Dai Marorop an Kadakulaan ni Jehova
Dai Marorop an Kadakulaan ni Jehova
“Si Jehova dakula asin maninigo nanggad na omawon, asin an saiyang kadakulaan dai marorop.”—SALMO 145:3.
1, 2. Anong klaseng tawo si David, asin paano nia minansay an saiyang sadiri kun ikokomparar sa Dios?
AN KOMPOSITOR kan Salmo 145 saro sa midbid na marhay na mga tawo sa kasaysayan. Kan aki pa, inatubang nia an sarong armadong higante asin ginadan ini. Asin bilang guerrerong hade, dakol na kalaban an dinaog kan salmistang ini. David an ngaran nia, asin sia an ikaduwang hade sa suanoy na Israel. An reputasyon ni David nagdanay pagkagadan nia, kaya dawa ngonyan minilyon an may aram manongod sa saiya.
2 Sa ibong kan mga nagibo ni David, igwa sia nin mapakumbabang pagmansay sa saiyang sadiri. Dapit ki Jehova, sia nag-awit: “Kun naheheling ko an saimong kalangitan, an mga gibo kan saimong mga moro, an bulan asin mga bitoon na saimong hinaman, ano an magagadanon na tawo ta sia ginigirumdom mo, asin an aki nin daganon na tawo ta sia inaataman mo?” (Salmo 8:3, 4) Imbes na isipon na sia mismo dakula, iinatribwir ni David ki Jehova an pagkaligtas sa gabos niang kalaban asin nagsabi sia dapit sa Dios: “Itatao mo sako an saimong kalasag nin kaligtasan, asin an saimong kapakumbabaan an minagibo sako na dakula.” (2 Samuel 22:1, 2, 36) Si Jehova nagpapaheling nin kapakumbabaan sa pagkaherak nia sa mga nagkakasala, asin inapresyar ni David an dai na kutana maninigong kabootan nin Dios.
‘Papahalangkawon Ko an Dios na Hade’
3. (a) Ano an pagmansay ni David dapit sa pagkahade sa Israel? (b) Sagkod saen minawot ni David na omawon si Jehova?
3 Minsan ngani si David an ninombrahan nin Dios na hade, minansay nia si Jehova bilang an tunay na Hade sa Israel. Nagsabi si David: “Saimo an kahadean, O Jehova, an Saro na naglalangkaw man kan saimong sadiri bilang payo kan gabos.” (1 Cronica 29:11) Asin kanigoan an pagpahalaga ni David sa Dios bilang Namamahala! “Papahalangkawon taka, O sakuyang Dios na Hade,” an inawit nia, “asin pag-oomawon ko an saimong ngaran sa panahon na daing talaan, sagkod lamang pa ngani. Sa bilog na aldaw pag-oomawon taka, asin pag-oomawon ko an saimong ngaran sa panahon na daing talaan, sagkod lamang pa ngani.” (Salmo 145:1, 2) Kamawotan ni David na omawon si Jehova Dios sa bilog na aldaw asin sa bilog na panahon na daing sagkod.
4. Ibinubuyagyag kan Salmo 145 an anong putik na mga paghihingako?
4 An Salmo 145 sarong mapuersang simbag sa paghingako ni Satanas na an Dios sarong maimot na namamahala na habong tawan nin katalingkasan an saiyang mga linalang. (Genesis 3:1-5) Ibinubuyagyag man kan salmong ini an kaputikan ni Satanas na an mga nagkukuyog sa Dios ginigibo sana iyan huli sa makukua ninda dian, bakong huli ta namomotan ninda an Dios. (Job 1:9-11; 2:4, 5) Arog ki David, an tunay na mga Kristiano ngonyan nagtatao nin simbag sa putik na mga sahot kan Diablo. Mahal ninda an saindang paglaom na buhay na daing katapusan sa irarom kan pamamahala kan Kahadean huli ta mawot ninda na omawon si Jehova sa bilog na panahon na daing sagkod. Minilyon na an nagpoon na gumibo kaiyan paagi sa pagtubod sa pantubos na atang ni Jesus asin paagi sa makinuyog na paglilingkod ki Jehova huli sa pagkamoot bilang saiyang nagdusay asin bautisadong mga parasamba.—Roma 5:8; 1 Juan 5:3.
