An mga Naggradwar sa Gilead Inenkaminar na Magtaram nin “Makangangalas na mga Bagay”

PRESENTE an 6,635 hale sa 52 na nasyon sa programa nin gradwasyon kan ika-115 klase kan Paadalan sa Biblia kan Watchtower sa Gilead kan Setyembre 13, 2003.

Nadangog ninda an pamparigon sa boot na basado sa Biblia na itinao sa 48 estudyante kan klase tanganing darahon ninda an “makangangalas na mga bagay nin Dios” sa mga tawo sa 17 nasyon. (Gibo 2:11) Duman isasagibo ngonyan kan mga naggradwar an saindang pagmimisyonero.

Sa saiyang pambukas na pahayag, ipinagirumdom ni Stephen Lett, na miembro kan Namamahalang Grupo kan Mga Saksi ni Jehova asin tsirman kan gradwasyon, sa mga estudyante: “Paghale nindo pasiring sa saindong destino, saen man kamo magduman o ano man an magin kamugtakan nindo, mas dakol an nasa kampi nindo kisa tumang saindo.” Ginagamit an kapitulo 6 kan Ikaduwang Hade, ipinagirumdom ni Tugang na Lett sa mga estudyante na makasasarig sinda sa pagsuportar ni Jehova Dios asin kan manampulong ribong anghel mantang ipinapaaram ninda an “makangangalas na mga bagay nin Dios.” (2 Hade 6:​15, 16) An mga Kristiano kan enot na siglo napaatubang sa pagtumang asin pagkaindiperente sa saindang paghuhulit asin pagtotokdo, asin an Kristianong mga misyonero ngonyan napapaatubang man sa kaparehong mga kamugtakan. Minsan siring, puede sindang manarig sa suporta hale sa langit saka hale sa organisasyon ni Jehova digdi sa daga.​—Salmo 34:7; Mateo 24:45.

Magtaram nin “Makangangalas na mga Bagay nin Dios”

Kasunod kan pambukas na pahayag kan tsirman, si Harold Corkern kan Komite kan Sangang Opisina sa Estados Unidos nagpahayag sa temang “Realistikong mga Linalaoman​—Liabe sa Magayagaya Asin Mapangganang Paglilingkod.” Idinoon ni Tugang na Corkern na an dai naotob na mga linalaoman puedeng magbunga nin pagkadesganar, arog kan ipinaheheling kan Talinhaga 13:12. Minsan siring, an pagkadesganar parateng resulta nin pagkaigwa nin bakong realistikong mga linalaoman na dai naotob. An mga naggradwar kaipuhan na magkaigwa nin balanse asin realistikong pagmansay sa sadiri ninda asin sa iba. Maninigo na laoman ninda na masasala sinda, alagad dai ini dapat na makapamondo nin sobra sa sainda mantang nagmamaigot sindang tabangan an iba na masabotan an “makangangalas na mga bagay nin Dios.” Inenkaminar ni Tugang na Corkern an bagong mga misyonero na manarig ki Jehova, “an parabalos sa mga maigot na naghahanap sa saiya.”​—Hebreo 11:6.

An suminunod sa programa iyo si Daniel Sydlik, sarong miembro kan Namamahalang Grupo, na nagpahayag sa temang “An Kristianong Paglaom​—Ano daw Iyan?” Sia nagsabi: “An paglaom sarong Kristianong birtud. Iyan sarong pamantayan nin tama na nagpapangyari sa saro na magkaigwa nin tamang relasyon sa Dios. Imposible para sa saro na bakong Kristiano na maglaom na arog kan ginigibo niato.” Sinabi ni Tugang na Sydlik kun ano an manlaenlaen na aspekto kan Kristianong paglaom na nakatatabang sa saro na magdanay na optimista sa ibong kan mga kadepisilan sa buhay. “Huli sa paglaom puede niatong atubangon an buhay na may bagong kahigosan asin espiritu nin kapangganahan.” An paglaom nin sarong Kristiano makatatabang sa saiya na mansayon si Jehova bilang Dios na may katuyohan asin maggayagaya sa paglilingkod sa saiya.​—Roma 12:12.

