Kinukultibar daw Nindo an Pakamate nin Pagngalas?

NARIPARO daw nindo na an mga kagsurat kan Biblia paorootrong pinupukaw an pakamate nin pagngalas kun rinerekonoser an mga gibo asin kualidad nin Dios? “Makangangalas an pagkagibo sa sako,” an ipinahayag kan salmista. (Salmo 139:14) “O Jehova,” an isinurat ni propeta Isaias, “ika an sakuyang Dios. Pinamumuraway taka, inoomaw ko an saimong ngaran, huli ta naggibo ka nin makangangalas na mga bagay.” (Isaias 25:1) O isipa nindo an pagngalas asin may pagkangirhat na paggalang na ipinahayag sa mga tataramon ni apostol Pablo: “O an rarom kan mga kayamanan asin kadonongan patin kaaraman nin Dios!”​—Roma 11:33.

An The Oxford Encyclopedic English Dictionary tinatawan nin kahulogan an “pagngalas” bilang “sarong emosyon na pinupukaw nin bagay na dai linalaoman, bakong pamilyar, o dai ikapaliwanag, nangorogna nin pagkabigla na may kaibang paghanga o pagkainteres asin iba pa.”

Bako daw na nakagagayagayang masdan an saradit na aki na napapaburarat sa pagngalas kun sinda nakaheheling, nakamamate, o nakadadangog nin mga bagay na bago sa sainda? Makamomondo, an siring na pagngalas basado sa pagkainteres o sa pagigin bago nin sarong bagay sa parate minaluya sa pag-agi nin mga taon.

Minsan siring, para sa mga kagsurat kan Biblia na kinotar pa sana, hararom an pakamate nin may pagkangirhat na paggalang. Iyan nagdadanay. Tadaw? Kinultibar ninda an saindang pakamate nin pagngalas paagi sa may pag-apresyar na paghorophorop sa mga gibo nin Dios. An salmista namibi: “Iniisip-isip ko an mga taon na haloy nang uminagi, an paggirumdom kan gabos na saimong ginibo; an mga ngangalasan sa saimong mga linalang nakapapano sa sakong isip.”​—Salmo 143:​5, The New English Bible.

Kaomaw-omaw nanggad na an pakamate na ini nin pagngalas maheheling sa tahaw kan mga parasamba sa Dios sa presenteng aldaw! Igwa daw kamo kaiyan? Kinukultibar daw nindo iyan?