5, 6. Ano an mga oportunidad na omawon si Jehova?
5 Isip-isipa an dakol na oportunidad niato na omawon si Jehova bilang mga lingkod nia. Puede niatong gibohon iyan sa pamibi kun odok na natutudok an boot niato sa sarong bagay na nababasa niato sa saiyang Tataramon, an Biblia. An may pagtanaw nin utang na boot na pag-omaw asin pagpasalamat puedeng ipahayag kun kita napahihiro kan paagi nin pagtratar nin Dios sa saiyang banwaan o kun napupukaw an satong boot sa sarong aspekto kan saiyang makangangalas na paglalang. Inoomaw ta man si Jehova Dios kun ipinakikipag-olay niato an saiyang mga katuyohan sa mga kapagtubod niato sa Kristianong mga pagtiripon o kun nag-oorolay sa pribado. Sa katunayan, an gabos na ‘marahay na gibo’ na ginigibo sa kapakanan kan Kahadean nin Dios nagtatao nin kaomawan ki Jehova.—Mateo 5:16.
6 Kabale sa bago pa sanang mga halimbawa nin siring na marahay na mga gibo an pagtogdok nin dakol na lugar nin pagsamba kan banwaan ni Jehova sa nagtitios na kadagaan. An dakol kaini nahaman paagi sa pinansial na tabang kan mga kapagtubod sa ibang nasyon. An nagkapirang Kristiano nagtabang paagi sa boluntaryong pagduman sa siring na mga lugar tanganing makikabtang sa pagtogdok nin mga Kingdom Hall. Asin an pinakamahalaga sa gabos na marahay na gibo iyo na omawon si Jehova paagi sa paghuhulit kan maogmang bareta kan saiyang Kahadean. (Mateo 24:14) Siring sa ipinaheheling kan huring mga bersikulo sa Salmo 145, inapresyar ni David an pamamahala nin Dios asin irinukyaw an Saiyang pagkahade. (Salmo 145:11, 12) Igwa daw kamo nin kaparehong apresasyon sa mamomoton na paagi nin pamamahala nin Dios? Asin regular daw kamong nakikipag-olay sa iba manongod sa saiyang Kahadean?
Mga Halimbawa kan Kadakulaan nin Dios
7. Tumao nin mayor na dahelan na omawon si Jehova.
7 An Salmo 145:3 nagtatao nin mayor na dahelan na omawon si Jehova. Nag-awit si David: “Si Jehova dakula asin maninigo nanggad na omawon, asin an saiyang kadakulaan dai marorop.” An kadakulaan ni Jehova daing limite. Dai iyan lubos marorop, masabotan, o masokol nin mga tawo. Alagad makikinabang nanggad kita sa pag-estudyar ngonyan sa mga halimbawa kan dai marorop na kadakulaan ni Jehova.
8. Ano an ihinahayag kan uniberso kun dapit sa kadakulaan asin kapangyarihan ni Jehova?
8 Probaring girumdomon kan sarong beses na kamo harayo sa maliwanag na mga ilaw sa siudad asin nagtingkalag kamo sa daing panganoron na langit kan banggi. Bako daw na nagngalas kamo sa kadakoldakol na bitoon na naheheling sa kadikloman kan espasyo? Bako daw na napahiro kamo na omawon si Jehova huli sa saiyang kadakulaan sa paglalang kan gabos na bagay na iyan sa langit? Minsan siring, an naheling nindo sadit sanang kabtang kan kabilangan nin mga bitoon sa galaksia na kinabibilangan kan daga. Dugang pa, kinakalkulo na igwa nin labing sanggatos bilyones na galaksia, na tolo sana kaiyan an naheheling maski mayo nin teleskopyo. Tunay nanggad, an dai mabilang na bitoon asin galaksia na minakompuesto kan grabe kadakulang uniberso sarong patotoo sa kapangyarihan nin paglalang asin dai marorop na kadakulaan ni Jehova.—Isaias 40:26.
