Pamurawayon an Dios, Bakong an Tawo

KAN nakaagi pa sanang mga bulan, an mga namomoot sa katanosan sa bilog na globo nakanood kun paano pamumurawayon an Dios mantang sinda nagtitiripon sa “Pamurawayon an Dios” na Pandistritong Kombension kan Mga Saksi ni Jehova. Repasohon niato an programa nin pagtotokdo na iprinesentar dian.

An programa na basado sa Biblia nagpadagos sa laog nin tolong sunod-sunod na aldaw para sa kadaklan na kombensionista asin apat na aldaw para sa mga nakaatender sa espesyal na internasyonal na mga kombension. Sa kabilogan, nakadangog an mga nag-atender nin labing 30 kabtang na sono sa Kasuratan, kaiba an mga pahayag na nagpararom sa espirituwal na pagpahalaga, mga eksperyensia na nagpakosog sa pagtubod, mga demonstrasyon na nagtampok nin praktikal na pag-aplikar kan mga prinsipyo sa Biblia, asin kompleto sa kostium na drama na ilinaladawan an mga angat na inatubang kan mga Kristiano kan enot na siglo. Kun nag-atender kamo sa saro sa mga kombension, taano ta dai repasohon an saindong mga nota mantang binabasa nindo an artikulong ini? Segurado kami na maoogma kamong girumdomon an mga memorya nin abundang espirituwal na bangkete asin magigin nakapagtotokdo man iyan.

Tema kan Enot na Aldaw: “Maninigo Ka, Jehova, . . . na Mag-ako kan Kamurawayan”

Pagkatapos kan pambukas na kanta asin pamibi, may init na inako kan enot na ispiker an gabos na nag-atender paagi sa sarong pahayag na nakasentro sa pangenot na dahelan kan kombension: “Nagkatiripon Tanganing Pamurawayon an Dios.” Nagkokotar sa Kapahayagan 4:​11, idinoon kan ispiker an pinakatema kan kombension. Tolos na ipinaliwanag nia kun ano an kahulogan kan pamurawayon an Dios. Ginagamit an libro nin Salmo, idinoon nia na kalabot sa pagpamuraway sa Dios an “pagsamba,” “pagpasalamat,” asin “pag-omaw.”​—Salmo 95:6; 100:​4, 5; 111:​1, 2.

An sunod na kabtang may titulong “Binebendisyonan an mga Nagpapamuraway sa Dios.” Nagtao nin interesanteng komento an ispiker. Mantang labi nang anom na milyon na Saksi ni Jehova an yaon sa 234 kadagaan sa bilog na globo, puedeng sabihon na an saldang nungkang minasolnop sa mga nagtatao nin kamurawayan ki Jehova. (Kapahayagan 7:15) An interbio sa dakol na Kristianong tugang na lalaki asin babae na nasa sarong klase nin espesyal na bilog na panahon na paglilingkod sarong bagay na pinahalagahan sa kabtang na ini na nakapaogma sa puso kan mga nagdadangog.

“An mga Linalang Nagpapahayag kan Kamurawayan nin Dios” an suminunod na pahayag. Minsan ngani silensio, ibinabantog kan pisikal na kalangitan an kadakulaan nin Dios asin tinatabangan kita na pararomon an satong pag-apresyar sa saiyang  mamomoton na pagmakolog. Ipinaliwanag ini nin maingat asin detalyado.​—Isaias 40:26.

An paglamag, pagtumang, kinabanon na mga impluwensia, asin makasalan na mga tendensia nag-aatubang nin angat sa integridad kan tunay na mga Kristiano. Huli kaini, an pahayag na “Maglakaw sa Dalan nin Integridad” angay na tawan nin bilog na atension kan mga nagdadangog. Suminunod an bersikulo por bersikulong pagtokar kan ika-26 na Salmo, kaiba an interbio sa nag-eeskuelang Saksi na nanindogan nin marigon para sa moralidad asin sa saro pa na inuubos an saiyang panahon sa kuestionableng aling-alingan alagad guminibo nin mga lakdang tanganing pangganahan an problemang iyan.

An pahayag sa pinakatema na, “Pinahihiro Kita kan Mamuraway na Makahulang mga Bisyon!” an tuminapos sa pan-agang programa. Sinitar kan ispiker an mga halimbawa ni propeta Daniel asin ni apostol Juan patin Pedro bilang mga tawo na an pagtubod pinakosog kan mamuraway na makahulang mga bisyon na nanonongod sa pagkaestablisar asin pagpunsionar kan Mesiyanikong Kahadean nin Dios. Sa pagtaram manongod sa siisay man na tibaad nakalingaw na sa malinaw na ebidensia na nagpapatunay na yaon na kita sa panahon kan katapusan, an ispiker nagsabi: “Odok niatong linalaoman na an mga siring logod na magturuhok liwat sa pagigin tunay kan presensia ni Cristo na may kamurawayan sa Kahadean asin matabangan na makabalik an espirituwal na kosog.”

