Nagigin Orog na Apurado Ngonyan na Kita Magin Mapagbantay

“Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan.”​—MATEO 24:42.

1, 2. Ano an nagpapaheling na kita nabubuhay sa pagtatapos kan presenteng sistema nin mga bagay?

“SA PANGENOT, an ikabeinteng siglo impluwensiado nin guerra,” an sabi kan autor na si Bill Emmoth. Minsan ngani inaadmitir na an kasakitan huli sa mga guerra asin kadahasan naeksperyensiahan sa bilog na kasaysayan nin tawo, idinugang nia: “An ikabeinteng siglo dai napapalaen huli sa klase, iyan napapalaen huli sa sokol. Iyan an kaenot-enoteng siglo na nagtampok nin tunay nanggad na panglobong ralaban . . . Asin, garo baga bilang pagdodoon pa, nagtampok iyan nin bako sanang sarong pambilog na kinaban na ralaban, kundi duwa.”

² An mga guerra na imbuelto ‘an nasyon tumang sa nasyon asin kahadean tumang sa kahadean’ ihinula ni Jesu-Cristo. Minsan siring, iyan sarong aspekto sana kan ‘tanda kan presensia ni Cristo asin kan pagtatapos kan sistema nin mga bagay.’ Sa dakulang hulang ini, nasambitan man ni Jesus an mga makuring kakulangan nin kakanon, mga peste, asin mga linog. (Mateo 24:​3, 7, 8; Lucas 21:​6, 7, 10, 11) Sa dakol na paagi, an siring na mga kalamidad orog pang naglakop asin naggrabe. Abunda an karatan nin tawo, siring sa maheheling sa saiyang aktitud sa Dios asin sa kapwa tawo. Risang-risa an pagbagsak kan moral saka an pagdakol nin krimen asin kadahasan. An mga tawo nagin mamomoton sa kuarta imbes na mamomoton sa Dios, na bangkag sa kasingawan. An gabos na ini nagpapatotoo na kita nabubuhay sa “delikadong mga panahon.”​—2 Timoteo 3:1-5.

3. Paano maninigong makaapektar sa sato an “mga tanda kan mga panahon”?

³ Paano mo minamansay an naggagrabeng dalagan nin mga bagay sa gibo-gibo nin mga tawo? An dakol indiperente, dai nganing pakiaram, sa makamomondong mga pangyayari sa presente. Dai namamansayan kan maimpluwensia asin madodonong na tawo sa kinaban an kahulogan kan “mga tanda kan mga panahon”; ni nagtao nin tamang paggiya manongod sa bagay na ini an mga namomoon sa relihion. (Mateo 16:1-3) Alagad sinadol ni Jesus an saiyang mga parasunod: “Magdanay kamong mapagbantay, kun siring, huli ta dai nindo aram kun sa anong aldaw madatong an saindong Kagurangnan.” (Mateo 24:42) Ineenkaminar kita digdi ni Jesus na bako sanang magin mapagbantay kundi ‘magdanay na mapagbantay.’ Tanganing magdanay na mapagbantay, dapat kitang magdanay na listo asin mapagmato. An hinahagad kaini labi pa sa pagrekonoser sana na kita nabubuhay sa huring mga aldaw, labi pa sa pagmidbid sana na masakit an mga panahon. Dapat na kita may marigon na kombiksion na “harani na an katapusan kan gabos na bagay.” (1 Pedro 4:7) Dangan sana kita makakamate nin pag-apura na magin mapagbantay. Huli kaini, an hapot na dapat niatong horophoropon iyo ini: ‘Ano an matabang sa sato na pakosogon an satong kombiksion na harani na an katapusan?’

4, 5. (a) Ano an mapakosog sa satong kombiksion na harani na an katapusan kan maraot na sistemang ini, asin taano? (b) Ano an sarong pagkakaagid kan kaaldawan ni Noe asin kan presensia kan Aki nin tawo?

