An Espirituwalidad Asin an Pagkaigwa Nindo nin Marahay na Kamugtakan

TIBAAD nauubos an kadaklan na panahon nindo sa pag-asikaso sa saindong pisikal na salud. Kada aldaw, tibaad naggagamit kamo nin sagkod walong oras sa pagtorog, nagkapirang oras sa pagluto asin pagkakan, asin walong oras o labi pa sa pagtatrabaho tanganing mabayadan an saindong iniistaran asin kinakakan. Kun kamo magkahelang, magamit gayod kamo nin oras asin kuarta tanganing magpaheling sa doktor o magpreparar nin sarong pinagkatodan na pambolong. Kamo naglilinig, nagkakarigos, asin tibaad regular na nag-eehersisyo pa ngani, an gabos para sa pagkaigwa nin marahay na salud.

Minsan siring, an kalabot sa pagpapadanay nin marahay na salud bako sanang pag-asikaso sa saindong pisikal na mga pangangaipo. Igwa pang ibang bagay na may mapuersang epekto sa pagkaigwa nindo nin marahay na kamugtakan. Ipinaheheling kan pagsiyasat sa medisina na an saindong pisikal na salud konektadong marhay sa saindong espirituwal na salud​—an saindong espirituwalidad o kawaran kaiyan.

Sarong Positibong Koneksion

“Nanompongan kan kadaklan na orihinal na artikulo sa pagsiyasat dapit sa temang iyan na may positibong koneksion an pinakosog na espirituwalidad asin an resulta na pagkaigwa nin mas marahay na salud,” an sabi ni Propesor Hedley G. Peach kan Unibersidad nin Melbourne, Australia. Nagkokomento sa mga nadiskobreng ini, an The Medical Journal of Australia (MJA) nagsasabi: “An pagigin relihioso iinasosyar man sa . . . mas hababang presyon nin dugo, mas hababang kolesterol . . . asin mas hababang insidente ngani nin kanser sa bituka.”

 Kaagid kaiyan, sa Estados Unidos, nanompongan sa sarong pag-adal kan 2002 sa 6,545 katawo na ginibo kan Unibersidad nin California (UC), sa Berkeley, na “an mga tawo na nag-aatender sa mga serbisyo relihioso nin sarong beses kada semana mas halabang marhay an buhay kun ikokomparar sa mga bihirang marhay na nag-aatender o nungkang nag-atender.” Si Doug Oman, an pangenot na autor kan pag-adal na iyan asin sarong paratokdo sa UC Berkeley’s School of Public Health, nagsabi: “Nanompongan mi an pagkakalaen na ini dawa pagkatapos na konsideraron an mga bagay na arog kan sosyal na mga pakiibaiba asin mga gawe-gawe sa salud, kaiba na an paninigarilyo asin pag-ehersisyo.”

Sinasabi kun ano pa an ibang pakinabang sa mga igwa nin espirituwal na punto de vista sa buhay, an MJA nagsasabi: “Nanompongan kan mga pag-adal sa Australia an pagkaigwa nin mas marigon na pag-agoman, dikit na pag-abuso sa paggamit nin inomon na de alkohol asin bawal na droga, mas hababang insidente nin asin pagigin mas negatibong maghugot, dikit na paghadit asin depresyon, asin orog na kadaihan nin kapasloan sa tahaw kan mga relihioso.” Dugang pa, an BMJ (dating midbid na The British Medical Journal) nagbabareta: “An mga tawong naghihingako na igwa nin mas makosog na espirituwal na mga paniniwala garo baga mas madali asin biyong napanggaganahan an saindang kamondoan pagkagadan nin sarong kadayupot na tawo kisa mga tawong mayo nin espirituwal na mga paniniwala.”

Igwa nin manlaenlaen na saboot manongod sa kun ano an tunay na espirituwalidad. Pero, an saindong espirituwal na kamugtakan igwa nin epekto sa saindong pisikal asin mental na salud. An ebidensiang ini kaoyon kan pahayag ni Jesu-Cristo haros 2,000 na taon na an nakaagi. Sia nagsabi: “Maogma idtong mga nakamamate kan saindang espirituwal na pangangaipo.” (Mateo 5:3) Huling an saindong espirituwal na kamugtakan may impluwensia sa saindong salud asin kaogmahan, rasonableng maghapot: ‘Saen daw ako makanonompong nin mapagtitiwalaan na espirituwal na giya? Asin ano an kalabot sa pagigin espirituwal na tawo?’