An panhapon na programa nagpoon paagi sa diskurso na may titulong “An Kamurawayan ni Jehova Ihinayag sa mga Mapakumbaba.” Ipinaheling kan ispiker kun paanong si Jehova nagpapaheling nin halimbawa sa kapakumbabaan, dawa ngani sia an pinakahalangkaw na Persona sa uniberso. (Salmo 18:35) Pinapaboran ni Jehova an mga tunay na mapakumbaba, alagad kontra sia sa mga nagsasagin mapakumbaba sana duman sa mga kapantay ninda o mas halangkaw sa sainda alagad maringis sa mga nasa irarom kan saindang superbisyon.​—Salmo 138:6.

Sunod, itinampok an hula sa Biblia sa sarong simposium na nagdodoon kan manlaenlaen na aspekto kan pinakatemang: “An Hula ni Amos​—An Mensahe Kaiyan Para sa Satong Kaaldawan.” Sinasambit an halimbawa ni Amos, dinara kan enot na ispiker an atension sa responsibilidad niato na patanidan an mga tawo dapit sa nagdadangadang na paghokom ni Jehova. An tema kan saiyang pahayag iyo an “Ipahayag na May Pagkapusoan an Tataramon nin Dios.” An ikaduwang ispiker naghapot: “Tataposon pa daw ni Jehova an karatan asin pagdusa sa dagang ini?” Ipinaheling kan saiyang kabtang na, “An Paghokom nin Dios Tumang sa mga Maraot,” na an paghokom nin Dios pirmeng maninigo, dai madudulagan, asin may pinipili. An pangultimong ispiker kan simposium nagtao nin atension sa temang “Sinisiyasat ni Jehova an Puso.” Hihimateon kan mga naghihimuyawot na paogmahon si Jehova an mga tataramon sa Amos 5:15: “Kaongisan an maraot, asin kamotan an marahay.”

An inomon na de alkohol, arog kan arak na nagpapagayagaya sa puso, puedeng gamiton sa salang paagi. Sa saiyang pahayag na “Likayan an Siod nin Pag-abuso sa Inomon na de Alkohol,” isinabi kan ispiker an pisikal asin espirituwal na mga peligro nin labi-labing paggamit nin inomon na de alkohol, dawa kun an saro dai man nabuburat. Nagtao sia nin naggigiyang prinsipyo: Mantang an epekto kan alkohol nagkakalaenlaen sa lambang indibiduwal, an ano man na kadakolan nin alkohol na nakadadanyar sa saindong “praktikal na kadonongan asin kakayahan sa pag-iisip” sobra na para sa saindo.​—Talinhaga 3:​21, 22.

Mantang kita nabubuhay na sa delikadong mga panahon, an suminunod na topiko na, “Si Jehova, an Satong ‘Pailihan sa mga Panahon nin Kasakitan,’” nagin nakararanga. An pamibi, banal na espiritu, asin mga kapwa Kristiano puedeng makatabang sa sato na maatubang an mga problema.

An pangultimong pahayag kan aldaw na, “‘An Marahay na Daga’​—Patanaw kan Paraiso,” natapos na may magayagayang sorpresa para sa gabos​—sarong bagong publikasyon na igwa nin dakol na mapa sa Biblia! Iyan may titulong See the Good Land.

Tema kan Ikaduwang Aldaw: “Ipahayag Nindo sa mga Nasyon an Saiyang Kamurawayan”

Pagkatapos na tokaron an pan-aroaldaw na teksto, iprinesentar an ikaduwang simposium kan kombension, na may temang “Ipabanaag na Siring sa mga Salming an Kamurawayan ni Jehova.” Detalyadong ipinaliwanag sa enot na kabtang an “Paagi sa Pagpalakop kan Maogmang Bareta sa Gabos na Lugar” asin kaiba an pag-akto kan aktuwal na mga eksperyensia sa paglilingkod sa langtad. Iiniba sa ikaduwang pahayag an sarong demonstrasyon nin  pagbalik liwat mantang ipinepresentar kan ispiker an temang “Paagi sa Paghale kan Suklob sa mga Binuta.” An huring kabtang, na may titulong “Paagi sa Paggibo Kaiyan nin Lubos Pa sa Satong Ministeryo,” dinugangan nin interesanteng mga interbio na may koneksion sa mga eksperyensia sa langtad.

An suminunod na parte kan programa may titulong “Ikinaoongis na Mayo nin Dahelan.” Kaiba dian an nakaparirigon sa boot na mga interbio sa fiel na mga indibiduwal na pinagdanay an integridad sa irarom nin pagtumang sa tabang kan itinao nin Dios na kosog.