⁴ Pensara an nagin mga kamugtakan durante kan panahon bago kan daing kaagid na pangyayari sa kasaysayan nin tawo​—an dakulang Delubyo kan kaaldawan ni Noe. Grabe karaot an mga tawo kaya ‘nakolgan an puso ni Jehova.’ Ipinahayag nia: “Paparaon ko an mga tawo na linalang ko sa ibabaw nin daga.” (Genesis 6:​6, 7) Asin ginibo nanggad nia iyan. Ipinaheheling an pagkakaagid kan panahon na idto asin ngonyan, sinabi ni Jesus:  “Kun paano kan mga aldaw ni Noe, siring man an presensia kan Aki nin tawo.”​—Mateo 24:37.

⁵ Makatanosan na isipon na an saboot ni Jehova manongod sa presenteng kinaban pareho kan nagin saboot nia manongod sa kinaban bago kan Baha. Huling tinapos nia an maraot na kinaban kan kaaldawan ni Noe, siertong lalaglagon man nia an maraot na kinaban ngonyan. An pagkaigwa nin malinaw na pakasabot sa pagkakaagid kan panahon na idto asin kan satong kaaldawan maninigong magpasarig kan satong kombiksion na harani na an katapusan kan presenteng kinaban. Kun siring, ano an mga pagkakaagid na iyan? Kisuerra may lima. An enot iyo na may itinataong malinaw na patanid dapit sa maabot na kalaglagan.

Pinatanidan Dapit sa “mga Bagay na Dai Pa Naheheling”

6. Nagdesisyon si Jehova na gibohon an ano kan kaaldawan ni Noe?

⁶ Kan kaaldawan ni Noe, ipinahayag ni Jehova: “An sakuyang espiritu dai maghihiro para sa tawo sagkod noarin pa man huli ta sia man laman. Huli kaiyan an saiyang mga aldaw magigin sarong gatos may duwang polong taon.” (Genesis 6:3) An pagpahayag kan dekretong ini nin Dios kan 2490 B.C.E. nagin tanda kan kapinonan kan katapusan para sa maraot na kinaban na idto. Isip-isipa na sana kun ano an nagin kahulogan kaiyan para sa mga nabubuhay kaidto! Siento beinteng taon na sana asin dadarahon na ni Jehova “sa daga an baha tanganing laglagon an gabos na laman na dian aktibo an puersa nin buhay sa sirong nin kalangitan.”​—Genesis 6:17.

7. (a) Ano an reaksion ni Noe sa patanid manongod sa Baha? (b) Paano niato maninigong himateon an mga patanid manongod sa katapusan kan sistemang ini?

⁷ Inako ni Noe an patanid dapit sa nagdadangadang na grabeng kapahamakan dakol na dekada antes pa, asin ginamit nia sa madonong na paagi an panahon sa pag-andam tanganing makaligtas. “Pakatapos na matawan nin patanid nin Dios dapit sa mga bagay na dai pa naheheling,” an sabi ni apostol Pablo, “[si Noe] nagpaheling nin diosnon na takot asin nagtogdok nin dahong para sa pagligtas kan saiyang kasararo sa harong.” (Hebreo 11:7) Kumusta man kita? Mga 90 taon na an nakalihis pakatapos na magpoon an huring mga aldaw kan sistemang ini nin mga bagay kan 1914. Yaon na nanggad kita sa “panahon kan katapusan.” (Daniel 12:4) Paano niato maninigong himateon an mga patanid na itinao sa sato? “An naggigibo kan kabotan nin Dios magdadanay sagkod lamang,” an sabi kan Biblia. (1 Juan 2:17) Kun siring ngonyan na an panahon na gibohon an kabotan ni Jehova na may makosog na pakamate nin pag-apura.

8, 9. Anong mga patanid an itinao sa presenteng mga panahon, asin paano iyan ipinapahayag?

