:​35, 36; 49:​16, 17.

6. Anong leksion an makukua niato sa Salmo 37:​1, 2?

⁶ Kun siring, maninigo daw niatong togotan na makadisturbo sa sato an temporaryong pag-asenso kan mga paragibo nin maraot? Ini an leksion sa enot na duwang bersikulo kan Salmo 37: Dai pagtogotan an saindang kapangganahan na pasuwayon kamo sa pinili nindong dalan na paglingkodan si Jehova. Imbes, magdanay kamong nakaturuhok sa espirituwal na mga bendisyon asin pasohan.​—Talinhaga 23:17.

“Magtiwala Ka ki Jehova Asin Gumibo Ka nin Marahay”

7. Taano ta maninigo kitang magtiwala ki Jehova?

⁷ “Magtiwala ka ki Jehova asin gumibo ka nin marahay,” an sadol sa sato kan salmista. (Salmo 37:3a) Kun kita pinupurisaw nin mga kahaditan o nin mga pagduda pa ngani, kaipuhan na marigon kitang magkompiar ki Jehova. Sia an Saro na nag-aalok nin lubos na espirituwal na seguridad. “An siisay man na nag-eerok sa hilom na lugar kan Kaharohalangkawe,” an isinurat ni Moises, “makakakua nin ontokan sa mismong limpoy kan Makakamhan sa gabos na Saro.” (Salmo 91:1) Kun napupurisaw huli sa pag-orog nin katampalasanan sa sistemang ini nin mga bagay, lalo nang kaipuhan niato na manarig ki Jehova. Kun malapoan kita sa buko-buko, naoogma kita pag-inalalayan kita nin sarong katood. Kaagid kaiyan, kun kita naghihingoang lumakaw nin fiel, kaipuhan niato an pag-alalay ni Jehova.​—Isaias 50:10.

8. Paano makatatabang sa sato an pakikikabtang sa Kristianong ministeryo tanganing malikayan an labi-labing pagkapurisaw sa pag-asenso kan mga maraot?

⁸ An sarong solusyon tanganing dai mapurisaw kan pag-asenso kan mga maraot iyo an magin sibot sa paghanap asin pagtabang sa mga arog-karnero na magkamit nin tamang kaaraman dapit sa katuyohan ni Jehova. Sa ibong nin nag-oorog na karatan, kaipuhan man kitang magin biyong sibot sa pagtabang sa iba. “Dai nindo paglingawan an paggibo nin marahay asin an paghiras nin mga bagay sa iba,” an sabi ni apostol Pablo, “huli ta sa siring na mga atang naoogmang gayo an Dios.” An ‘pinakamarahay’ na magigibo niato iyo na ihiras sa iba an mamuraway na maogmang bareta kan Kahadean nin Dios. An satong paghuhulit sa publiko tunay nanggad na sarong “atang nin pag-omaw.”​—Hebreo 13:​15, 16; Galacia 6:10.

9. Ipaliwanag an sadol ni David na “mag-erok ka sa daga.”

⁹ “Mag-erok ka sa daga,” an pagpadagos ni David, “asin gumawe kang may pagigin fiel.” (Salmo 37:3b) An “daga” kan kaaldawan ni David iyo an teritoryo na itinao ni Jehova sa Israel, an Dagang Panuga. Durante kan pagreynar ni Salomon an abot kan mga linderos kaiyan magpoon sa Dan sa amihanan sagkod sa Beer-seba sa timog. Ini an erokan kan Israel. (1 Hade 4:25) Ngonyan, saen man kita nag-iistar sa daga, inaantisipar niato an panahon na an bilog na planeta magigin paraiso sa bagong kinaban na may katanosan. Mientras tanto,  kita nag-eerok sa espirituwal na katiwasayan.​—Isaias 65:​13, 14.