An sarong kabtang na inaantisipar na marhay sa mga kombension iyo an pahayag sa bautismo na sinundan nin biyong pagbuntog sa tubig kan gabos na kualipikadong kandidato. An bautismo sa tubig nagsisimbolisar sa lubos na pagdusay nin sarong tawo ki Jehova. Huli kaini, angay na marhay an temang: “An Pag-otob sa Satong Pagdusay Nagpapamuraway sa Dios.”

 An panhapon na programa nagpoon paagi sa pahayag na nag-enkaminar na siyasaton an sadiri, an “Pagkultibar sa Arog-Cristong Punto de Vista sa Kadakulaan.” Pinalataw kan ispiker an interesanteng puntong ini: An kadakulaan ibinubunga kan pag-arog sa kapakumbabaan ni Cristo. Huli kaini, an sarong Kristiano maninigo na dai maghingoang kamtan an katongdan tanganing panigoan an personal na ambisyon. Maninigong hapoton nia an saiyang sadiri, ‘Andam daw akong gumibo nin nakatatabang na mga gibohon na daing gayo naririsa?’

Napapagal daw kamo? Risang marhay an simbag. An pahayag na “Pagal sa Pisikal Alagad Dai Napapagal sa Espirituwal” inapresyar kan gabos. An mga interbio sa haloy nang mga Saksi nagpaheling na puede kitang gibohon ni Jehova na “poderoso . . . paagi kan saiyang espiritu.”​—Efeso 3:16.

An pagigin buka an palad sarong kualidad na mayo sa sato kan kita mamundag alagad kaipuhan iyan na manodan. Idinoon an importanteng puntong ini sa kabtang na “Magin Matinao, Andam na Manhiras.” Asin pinalataw an nakapupukaw nin isip na hapot na ini: “Andam daw kitang ihiras an nagkapirang minuto kan satong aldaw sa mga tugang na lalaki asin babae na may edad na, maluya an salud, nagmomondo nin makuri, o napupungaw?”

An “Mag-ingat sa ‘Tingog nin mga Estranghero’” nakapukaw sa atension kan mga nagdadangog. Sa pahayag na ini, an mga parasunod ni Jesus ikinomparar sa mga karnero na nagdadangog sana sa saiyang tingog bilang an “marahay na pastor” asin dai nagdadangog sa “tingog nin mga estranghero” na itinataram paagi sa dakol na ahensia na impluwensiado kan Diablo.​—Juan 10:​5, 14, 27.

An sarong koro kaipuhan na umawit nin sarabay tanganing masabotan. Tanganing mapamuraway an Dios, an tunay na mga parasamba sa bilog na kinaban kaipuhan na nagkakasararo. Huli kaini, an “Pamurawayon an Dios ‘Paagi sa Sarong Ngoso’” nagtao nin kapakipakinabang na instruksion kun paano kita gabos makatataram kan sarong “dalisay na tataramon” asin makapaglilingkod ki Jehova nin “daramay.”​—Sofonias 3:9.

An mga magurang, partikularmente an mga may saradang na aki, biyong naogma sa pangultimong pahayag kan aldaw na, “An Satong mga Aki​—Mahalagang Marhay na Pamana.” Sarong bagong 256 na pahinang publikasyon an ilinuwas, na maogmang sinorpresa an mga nagdadangog. An Makanood sa Dakulang Paratokdo sarong libro na matabang sa mga magurang na magtao nin panahon na kapakipakinabang sa espirituwal para sa saindang mga aki, na regalo sa sainda nin Dios.

Tema kan Ikatolong Aldaw: “Gibohon an Gabos na Bagay sa Ikamumuraway nin Dios”

Pinonan sa espirituwal na paagi kan mga pagirumdom sa pan-aroaldaw na teksto an pantapos na aldaw kan kombension. An enot na kabtang kan programa sa aldaw na ini nagtao nin ekstrang atension sa areglo nin pamilya. An enot na pahayag na, “Mga Magurang, Pakosogon an Saindong Pamilya,” an nag-andam sa isip kan mga nagdadangog. Pagkatapos na repasohon an mga responsibilidad kan mga magurang na sustentohan sa materyal an saindang pamilya, pinatunayan kan ispiker na an  pangenot na responsibilidad kan mga magurang iyo na itao sa saindang mga aki an espirituwal na pangangaipo.

Tinawan nin atension kan suminunod na ispiker an mga aki asin siniyasat an temang “Kun Paano Inoomaw kan mga Hoben si Jehova.” Sinabi nia na an mga hoben garo “tagdo kan ambon” huli sa kadakolan ninda asin nakakarepresko an saindang kaigotan nin pagkahoben. Naoogmang makiiba sa sainda an mga nasa edad na sa paglilingkod ki Jehova. (Salmo 110:3) Kaiba sa kabtang na ini an nakaoogmang marhay na mga interbio sa arogan na mga hoben.

