An Pamilya ni Jesus—Siisay Sinda?

SA DAKOL na parte kan kinaban, parateng maheheling nindo kun Disyembre an mga belen na yaon an omboy na si Jesus na mamomoton na inaasikaso kan saiyang ina, si Maria, asin kan saiyang kag-ampon na ama, si Jose. Puedeng maakit kan arog kaiyan na mga eksena nin pamilya dawa an mga dai naghihingakong Kristiano. Huling ki Jesus nakasentro an atension, ano an sinasabi sa sato kan Kasuratan manongod sa pamilyang tawo ni Jesus?

Interesanteng marhay an pinaghalean na pamilya ni Jesus. Ipinangaki sia nin sarong birhen na an ngaran Maria, na huli kaini sia nagin miembro kan pamilya nin tawo. Oyon sa Biblia, paagi sa banal na espiritu ibinalyo an saiyang buhay hale sa langit pasiring sa matris ni Maria. (Lucas 1:30-35) Bago iinanunsiar an milagrosong pangingidam ki Jesus, si Maria nakitratong pakasal sa sarong lalaki na an ngaran Jose, na sa siring iyo an magigin kag-ampon na ama ni Jesus.

Pagkamundag ki Jesus, si Jose asin Maria nagkaigwa nin iba pang aki, mga tugang na lalaki asin babae ni Jesus sa ina. Maririsa iyan sa ihinapot kan huri manongod ki Jesus kan mga nag-eerok sa Nazaret: “Bakong ini an aki kan panday? Bakong an ngaran kan saiyang ina Maria, asin an saiyang mga tugang na lalaki si Santiago asin Jose asin Simon patin Judas? Asin an saiyang mga tugang na babae, bako daw na sinda gabos kairiba niato?” (Mateo 1:25; 13:​55, 56; Marcos 6:3) Puede kitang magkonklusyon base digdi na an pinakaharaning pamilya ni Jesus kompuesto kan saiyang mga magurang, apat na tugang na lalaki, asin kisuerra duwang tugang na babae.

Minsan siring, may mga dai naniniwala ngonyan na mga aki ni Jose asin Maria an mga tugang na lalaki asin babae ni Jesus. Taano? “Itinokdo kan Iglesia,” sabi kan New Catholic Encyclopedia, “poon kan kaenot-enoteng mga aldaw kaiyan na si Maria nagdanay na sarong birhen. Kun siring, huli kaini daing duda na si Maria dai nagkaigwa nin iba pang mga aki.” An iyo man sanang reperensia naghihingako na an mga terminong “tugang na lalaki” asin “tugang na babae” puedeng nanonongod sa “sarong tawo o mga tawo na nagkakasararo sa sarong relihion o iba pang pagkakapareho” o sa mga paryente, tibaad mga pinsan.

Totoo daw talaga iyan? Dawa an nagkapirang teologong Katoliko, na nagkokontra sa tradisyonal na doktrina, nagsusuportar sa opinyon na si Jesus may mga tugang na lalaki asin babae sa laman. Si John P. Meier, dating presidente kan Asosasyon nin Katolikong Biblia sa Amerika, nagsurat: “Sa B[agong] T[ipan] an adelphos [tugang na lalaki], kun ginagamit bako sanang sa piguratibong pagtaram kundi imbes tanganing iindikar an sarong klase nin pisikal o legal na relasyon, daing ibang kahulogan kundi tugang na lubos o tugang na lalaki sa ina o ama, asin mayo nang iba.” * Iyo, an Kasuratan nag-iindikar na si Jesus igwa nin mga tugang na lalaki asin babae na namundag ki Jose asin Maria.

Sinambit kan mga Ebanghelyo an iba pang paryente ni Jesus, alagad magkonsentrar kita ngonyan sa pinakaharaning pamilya ni Jesus asin helingon ta kun ano an puede niatong manodan sa sainda.

[Nota sa Ibaba]