Mga Panuga na Puede Nindong Pagtiwalaan

ARAM kan propeta nin Dios na si Miqueas na an mga panuga sa parate dai masasarigan. Kan saiyang kaaldawan, dawa an pinakadayupot na mga kaibaiba dai pirmeng mapagtitiwalaan na mag-otob kan saindang tataramon. Kaya nagpatanid si Miqueas: “Dai kamo magtubod sa sarong kaiba. Dai kamo magtiwala sa dayupot na amigo. Sa naghihigda sa kadorog mo ingatan mo an mga pagbuka kan saimong ngoso.”​—Miqueas 7:5.

Si Miqueas daw nagtogot na sia magin mapagduda sa gabos na panuga huli sa makamomondong kamugtakan na ini? Dai! Ipinahayag nia an bilog na kompiansa sa mga panuga kan saiyang Dios, si Jehova. “Kun para sa sako,” an isinurat ni Miqueas, “ki Jehova ako padagos na maghahalat. Mapaheling ako nin mapaghalat na aktitud sa Dios nin sakong kaligtasan.”​—Miqueas 7:7.

Taano ta may arog kaiyan na kompiansa si Miqueas? Huli ta aram nia na pirmeng inootob ni Jehova an saiyang tataramon. An gabos na isinumpa nin Dios sa mga apoon ni Miqueas talagang nagkatotoo. (Miqueas 7:20) An pagigin fiel ni Jehova kan nakaagi nagtao ki Miqueas nin makosog na dahelan na ootobon Nia an Saiyang mga tataramon sa ngapit.

 “Mayo ni Sarong Tataramon . . . an Nasudya”

Halimbawa, aram ni Miqueas na ilinigtas ni Jehova an mga Israelita sa pagkaoripon sa Egipto. (Miqueas 7:15) Inenkaminar ni Josue, na nakaeksperyensia sa pagliligtas na iyan, an saiyang mga kapwa Israelita na magtubod sa gabos na panuga nin Dios. Sa anong basehan? “Aram nindong gayo sa bilog nindong puso asin sa bilog nindong kalag,” an ipinagirumdom sa sainda ni Josue, “na mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya. Iyan gabos naotob para sa saindo. Mayo ni sarong tataramon sa mga iyan an nasudya.”​—Josue 23:14.

Aram na marhay kan mga Israelita na naggibo si Jehova nin makangangalas na mga bagay para sa sainda. Inotob nia an saiyang panuga sa matatakton sa Dios na apoon ninda na si Abraham na an saiyang mga gikan magigin arog kadakol nin mga bitoon asin sasadirihon an daga nin Canaan. Sinabihan man ni Jehova si Abraham na an saiyang mga gikan maagi nin makuring sakit sa laog nin 400 na taon alagad mabuelta sa Canaan “sa ikaapat na kapag-arakian.” Nangyari ini gabos.​—Genesis 15:5-16; Exodo 3:6-8.

An mga Israelita maogmang inako sa Egipto kan kaaldawan kan aki ni Jacob na si Jose. Kan huri may kabangisan sindang pinagtrabaho kan mga Egipcio bilang oripon, alagad arog kan panuga nin Dios, sa laog nin apat na nagkainabotan na henerasyon poon kan lumaog sinda sa Egipto, an mga gikan na ini ni Abraham pinatalingkas sa pagkaoripon sa Egipto. *

Durante kan suminunod na 40 taon, an mga Israelita nagkaigwa nin dugang pang prueba na pirmeng inootob ni Jehova an saiyang mga panuga. Kan an mga Amalequita maglansar nin mayo nin marahay na basehan na pagsalakay sa mga Israelita, nakipaglaban an Dios para sa saiyang banwaan asin prinotehiran sinda. Pinanigoan nia an gabos nindang materyal na pangangaipo durante kan 40 taon na pagbaklay sa kaawagan asin sa kahurihurihi pinapag-erok sinda sa Dagang Panuga. Mantang rinerepaso ni Josue an kasaysayan kan mga pagtratar ni Jehova sa mga gikan na ini ni Abraham, kompiado siang makasasabi: “Mayo ni sarong panuga an nasudya sa gabos na marahay na ipinanuga ni Jehova sa harong ni Israel; iyan gabos naotob.”​—Josue 21:45.