Pirmeng nakaoogmang kabtang sa pandistritong mga kombension an mga drama sa Biblia na kompleto sa kostium, asin dai napapalaen an kombension na ini. Ilinadawan kan dramang “Pusoan na Paghuhulit sa Ibong nin Pagtumang” an mga parasunod ni Jesus kan enot na siglo. Bako sanang nakakalibang iyan kundi, mas importante, nakapagtotokdo man. Idinoon kan diskursong kasunod kan drama na, “Ipahayag an Maogmang Bareta na ‘Dai nin Ontok,’” an lataw na mga punto kan drama.

Inaantisipar kan gabos na nag-atender an tampok na kabtang kan programa kan Domingo, an pampublikong pahayag na, “Sairisay an Nagpapamuraway sa Dios Ngonyan?” An ispiker nagtao nin dokumentadong ebidensia kun paanong an langtad nin siensia asin relihion sa pankagabsan dai nagpamuraway sa Dios. Idto sanang mga tawo para sa saiyang ngaran, idtong mga naghuhulit asin nagtotokdo kan katotoohan manongod ki Jehova, an totoong nagpapamuraway sa saiyang ngaran ngonyan.

An pampublikong diskurso sinundan nin sumaryo kan leksion sa magasin na Torrengbantayan para sa semanang iyan. Dangan suminunod an pangultimong pahayag na, “‘Padagos Kamong Mamunga nin Dakol’ sa Ikamumuraway ni Jehova.” Iprinesentar kan ispiker an sampulong punto na resolusyon tanganing aprobaran kan gabos na nag-atender. Nakasentro iyan sa manlaenlaen na paagi na mapapamuraway si Jehova, an Kaglalang. Biyong nagkakasararong “Iyo” an nadangog sa gabos na kombension sa bilog na daga.

Sa siring, natapos an kombension na ikinadoon sa lambang nag-atender an temang “Pamurawayon an Dios.” Asin logod na pirme kitang maghingoa, sa tabang kan espiritu ni Jehova asin kan naheheling na kabtang kan saiyang organisasyon, na pamurawayon an Dios asin bakong an tawo.

[Kahon/Mga Ritrato sa pahina 23]

Internasyonal na mga Kombension

Apat na aldaw na internasyonal na kombension an ginibo sa Amerika del Norte asin del Sur, Aprika, Asia, Australia, asin Europa. May piniling mga Saksi hale sa bilog na kinaban na inimbitaran na magin mga delegado sa mga pagtiripon na ini. Sa paaging ini nagkaigwa nin “pagparinigonan sa boot” sa pag-oltanan kan mga bisita asin kan mga kag-imbitar sa sainda. (Roma 1:12) Napakosog liwat an relasyon kan dating mga magkamidbid, asin nagkaigwa nin bagong mga kamidbid. An sarong espesyal na kabtang kan internasyonal na mga kombension iyo an programa na may titulong “Mga Bareta Hale sa Ibang Daga.”

[Kahon/Mga Ritrato sa pahina 25]

Bagong mga Publikasyon na Nagpapamuraway sa Dios

Duwang bagong publikasyon an ilinuwas sa “Pamurawayon an Dios” na Pandistritong mga Kombension. An libro nin mga mapa sa Biblia na See the Good Land igwa nin durableng tutob asin 36 na pahina nin mga mapa asin retrato kan mga lugar sa Biblia. An lambang pahina kompleto sa kolor asin may mga mapa kan imperyo nin Asiria, Babilonya, Medo-Persia, Grecia, asin Roma. Igwa nin suway na mga mapa kan ministeryo ni Jesus asin kan paghiwas kan Kristianismo.

An Makanood sa Dakulang Paratokdo sarong 256 na pahinang libro na may 230 retrato. Dakol na nakagagayagayang pag-orolay an puedeng gibohon kaiba kan mga aki na hineheling sana an mga retrato asin sinisimbag an nakapupukaw nin isip na mga hapot sa libro. An bagong publikasyon na ini dinisenyo tanganing kontrahon an pag-atake ni Satanas sa mga aki niato, na an obheto raoton an saindang moral.

[Ritrato sa pahina 23]

An mga misyonero nagsaysay nin nakapakokosog sa pagtubod na mga eksperyensia

[Mga Ritrato sa pahina 24]

An bautismo sarong importanteng kabtang kan “Pamurawayon an Dios” na mga kombension

[Mga Ritrato sa pahina 24]

Naogma an mga hoben asin gurang sa mga drama sa Biblia