10. Ano an resulta kun kita ‘minagawe na may pagigin fiel’?

¹⁰ Ano an magigin resulta kun kita ‘minagawe na may pagigin fiel’? An ipinasabong na talinhaga nagpapagirumdom sa sato: “An tawo na may fiel na mga gibo magkakamit nin dakol na bendisyon.” (Talinhaga 28:20) An satong fiel na pagmamaigot sa paghuhulit kan maogmang bareta saen man kita nag-iistar asin sa siisay man na makakaolay niato nagbubunga nanggad nin mga balos hale ki Jehova. Halimbawa, si Frank asin an saiyang agom, si Rose, inako an asignasyon na magpayunir kaidtong 40 taon na an nakaagi sa sarong banwaan sa amihanan na Scotland. Nagbaraya na an pipirang nagpaheling kaidto nin interes sa katotoohan duman. Dai nadedesganar, pinonan kan mag-agom na payunir na ini an paghuhulit asin paggibo nin mga disipulo. Ngonyan igwa na nin maoswag na kongregasyon sa banwaan na iyan. An pagigin fiel kan mag-agom na ini tunay nanggad na binendisyonan ni Jehova. “An pinakadakulang balos,” an mapakumbabang paliwanag ni Frank, “iyo nanggad na kami yaon pa giraray sa katotoohan asin nagagamit ni Jehova.” Iyo, kun kita ‘minagawe na may pagigin fiel,’ dakol na bendisyon an satong inaako asin pinahahalagahan.

“Magkaigwa nin Labi-labi Nanggad na Kaogmahan ki Jehova”

11, 12. (a) Paano niato magigibo na “magkaigwa nin labi-labi nanggad na kaogmahan ki Jehova”? (b) Anong pasohan an puede nindong gibohon mapadapit sa personal na pag-adal, asin ano an posibleng resulta?

¹¹ Tanganing mapakosog an satong relasyon ki Jehova asin mapagdanay an satong pagtitiwala sa saiya, kita dapat na “magkaigwa nin labi-labi nanggad na kaogmahan ki Jehova.” (Salmo 37:4a) Paano niato iyan gigibohon? Imbes na magparaisip sa satong sadiring situwasyon, baga man tibaad masakit iyan, ipinopokus niato an satong isip ki Jehova. An sarong paagi tanganing magibo ini iyo an pagtao nin panahon na basahon an saiyang Tataramon. (Salmo 1:​1, 2) Nagtatao daw sa saindo nin labi-labing kaogmahan an saindong pagbasa sa Biblia? Iyo, kun kamo nagbabasa na may pasohan na makanood nin orog pa manongod ki Jehova. Taano ta dai nguna magpondo pagkabasa nin sarong kabtang asin hapoton an saindong sadiri, ‘Ano an itinokdo sa sako kan tekstong ini manongod ki Jehova?’ Tibaad makatabang para sa saindo na magkaigwa nin magagamit na kuaderno o papel kun kamo nagbabasa sa Biblia. Kada pagpondo nindo tanganing horophoropon an kahulogan kan saindong binasa, isurat an sarong frase na nagpapagirumdom sa saindo kan saro sa kawiliwiling mga kualidad nin Dios. Sa saro pang salmo, si David nag-awit: “Logod an mga tataramon kan sakong ngoso asin an paghorophorop kan sakong puso magin nakaoogma sa saimo, O Jehova na sakong Gapo asin sakong Paratubos.” (Salmo 19:14) An pagkonsentrar na ini kan satong atension sa Tataramon nin Dios “nakaoogma” ki Jehova asin nakaoogmang marhay sa sato.