9, 10. (a) Anong mga aspekto kan kadakulaan ni Jehova an ipinaheling may koneksion ki Jesu-Cristo? (b) Ano an maninigo na magin epekto sa satong pagtubod kan pagkabuhay liwat ni Jesus?
9 Estudyare an iba pang aspekto kan kadakulaan ni Jehova—an may koneksion ki Jesu-Cristo. An kadakulaan nin Dios ipinaheling sa paglalang sa saiyang Aki asin paggamit sa saiya sa laog nin haloyon na panahon bilang “pangenot na trabahador” Nia. (Talinhaga 8:22-31) An kadakulaan kan pagkamoot ni Jehova nahayag kan itao nia an saiyang bugtong na Aki bilang atang na pantubos sa katawohan. (Mateo 20:28; Juan 3:16; 1 Juan 2:1, 2) Asin an dai kayang saboton nin mga tawo iyo an mamuraway asin inmortal na espiritung hawak na dinisenyo ni Jehova para ki Jesus kan sia buhayon liwat.—1 Pedro 3:18.
10 An pagbuhay liwat ki Jesus may kalabot na dakol na kahangahangang aspekto kan dai marorop na kadakulaan ni Jehova. Daing duda na ibinalik nin Dios sa memorya ni Jesus an mapadapit sa gibohon na kalabot sa paglalang kan dai naheheling sagkod naheheling na mga bagay. (Colosas 1:15, 16) Kabale digdi an iba pang espiritung linalang, an uniberso, an mabungang daga, asin an gabos na klase nin pisikal na buhay sa satong globo. Apuera sa pagbalik nia kan kaaraman kan saiyang Aki dapit sa bilog na kasaysayan kan buhay sa langit asin sa daga na naheling kan panahon bago nagin tawo an saiyang Aki, iiniba ni Jehova an naeksperyensiahan ni Jesus bilang sangkap na tawo. Iyo, an dai marorop na kadakulaan ni Jehova risang-risa sa pagbuhay liwat ki Jesus. Dugang pa, an dakulang gibo na iyan garantiya na posible an pagkabuhay liwat kan iba pa. Maninigo iyan na magpakosog kan satong pagtubod na kayang buhayon liwat nin Dios an minilyon na tawong nagadan na yaon sa saiyang sangkap na memorya.—Juan 5:28, 29; Gibo 17:31.
Makangangalas Asin Makakamhan na mga Gibo
11. Anong dakulang gibo ni Jehova an naponan kan Pentecostes 33 C.E.?
11 Poon kan buhayon liwat si Jesus, si Jehova igwa nin dakol na iba pang dakula asin makangangalas na ginibo. (Salmo 40:5) Kan Pentecostes 33 C.E., pinangyari ni Jehova na mag-eksister an sarong bagong nasyon, an “Israel nin Dios,” na kompuesto kan mga disipulo ni Cristo na linahidan nin banal na espiritu. (Galacia 6:16) Sa makakamhan na paagi, an bagong espirituwal na nasyon na ini naghiwas sa bilog na kinaban kan panahon na idto. Sa ibong kan apostasiya na nagresulta sa pagkaestablisar kan Kakristianohan pagkagadan kan mga apostol ni Jesus, si Jehova nagpadagos sa paggibo nin makangangalas na mga bagay tanganing seguradohon an pagkaotob kan saiyang katuyohan.
12. An katunayan na igwang Biblia sa gabos na mayor na lenguahe sa daga sarong patotoo sa ano?
12 Halimbawa, an opisyal na lista nin mga libro na inaako bilang Banal na Kasuratan naingatan asin sa kahurihurihi trinadusir sa gabos na mayor na lenguahe sa daga ngonyan. An pagtradusir kan Biblia sa parate ginibo sa masakit na mga kamugtakan asin may huma nin kagadanan hale sa mga kampon ni Satanas. Daing duwa-duwa, an pagtradusir kan Biblia sa labing 2,000 na lenguahe dai kutana nagibo kun bakong huli sa kabotan kan Dios na dai marorop sa kadakulaan, si Jehova!