Inenkaminar ni Wallace Liverance, na rehistrador kan Paadalan nin Gilead, an mga estudyante na “Padagos na Maglakaw sa Espiritu.” (Galacia 5:16) Ipinaheling nia kun paanong si Baruc, an sekretaryo ni Jeremias, haros naparayo nin luway-luway sa paglakaw sa espiritu. May panahon na si Baruc napagal asin nagpoon na magparahanap nin darakulang bagay para sa  saiya man sana. (Jeremias 45:​3, 5) Dangan idinoon ni Tugang na Liverance na an nagkapira nagpondo sa pagsunod ki Jesus asin hinaboan an espirituwal na katotoohan, na kaipuhan sa kaligtasan. Iyan huli ta dai ninda nasabotan an itinotokdo nia, asin nadesganar sinda ta an saindang makalaman na mga linalaoman dai naotob kan panahon na iyan. (Juan 6:​26, 27, 51, 66) Sa mga pagkasaysay na ini, ano an manonodan kan mga misyonero, na an gibohon iyo na idirehir an atension sa Kaglalang asin sa saiyang katuyohan? Pinarigon an boot kan mga estudyante na dai magparaisip manongod sa pagkapot nin posisyon, pag-ako nin pagrekonoser nin mga tawo, o paggamit sa teokratikong mga asignasyon para sa personal na pakinabang.

“Kamo daw Magigin Paratao o Paraako?” an ihinapot kan instruktor sa Gilead na si Mark Noumair. Ibinasar nia an saiyang mga komento sa Hokom 5:​2, kun saen an indibiduwal na mga Israelita inomaw huli sa daing kaimotan na pagboluntaryo na maglingkod sa hukbo ni Barac. Inomaw an mga estudyante sa Gilead huli sa aktitud ninda sa paghimate sa pangapodan kan Barac na Orog na Dakula, si Jesu-Cristo, na makikabtang nin orog pa sa espirituwal na pakikiguerra. An mga soldados ni Cristo maninigong magin interesado na makua an pag-oyon kan saro na naglista sa sainda. Ipinagirumdom ni Tugang na Noumair sa mga estudyante: “Kun minapoon kitang magkonsentrar sa pagpanigo sa satong sadiri, minapondo kita sa pakikipaglaban sa kaiwal. . . . An paglilingkod bilang misyonero bakong manongod saindo. Manongod iyan ki Jehova, sa saiyang soberaniya, asin sa paghaman kan saiyang kabotan. Dai kita naglilingkod bilang mga misyonero ta gusto niatong paogmahon kita ni Jehova,  naglilingkod kita sa saiya huli ta namomotan niato sia.”​—2 Timoteo 2:4.

Suminunod an instruktor sa Gilead na si Lawrence Bowen na nangenot sa kabtang na “Santipikaron Mo Sinda Paagi sa Katotoohan.” (Juan 17:17) Sinabi nia na an mga estudyante kan ika-115 klase sinantipikar na mga ministro nin Dios. Mantang yaon sa eskuelahan, nakikabtang man sinda sa ministeryo sa langtad, na naghahanap nin sadiosan an pusong mga tawo na namomoot sa katotoohan. Arog ni Jesus asin kan saiyang enot na mga disipulo, an mga estudyante dai nagtaram hale sa “sadiring kabotan” ninda. (Juan 12:​49, 50) May kaigotan nindang iinatubang an ipinasabong, nagtatao nin buhay na tataramon nin katotoohan. Ipinaheling kan mga pag-akto asin eksperyensia kan mga estudyante an mapuersang epekto kan Biblia sa mga nakaolay ninda.