¹² Paano niato makakamit an kaogmahan sa satong pag-adal asin paghorophorop? Puede niatong gibohon na obheto niato na makanood nin dakol sagkod sa mahihimo niato manongod ki Jehova asin sa saiyang mga paagi nin paghiro. An mga publikasyon na arog kan The Greatest Man Who Ever Lived asin Rumani ki Jehova * nagtatao sa sato nin dakol-dakol na bagay na puede niatong horophoropon na may pag-apresyar. Bilang resulta, inasegurar ni David an mga matanos, “itatao [ni Jehova] sa saimo an mga kahagadan kan saimong puso.” (Salmo 37:4b) Ini an klase nin kompiansa na siertong nagpahiro ki apostol Juan na isurat an mga tataramon: “Iyo ini an satong mapananarigan mapadapit sa saiya, na, minsan ano an satong hagadon segun sa saiyang kabotan, dinadangog nia kita. Dugang pa, kun kita nakakaaram na dinadangog nia kita manongod sa ano man na hagadon niato, aram niato na aakoon  niato an mga bagay na hinagad ta an mga iyan hinagad niato sa saiya.”​—1 Juan 5:​14, 15.

13. Sa nakaagi pa sanang mga taon, anong paghiwas kan gibohon na paghuhulit kan Kahadean an naheling sa dakol na kadagaan?

¹³ Bilang mga nagdadanay na may integridad, an pinakadakulang kaogmahan niato iyo na maheling an pagkabindikar kan soberaniya ni Jehova. (Talinhaga 27:11) Bako daw na nagsusulwak sa kagayagayahan an satong puso kun nababaretaan niato an mahiwason na paghuhulit na ginigibo kan mga tugang niato sa kadagaan na dati sakop nin totalitaryo o diktatoryal na pamamahala? Galaga niatong inaantisipar na maheling kun ano pang katalingkasan an tibaad mangyari bago matapos an sistemang ini. An dakol na lingkod ni Jehova na nag-eerok sa mga nasyon sa solnopan maigot na nakikikabtang sa paghuhulit sa mga estudyante, mga dulag, asin iba pa na temporaryong nag-iistar sa solnopan asin igwa nin katalingkasan sa pagsamba. Odok niatong minamawot na kun magpuli na an mga indibiduwal na ini, logod na padagos nindang pasirangon an liwanag nin katotoohan sa dawa garo baga dai natataros na kadikloman.​—Mateo 5:14-16.

“Idolot Mo ki Jehova an Saimong Dalan”

14. Ano an ebidensia na puede kitang magsarig ki Jehova?

¹⁴ Nakagiginhawa nanggad na maaraman na puedeng haleon an mga kahaditan niato asin an tibaad garo baga magabaton na mga pagabat sa sato! Paano? “Idolot mo ki Jehova an saimong dalan, asin manarig ka sa saiya,” sabi ni David, na nagsabi pa, “asin sia mismo mahiro.” (Salmo 37:5) Sa satong mga kongregasyon, igwa kita nin igong ebidensia na si Jehova sarong masasarigan na suporta. (Salmo 55:22) An mga nasa bilog na panahon na ministeryo, baga man mga payunir, nagbibiaheng paraataman, misyonero, o boluntaryo na naglilingkod sa Bethel, gabos makapagpapatunay sa pagigin masasarigan kan pag-ataman ni Jehova. Taano ta dai makipag-olay sa mga kamidbid nindo asin hapoton sinda kun paano sinda tinabangan ni Jehova? Daing duda na makakadangog kamo nin dakol na eksperyensia na nagpapaheling na dawa sa mga panahon nin kasakitan, nungkang halipot an kamot ni Jehova. Pirme niang itinatao an mga pangangaipo sa buhay.​—Salmo 37:25; Mateo 6:25-34.

15. Paano nagsisirang an katanosan kan banwaan nin Dios?

¹⁵ Kun ginigibo niato si Jehova na mani satong kompiansa asin lubos kitang nagtitiwala sa saiya, maeeksperyensiahan niato an dugang pang mga tataramon kan salmista: “Sierto nanggad na pasisirangon nia siring sa liwanag an saimong katanosan, asin siring sa kaudtohan an saimong hustisya.” (Salmo 37:6) Bilang mga Saksi ni Jehova, parate kitang minimisrepresentar. Alagad minumuklat ni Jehova an mga mata kan mga sadiosan an puso tanganing  tabangan sindang marealisar na an satong ministeryo sa publiko minomotibar nin pagkamoot ki Jehova asin sa kapwa. Kadungan kaiyan, dai matatago an satong tanos na gawe-gawe minsan ngani minimisrepresentar nin dakol. Sinususteniran kita ni Jehova sa gabos na klase nin pagtumang asin paglamag. Bilang resulta, an katanosan kan banwaan nin Dios nagsisirang siring sa saldang sa kaudtohan.​—1 Pedro 2:12.