13. Poon kan 1914, paano nahayag an kadakulaan ni Jehova may koneksion sa mga katuyohan kan saiyang Kahadean?
13 An kadakulaan ni Jehova nahayag may koneksion sa mga katuyohan kan saiyang Kahadean. Halimbawa, kan taon 1914, pinatukaw nia an saiyang Aki, si Jesu-Cristo, bilang langitnon na Hade. Dai nahaloy pakatapos kaiyan, huminiro si Jesus tumang ki Satanas asin sa mga demonyo nia. Pinalayas sinda sa langit asin linaom sa palibot kan daga, kun saen naghahalat sinda ngonyan na iapon sa bungaw. (Kapahayagan 12:9-12; 20:1-3) Poon kaidto, naeksperyensiahan kan linahidan na mga parasunod ni Jesus an orog na paglamag. Minsan siring, sinusteniran sinda ni Jehova durante kan panahon na ini kan dai naheheling na presensia ni Cristo.—Mateo 24:3; Kapahayagan 12:17.
14. Ano an makangangalas na ginibo ni Jehova kan 1919, asin ano an nahaman kaini?
14 Kan taon 1919, may saro pang makangangalas na ginibo si Jehova na nagpaheling kan saiyang kadakulaan. Ibinalik an animo kan linahidan Kapahayagan 11:3-11) Kan mga taon poon kaidto, maigot na ihinulit kan mga linahidan an maogmang bareta kan inestablisar na langitnon na Kahadean. An iba pang linahidan tinipon tanganing kompletohon an kabilangan na 144,000. (Kapahayagan 14:1-3) Asin paagi sa linahidan na mga parasunod ni Cristo, ibinugtak ni Jehova an pundasyon nin “sarong bagong daga,” sarong matanos na sosyedad nin tawo. (Kapahayagan 21:1) Alagad ano an mangyayari sa “bagong daga” pagkasakat kan gabos na fiel na linahidan sa langit?
na mga parasunod ni Jesus, na namugtak sa espirituwal na pagkadaing maginibo. (15. Anong gibohon an pinangengenotan kan linahidan na mga Kristiano, asin may anong mga resulta?
15 Kan 1935, an luwas kan magasin na ini na Agosto 1 asin Agosto 15 igwa nin mahalagang marhay na mga artikulo mapadapit sa “dakulang kadaklan,” na nasambitan sa Kapahayagan kapitulo 7. Maigot na pinonan kan linahidan na mga Kristiano na hanapon asin iasosyar sa sainda an mga kapwa parasamba na ini hale sa gabos na nasyon, tribo, banwaan, asin tataramon. An “dakulang kadaklan” na ini makaliligtas sa madali nang dumatong na “dakulang kahorasaan,” na may tinatanaw na buhay na daing sagkod sa Paraiso bilang permanenteng mga miembro kan “bagong daga.” (Kapahayagan 7:9-14) Huli sa paghuhulit kan Kahadean asin paggibo nin mga disipulo, na pinangengenotan kan linahidan na mga Kristiano, labi sa anom na milyon katawo ngonyan an igwa nin paglaom na buhay na daing katapusan sa sarong daganon na paraiso. Kiisay maninigong itao an kredito sa siring na pagdakol apisar kan pagtumang ni Satanas asin kan saiyang maraot na kinaban? (1 Juan 5:19) Solamente si Jehova an makagigibo kan gabos na ini, na ginagamit an saiyang banal na espiritu.—Isaias 60:22; Zacarias 4:6.
An Mamuraway na Kagayonan Asin Dignidad ni Jehova
16. Taano ta dai literal na maheheling kan mga tawo ‘an mamuraway na kagayonan kan dignidad ni Jehova’?
16 Ano man iyan, an “makangangalas na mga gibo” asin “makakamhan na mga gibo” ni Jehova nungkang malilingawan. Si David nagsurat: “An sunod-sunod na mga kapag-arakian mag-oomaw sa saimong mga gibo, asin isasaysay ninda an saimong makakamhan na mga gibo. An mamuraway na kagayonan kan saimong dignidad asin an saimong makangangalas na mga gibo sakuyang pagmamakolgan. Asin ipangongosip ninda an kosog kan saimong makangingirhat na mga bagay; asin kun manongod sa saimong kadakulaan, ipahahayag ko iyan.” (Salmo 145:4-6) Pero, gurano kadakol an puedeng maaraman ni David manongod sa mamuraway na kagayonan ni Jehova, mantang “an Dios Espiritu” asin kun siring dai naheheling kan mga mata nin tawo?—Juan 1:18; 4:24.