Nakaparigon sa Boot an Sadol Asin Eksperyensia

Ininterbio ni Anthony Pérez asin Anthony Griffin, mga miembro kan Departamento sa Paglilingkod sa sangang opisina sa Estados Unidos, an mga miembro kan Komite kan Sangang Opisina hale sa bilog na kinaban. Tinokar kan mga lalaking ini an mga kadepisilan na napapaatubang sa bagong mga misyonero asin nagtao nin praktikal na hatol basado sa personal na eksperyensia. Kaiba sa nagkapirang kadepisilan an mga pagkakalaen sa kultura, tropikal na klima sa bilog na taon, o mga kamugtakan sa relihion asin politika na laen sa kamugtakan na kinatodan kan mga estudyante. Ano an makakatabang sa bagong mga misyonero na makayang atubangon an bago nindang mga kamugtakan? An pagkamoot ki Jehova, pagkamoot sa mga tawo, dai pagparagirumdom sa nakaagi, asin dai paghiro nin pabiglabigla. An sarong miembro kan komite kan sanga nagsabi: “An mga tawo sa samong destino nag-istar na duman sa laog nin dakol na siglo bago kami uminabot. Segurado na puede man kaming mag-istar duman asin makaadaptar. Kada mapaatubang kami sa mga kadepisilan, minamansay mi iyan na oportunidad tanganing mapakarhay an samong ugale. Magsarig kamo sa pamibi asin sa espiritu ni Jehova, asin maeeksperyensiahan nindo an pagigin totoo kan mga tataramon ni Jesus, ‘Ako danay na nasa saindo.’”​—Mateo 28:20.

Dinara ni Samuel Herd, na miembro kan Namamahalang Grupo, an programa sa tampok na kabtang kaiyan sa saiyang pahayag na, “Padagos na Magtaram Dapit sa Makangangalas na mga Bagay nin Dios.” An pagbubo kan banal na espiritu kan aldaw nin Pentecostes 33 C.E. nagpakosog sa mga disipulo ni Jesus na magtaram dapit sa “makangangalas na mga bagay nin Dios.” Ano an makakatabang sa bagong mga misyonero ngonyan na magtaram dapit sa Kahadean nin Dios na may kaparehong kaigotan? An iyo man sanang banal na espiritu. Inenkaminar ni Tugang na Herd an naggradwar na mga estudyante na “magin malaad sa espiritu,” magin ogmahon manongod sa mga asignasyon ninda, nungkang lingawan an pagsasanay na itinao sa sainda. (Roma 12:11) “An Biblia sarong makangangalas na bagay nin Dios,” an sabi ni Tugang na Herd. “Dai noarin man menoson an halaga kaiyan. Buhay an mensahe kaiyan. Minataros iyan sa kalaoglaoging kabtang. Gamiton iyan sa paghusay nin mga bagay sa buhay nindo. Togotan na bagohon kaiyan an paagi kan saindong pag-iisip. Ingatan an saindong kakayahan nin pag-isip paagi sa pag-adal, pagbasa, asin paghorophorop sa Kasuratan . . . Gibohon nindong obheto asin determinasyon na gamiton an saindong pagsasanay sa Gilead tanganing padagos na magtaram kan ‘makangangalas na mga bagay nin Dios.’”

Kasunod kan pagbasa kan mga pataratara hale sa bilog na globo asin pagpresentar kan mga diploma, binasa kan saro sa naggradwar an surat hale sa klase na ipinahahayag an pagpasalamat sa pagsasanay na inako ninda. Dangan, angay na tinapos ni Tugang na Lett an magayagayang okasyon paagi sa pagsambit kan 2 Cronica 32:7 sin Deuteronomio 20:​1, 4. Ikinokonektar an saiyang pangultimong mga komento sa saiyang pambukas na komento, sia nagtapos: “Kaya mahal na mga naggradwar, girumdomon mantang nagpapadagos kamo, mantang nagmamartsa kamo pasiring sa espirituwal na ralaban sa bago nindong mga asignasyon, na si Jehova nagmamartsa kaiba nindo. Dai noarin man paglingawan an katunayan na mas dakol an nasa kampi nindo kisa tumang saindo.”

[Kahon sa pahina 25]

ESTADISTIKA KAN KLASE

Bilang nin mga nasyon na irinepresentar: 7

Bilang nin mga nasyon na inasignaran: 17

Bilang nin mga estudyante: 48

Promedyong edad: 33.7

Promedyong taon sa katotoohan: 17.8

Promedyong taon sa bilog na panahon na ministeryo: 13.5

[Ritrato sa pahina 26]

An Ika-115 Naggradwar na Klase kan Paadalan sa Biblia kan Watchtower sa Gilead

Sa lista sa ibaba, an bilang kan mga raya poon sa atubangan pasiring sa likod, asin an mga ngaran nakalista poon sa wala pasiring sa too sa kada raya.

(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.