Itinatao ni Jehova an Satong mga Pangangaipo sa Aroaldaw

“Umontok na kamo sa pagparahadit; huli ta . . . aram kan saindong Ama na kaipuhan nindo an mga bagay na ini.”​—LUCAS 12:​29, 30.

1. Paano tinatawan ni Jehova nin kakanon an mga linalang na hayop?

NAPAGMASDAN na daw nindo an sarong dignos o ibang klase nin gamgam na garo baga sa daga man sana nagpaparatuka? Tibaad inisip-isip nindo kun ano an nakukuang pagkakan kaiyan paagi sa pagtuka sa daga. Sa saiyang Sermon sa Bukid, ipinaheling ni Jesus na may makukua kitang leksion sa paagi nin pagtao ni Jehova nin kakanon sa mga gamgam. Sinabi nia: “Masdan nindo nin odok an mga gamgam sa langit, huli ta sinda dai nagsasabwag nin banhi o nag-aani o nagtitipon sa mga tambobong; pero pinakakakan sinda kan saindong langitnon na Ama. Bako daw na kamo orog na mahalaga kisa sainda?” (Mateo 6:26) Sa makangangalas na paagi, tinatawan ni Jehova nin kakanon an gabos niang linalang.​—Salmo 104:​14, 21; 147:9.

2, 3. Anong espirituwal na mga leksion an makukua niato sa bagay na tinokdoan kita ni Jesus na mamibi para sa tinapay niato sa aroaldaw?

² Kun siring, taano ta iiniba ni Jesus sa saiyang modelong pamibi an kahagadan na: “Itao mo samo ngonyan an samong tinapay para sa aldaw na ini”? (Mateo 6:11) May makahulogan na espirituwal na mga leksion na makukua sa simpleng kahagadan na ini. Enot, ipinagigirumdom kaiyan sa sato na si Jehova an Dakulang Paratao. (Salmo 145:​15, 16) An mga tawo puedeng magtanom asin mag-oma, alagad an Dios sana an puedeng magpatubo kaiyan, sa espirituwal asin pisikal na paagi. (1 Corinto 3:7) An kinakakan asin iniinom niato balaog hale sa Dios. (Gibo 14:17) An paghagad sa saiya na itao sa sato an satong mga pangangaipo sa aroaldaw nagpapaheling sa saiya na dai niato binabaliwala an siring na mga probisyon. Siempre, an siring na kahagadan dai man kita pinalilibre sa responsibilidad na magtrabaho kun kaya ta.​—Efeso 4:28; 2 Tesalonica 3:10.

³ Ikaduwa, an paghagad niato kan “tinapay para sa aldaw na ini” nagpapaheling na dai kita maninigong maghadit nin labi-labi manongod sa maabot. Sinabi pa ni Jesus: “Dai kamo noarin man maghadit asin magsabi, ‘Ano an samong kakakanon?’ o, ‘Ano an samong iinomon?’ o, ‘Ano an samong gugubingon?’ Huli ta an gabos na ini iyo an mga bagay na hinahanap na gayo kan mga nasyon. Huli ta an saindong langitnon na Ama nakaaaram na kaipuhan nindo an gabos na bagay na ini. Kun siring, padagos na hanapon nguna an kahadean asin an saiyang katanosan, asin ini gabos na ibang bagay idadagdag na sana sa saindo. Kaya, dai kamo noarin man maghadit dapit sa masunod na aldaw, huli ta an masunod na aldaw magkakaigwa kan sadiring mga kahaditan kaiyan.” (Mateo 6:31-34) An pamibi para sa “tinapay para sa aldaw na ini” nagtatao nin arogan para sa pamumuhay nin simple na may “diosnon na debosyon kaiba an pagigin kontento.”​—1 Timoteo 6:6-8, nota sa ibaba.

Espirituwal na Kakanon sa Aroaldaw

4. Anong mga pangyayari sa buhay ni Jesus asin kan mga Israelita an nagdodoon kan importansia nin pagkakan nin espirituwal na kakanon?