17, 18. Paano mapatatalubo ni David an pag-apresyar sa ‘mamuraway na kagayonan kan dignidad ni Jehova’?
17 Minsan ngani dai nia naheheling an Dios, may mga paagi tanganing tumalubo an pag-apresyar ni David sa dignidad ni Jehova. Halimbawa, puede niang basahon an rekord kan Kasuratan dapit sa makakamhan na mga gibo nin Dios, arog baga kan paglaglag sa maraot na kinaban paagi sa lakop sa globong baha. Posibleng marhay na naaraman ni David kun paano sinupog an falsong mga dios sa Egipto kan kaldahon nin Dios an mga Israelita sa kaoripnan sa Egipto. An siring na mga pangyayari nagpapatotoo sa dignidad asin kadakulaan ni Jehova.
18 Daing duda na nagtalubo an pag-apresyar ni David sa dignidad nin Dios bako sanang paagi sa pagbasa sa Kasuratan kundi paagi man sa paghorophorop dian. Halimbawa, tibaad hinorophorop nia an nangyari kan itao ni Jehova an Ley sa Israel. Igwa nin mga dagoldol, kitkilat, mahibog na panganoron, asin makosogon na tanog nin amodyong. An Bukid nin Sinai nagkunogkunog asin nag-aso. Nagkatiripon sa ibaba kan bukid, nadangog pa ngani kan mga Israelita “an Sampulong Tataramon” hale sa tahaw kan kalayo asin kan panganoron mantang si Jehova nagtataram sa sainda paagi sa sarong representanteng anghel. (Deuteronomio 4:32-36; 5:22-24; 10:4; Exodo 19:16-20; Gibo 7:38, 53) Kanigoan na kapahayagan kan kadakulaan ni Jehova! An mga namomoot sa Tataramon nin Dios na naghohorophorop sa mga pagkasaysay na ini daing magigibo kundi mapahiro kan ‘mamuraway na kagayonan kan dignidad ni Jehova.’ Siempre, ngonyan yaon sato an bilog na Biblia, na igwa nin laen-laen na mamuraway na bisyon na nagdodoon sa sato kan kadakulaan ni Jehova.—Ezequiel 1:26-28; Daniel 7:9, 10; Kapahayagan, kapitulo 4.
19. Ano an mapakosog kan satong pag-apresyar sa dignidad ni Jehova?
19 An saro pang paagi na si David napahanga sa dignidad nin Dios iyo an pag-adal sa mga ley na itinao nin Dios sa mga Israelita. (Deuteronomio 17:18-20; Salmo 19:7-11) An pagkuyog sa mga ley ni Jehova nagtao nin dignidad sa nasyon nin Israel asin isiniblag iyan sa gabos na iba pang banwaan. (Deuteronomio 4:6-8) Kun paanong totoo iyan sa kamugtakan ni David, an regular na pagbasa kan Kasuratan, odok na paghorophorop dian, asin mahigos na pag-adal kaiyan mapakosog kan satong pag-apresyar sa dignidad ni Jehova.
Kanigoan Karahay kan Moral na mga Kualidad nin Dios!
20, 21. (a) Ibinabantog kan Salmo 145:7-9 an kadakulaan ni Jehova may koneksion sa anong mga kualidad? (b) An mga kualidad nin Dios na nasambitan digdi igwa nin anong epekto sa gabos na namomoot sa saiya?