⁸ Sa presenteng mga panahon, nanodan kan sinserong mga estudyante sa Biblia basado sa ipinasabong na Kasuratan na an sistemang ini seguradong malalaglag. Nagtutubod daw kita digdi? Mangnoha an malinaw na sinabi ni Jesu-Cristo: “Magkakaigwa nin dakulang kahorasaan na dai pang kaagid na nangyari poon sa kapinonan kan kinaban sagkod ngonyan, dai pa, ni mangyayari pa giraray.” (Mateo 24:21) Sinabi man ni Jesus na sia madatong bilang ninombrahan nin Dios na Hokom asin pagbubulagbulagon nia an mga tawo kun paanong ibinubulag nin pastor an mga karnero sa mga kanding. An manompongan na bakong maninigo “maduman sa pagkaparang daing katapusan, alagad an mga matanos sa buhay na daing katapusan.”​—Mateo 25:31-33, 46.

 ⁹ Pinagdanay ni Jehova sa atension kan saiyang banwaan an mga patanid na ini paagi sa napapanahon na mga pagirumdom na ginagamit an espirituwal na kakanon na itinatao kan “fiel asin may diskresion na oripon.” (Mateo 24:45-47) Dugang pa, an gabos na nasyon, tribo, tataramon, patin banwaan inaapodan na “matakot . . . sa Dios asin pamurawayon sia, huli ta nag-abot na an oras kan saiyang paghokom.” (Kapahayagan 14:​6, 7) An sarong mahalagang kabtang kan mensahe kan Kahadean na ihinuhulit sa bilog na daga kan Mga Saksi ni Jehova iyo an patanid na sa dai na mahahaloy hahaleon kan Kahadean nin Dios an pamamahala nin tawo. (Daniel 2:44) An patanid na ini dai maninigong baliwalaon. Pirmeng inootob kan Makakamhan sa Gabos na Dios an saiyang tataramon. (Isaias 55:​10, 11) Inotob nia iyan kan kaaldawan ni Noe, asin ootobon nia man iyan sa satong kaaldawan.​—2 Pedro 3:3-7.

Naglakop an Kabikoan sa Sekso

10. Ano an masasabi manongod sa kabikoan sa sekso kan kaaldawan ni Noe?

¹⁰ An satong panahon kapareho kan kaaldawan ni Noe sa saro pang bagay. Pinagbotan ni Jehova an enot na lalaki asin babae na ‘panoon an daga’ nin mga tawo, na ginagamit an saindang tao nin Dios na seksuwal na mga kakayahan sa onorableng paagi sa laog nin areglo nin pag-agoman. (Genesis 1:28) Kan kaaldawan ni Noe, rinaot kan suwayan na mga anghel an katawohan paagi sa salang paggamit sa sekso. Huminilig sinda digdi sa daga, nagmateryalisar, asin nakidorog sa magayon na mga babae, na nagkaaki nin kabangang tawo, kabangang demonyo​—an mga Nefilim. (Genesis 6:​2, 4) An kasalan kan mga anghel na ini na malaad sa seksuwal na horot iinagid sa salang paggamit sa sekso kan Sodoma asin Gomorra. (Judas 6, 7) Bilang resulta, lakop an kabikoan sa sekso kan kaaldawan na idto.

11. Anong kamugtakan sa moral an nagpapangyaring magin kaagid kan satong panahon an kaaldawan ni Noe?

¹¹ Kumusta man an kamugtakan sa moral ngonyan? Sa ultimong mga aldaw na ini, an buhay nin dakol nakasentro sa sekso. Malinaw na ilinaladawan ni Pablo an siring na mga tawo na “nawaran na kan gabos na pagmate sa moral”; an dakol nagpangana na kan saindang sadiri “sa malaswang gawe sa paggibo nin gabos na klaseng kaatian na may kahanaban.” (Efeso 4:19) Ordinaryo na sana an pornograpiya, pagdodorog bago an kasal, seksuwal na pagmaltrato sa mga aki, asin homoseksuwalidad. An nagkapira “nag-aako [na] sa sainda man sana kan bilog na kabayadan” paagi sa mga helang na ikinaoolakit paagi sa pagdodorog, pagkalaglag nin buhay pampamilya, asin iba pang helang nin sosyedad.​—Roma 1:​26, 27.