⁴ An pamibi niato para sa tinapay sa aroaldaw maninigo man na magpagirumdom sa sato kan pangangaipo niato nin espirituwal na kakanon sa aroaldaw. Minsan ngani gutom nang marhay pagkatapos nin haloy na pag-ayuno, kinontra ni Jesus an sugot ni Satanas na gibohon na tinapay an mga gapo, na nagsasabi: “Nasusurat, ‘An tawo dapat na mabuhay, bakong sa tinapay sana, kundi sa  lambang tataramon na minaluwas sa ngoso ni Jehova.’ ” (Mateo 4:4) Kinotar digdi ni Jesus si propeta Moises, na nagsabi sa mga Israelita: “Ginibo ka [ni Jehova na] hababa asin pinabayaan kang magutom patin pinakakan ka nin mana, na dai mo namidbid ni namidbid man kan saimong mga magurang; tanganing ipaaram sa saimo na an tawo bako sanang sa tinapay nabubuhay kundi sa lambang tataramon kan ngoso ni Jehova na an tawo nabubuhay.” (Deuteronomio 8:3) An paagi nin pagtao ni Jehova kan mana nagtao sa mga Israelita bako sana nin pisikal na kakanon kundi patin espirituwal na mga leksion. Enot, sinda ‘kanya-kanyang mapurot kan igo para sa kada aldaw.’ Kun makua sinda nin sobra sa kayang uboson sa sarong aldaw, an tada minabata asin inuulod. (Exodo 16:​4, 20) Pero, dai ini nangyayari sa ikaanom na aldaw na kaipuhan nindang doblehon an kinukua ninda sa aroaldaw tanganing may igo sindang pagkakan para sa Sabbath. (Exodo 16:​5, 23, 24) Kaya itinudok kan mana sa isip ninda na kaipuhan sindang magin makinuyog asin na an saindang buhay nakadepende bako sanang sa tinapay kundi sa “lambang tataramon kan ngoso ni Jehova.”

5. Paano kita tinatawan ni Jehova nin espirituwal na kakanon sa aroaldaw?

⁵ Kaipuhan man kitang kumakan aroaldaw nin espirituwal na kakanon na itinatao ni Jehova paagi sa saiyang Aki. Sa katuyohan na ini, si Jesus nagnombra nin “fiel asin may diskresion na oripon” tanganing magtao nin “kakanon sa igong panahon” para sa kapamilya sa pagtubod. (Mateo 24:45) An grupong iyan nin fiel na oripon bako sanang nagtatao nin abundang espirituwal na kakanon paagi sa mga pantabang sa pag-adal sa Biblia kundi ineenkaminar man kita na magbasa nin Biblia aroaldaw. (Josue 1:8; Salmo 1:1-3) Arog ni Jesus, makakakakan man kita sa espirituwal paagi sa paghihingoa aroaldaw na pag-adalan asin gibohon an kabotan ni Jehova.​—Juan 4:34.

Kapatawadan sa mga Kasalan

6. Sa anong mga utang kita naghahagad nin kapatawadan, asin sa anong mga kondisyon andam si Jehova na kanselaron iyan?

⁶ An sunod na kahagadan sa modelong pamibi iyo ini: “Ipatawad mo samo an samong mga utang, siring na kami man nagpatawad sa mga may utang sa samo.” (Mateo 6:12) Bakong utang na kuarta an boot sabihon digdi ni Jesus. An nasa isip nia iyo an kapatawadan sa satong mga kasalan. Sa rekord ni Lucas kan modelong pamibi, an kahagadan na ini nagsasabi: “Ipatawad mo samo an samong mga kasalan, huli ta kami man nagpapatawad sa gabos na may utang sa samo.” (Lucas 11:4) Sa siring, kun kita nagkakasala, garo man sana kita nagkakautang ki Jehova. Alagad an satong mamomoton na Dios andam na ‘paraon,’ o kanselaron, an utang na iyan kun kita sinserong nagsosolsol, ‘minabakle,’ asin naghahagad sa saiya nin kapatawadan basado sa pagtubod sa atang na pantubos ni Cristo.​—Gibo 3:19; 10:43; 1 Timoteo 2:​5, 6.

