Mga Hapot Hale sa mga Parabasa

Sa saiyang modelong pamibi, ipinarisa daw ni Jesus na an kabotan nin Dios ginigibo na kaidto sa langit minsan ngani an maraot na mga anghel dai pa pinapahale?

Siring kan nakarekord sa Mateo 6:​10, sinabi ni Jesus: “Gibohon logod an boot mo, kun paano sa langit, siring man sa daga.” An kahagadan na ini puedeng saboton arin man sa duwang paagi. Enot, bilang sarong kahagadan na gibohon logod an kabotan nin Dios sa daga kun paanong ginigibo na iyan kaidto sa langit o, ikaduwa, bilang sarong kahagadan na iyan gibohon logod nin lubos sa langit sagkod sa daga. * An kahulogan sa likod kan naenot na mga tataramon ni Jesus na, “dumatong logod an kahadean mo,” nagpaparisa na an ikaduwang punto de vista mas kaoyon kan Kasuratan. Asin ipinapabanaag kaiyan an situwasyon kan si Jesus yaon pa sa daga asin an halawig na panahon pakatapos kaiyan. Taano man?

An libro nin Kapahayagan nagsasambit sa duwang magkalaen na resulta kan pagkaestablisar kan Kahadean nin Dios sa langit. An enot nakaaapekto sa langit mismo, an ikaduwa, sa daga. Sinasabi kan Kapahayagan 12:7-9, 12: “Puminutok an ralaban sa langit: Si Miguel asin an saiyang mga anghel nakipaglaban sa dragon, asin an dragon asin an mga anghel kaiyan nakipaglaban alagad ta dai iyan nanggana, ni may nanompongan pa man na lugar para sa sainda sa langit. Kaya ihinolog an dakulang dragon, an enot na halas, an inaapod Diablo asin Satanas, na ilinalagalag an bilog na ineerokan na daga; ihinolog sia sa daga, asin an saiyang mga anghel ihinolog kaiba nia. Huli kaini mag-ogma, kamo kalangitan asin kamo na nag-eerok dian! Herak man kan daga asin kan dagat, huli ta huminilig na dian sa saindo an Diablo, na may dakulang kaanggotan, sa pakaaram na halipot na sana an saiyang panahon.”

Dahel sa pagpahale ki Satanas asin sa mga demonyo sa langit pakalihis nin 1914 nawara sa rona na iyan an gabos na rebeldeng espiritu, na nagtao nin dakulang kagayagayahan sa maimbod na mga aking anghel ni Jehova, na nagrepresentar nanggad sa mayoriya kan saiyang espiritung mga linalang. (Job 1:​6-​12; 2:​1-7; Kapahayagan 12:10) Huli kaini, an kahagadan sa modelong pamibi ni Jesus, kun paanong minaaplikar iyan sa langit, naotob na. An gabos na nagdanay sa langitnon na rona na iyan mga maimbod ki Jehova asin lubos na nagpapasakop sa saiyang soberaniya.

Dapat na idoon na dawa bago pa kaiyan, kan an maraot na mga anghel nakasasakat pa sa langit, isinikwal na sinda sa pamilya nin Dios asin nasa irarom nin depinidong mga restriksion. Halimbawa, ihinahayag kan Judas 6 na kaidto pang enot na siglo C.E., sinda ‘itinagama na may daing sagkod na mga gapos sa irarom nin mahibog na [espirituwal na] kadikloman para sa paghokom kan dakulang aldaw.’ Kaagid kaiyan, an 2 Pedro 2:4 nagsasabi: ‘An Dios dai nag-alangan sa pagkastigo sa mga anghel na nagkasala, kundi, paagi sa pag-apon sa sainda sa Tartaro [sarong kamugtakan nin pagigin biyong ibinaba], ibinugtak sinda sa mga kotkot nin makuring [espirituwal na] kadikloman tanganing itagama sinda para sa paghokom.’ *

Bilang dakulang kalaenan sa saindang kamugtakan bilang mga isinikwal mientras na nasa langit pa, an maraot  na mga anghel naggamit nin dakulang autoridad sa daga. Sa katunayan, an Tataramon nin Dios inaapod si Satanas na “an namamahala sa kinaban na ini,” asin inaapod kaiyan an mga demonyo na an “mga namamahala sa kinaban sa kadikloman na ini.” (Juan 12:31; Efeso 6:​11, 12; 1 Juan 5:19) Huli sa saiyang autoridad, ikaaalok kan Diablo ki Jesus an “gabos na kahadean kan kinaban asin an kamurawayan kan mga iyan” bilang karibay nin sarong akto nin pagsamba. (Mateo 4:​8, 9) Kun siring, malinaw na kun an Kahadean nin Dios “dumatong” may koneksion sa daga, maresulta iyan sa dakulang mga pagbabago.

Digdi sa daga, an ‘pagdatong’ kan Kahadean nin Dios maresulta sa biyong bagong sistema nin mga bagay. Roronoton kan Kahadean an gabos na pamamahala na gibo nin tawo asin ini an magigin solamenteng gobyerno sa daga. Kadungan kaiyan, an mga sakop kaiyan na mga tawo na matatakton sa Dios magigin “sarong bagong daga.” (2 Pedro 3:​13; Daniel 2:44) Paparaon man kan Kahadean an kasalan sa makinuyog na katawohan asin pag-abot nin panahon gigibohon an daga na magin sarong lakop sa globong paraiso, na sa siring hinahale an gabos na gira nin satanikong pamamahala.​—Roma 8:​20, 21; Kapahayagan 19:17-​21.

Sa pagtatapos kan Milenyo, kun maotob na kan Mesiyanikong Kahadean an kabotan nin Dios para dian, “an Aki mismo mapasakop man sa Saro na nagpasakop sa saiya kan gabos na bagay, tanganing an Dios magin gabos na bagay sa gabos na tawo.” (1 Corinto 15:28) Dangan magkakaigwa nin pangultimong pagbalo, na pakatapos kaiyan si Satanas, an saiyang mga demonyo, asin an siisay man na nadaya na mga rebeldeng tawo permanente nang popohoon sa “ikaduwang kagadanan.” (Kapahayagan 20:7-15) Pakatapos kaiyan, an gabos na intelihenteng linalang sa langit asin sa daga magayagayang mapasakop sagkod lamang sa mamomoton na soberaniya ni Jehova. Sa gabos na aspekto, iyan an magigin biyong kaotoban kan mga tataramon sa modelong pamibi ni Jesus.​—1 Juan 4:8.

[Mga Nota sa Ibaba]