12. Taano ta dapat niatong kultibaron an pagkaongis sa maraot?

¹² Kan kaaldawan ni Noe, si Jehova nagpaabot nin dakulang Delubyo asin tinapos an kinaban na iyan na lolong sa sekso. Dapat na dai niato noarin man paglingawan an bagay na an mga aldaw na ini tunay nanggad na kapareho kan kaaldawan ni Noe. An nagdadangadang na “dakulang kahorasaan” paparaon sa daga an ‘mga parapakisaro, parasambay, binabae, asin lalaki na minadorog sa kapwa lalaki.’ (Mateo 24:21; 1 Corinto 6:​9, 10; Kapahayagan 21:8) Importante nanggad na kultibaron niato an pagkaongis sa maraot asin rumayo sa mga sirkonstansia na puedeng magresulta sa inmoralidad!​—Salmo 97:10; 1 Corinto 6:18.

An Daga “Napano nin Kadahasan”

13. Kan kaaldawan ni Noe, taano ta “pano nin kadahasan” an daga?

¹³ Itinotokdo an saro pang karakteristiko kan kaaldawan ni Noe, an Biblia nagsasabi: “An daga nagin  raot sa pagheling kan tunay na Dios asin an daga napano nin kadahasan.” (Genesis 6:11) Bako man talagang bago an kadahasan. Ginadan kan aki ni Adan na si Cain an saiyang matanos na tugang. (Genesis 4:8) Ipinababanaag an madahas na espiritu kan saiyang kaaldawan, si Lamec nagsurat nin sarong berso na ipinaghahambog kun paano nia ginadan an sarong hoben na lalaki, na soboot huli sa pagdepensa sa sadiri. (Genesis 4:​23, 24) An bago kan kaaldawan ni Noe iyo an sokol nin kadahasan. Kan an suwayan na mga aking anghel nin Dios nag-agom nin mga babae digdi sa daga asin nagkaaki​—an mga Nefilim​—nag-orog an kadahasan sa sokol na dai pa naheling kaidto. An madahas na mga higanteng ini iyo an “mga Paratumba”​—“an mga nagpapatumba sa iba.” (Genesis 6:​4, nota sa ibaba) Bilang resulta, an daga kaidto “pano nin kadahasan.” (Genesis 6:13) Imahinara an mga problema na siertong napaatubang ki Noe sa pangangataman sa saiyang pamilya sa siring na kamugtakan! Pero, si Noe nagin ‘matanos sa atubangan ni Jehova sa tahaw kan kapag-arakian na iyan.’​—Genesis 7:1.

14. Paano nagin “pano nin kadahasan” an kinaban ngonyan?

¹⁴ An kadahasan nag-eksister sa bilog na kasaysayan nin katawohan. Alagad siring kan nagin totoo kan kaaldawan ni Noe, naheling man iyan sa satong panahon sa dai pang kaagid na sokol. Pirme niatong nadadangog an manongod sa kadahasan sa laog kan pamilya, mga gibo nin terorismo, mga kampanya nin paglaglag sa sarong rasa, asin lagdoan na paggadan nin propesyonal na mga paragadan na haros mayong malinaw na motibo. Idugang pa sa gabos na ini an pagpabolos nin dugo na bunga nin mga guerra. An daga napano giraray nin kadahasan. Taano? Ano an dahelan kan pag-orog na iyan? An simbag naghahayag nin saro pang pagkakaagid kan kaaldawan ni Noe.

15. (a) Ano an dahelan kan pag-orog nin kadahasan sa huring mga aldaw? (b) Sa anong kaaabtan kita makakokompiar?

¹⁵ Kan an Mesiyanikong Kahadean nin Dios inestablisar sa langit kan 1914, an pinatukaw na Hade, si Jesu-Cristo, naggibo nin importanteng marhay na aksion. Si Satanas na Diablo asin an saiyang mga demonyo pinalayas sa langit pasiring sa palibot kan daga. (Kapahayagan 12:9-12) Bago an Baha, boluntad na binayaan kan suwayan na mga anghel an saindang kamugtakan sa langit; minsan siring, sa presenteng mga panahon sinda puersahan na pinahale. Dugang pa, mayo na sinda ngonyan nin kakayahan na magmateryalisar sa hawak nin tawo digdi sa daga tanganing kamtan an bawal na kasiraman sa laman. Kaya huli sa pagkasudya kan mawot, kaanggotan, asin takot sa nagdadangadang na paghokom, iniimpluwensiahan ninda an mga tawo asin organisasyon na gibohon an bakong makatawong krimen asin kadahasan na mas grabe pa ngani kisa kaidtong kaaldawan ni Noe. Biyong linaglag ni Jehova an kinaban bago kan Baha pakatapos na iyan panoon nin karatan kan suwayan  na mga anghel asin kan saindang mga aki. Makasesegurado kamo na gigibohon man nia iyan sa satong kaaldawan! (Salmo 37:10) Minsan siring, an mga nagdadanay na mapagbantay ngonyan nakaaaram na harani na an saindang kaligtasan.