7. Taano ta maninigo kitang mamibi para sa kapatawadan kada aldaw?

⁷ Sa saro pang punto de vista, kita nagkakasala kun dai niato naaabot an mga pamantayan ni Jehova sa katanosan. Huli sa minanang kasalan, kita gabos nagkakasala sa pagtaram, sa gibo, asin pag-iisip o dai niato nagigibo an maninigo niatong gibohon. (Eclesiastes 7:20; Roma 3:23; Santiago 3:2; 4:17) Kun siring, baga man aram niato na nagkasala kita o dai durante kan aldaw, kaipuhan niatong iiba sa satong mga pamibi sa aroaldaw an paghagad nin kapatawadan sa satong mga kasalan.​—Salmo 19:12; 40:12.

8. An pamibi para sa kapatawadan maninigong magpahiro sa sato na gibohon an ano, na may anong kapakipakinabang na resulta?

⁸ An pamibi para sa kapatawadan maninigong gibohon kasunod nin onestong pagsiyasat sa sadiri, pagsolsol, asin pagtuga, basado sa pagtubod sa nakababalukat na puersa kan pinabolos na dugo ni Cristo. (1 Juan 1:7-9) Tanganing patunayan an sinseridad kan satong pamibi, an satong paghagad nin kapatawadan dapat na suportaran niato nin “mga gibo na angay sa pagsolsol.” (Gibo 26:20) Dangan puede kitang tumubod sa pagigin andam ni Jehova na patawadon an satong mga kasalan. (Salmo 86:5; 103:8-14) An resulta daing kaparehong katoninongan nin isip, “an katoninongan nin Dios na minalampas sa gabos na kaisipan,” na ‘mag-iingat man kan satong puso asin kan satong mga pag-isip paagi ki Cristo Jesus.’ (Filipos 4:7) Alagad an modelong pamibi ni Jesus may orog pa nganing itinotokdo sa sato manongod sa kun ano an dapat niatong gibohon tanganing kamtan an kapatawadan sa satong mga kasalan.

 Tanganing Patawadon, Dapat Kitang Magpatawad

9, 10. (a) Anong komento an idinagdag ni Jesus sa modelong pamibi, asin ano an idinoon kaini? (b) Paano orog pang iinilustrar ni Jesus an satong pangangaipo na magin mapagpatawad?

⁹ Interesante nanggad, an kahagadan na “ipatawad mo samo an samong mga utang, siring na kami man nagpatawad sa mga may utang sa samo,” iyo an solamenteng kabtang kan modelong pamibi na kinomentohan ni Jesus. Pakapamibi, idinugang nia: “Huli ta kun pinatatawad nindo an mga tawo sa saindang mga kasalan, patatawadon man kamo kan saindong langitnon na Ama; mantang kun dai nindo pinatatawad an mga tawo sa saindang kasalan, dai man patatawadon kan saindong Ama an saindong mga kasalan.” (Mateo 6:​14, 15) Sa siring, lininaw na marhay ni Jesus na an pagpatawad sa sato ni Jehova nakadepende sa satong pagigin andam na magpatawad sa iba.​—Marcos 11:25.

