Kiisay na mga Panuga an Puede Nindong Pagtiwalaan?

“AN SAIYANG mga panuga, arog nia kaidto, mapuersa; alagad an saiyang nahaman, arog nia ngonyan, daing halaga.”​—King Henry the Eighth, ni William Shakespeare.

An mapuersang mga panuga na sinambit ni Shakespeare mga panuga kan Ingles na kardinal na si Thomas Wolsey, na nagkapot nin dakulang kapangyarihan sa politika sa Inglaterra durante kan ika-16 na siglo. May mga masabi na an deskripsion ni Shakespeare minaaplikar man sa kadaklan kan mga panuga na nadadangog ninda ngonyan. Paorootro na an mga tawo pinanunugaan nin dakol alagad kadikit an naootob. Huli kaini, bakong depisil na masabotan kun taano ta sinda nagigin mapagduda sa ano man na mga panuga.

Lakop an mga Pagkadesganar

Halimbawa, durante kan grabeng guerra sa Balkanes kan mga taon nin 1990, idineklarar kan United Nations Security Council an banwaan sa Bosnia na Srebrenica na “sarong ligtas na lugar.” Iyan garo baga masasarigan na garantiya kan internasyonal na komunidad. Iyan man an paghona kan rinibong dulag na Muslim sa Srebrenica. Minsan siring, sa katapustapusi an panuga na sarong ligtas na lugar nagin biyong daing saysay. (Salmo 146:3) Kan Hulyo nin 1995, talagang dinaog kan nan-aatakeng mga hukbo an mga hukbo kan NU asin sinakop an banwaan. Labing 6,000 na Muslim an nawara, asin kisuerra 1,200 na sibilyan na Muslim an ginadan.

An lambang aspekto nin buhay pano nin dai inotob na mga panuga. An mga tawo nakakamateng dinadaya kan pagpaoran sa sainda ngonyan nin “dai mabilang na mga kaso nin bakong totoo asin nakadadayang mga anunsio.” Nadedesganar sinda sa “dai naotob na mga panuga sa kampanya kan rinibong politiko.” (The New Encyclopædia Britannica, Tomo 15, pahina 37) An tinitiwalaan na mga namomoon sa relihion na nanunugang pangangatamanan an saindang mga aripompon inaabuso sinda sa pinakamarigsok na paagi. Dawa sa mga propesyon na arog kan edukasyon asin medisina​—na ginigiyahan daa nin pagkaludok asin pagmakolog sa iba​—trinaydor kan nagkapira an saindang pagtitiwala asin inaprobetsaran o ginadan pa ngani an mga pinangangatamanan ninda. Bakong makangangalas na pinatatanidan kita kan Biblia na dai magtubod sa lambang tataramon!​—Talinhaga 14:15.

 Mga Panugang Inootob

Siempre, dakol na tawo an nag-ootob kan saindang tataramon, na kun beses may kaibang dakulang pagsasakripisyo sa sadiri ninda. (Salmo 15:4) An saindang tataramon iyo an saindang garantiya, asin inootob ninda iyan. An iba may sinseridad na gustong otobon an saindang mga panuga na may marahayon na mga intension. Andam asin gusto nindang otobon an ipinanuga ninda alagad talagang dai ninda kayang gibohon iyan. Dahel sa mga sirkonstansia puedeng masudya dawa an pinakanobleng mga plano.​—Eclesiastes 9:11.

Ano man an dahelan, an totoo iyo na dakol na tawo an nadedepisilan na marhay na magtubod sa mga panuga nin siisay man. Kaya minalataw an mga hapot na: Igwa daw nin ano man na mga panuga na puede niatong pagtiwalaan? Iyo. Puede niatong pagtiwalaan an mga panuga na yaon sa Tataramon nin Dios, an Biblia. Taano ta dai siyasaton kun ano an sinasabi kan masunod na artikulo dapit sa temang ini? Tibaad magkonklusyon kamo, arog kan ginibo na kan minilyon, na puede talaga kitang magtiwala sa mga panuga nin Dios.

[Picture Credit Line sa pahina 3]

AP Photo/Amel Emric