An Mensahe Ihinuhulit

16, 17. Ano an ikaapat na pagkakaagid kan kaaldawan ni Noe asin kan satong kaaldawan?

¹⁶ An ikaapat na pagkakaagid kan presenteng kaaldawan asin kan kinaban bago kan Baha maheheling sa gibohon na isinugong gibohon ni Noe. Si Noe nagtogdok nin dakulaon na dahong. Sia saro man na “parahulit.” (2 Pedro 2:5) Anong mensahe an ihinulit nia? Malinaw na kaiba sa paghuhulit ni Noe an pangapodan na magsolsol asin an patanid dapit sa nagdadangadang na kalaglagan. Sinabi ni Jesus na an mga tawo kan kaaldawan ni Noe “dai . . . nagmangno sagkod na dumatong an baha asin iinanod sinda gabos.”​—Mateo 24:​38, 39.

¹⁷ Kaagid kaiyan, mantang maigot na inootob kan Mga Saksi ni Jehova an sugo sa sainda na maghulit, an mensahe kan Kahadean nin Dios ipinahahayag sa bilog na kinaban. Sa haros gabos na parte kan globo, madadangog asin mababasa kan mga tawo an mensahe kan Kahadean sa saindang sadiring lenguahe. An magasin na Torrengbantayan, na nagpapahayag kan Kahadean ni Jehova, igwa nin sirkulasyon na labing 25,000,000 asin iniimprenta sa labing 140 lenguahe. Tunay nanggad, an maogmang bareta kan Kahadean nin Dios ihinuhulit “sa bilog na ineerokan na daga para sa pagpatotoo sa gabos na nasyon.” Kun an gibohon na iyan matapos na sa paaging kontento na an Dios, an katapusan siertong madatong.​—Mateo 24:14.

18. Ano an pagkakaagid kan reaksion kan dakol na tawo sa satong paghuhulit asin kan reaksion kan kadaklan na tawo kan kaaldawan ni Noe?

¹⁸ Kun kokonsideraron an biyong kadaihan nin espirituwalidad asin moralidad kan kaaldawan bago kan Baha, madaling masabotan kun taano ta an pamilya ni Noe pinagngisihan kan habong tumubod na mga kataed asin ininsulto patin inolog-olog. Pero talagang nagdatong an katapusan. Kaagid kaiyan, kadakol ‘an paraolog-olog na may pag-olog-olog’ sa huring mga aldaw. “Pero an aldaw ni Jehova madatong siring sa parahabon,” an sabi kan Biblia. (2 Pedro 3:​3, 4, 10) Iyan siertong madatong sa itinalaan na panahon. Dai iyan mahuhuri. (Habacuc 2:3) Madonong nanggad na kita magdanay na mapagbantay!

Pira Sana an Makakaligtas

19, 20. Ano an masasabi niatong pagkakaagid kan Baha asin kan kalaglagan kan presenteng sistema nin mga bagay?