Pataluboon an Kompiansa sa mga Panuga nin Dios

Paano nindo mapatatalubo an pagtubod sa mga panuga ni Jehova, arog kan ginibo ni Miqueas asin Josue? Bueno, paano nindo pinatatalubo an pagtitiwala sa iba? Minimidbid nindo sindang marhay sagkod na mapupuede. Halimbawa, tibaad maaraman nindo kun gurano sinda kamasasarigan paagi sa pag-obserbar na fiel nindang pinagmamaigotan na otobon an gabos nindang panuga. Mantang nadadagdagan an kaaraman nindo dapit sa siring na mga tawo, gradwal na napatatalubo nindo an pagtitiwala sa sainda. Magigibo man nindo iyan kun manongod sa pagpatalubo nin pagtubod sa mga panuga nin Dios.

An sarong paagi na puede nindong magibo ini iyo an paghorophorop sa mga linalang asin sa mga ley na nagkokontrol kaiyan. An mga sientista nagkokompiar sa mga ley na ini, arog kan mga ley na nagkokontrol sa paagi na an sarong selula nin tawo nababanga asin nagdadakol tanganing makaprodusir nin trilyones na selula na iyong minakompuesto kan saindong hawak. Sa katunayan, an mga ley na nagkokontrol sa paghiro kan materya asin enerhiya sa bilog na uniberso seguradong ibinugtak nin sarong biyong masasarigan na Paragibo nin Ley. Daing duwa-duwa na puede kamong  magtiwala sa saiyang mga panuga, kun paanong igwa kamo nin kompiansa sa mga ley na nagkokontrol sa saiyang mga linalang.​—Salmo 139:14-16; Isaias 40:26; Hebreo 3:4.

Paagi ki propeta Isaias, sarong katemporanyo ni Miqueas, ginamit ni Jehova an pagigin regular kan mga kapanahonan asin an makangangalas na siklo nin tubig tanganing ipaheling an pagigin masasarigan kan saiyang tataramon. Kada taon minaabot an oran. Sinasagom kaiyan an daga asin ginigibong posible para sa mga tawo na magsabwag kan saindang banhi asin mag-ani kan bunga. Mapadapit digdi, si Jehova nagsabi: “Kun paanong an oran minaibaba, asin an niebe, hale sa kalangitan asin dai na minabalik dian, sagkod na dai kaiyan masagom an daga asin papagbungahon saka patuboon iyan, asin tawan nin banhi an parasabwag asin nin tinapay an makakan, magigin siring man an sakong tataramon na magluwas sa sakong ngoso. Dai iyan mabalik sa sako na mayong nahaman, kundi gigibohon nanggad kaiyan an ikinaoogma kong marhay, asin iyan siertong magigin mapanggana sa sakuyang sinobolan kaiyan.”​—Isaias 55:​10, 11.

Seguradong mga Panuga Manongod sa Paraiso

An pagsiyasat sa mga linalang puedeng makapatalubo nin pagtitiwala sa Kaglalang, alagad orog pa an kaipuhan kun gusto nindong manodan an manongod sa mga panuga na kabtang kan ‘tataramon na minaluwas sa saiyang ngoso.’ Tanganing manodan an manongod sa mga panugang ini asin ikabugtak nindo an saindong pagtitiwala dian, kaipuhan nindong siyasaton an ipinasabong nin Dios na rekord sa Kasuratan manongod sa katuyohan nin Dios para sa daga asin sa saiyang mga pagtratar sa katawohan.​—2 Timoteo 3:14-17.

May kompiansa si propeta Miqueas sa mga panuga ni Jehova. Mas dakol ngani an makukua nindong ipinasabong nin Dios na rekord kisa kan makukua kaidto ni Miqueas. Mantang binabasa nindo an Biblia asin hinohorophorop iyan, puede man nindong mapatalubo an pagtubod sa kaotoban kan mga panuga nin Dios. An kalabot sa mga panugang ini bako sanang an kadugong mga gikan ni Abraham kundi an bilog na katawohan. Pinanugaan ni Jehova an matatakton sa Dios na patriarkang ini: “Paagi sa saimong banhi an gabos na nasyon sa daga magbebendisyon nanggad kan saindang sadiri huli sa bagay na ika naghinanyog sa sakong tingog.” (Genesis 22:18) An pangenot na kabtang kan “banhi,” o gikan, ni Abraham iyo an Mesiyas, si Jesu-Cristo.​—Galacia 3:16.