20 Siring sa naheling niato, an enot na anom na bersikulo kan Salmo 145 nagtatao sa sato nin tamang mga dahelan na omawon si Jehova huli sa mga bagay na konektado sa saiyang dai marorop na kadakulaan. Ibinabantog kan bersikulo 7 sagkod 9 an kadakulaan nin Dios paagi sa pagsambit sa saiyang moral na mga kualidad. Si David nag-awit: “Sa pagsambit kan abundansia kan saimong karahayan sinda magsusulwak, asin huli sa saimong katanosan sinda magayagayang magkukururahaw. Si Jehova maugayon asin maheherakon, maluway sa pagkaanggot asin dakulaon sa mamomoton na kabootan. Si Jehova marahay sa gabos, asin an saiyang mga pagkaherak yaon sa gabos niang ginibo.”
21 Enot na idinodoon digdi ni David an karahayan asin katanosan ni Jehova—mga kualidad na kinuestion ni Satanas na Diablo. Ano an epekto kan mga kualidad na ini sa gabos na namomoot sa Dios asin nagpapasakop sa saiyang pamamahala? Tara, an karahayan ni Jehova asin an saiyang matanos na paagi nin pamamahala nagtatao nanggad nin kagayagayahan sa saiyang mga parasamba kaya dai ninda kayang pumondo sa pagsulwak nin pag-omaw sa saiya. Dugang pa, an karahayan ni Jehova nakakaabot “sa gabos.” Logod pa man na makatabang ini sa dakol pa na magsolsol asin Gibo 14:15-17.
magin parasamba sa tunay na Dios bago magin huri an gabos.—22. Paano tinatratar ni Jehova an saiyang mga lingkod?
22 Pinahalagahan man ni David an mga kualidad na idinoon mismo nin Dios kan Sia “nag-aagi sa atubangan kan . . . lalauogon [ni Moises] asin nagsasabi: ‘Jehova, Jehova, Dios na maheherakon asin maugayon, maluway sa pagkaanggot asin abunda sa mamomoton na kabootan asin katotoohan.’” (Exodo 34:6) Sa siring, ikakapahayag ni David: “Si Jehova maugayon asin maheherakon, maluway sa pagkaanggot asin dakulaon sa mamomoton na kabootan.” Minsan ngani si Jehova dai marorop sa kadakulaan, tinatawan nia nin dignidad an saiyang mga lingkod na tawo paagi sa pagtratar sa sainda sa maugayon na paagi. Pano sia nin pagkaherak, andam na magpatawad sa nagsosolsol na mga nagkasala basado sa pantubos na atang ni Jesus. Si Jehova maluway man sa pagkaanggot, huli ta tinatawan nia nin oportunidad an saiyang mga lingkod na pangganahan an mga kaluyahan na puedeng makaolang sa paglaog ninda sa saiyang bagong kinaban nin katanosan.—2 Pedro 3:9, 13, 14.
23. Anong mahalagang marhay na kualidad an totokaron niato sa sunod na artikulo?
23 Irinurukyaw ni David an mamomoton na kabootan, o maimbod na pagkamoot, nin Dios. Sa katunayan, an iba pang kabtang kan Salmo 145 nagpapaheling kun paano ipinapahayag ni Jehova an kualidad na ini asin kun ano an reaksion kan maimbod na mga lingkod nia sa saiyang mamomoton na kabootan. Totokaron sa sunod na artikulo an mga bagay na ini.
Ano an Isisimbag Nindo?
• Ano an mga oportunidad na omawon si Jehova “sa bilog na aldaw”?
• Anong mga halimbawa an nagpapaheling na dai marorop an kadakulaan ni Jehova?
• Paano niato mapatatalubo an pag-apresyar sa mamuraway na dignidad ni Jehova?
[Mga Hapot Para sa Pag-adal]
[Ritrato sa pahina 10]
An mga galaksia sa uniberso nagpapatotoo sa kadakulaan ni Jehova
[Credit Line]
Sa karahayan nin boot kan Anglo-Australian Observatory, rinetrato ni David Malin
[Ritrato sa pahina 12]
Paano nahayag an kadakulaan ni Jehova may koneksion ki Jesu-Cristo?
[Ritrato sa pahina 13]
Kan akoon kan mga Israelita an Ley sa Bukid nin Sinai, may ebidensia sinda kan mamuraway na dignidad ni Jehova