¹⁹ An pagkakaagid kan kaaldawan ni Noe asin kan satong kaaldawan bako sanang sa karatan kan mga tawo asin sa paglaglag sa sainda. Kun paanong may mga nakaligtas sa Baha, may mga makaliligtas man sa katapusan kan presenteng sistema nin mga bagay. An mga nakaligtas sa Baha mga mahoyo na dai namuhay na kapareho kan mga tawo sa pankagabsan. Naghimate sinda sa patanid nin Dios asin nagdanay na siblag sa maraot na kinaban kan panahon na idto. “Si Noe nakakua nin biyaya sa mga mata ni Jehova,” an sabi kan Biblia. “Pinatunayan [ni Noe] an saiyang sadiri na daing sala sa tahaw kan saiyang mga kapanahon.” (Genesis 6:​8, 9) Sa bilog na katawohan, sarong pamilya, “pira sana, an boot sabihon, walong kalag, an dinarang ligtas sa tubig.” (1 Pedro 3:20) Asin sa sainda nagtao si Jehova Dios nin pagboot na nagsasabi: “Pangagbunga asin pangagdakol kamo asin panoon nindo an daga.”​—Genesis 9:1.

²⁰ Inaasegurar kita kan Tataramon nin Dios na “sarong dakulang kadaklan” an ‘maluwas sa dakulang kahorasaan.’ (Kapahayagan 7:​9, 14) Gurano kadakol an makakabilang sa dakulang kadaklan? Si Jesus mismo nagsabi: “Hayakpit an tata asin piot an dalan na pasiring sa buhay, asin diit an mga nakakukua kaiyan.” (Mateo 7:​13, 14) Kun ikokomparar sa binilyon na nabubuhay sa daga ngonyan, an mga makaliligtas sa nagdadangadang na dakulang kahorasaan diit sana. Alagad puedeng magkaigwa nanggad sinda nin pribilehio na kaagid  kan itinao sa mga nakaligtas sa Baha. An mga makaliligtas puedeng sa laog nin kadikit na panahon magkaaki bilang kabtang kan bagong sosyedad sa daga.​—Isaias 65:23.

“Magdanay Kamong Mapagbantay”

21, 22. (a) Paano ka nakinabang sa pag-estudyar na ini kan pagkasaysay dapit sa Baha? (b) Ano an teksto kan taon para sa 2004, asin taano ta maninigo niatong himateon an itinataong sadol kaiyan?

²¹ Minsan ngani an Baha garo baga daing koneksion sa satong kaaldawan, iyan malinaw na nagtatao nin patanid na dai niato dapat ignorohon. (Roma 15:4) Huli sa mga pagkakaagid kan kaaldawan ni Noe asin kan satong kaaldawan maninigo na lalo niatong marealisar an kahulogan kan nangyayari asin magin listo kita sa garo parahabon na pagdatong ni Jesus tanganing hokoman an mga maraot.

²² Ngonyan, dinidirehiran ni Jesu-Cristo an dakulaon na espirituwal na pagtotogdok. Para sa seguridad asin kaligtasan kan tunay na mga parasamba, igwa nin garo dahong na espirituwal na paraiso. (2 Corinto 12:​3, 4) Tanganing maligtas sa dakulang kahorasaan, dapat kitang magdanay sa espirituwal na paraisong iyan. An rona kan espirituwal na paraiso napapalibotan kan kinaban ni Satanas, na andam na sibaon an siisay man na tinutungka sa espirituwal. Kaipuhan nanggad na kita ‘magdanay na mapagbantay’ asin magin andam para sa aldaw ni Jehova.​—Mateo 24:​42, 44.

Nagigirumdoman daw Nindo?

• Anong konseho an itinao ni Jesus may labot sa saiyang pagdatong?

• Sa ano ikinomparar ni Jesus an panahon kan saiyang presensia?

• Sa anong mga paagi nagkakaagid an satong kapanahonan asin an kaaldawan ni Noe?

• Paano maninigong makaapektar sa satong pakamate nin pag-apura an pagpensar sa mga pagkakaagid kan kaaldawan ni Noe asin kan satong kaaldawan?

[Mga Hapot Para sa Pag-adal]

[Blurb sa pahina 18]

An teksto kan taon para sa 2004: “Magdanay kamong mapagbantay . . . Magin andam.”​—Mateo 24:​42, 44.

[Ritrato sa pahina 15]

Si Noe naghimate sa patanid nin Dios. Naghihimate man daw kita?

[Mga Ritrato sa pahina 16, 17]

“Kun paano kan mga aldaw ni Noe, siring man an presensia kan Aki nin tawo”