“Dai Ka Maggirong . . . Maghalat Kang May Paghidaw”

16, 17. Kaoyon kan Salmo 37:​7, panahon na ngonyan para sa ano, asin taano?

¹⁶ An sunod na mga tataramon kan salmista: “Dai ka maggirong sa atubangan ni Jehova asin maghalat kang may paghidaw sa saiya. Dai ka mag-init sa saro na nagigin mapanggana sa saiyang dalan, sa tawo na naggigibo kan saiyang mga ideya.” (Salmo 37:7) Idinodoon digdi ni David an pangangaipo na kita mapasensiang maghalat na humiro si Jehova. Minsan ngani dai pa minaabot an katapusan kan sistemang ini, bako ining dahelan na magreklamo. Bako daw na naheling niato na an pagkaherak asin pasensia ni Jehova labi pa kisa kan paghona niato kan enot? Puede daw niatong ipaheling ngonyan na kita naghahalat man na may pagpapasensia mantang kita nagdadanay na sibot sa paghuhulit kan maogmang bareta bago dumatong an katapusan? (Marcos 13:10) Panahon na ngonyan na likayan an ragap na mga paghiro na puedeng ikawara kan satong kagayagayahan asin espirituwal na katiwasayan. Panahon na ngonyan na labanan nin orog pa kaigot an nakararaot na impluwensia kan kinaban ni Satanas. Asin panahon na ngonyan na papagdanayon an kadalisayan sa moral asin nungkang isapeligro an satong matanos na kamugtakan sa atubangan ni Jehova. Padagos niatong haleon an inmoral na mga kaisipan asin likayan an bakong angay na mga paggawe sa bakong kasekso o, sa katunayan, sa mga kasekso.​—Colosas 3:5.

¹⁷ “Pabayae an kaanggotan asin bayae an kabangisan,” an hatol sa sato ni David. “Dai ka mag-init tangani sanang makagibo nin maraot. Huli ta an mga paragibo nin maraot mismo popohoon, alagad idtong mga naglalaom ki Jehova iyo an mga makasasadiri kan daga.” (Salmo 37:​8, 9) Iyo, may kompiansa kitang makalalaom sa panahon​—na haranihon na ngonyan​—na popohoon ni Jehova sa daga an gabos na karatan asin an mga responsable dian.

“Dai Na Mahahaloy”

18, 19. Anong pamparigon sa boot an nakukua nindo sa Salmo 37:10?

¹⁸ “Dai na mahahaloy, asin ta an maraot mawawara na; asin hehelingon mo nanggad an saiyang namumugtakan, asin ta mayo na sia dian.” (Salmo 37:10) Naparirigon nanggad kan mga tataramon na iyan an boot niato mantang kita nagdadangadang sa katapusan kan sistemang ini asin sa kulminasyon kan kapahapahamak na pagigin independiente ki Jehova! Nasudya nanggad an ano man na klase nin gobyerno o autoridad na minukna nin tawo. Asin ngonyan harani na kita sa panahon nin pagbalik sa pamamahala nin Dios, sa tunay na teokrasya, an Kahadean ni Jehova sa kamot ni Jesu-Cristo. Iyan na an biyong mapalakaw sa mga bagay-bagay sa kinaban asin hahaleon an gabos na nagtutumang sa Kahadean nin Dios.​—Daniel 2:44.

