‘An Dios Dai Nag-eerok sa mga Templo na Ginibo nin mga Kamot’

DAING duda na si apostol Pablo pamilyar sa mga templo ni Atena, huli ta maheheling ini sa kadaklan kan mga siudad na binisita nia durante kan saiyang mga pagbiahe sa pagmimisyonero. Oyon sa The Encyclopædia Britannica, si Atena bantog bilang diosa bako sana nin guerra asin kadonongan kundi siring man “nin mga produktong gibo nin kamot asin ekspertong mga pinag-aaabot sa panahon na toninong sa pankagabsan.”

An pinakabantog na templo ni Atena iyo an Partenon, na ipinatindog sa Atenas, an siudad na inginaran sa diosa. Ibinibilang na saro sa kadarudakulaing mga templo kan suanoy na kinaban, nasa Partenon an sarong 12 metros na bulawan asin marfil na estatuwa ni Atena. Kan bisitahon ni Pablo an Atenas, an puting marmol na templong ini mga 500 na taon nang pinakatanda kan siudad.

Sa distansiang natatanaw an Partenon, si Pablo naghulit sa sarong grupo nin mga taga Atenas manongod sa ‘Dios na dai nag-eerok sa mga templo na ginibo nin mga kamot.’ (Gibo 17:​23, 24) Tibaad an pagigin kahangahanga kan mga templo ni Atena o an kadakulaan kan saiyang mga idolo an garo baga orog na hinangaan kan nagkapira sa mga naghihinanyog ki Pablo kisa dai naheheling na Dios na dai ninda namimidbid. Minsan siring, arog kan sinabi ni Pablo, dai maninigong imahinaron na an Kaglalang nin katawohan “kaagid nin bulawan o pirak o gapo, kaagid nin sarong bagay na kinortehan nin . . . tawo.”​—Gibo 17:29.

An mga dios asin diosa na kapareho ni Atena​—na an kamurawayan minadepende sa mga templo asin estatuwa​—naheling asin nawara. An estatuwa ni Atena nawara sa Partenon kan ikalimang siglo C.E., asin solamente mga kagabaan nin pira sana kan saiyang mga templo an nag-eeksister sagkod ngonyan. Siisay ngonyan an naglalaom ki Atena para sa kadonongan asin paggiya?

Laen nanggad si Jehova, ‘an Dios na daing katapusan’ na dai pa naheling nin tawo kasuarin man. (Roma 16:26; 1 Juan 4:12) An mga aki ni Core nagsurat: “An Dios na ini iyo an satong Dios sagkod sa panahon na daing talaan, sagkod lamang pa ngani. Sia mismo an magiya sa sato.” (Salmo 48:14) An sarong paagi na makamtan an paggiya ni Jehova Dios iyo an pag-adal kan saiyang Tataramon, an Biblia, asin pag-aplikar kan hatol kaiyan sa satong buhay.