Paagi ki Jesu-Cristo, seseguradohon ni Jehova na makaabot an mga bendisyon sa makinuyog na katawohan. Asin ano an ipinanuga nin Dios na gigibohon nia sa satong panahon? An Miqueas 4:​1, 2 nagsisimbag sa makahulang mga tataramon na ini: “Mangyayari sa huring kabtang kan mga aldaw na an bukid kan harong ni Jehova marigon na mapatitindog na halangkaw pa sa alitoktok kan mga bukid, asin iyan ilalangkaw nanggad nin mas halangkaw pa sa mga bulod; asin dian maburunyog an mga banwaan. Asin dakol na nasyon an maduruman asin masarabi: ‘Madia kamo, banwaan, asin magturukad kita sa bukid ni Jehova asin sa harong kan Dios ni Jacob; asin totokdoan nia kita mapadapit sa saiyang mga dalan, asin magraralakaw kita sa saiyang mga dana.’”

An mga nakakanood manongod sa dalan ni Jehova ‘pupulpogon an saindang mga espada na magin tarom nin arado asin an saindang mga budyak na magin mga gunting na pan-awan.’ Mawawara an ano man na mga tendensiang makiguerra. Dai na mahahaloy an daga mapapano nin matanos na mga tawo, asin mayo nin siisay man na mapatakig sa sainda huli sa takot. (Miqueas 4:​3, 4) Iyo, an Tataramon nin Dios nanunuga na sa irarom kan pamamahala kan Kahadean sa kamot ni Jesu-Cristo, hahaleon ni Jehova sa daga an gabos na nan-aapi.​—Isaias 11:6-9; Daniel 2:44; Kapahayagan 11:18.

Dawa an mga nagdusa asin nagadan huli sa pagrebelde nin tawo sa Dios bubuhayon liwat na may esperansang mabuhay sagkod lamang sa daga. (Juan 5:​28, 29) Si Satanas asin an saiyang mga demonyo, an mga parasutsut nin karatan, hahaleon  na sa eksena, asin an mga epekto kan kasalan ni Adan hahaleon paagi sa atang na pantubos ni Jesus. (Mateo 20:28; Roma 3:​23, 24; 5:12; 6:23; Kapahayagan 20:13) Asin ano an magigin kamugtakan kan makinuyog na mga tawo? Tara, bebendisyonan sinda nin buhay na daing katapusan na may sangkap na salud sa sarong paraisong daga!​—Salmo 37:​10, 11; Lucas 23:43; Kapahayagan 21:3-5.

Kanigoan karahay na mga panuga! Alagad puede daw nindong paniwalaan an mga iyan? Siempre iyo. Bako ining mga panuga nin mga tawong tibaad may marahay na intension alagad mayo nin kapangyarihan na isagibo iyan. Mga panuga iyan kan Makakamhan sa Gabos na Dios, na dai puedeng magputik asin “bakong maluway kun dapit sa saiyang panuga.” (2 Pedro 3:9; Hebreo 6:13-18) Lubos kamong makapagtitiwala sa gabos na panuga na yaon sa Biblia, huli ta an Ginikanan kaiyan iyo si “Jehova na Dios nin katotoohan.”​—Salmo 31:5.

[Nota sa Ibaba]

[Blurb sa pahina 6]

“Mayo ni sarong tataramon sa gabos na marahay na tataramon na isinabi sa saindo ni Jehova na saindong Dios an nasudya.”​—JOSUE 23:14

[Mga Ritrato sa pahina 4, 5]

Inotob ni Jehova an saiyang mga panuga sa Israel sa Dagat na Pula asin sa kaawagan

[Mga Ritrato sa pahina 7]

Inotob ni Jehova an saiyang panuga ki Abraham. An saiyang Banhi, si Jesu-Cristo, matao nin mga bendisyon sa katawohan