¹⁹ Sa bagong kinaban na sakop kan Kahadean nin Dios, dawa maghanap kamo, dai na kamong manonompongan na “maraot.” Sa katunayan, an siisay man na sa panahon na iyan magrerebelde ki Jehova tolos na hahaleon. Mayo na duman nin siisay man na nag-aatake sa saiyang soberaniya o nagsasayumang magpasakop sa diosnon na autoridad. An gabos nindong kapwa magigin parareho an isip sa saindang kamawotan na paogmahon si Jehova. Kanigoan na katiwasayan an ibubunga kaiyan​—mayo nang mga barat, mayo nang mga rehas, mayo nang ano man na makakaraot sa lubos na pagtitiwala asin kaogmahan!​—Isaias 65:20; Miqueas 4:4; 2 Pedro 3:13.

20, 21. (a) Sairisay an “mahoyo” sa Salmo 37:​11, asin saen sinda nakanonompong nin “nagsosopay na katoninongan”? (b) Anong mga bendisyon an mapapasato kun aarogon niato an David na Orog na Dakula?

²⁰ Dangan, “an mga mahoyo mismo makasasadiri kan daga.” (Salmo 37:11a) Alagad sairisay an “mga mahoyo” na ini? An termino na trinadusir  na “mahoyo” hale sa orihinal na termino na nangangahulogan “papagsakiton nin makuri, pakumbabaon, ibaba.” Iyo, “an mga mahoyo” iyo an mga mapakumbabang naghahalat ki Jehova na itanos an gabos na inhustisya na ginigibo sa sainda. “Tunay na manonompongan ninda an saindang labi-labi nanggad na kaogmahan sa nagsosopay na katoninongan.” (Salmo 37:11b) Dawa ngonyan nakaeeksperyensia kita nin nagsosopay na katoninongan sa espirituwal na paraiso na konektado sa tunay na Kristianong kongregasyon.

²¹ Minsan ngani bako pang libre sa makuring mga sakit, sinusuportaran niato an lambang saro asin rinaranga an mga nagmomondo nin makuri. Bilang resulta, an tunay na panlaog na pagkakontento napapalakop sa tahaw kan banwaan ni Jehova. An mga tugang na lalaki na ninombrahan bilang mga pastor mamomoton na naglilingkod para sa satong espirituwal​—asin may beses na pati sa pisikal​—na mga pangangaipo, na nagpapangyari sa sato na matagalan an makuring sakit dahel sa katanosan. (1 Tesalonica 2:​7, 11; 1 Pedro 5:​2, 3) Kanigoan kahalagang rogaring an katoninongan na ini! Igwa man kita kan paglaom na buhay na daing katapusan sa matoninong na Paraiso na harani na. Kun siring, logod na arogon niato an David na Orog na Dakula, si Cristo Jesus, na an kaigotan para ki Jehova an nagmotibar sa saiya na maglingkod nin fiel sagkod sa katapusan. (1 Pedro 2:21) Paagi sa paggibo kaiyan, magpapadagos kita na maogma, na inoomaw an saro na sa saiya igwa kita nin labi-labi nanggad na kaogmahan, an satong Dios, si Jehova.

[Nota sa Ibaba]

Masisimbag daw Nindo?

• Anong mga leksion an nanodan nindo sa Salmo 37:​1, 2?

• Paano kamo ‘magkakaigwa nin labi-labi nanggad na kaogmahan ki Jehova’?

• Ano an ebidensia na puede kitang magsarig ki Jehova?

[Mga Hapot Para sa Pag-adal]

[Ritrato sa pahina 9]

An mga Kristiano ‘dai nauuri sa mga naggigibo nin karatan’

[Ritrato sa pahina 10]

“Magtiwala ka ki Jehova asin gumibo ka nin marahay”

[Ritrato sa pahina 11]

Magkaigwa nin labi-labi nanggad na kaogmahan ki Jehova paagi sa pakanood nin dakol sagkod sa mahihimo nindo manongod sa saiya

[Ritrato sa pahina 12]

“An mga mahoyo mismo makasasadiri kan daga”