¹⁰ Sa saro pang pangyayari, nagtao si Jesus nin ilustrasyon na nagpapaheling kan pangangaipo na kita magin mapagpatawad kun inaasahan niato na patawadon kita ni Jehova. Isinaysay nia an dapit sa sarong hade na may kabootan na kinanselar an dakulaon na pagkakautang nin sarong oripon. Kan huri kinastigo nin grabe kan hade an lalaki man sanang ini kan ini magsayumang kanselaron an mas sadit nanggad na utang nin sarong kapwa oripon. Tinapos ni Jesus an saiyang ilustrasyon paagi sa pagsabi: “Siring man an gigibohon sa saindo kan sakong langitnon na Ama kun dai kamo magpatinawadtawadan gikan sa saindong puso, an balang saro sa saiyang tugang.” (Mateo 18:23-35) Malinaw an leksion: An utang na kasalan na ipinatawad ni Jehova sa lambang saro sa sato dakulaon nanggad kisa ano man na tibaad pagkakasala sa sato nin siisay man. Dugang pa, pinatatawad kita ni Jehova aroaldaw. Kun siring, daing duwa-duwa na puede niatong patawadon an paminsanminsan na pagkakasala sa sato kan iba.

11. Anong hatol na itinao ni apostol Pablo an susunodon niato kun linalaoman niato na patawadon kita ni Jehova, na may anong marahay na mga resulta?

¹¹ Si apostol Pablo nagsurat: “Magin maboot sa lambang saro, madinamayon sa mamomoton na paagi, na sueltong nagpapatarawadtawadan siring na an Dios man sueltong nagpatawad sa saindo paagi ki Cristo.” (Efeso 4:32) An pagpatarawadtawadan nakakokontribwir sa katoninongan sa tahaw nin mga Kristiano. Nagsadol pa si Pablo:  “Bilang mga pinili nin Dios, banal asin namomotan, isolog nindo an mamomoton na mga pagmate nin pagdamay, kabootan, kababaan nin isip, kahoyoan, asin pakatios. Padagos kamong magpatiriostios asin sueltong magpatarawadtawadan kun an siisay man igwa nin sumbong tumang sa saro. Kun paanong kamo sueltong pinatawad ni Jehova, siring man an gibohon nindo. Alagad, laen pa sa gabos na bagay na ini, isolog nindo an pagkamoot, huli ta iyan sangkap na bogkos nin pagkasararo.” (Colosas 3:12-14) An gabos na ini ipinasesentido sa pamibi na itinokdo sa sato ni Jesus: “Ipatawad mo samo an samong mga utang, siring na kami man nagpatawad sa mga may utang sa samo.”

Proteksion Kun May Sugot

12, 13. (a) Ano an dai puedeng boot sabihon kan ikaduwa sa ultimong kahagadan sa modelong pamibi? (b) Siisay an dakulang Parasugot, asin ano an boot sabihon kan satong pamibi na dai kita darahon sa sugot?

¹² An ikaduwa sa ultimong kahagadan sa modelong pamibi ni Jesus iyo ini: “Dai mo kami darahon sa sugot.” (Mateo 6:13) Boot daw sabihon ni Jesus na maninigo niatong hagadon ki Jehova na dai kita pagsugotan? Dai, ta si disipulo Santiago pinasabngan na sumurat: “Kun binabalo, dai nin siisay man na magsabi: ‘Binabalo ako nin Dios.’ Huli ta paagi sa maraot na mga bagay an Dios dai puedeng baloon ni binabalo man nia an siisay man.” (Santiago 1:13) Dugang pa, an salmista nagsurat: “Kun mga sala an saimong binabantayan, O Jah, O Jehova, siisay an makatitindog?” (Salmo 130:3) Dai binabantayan ni Jehova an kada sala niato, asin dai nanggad nia hinihingoang sikyodon kita. Kaya, ano an boot sabihon kan kabtang na ini kan modelong pamibi?

¹³ An saro na naghihingoang sikyodon kita, tanganing mapukan kita paagi sa mga katusohan, asin tanganing sibaon pa ngani kita iyo si Satanas na Diablo. (Efeso 6:​11, nota sa ibaba) Sia an dakulang Parasugot. (1 Tesalonica 3:5) Paagi sa pagpamibi na dai kita pagdarahon sa sugot, hinahagad niato ki Jehova na dai kita pagtogotan na mapukan kun may sugot sa sato. Hinahagad niato sa saiya na tabangan kitang dai “masaroan ni Satanas,” na dai magpadaog sa mga sugot. (2 Corinto 2:11) Ipinamimibi niato na kita magdanay logod sa “hilom na lugar kan Kaharohalangkawe,” na nag-aako kan espirituwal na proteksion na itinatao sa mga nagrerekonoser sa soberaniya ni Jehova sa gabos nindang ginigibo.​—Salmo 91:1-3.

