Mga Hapot Hale sa mga Parabasa

Sa anong sentido na si Ezequiel nagin “pula” durante kan panahon na salikopan asin laglagon an Jerusalem?

Sa pundamental, sa sentido na mayo na siang idadagdag pa sa makahulang mensahe ni Jehova na ipinahayag na nia.

Pinonan ni propeta Ezequiel an saiyang paglilingkod bilang fiel na bantay para sa desterradong mga Israelita sa Babilonya kan “ikalimang taon kan pagkadistiero ni Hadeng Joachin,” an boot sabihon, kan 613 B.C.E. (Ezequiel 1:​2, 3) Kan ikasampulong aldaw kan ikasampulong lunar na bulan kan 609 B.C.E., ipinaisi sa saiya paagi sa pasabong nin Dios an kapinonan kan pagsalikop sa Jerusalem kan mga Babilonyo. (Ezequiel 24:​1, 2) Ano an kaaabtan kan pagsalikop? Malilikayan daw kan Jerusalem asin kan daing pagtubod na mga nag-eerok dian an kapahamakan? Bilang an bantay, ipinahayag na ni Ezequiel an dai mamamaluan na mensahe nin kalaglagan hale ki Jehova, asin dai na kaipuhan pang magdagdag nin ano man si Ezequiel, na garo baga tanganing gibohon na orog na nakakokombensir an mensaheng iyan. Si Ezequiel nagin pula mapadapit sa dugang pang kapahayagan manongod sa pagsalikop sa Jerusalem.​—Ezequiel 24:25-27.

Mga anom na bulan pakatapos malaglag an Jerusalem kan 607 B.C.E., an sarong dulag nagbareta ki Ezequiel na nasa Babilonya kan manongod sa pagkagaba kan banal na siudad. Kan banggi bago nag-abot an dulag, ‘binuka ni Jehova an ngoso ni Ezequiel, asin dai na sia nagin pula.’ (Ezequiel 33:22) Sagkod dian an pagigin pula ni Ezequiel.

Si Ezequiel daw pula sa literal durante kan panahon na iyan? Malinaw na dai, huli ta dawa kan sia “napula,” nagtaram sia nin mga hula na ipinanongod nia prinsipalmente sa mga nasyon sa palibot na naggayagaya sa pagbagsak kan Jerusalem. (Ezequiel, kapitulo 25-32) Sa mas naenot na kabtang sa karera ni Ezequiel bilang propeta asin bantay, sinabihan sia ni Jehova: “An saimo mismong dila gigibohon kong dumokot sa saimong ngaragngag, asin ika nanggad magigin pula, asin ika dai na magigin sa sainda lalaking nagsasaway, huli ta sinda masumbikal na harong. Asin kun makipag-olay ako sa saimo bubukahon ko an saimong ngoso.” (Ezequiel 3:​26, 27) Kun si Jehova daing mensahe para sa Israel, si Ezequiel magdadanay na pula kun dapit sa nasyon na iyan. Si Ezequiel autorisadong magtaram kan gusto ni Jehova na itaram nia sa panahon na gusto ni Jehova na gibohon nia iyan. An pagigin pula ni Ezequiel nagpapasentido na sia nagin pula kun mapadapit sa pagpahayag nin mga tataramon na may makahulang kahulogan sa mga Israelita.

An grupong bantay sa presenteng aldaw, an linahidan na mga Kristiano, padagos na nagpapatanid manongod sa kalaglagan kan Kakristianohan, an antitipikong Jerusalem. Kun dumatong na an “dakulang kahorasaan” asin laglagon na an “Dakulang Babilonya,” an pambilog na kinaban na imperyo nin falsong relihion, mayo nang sasabihon pa an linahidan na grupong Ezequiel manongod sa katapusan kan Kakristianohan, na dakulang kabtang kan imperyong iyan.​—Mateo 24:21; Kapahayagan 17:​1, 2, 5.

Iyo, maabot an panahon na magigin pula an linahidan na natatada asin an saindang mga kaiba, huling mayo nang ipapahayag pa sa Kakristianohan. Mangyayari iyan kun laglagon asin hubaan na kan “sampulong sungay” asin kan “mabangis na hayop” an Dakulang Babilonya. (Kapahayagan 17:16) Siempre, dai ini nangangahulogan na magigin pula an mga Kristiano sa literal na sentido. Kun paanong ginigibo ninda iyan ngonyan, oomawon ninda si Jehova asin sasambiton sia aroaldaw patin “sa gabos na kapag-arakian na maabot.”​—Salmo 45:17; 145:2.