Mga Hapot Hale sa mga Parabasa

Anong mga sirkonstansia an nagin dahelan kan pagdorog ni Juda sa sarong babae na sa paghona nia sarong patotot, siring kan sinabi sa Genesis 38:​15, 16?

Minsan ngani talagang dinorogan ni Juda an sarong babae na sa paghona nia patotot, an totoo bako siang patotot. Segun sa Genesis kapitulo 38, ini an nangyari.

Bago nagkaaki an panganay na aking lalaki ni Juda sa saiyang agom, si Tamar, ginadan sia huli ta sia “nagin maraot sa pagheling ni Jehova.” (Genesis 38:7) Kan panahon na idto, kaugalean an pag-agom kan bayaw. Hinahagad kaini na kun magadan an sarong lalaki na mayo nin paramana, aagomon asin aakian kan saiyang tugang na lalaki an balong babae tanganing magkaigwa nin paramana. Alagad an ikaduwang aking lalaki ni Juda, si Onan, nagsayumang otobon an saiyang obligasyon. Huli kaini, nagadan sia bilang resulta kan paghokom nin Dios. Dangan pinapuli ni Juda an saiyang manugang na si Tamar sa harong kan saiyang ama sagkod na dumatong an panahon na nasa tamang edad na an ikatolong aking lalaki ni Juda, si Selah, tanganing agomon sia. Minsan siring, sa paglihis nin dakol na taon, dai ipinaagom ni Juda ki Selah si Tamar. Kaya kan magadan an agom ni Juda, naggibo nin pakana si Tamar tanganing magkaigwa sia nin paramana paagi ki Juda, an Israelita na nagin panugangan nia. Ginibo nia ini paagi sa pagbalatkayong patotot sa templo asin pagpuesto nia sa may tinampo na aram niang aagihan ni Juda.

Huling dai nia namidbid si Tamar, dinorogan sia ni Juda. Para sa pabor na itatao nia sa saiya, sa madonong na paagi nakakua sia nin mga garantiya hale ki Juda, asin paagi kaini pinatunayan nia kan huri na si Juda an nakabados sa saiya. Kan nahayag an katotoohan, dai sia binasol ni Juda kundi mapakumbabang nagsabi: “Mas matanos sia kisa sako, sa dahelan na dai ko sia itinao ki Selah na sakong aking lalaki.” Asin angay nanggad, “dai na sia nakidorog sa saiya.”​—Genesis 38:26.

Si Juda sala ta dai nia itinao si Tamar sa aki niang lalaki na si Selah siring sa ipinanuga nia. Nakidorog man sia sa sarong babae na sa paghona nia patotot sa templo. Sarongat ini sa katuyohan nin Dios, na an sarong lalaki makidorog sana sa saiyang agom. (Genesis 2:24) Pero an totoo, si Juda dai nakidorog sa sarong patotot. Imbes, dai nia tinutuyong kinua an kabtang kan saiyang aking si Selah sa paggibo kan pag-agom kan bayaw asin sa siring nagin ama nin sarong lehitimong aki.

Kun dapit ki Tamar, an saiyang ginibo bakong inmoral. An saiyang kambal na aking lalaki dai ibinilang na mga aki sa pakikisaro. Kan inagom ni Booz na taga Betlehem an Moabitang si Rut sono sa areglong pag-agom kan bayaw, an kamagurangan sa Betlehem paborableng nagtaram dapit sa aking lalaki ni Tamar na si Perez, na sinasabi ki Booz: “An saimong harong logod magin arog kan harong ni Perez, na ipinangaki ni Tamar ki Juda, gikan sa aki na itatao sa saimo ni Jehova paagi sa hoben na babaeng ini.” (Rut 4:12) Si Perez ilinista man kaiba kan mga apoon ni Jesu-Cristo.​—Mateo 1:1-3; Lucas 3:23-33.