14. Paano kita inaasegurar ni apostol Pablo na dai kita babayaan ni Jehova mantang kita nagsasarig sa Saiya kun may sugot sa sato?

¹⁴ Makasisierto kita na kun iyan an satong sinserong pagmawot, na ipinahahayag sa satong mga pamibi asin sa satong mga gibo, nungka kitang babayaan ni Jehova. Inaasegurar kita ni apostol Pablo: “Mayong sugot na uminabot sa saindo kundi idto sanang komun sa mga tawo. Alagad fiel an Dios, asin dai nia itotogot na kamo masugotan nin labi sa saindong makakaya, kundi kaibahan kan sugot matao man sia nin luluwasan tanganing iyan matagalan nindo.”​—1 Corinto 10:13.

“Iligtas Mo Kami sa Maraot”

15. Taano ta lalo nang importante kisa kaidto an mamibi na iligtas logod kita sa maraot?

¹⁵ Segun sa pinakamasasarigan na mga manuskrito kan Kristianong Griegong Kasuratan, an modelong pamibi ni Jesus nagtatapos sa mga tataramon na: “Iligtas mo kami sa maraot.” * (Mateo 6:13) An proteksion laban sa Diablo lalo nang kaipuhan sa panahon na ini kan katapusan. Si Satanas asin an mga demonyo nia nakikipaglaban sa linahidan na natatada, na “nagkukuyog sa mga togon nin Dios asin igwa kan gibohon nin pagpatotoo ki Jesus,” saka sa saindang kairiba na “dakulang kadaklan.” (Kapahayagan 7:9; 12:​9, 17) Nagsadol si apostol Pedro sa mga Kristiano: “Magmata kamo, magpuka kamo. An saindong kaiwal, an Diablo, naglalakaw na siring sa nagngangarob na leon, na naghahanap nin masisiba. Alagad tumangon sia nindo, na marigon sa pagtubod.” (1 Pedro 5:​8, 9) Gusto ni Satanas na paontokon an satong paghuhulit, asin paagi sa saiyang mga kampon digdi sa daga​—baga man sa relihion, komersio, o politika​—hinihingoa nia na takoton  kita. Minsan siring, kun kita maninindogan nin marigon, ililigtas kita ni Jehova. Si disipulo Santiago nagsurat: “Kun siring pumasakop kamo sa Dios; alagad tumangon nindo an Diablo, asin sia madulag sa saindo.”​—Santiago 4:7.

16. Ano an ginagamit ni Jehova ano man na oras tanganing tabangan an mga lingkod nia na nasa pagbalo?

¹⁶ Itinogot ni Jehova na sugotan an saiyang Aki. Alagad pakatapos na tumangon ni Jesus an Diablo, na ginagamit an Tataramon nin Dios bilang proteksion, nagsugo si Jehova nin mga anghel tanganing pakosogon sia. (Mateo 4:1-11) Kaagid kaiyan, ginagamit ni Jehova an saiyang mga anghel tanganing tabangan kita kun kita namimibi na may pagtubod asin ginigibo sia na satong pailihan. (Salmo 34:7; 91:9-11) Si apostol Pedro nagsurat: “Si Jehova tataong magligtas sa mga tawong may diosnon na debosyon hale sa pagbalo, alagad itagama an mga tawong maraot para sa aldaw nin paghokom tanganing gadanon.”​—2 Pedro 2:9.

Harani Na an Lubos na Pagliligtas

17. Paagi sa pagtao sa sato kan modelong pamibi, paano ibinugtak ni Jesus an mga bagay sa tamang lugar kaiyan?

¹⁷ Sa modelong pamibi, ibinubugtak ni Jesus an mga bagay sa tamang lugar kaiyan. An pinakapangenot sa sato maninigo na iyo an pagsantipikar kan dakula asin banal na ngaran ni Jehova. Mantang an instrumentong gagamiton sa paggibo kaini iyo an Mesiyanikong Kahadean, ipinamimibi niato na dumatong logod an Kahadean tanganing laglagon an gabos na bakong sangkap na kahadean, o gobyerno, nin tawo asin seguradohon na maotob nin lubos an kabotan nin Dios kun paano sa langit siring man sa daga. An paglaom niato na buhay na daing katapusan sa sarong paraisong daga nakadepende sa pagsantipikar kan ngaran ni Jehova asin sa pagrekonoser sa bilog na uniberso kan saiyang matanos na soberaniya. Pakatapos na ipamibi an pinakaimportante sa gabos na mga bagay na ini, puede kitang mamibi manongod sa satong mga pangangaipo sa aroaldaw, kapatawadan sa satong mga kasalan, asin pagkaligtas sa mga sugot asin mga pakana kan maraot, si Satanas na Diablo.

18, 19. Paano kita tinatabangan kan modelong pamibi ni Jesus na magdanay na puka asin gibohon an satong paglaom na magin “marigon sagkod sa katapusan”?

¹⁸ Naghaharani an lubos na pagliligtas sa sato sa maraot na saro asin sa saiyang maraot na sistema nin mga bagay. Aram na gayo ni Satanas na “halipot na sana an saiyang panahon” na natatada tanganing iluwas an saiyang “dakulang kaanggotan” sa daga, partikular na sa fiel na mga lingkod ni Jehova. (Kapahayagan 12:​12, 17) Sa kompuesto nin laen-laen na kabtang na tanda kan “pagtatapos kan sistema nin mga bagay,” si Jesus naghula nin nakapupukaw sa boot na mga pangyayari, na an nagkapira nasa ngapit pa niato. (Mateo 24:​3, 29-31) Mantang naheheling niato na nangyayari ini, an satong paglaom para sa pagliligtas magigin mas maliwanag. Nagsabi si Jesus: “Kun an mga bagay na ini magpoon nang mangyari, tindog kamo nin tanos asin tingagan an saindong mga payo, huli ta an saindong pagkaligtas naghaharani na.”​—Lucas 21:25-28.

¹⁹ An halipot asin malinaw na modelong pamibi na itinao ni Jesus sa mga disipulo nia nagtatao sa sato nin madonong na giya dapit sa kun ano an dapat na iiba sa satong mga pamibi mantang naghaharani na an katapusan. Logod na magdanay kitang may pagsarig sagkod sa katapusan, padagos na itatao ni Jehova an satong mga pangangaipo sa aroaldaw, sa espirituwal sagkod materyal. An pagpuka niato sa pamimibi mapangyari sa sato na “pangaptan . . . nin higot an kompiansa na nasa sato sa kapinonan na marigon sagkod sa katapusan.”​—Hebreo 3:14; 1 Pedro 4:7.

[Nota sa Ibaba]

Bilang Repaso

• Anong mga bagay an ipinasesentido kan satong paghagad nin “tinapay para sa aldaw na ini”?

• Ipaliwanag an pamibi na “ipatawad mo samo an samong mga utang, siring na kami man nagpatawad sa mga may utang sa samo.”

• Ano an boot sabihon kun hinahagad niato ki Jehova na dai kita pagdarahon sa sugot?

• Taano ta dapat niatong ipamibi na “iligtas mo kami sa maraot”?

[Mga Hapot Para sa Pag-adal]

[Mga Ritrato sa pahina 15]

Dapat kitang magpatawad sa iba tangani na kita patawadon man

[Picture Credit Line sa pahina 13]

Lydekker